Ol Man i Stap Olsem Gutpela Piksa—Pasin Bilong Ol i Helpim Yu?
“YUPELA i bin soim gutpela pasin long olgeta manmeri i bilip long Krais long provins Masedonia na Akaia.” Aposel Pol i raitim dispela tok long ol gutpela Kristen i stap long Tesalonaika. Ol i bin stap olsem gutpela piksa tru bilong ol wanbilip i ken bihainim. Tasol ol Tesalonaika yet ol i bihainim pasin bilong Pol na bilong ol wanwok bilong em. Pol i tok: “Dispela gutnius mipela i bin bringim i kam long yupela, em i no bin kamap long yupela olsem toktok tasol. Nogat. Em i kamap wantaim strong na wantaim Holi Spirit, na yupela i bin lukim klia strongpela bilip bilong mipela. Yupela yet i save long pasin mipela i bin mekim bilong helpim yupela long taim mipela i stap namel long yupela . . . , [na] yupela i bin bihainim pasin bilong mipela.”—1 Tesalonaika 1:5-7.
Em nau, Pol i no autim tok tasol. Ol samting em i mekim i kirapim ol narapela—em i save holimpas bilip, na sanap strong, na daunim laik bilong em. Long dispela as Pol na ol wanwok bilong em ol i stiaim strong ol Tesalonaika, na gutpela pasin bilong ol i kirapim ol long kisim tok i tru maski “planti hevi i kamap” long ol. Tasol i no Pol na ol dispela wanwok tasol i stiaim ol dispela bilipman. Pasin bilong ol narapela, em ol i bin karim bikpela hevi, dispela tu i strongim bel bilong ol. Pol i tokim ol Tesalonaika: “Ol brata, yupela i bin kamap wankain olsem ol manmeri bilong sios bilong God i stap long Judia, em ol manmeri i pas wantaim Krais Jisas. Yupela i kisim bikpela hevi long han bilong ol wantok bilong yupela yet, wankain olsem ol manmeri bilong God long Judia i bin kisim long han bilong ol Juda.”—1 Tesalonaika 2:14.
Krais Jisas—Nambawan Gutpela Piksa Bilong Bihainim
Maski Pol yet i stap olsem gutpela piksa bilong ol man i ken bihainim, em i kamapim klia olsem Krais Jisas em i nambawan gutpela piksa ol Kristen i mas bihainim. (1 Tesalonaika 1:6) Bipo na long nau tu Krais em i nambawan gutpela piksa bilong yumi ken bihainim. Aposel Pita i tok: “God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.”—1 Pita 2:21.
Tasol klostu 2,000 yia i go pinis, laip bilong Jisas olsem wanpela man bilong graun em i pinis. Nau em i “stap long bikpela lait tru” olsem wanpela spirit i no inap i dai, na “i no gat wanpela man i bin lukim em, na i no gat wanpela man inap long lukim em.” (1 Timoti 6:16) Orait, olsem wanem yumi inap bihainim pasin bilong em? Wanpela rot i olsem: Stadi long 4-pela hap bilong Baibel i stori long i stap bilong Jisas. Ol Gutnius i stori gut long pasin bilong em, na i stap na wok bilong em, na long “tingting” bilong em. (Filipai 2:5-8) Yu inap kisim sampela save moa sapos yu skelim gut buk Nambawan Man Tru i Winim Olgeta Narapela Man. Dispela buk i stori gut long i stap bilong Jisas, na samting i kamap pastaim em i stori pastaim long en, na samting i kamap bihain, em i stori bihain long en.a
Pasin bilong Jisas long daunim laik bilong em yet i kirapim tru aposel Pol. Em i tokim ol Kristen long Korin: “Mi bai amamas tasol long givim olgeta samting bilong mi, na long givim laip bilong mi tu, bilong helpim yupela.” (2 Korin 12:15) Em i bihainim tru tingting bilong Krais! Taim yumi skelim gutpela pasin bilong Krais, dispela i mas kirapim yumi tu long bihainim pasin bilong em long i stap bilong yumi yet.
Jisas i lainim yumi olsem yumi mas bilip long tok promis bilong God long em bai lukautim yumi long ol samting bilong skin. Tasol em i no mekim dispela samting tasol, nogat. Long olgeta de em i kamapim olsem em yet i gat kain bilip olsem long Jehova. Em i tok: “Ol weldok i gat hul long graun, na ol pisin i gat haus bilong ol. Tasol Pikinini Bilong Man em i no gat ples bilong slip.” (Matyu 6:25; 8:20) Olsem wanem? Ol samting bilong skin i save bosim tingting na pasin bilong yu? O i stap bilong yu i kamapim long ples klia olsem yu save tingim Kingdom pastaim? Na olsem wanem long tingting bilong yu long wok bilong Jehova? Tingting bilong yu i olsem bilong Jisas, em Man i stap olsem gutpela piksa bilong yumi ken bihainim? Baibel i soim olsem Jisas i tokim yumi long givim bel long wok, tasol planti taim em yet i kamapim klia olsem em i givim bel tru long wok bilong Jehova. (Jon 2:14-17) Na tu, Jisas i stap olsem gutpela piksa tru long mekim pasin sori long ol man! Em i givim laip bilong em yet bilong helpim ol disaipel bilong em! (Jon 15:13) Olsem wanem? Yu save bihainim pasin bilong Jisas na mekim pasin sori long ol brata Kristen bilong yu? O yu larim sampela pasin kranki bilong ol i mekim na yu no mekim pasin sori long ol?
Taim yumi wok long bihainim pasin bilong Krais, bai yumi pundaun planti taim. Tasol Jehova bai amamas long ol samting yumi mekim bilong “kisim Bikpela Jisas Krais na pasim em olsem klos pait bilong” yumi.—Rom 13:14.
“Mekim Gutpela Pasin Tasol”
Olsem wanem? I gat sampela brata sista long kongrigesen long nau em yumi ken bihainim pasin bilong ol? Yes, i gat! Ol brata ol i makim bilong lukautim wok ol i mas i stap olsem gutpela piksa. Taitus i raun lukim ol kongrigesen long Krit na em i makim ol brata long kamap elda, na Pol i tokim em olsem ol elda i mas i stap olsem man “i no gat rong long ai bilong ol manmeri.” (Taitus 1:5, 6) Aposel Pita tu i tokim “ol hetman” long “mekim gutpela pasin tasol, bai ol [brata] i ken lukim na bihainim.” (1 Pita 5:1-3) Na olsem wanem long ol wokman? Ol tu i mas “mekim gutpela wok.”—1 Timoti 3:13.
Tru, yumi no ken ting olgeta wan wan elda o wokman i gat gutpela save tru long mekim olgeta hap wok bilong ol Kristen. Pol i tokim ol Kristen long Rom: “Long marimari bilong en God i bin givim yumi narakain narakain save.” (Rom 12:6) Ol brata wan wan i gat narapela narapela save bilong ol yet long mekim wok. I no stret long ting olsem olgeta tok na ol samting ol elda i mekim i gutpela olgeta. Jems 3:2 i tok: “Planti taim yumi save tingting long mekim wanpela samting, na yumi save popaia. Dispela kain samting i save kamap long yumi olgeta. Na sapos i gat wanpela man i stap, em i no save mekim sampela tok i no stret, orait em i gutpela man tru, na em bai inap long bosim gut olgeta hap bilong bodi bilong en.” Tasol maski ol elda i no gutpela olgeta, ol i ken kamap gutpela piksa olsem Timoti na ‘mekim gutpela pasin long tok bilong ol na long wokabaut bilong ol na long pasin bilong laikim tru ol arapela na long pasin bilong bilip na long pasin bilong i stap klin tru long ai bilong God.’ (1 Timoti 4:12) Taim elda i mekim olsem, ol brata sista bai amamas long bihainim tok bilong Hibru 13:7: “Yupela i mas tingting long ol lida bilong sios bilong yupela, . . . na yupela i mas bihainim pasin bilong bilip bilong ol.”
Sampela Bilong Nau Ol i Stap Olsem Gutpela Piksa
Insait long planti yia i go pinis, planti narapela i bin stap olsem gutpela piksa. Planti tausen misineri i daunim laik bilong ol yet na “lusim haus o brata o susa o papa o mama o pikinini o gaden” bilong mekim wok Kristen long autim tok long ol narapela kantri. (Matyu 19:29) Tingim tu ol wasman bilong raun na meri bilong ol, na ol man na meri i mekim wok volantia long ol brens-ofis bilong Sosaiti Was Taua, na ol painia i save wok long ol kongrigesen. Olsem wanem? Pasin bilong ol inap kirapim ol narapela? Wanpela Kristen i save autim tok long Esia, em i tingim wanpela misineri i bin go long klas namba 8 bilong Wastaua Baibel Skul Bilong Gileat. Em i tok, dispela gutpela brata i “redi long stap long ples i hat nogut tru na i gat planti natnat long en. . . . Na mi kirap nogut moa long em inap autim tok long tok Saina na tok Malai, maski em i kam long Inglan.” Gutpela pasin bilong dispela misineri i bin mekim wanem? Brata i tok: “Pasin bilong em long stap isi na bilip strong i kirapim laik bilong mi long kamap wanpela misineri taim mi bikpela.” Olsem na yumi no kirap nogut long dispela brata i bin kamap wanpela misineri.
Buk Watch Tower Publications Index i gat lista bilong stori bilong planti brata sista i bin kamap long nius Wastaua na Kirap! Ol nius i stori long ol man na meri i bin lusim gutpela wok mani na ol samting bilong dispela graun ol i laik kisim, na daunim ol pasin kranki bilong ol, na senisim tru pasin bilong ol, na holim stretpela tingting taim bikpela hevi i painim ol, na kamapim pasin bilong wok strong, na sanap strong, na stap gut long God, na mekim pasin daun, na daunim laik bilong ol yet. Wanpela meri i tok long ol dispela stori olsem: “Taim mi ritim stori bilong ol hevi ol narapela i bin karim, dispela i mekim na mi daunim mi yet na kamapim pasin bilong tenkyu, na ol i helpim mi long mi no ken tingim mi yet tumas.”
Na tu, yu no ken lusim tingting long ol gutpela piksa i stap long kongrigesen bilong yu yet. Olsem: Ol het bilong famili em ol i save lukautim famili bilong ol long ol samting bilong skin na bilong spirit. Ol sista—ol mama wanpis tu—ol i karim hevi bilong wok bilong mekim bikpela long pikinini na ol i mekim wok autim tok tu. Ol lapun na ol man i gat sik ol i mekim yet wok bilong God, maski skin bilong ol i wok long lusim strong bilong en. Ating ol kain gutpela piksa olsem i save kirapim yu tu, a?
Tru, ol man i stap olsem piksa nogut ol i pulap long dispela graun. (2 Timoti 3:13) Tasol tingim tok Pol i mekim long ol Kristen i stap long Judia. Bihain long em i stori long gutpela pasin bilong planti bilipman na bilipmeri bilong bipo, aposel Pol i tokim ol olsem: “Ol dispela manmeri bilong bipo ol i sanap na raunim yumi i stap olsem bikpela klaut . . . Olsem na . . . yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi.” (Hibru 12:1, 2) Ol ‘manmeri i olsem bikpela klaut’ na ol i stap olsem gutpela piksa—ol manmeri bilong bipo na bilong nau—ol i raunim ol Kristen bilong nau tu. Olsem wanem? Pasin bilong ol i helpim yu tru? Ol inap helpim yu sapos yu strong long “bihainim gutpela pasin.”—3 Jon 11.
[Futnot]
a Sosaiti Wastaua Bilong Nu Yok i wokim.
[Rait long pes 20]
Yumi no ken ting olgeta wan wan elda o wokman i gat gutpela save tru long mekim olgeta hap wok bilong ol Kristen
[Ol Piksa long pes 21]
Ol elda i mas “mekim gutpela pasin” ol brata sista i ken bihainim