Yu Tingim Yet?

Olsem wanem? Yu pilim olsem ol tok bilong ol nupela Wastaua i bin helpim gut yu? Sapos olsem, orait yu ken traim ol save yu bin kisim, yu tingim yet o nogat:

• Olsem wanem yumi save, tok profet long “nupela skai na nupela graun” long Aisaia 65:​17-19, liklik truim bilong en i bin kamap long taim ol Juda i kam bek long ples, na bikpela truim bilong en i no kamap yet?

Long wanem, taim aposel Pita na Jon i raitim ol tok bilong Baibel long bipo, ol i kamapim olsem i gat wanpela truim bilong dispela tok profet bai kamap long bihain, na ol man bai kisim sampela blesing em ol i no kisim yet. (2 Pita 3:13; KTH 21:​1-4)​​—⁠4/15, pes 10-​12.

• Ating wanem as bilong ol dispela stori nating bilong ol Grik bilong bipo long ol god bilong pait?

Ating ol i kisim long wanpela stori bilong taim Bikpela Tait i no yet na sampela ensel i kamap man na ol i man bilong pait na pamuk. (Stat 6:​1, 2)​​—⁠4/15, pes 27.

• Wanem sampela samting ol strongpela Kristen i mas was gut long en long ol bung bilong marit?

Em i bikpela samting long yumi abrusim pasin bilong spak, tok pilai nogut, bikmaus nabaut na hambak, em dispela pasin inap kamap sapos ol lain i stap long bung i wok long dring planti na danis kranki na musik i pairap tumas. Sapos i no gat toksave olsem em wanpela bung bilong olgeta man, orait ol man tupela i no bin singautim ol, ol i no ken kam. Em wok bilong nupela man marit long save olsem i gat sampela strongpela Kristen bai stap long dispela bung i go inap long taim bung i pinis, na bung i no ken i go inap longpela taim tumas.​​—⁠5/1, pes 19-​22.

• Dispela tok i stap long Song 128:3 i tok long ol pikinini i olsem “ol yangpela diwai oliv” i raunim tebol bilong wanpela man, em i makim wanem samting?

Ol nupela kru i save kamap long as bilong diwai oliv. Taim mama diwai i kamap olpela tru na i no karim planti kaikai moa, ol i larim ol nupela kru i stap na taim ol i kamap bikpela ol bai kamap olsem hap tru bilong diwai. Olsem tasol, ol papamama i ken amamas long ol pikinini i karim kaikai na wok wantaim ol long lotuim Jehova.​​—⁠5/15, pes 27.

• Wanem sampela helpim ol pikinini i save kisim taim famili i bung wantaim na amamas?

Sapos i stap bilong famili i gutpela, dispela bai helpim ol pikinini long kisim stretpela tingting long ol lain i gat wok long bosim ol, na ol bai tingim ol samting i bikpela samting, na stap amamas wantaim ol narapela. Sapos i stap bilong ol i gutpela, dispela bai helpim ol pikinini na ol bai wok long kamap pren bilong God.​​—⁠6/1, pes 18.

• Long wanpela kantri long hap bilong Esia, ol i bin mekim wanem bilong kirapim ol brata long kisim tingting olsem olgeta Kristen i stap brata brata?

Ol i bin tokim olgeta kongrigesen olsem yumi no ken kolim wanpela nem i givim biknem long narapela na makim olsem em i gat biknem. Yumi olgeta i wankain na yumi i stap olsem brata brata.​​—⁠6/15, pes 21, 22.

• Olsem wanem? Ol Witnes Bilong Jehova i save kisim ol kain marasin ol i kisim long blut?

Mipela i bilip olsem tok bilong Baibel long abrusim blut i tambuim mipela long kisim blut o wanpela hap bilong blut (plasma, retpela sel, waitpela sel, pletlet). (Aposel 15:​28, 29) Ol i save kamautim sampela hap samting moa long ol dispela hap bilong blut na mekim wok long en, na Kristen yet i mas skelim olsem em bai kisim dispela marasin o nogat, na em i mas tingim tok bilong Baibel na long stap gut wantaim God.​​—⁠6/15, pes 29-​31.

• Olsem wanem? Nau yumi inap painim bel isi tru?

Yumi inap. Long rot bilong Baibel, Jisas Krais i stiaim ol manmeri i go long rot bilong lotu tru long God, na ol inap kisim dispela bel isi em Aisaia 32:18 i tok long en. Na ol manmeri i kisim kain bel isi olsem, ol inap tingting long i stap bel isi tru long graun inap oltaim oltaim na dispela bai truim tok bilong Song 37:​11, 29.​​—⁠7/1, pes 7.

• George Young i bin mekim wanem wok insait long oganaisesen bilong God long taim bilong yumi?

Kirap long 1917, em i mekim wok bilong kamapim lait bilong gutnius bilong Kingdom long planti kantri. Em i autim tok long ol hap bilong Kanada, long ol ailan Karibian, Brasil na sampela hap moa bilong Saut Amerika, long Sentral Amerika, Spen, Potugal, long hap bipo ol i kolim Soviet Yunion, na Yunaitet Stets.​​—⁠7/1, pes 22-​27.

• Taim 1 Korin 15:29 (NW ) i tok olsem “sampela man i kisim baptais bilong kamap man i dai pinis,” dispela i makim wanem samting?

Insait bilong en i olsem, taim spirit bilong God i makim ol Kristen, ol i bihainim rot i bringim ol long indai na ol i kirap bek na kisim laip long heven.​—⁠7/15, pes 17.

• Aposel Pol i bin mekim wanem long dispela hap taim i no gat sampela stori bilong em?

Ating Pol i bin kirapim na strongim ol kongrigesen long Siria na Silisia. Planti hevi i bin painim Pol olsem 2 Korin 11:​23-27 i toktok long en, ating ol i bin kamap long dispela taim, na dispela i kamapim olsem em i bin wok strong long mekim wok autim tok.​​—⁠7/15, pes 26, 27.

• Wanem samting inap helpim yumi long putim ol mak i no antap tumas?

Jehova i save long skel bilong yumi long mekim samting. Taim yumi beten long em, dispela i helpim yumi long kisim stretpela tingting, na tu, em i makim olsem yumi gat pasin daun. Narapela rot, em yumi ken toktok wantaim wanpela gutpela pren na em bai helpim yumi long kisim sampela tingting.​—⁠8/1, pes 29, 30.