Stap Amamas Oltaim—Long Heven o Long Graun?

OLSEM WANEM? Hap yu stap long en, long dispela hap tasol yu bai stap amamas? Planti manmeri bai tok, bikpela samting moa long mekim man i amamas, em taim em i no gat sik, na i gat as bilong i stap bilong em, na em i stap wanbel wantaim ol narapela. Baibel i kamapim tok olsem: “Sapos yu stap wantaim ol pren bilong yu na yupela i kaikai kumu tasol, dispela i winim tru pasin bilong i stap wantaim ol man yu no laikim, na yupela i kaikai mit bilong bulmakau.”​—⁠Sindaun 15:⁠17.

Tasol sori tru, kirap long bipo yet na i kam inap long nau, pasin bilong bel nogut, pait, na ol narapela kain pasin nogut i pulap long graun. Tasol olsem wanem long heven, o ples bilong ol spirit? Em ples ol manmeri i gat laik long go long en taim ol i dai. Olsem wanem? Olgeta taim dispela ples i stap gutpela na i no gat wanpela liklik hevi i bin kamap long en, olsem planti man i ting?

Baibel i skulim yumi olsem God i stap long heven wantaim planti milion lain spirit, em ol ensel. (Matyu 18:10; KTH 5:11) Baibel i stori long ol ensel olsem ol i “pikinini bilong God.” (Jop 38:​4, 7, NW ) Olsem ol manmeri long graun, ol ensel yet i ken makim wanem rot ol i laik bihainim; ol i no stap olsem ol masin samting i no gat tingting. Olsem na ol ensel tu i ken makim gutpela pasin long bihainim o pasin nogut. Olsem wanem? Bai i gat sampela ensel i bihainim pasin nogut? Ating sampela man bai kirap nogut taim ol i kisim save olsem long planti tausen yia i go pinis, i gat bikpela lain ensel i mekim olsem; ol i mekim sin long God​—⁠ol i bikhet long Em!​—⁠Jut 6.

Ol Bikhetlain Long Heven

Sin i kamap long ples spirit long pasin bikhet bilong wanpela ensel, bihain ol i kolim em Satan (Birua) na man i kamapim ol tok giaman i bagarapim gutpela nem bilong narapela. Pastaim dispela ensel i save bihainim tok bilong God, tasol long laik bilong em yet em i kirap na bihainim pasin nogut. Bihain em i wok long pulim ol narapela ensel long mekim pasin nogut, olsem na long taim bilong Noa paslain long bikpela tait, i gat bikpela lain ensel i bung wantaim Satan long mekim pasin bilong bikhet long God.​—⁠Stat 6:​2, lukim sta daunbilo; 2 Pita 2:⁠4.

Ol dispela ensel i pundaun, ol i no raus wantu long heven, nogat. Inap planti tausen yia samting God i larim ol i go i kam​—⁠tasol i gat sampela tambu i bosim ol long dispela samting.a Tasol taim God i no larim ol moa long i stap long heven, Maikel wantaim ol ensel bilong en i rausim ol na “tromoi” ol i kam daun, na bihain ol bai bagarap olgeta. Taim dispela samting i bin kamap, wanpela nek long heven i tok: “Olsem na yu heven, na yupela olgeta lain i stap long heven, yupela i ken amamas.” (KTH 12:​7-12) Ol lain ensel i stap gut long God ol i gat bikpela amamas taim ol dispela lain bilong kirapim ol hevi i no stap moa long heven!

Stori yumi kamapim long dispela samting em planti man i no save liklik long en, dispela i kamapim klia olsem i no gat rot long stap bel isi taim sampela lain i givim baksait long ol lo bilong God. (Aisaia 57:​20, 21; Jeremaia 14:​19, 20) Tasol taim olgeta i bihainim ol lo bilong God, bel isi i save stap long olgeta hap. (Song 119:165; Aisaia 48:​17, 18) Olsem na sapos olgeta manmeri i laikim tru ol narapela na ol i laikim tumas God na bihainim tok bilong em, dispela graun bai stap olsem gutpela ples tru, a? Tok bilong Baibel i makim olsem!

Tasol wanem samting bai painim ol lain i tingim ol yet tasol na ol i no laik senisim pasin nogut bilong ol? Yu ting long olgeta taim ol bai stap na bagarapim bel isi bilong ol lain i gat bikpela laik tru long bihainim laik bilong God? Nogat. God i no bin larim ol ensel nogut i stap long heven, na olsem tasol Em bai i no inap larim ol manmeri nogut i stap olgeta taim long graun.

Klinpela Graun

God i tok: “Heven em i sia king bilong mi na graun em i ples mi putim lek bilong mi antap long en.” (Aisaia 66:⁠1) God em i holi olgeta, olsem na em bai i no inap larim dispela hap bilong putim lek bilong em i stap nogut long olgeta taim. (Aisaia 6:​1-3; KTH 4:⁠8) Em i bin rausim ol spirit nogut long heven, na olsem tasol em bai i rausim ol manmeri nogut long dispela graun, olsem ol tok bilong Baibel daunbilo i kamapim:

“Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol.”​—⁠Song 37:⁠9.

“Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.”​—⁠Sindaun 2:​21, 22.

“God bai i mekim stretpela pasin olsem. Em bai i bekim hevi long ol man i save givim hevi long yupela. Na em bai i pinisim dispela hevi nau yupela i karim, na givim malolo long yupela na long mipela wantaim. God bai i mekim olsem long taim Bikpela Jisas wantaim olgeta strongpela ensel bilong en i lusim heven na i kamap ples klia. Em bai i kam long bikpela paia tru na em bai i mekim save long ol man i no laik save long God na i no bihainim gutnius bilong Jisas, Bikpela bilong yumi. Ol dispela man bai i kisim pe nogut olsem. Ol bai i stap longwe long Bikpela na long lait bilong bikpela strong bilong em, na ol bai i bagarap i stap oltaim oltaim.”​—⁠2 Tesalonaika 1:​6-9.

“Dispela graun [olsem ol manmeri nogut bilong graun] bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.”​—⁠1 Jon 2:⁠17.

Yu Ting Graun Bai Stap Gutpela Olsem?

Baibel i kamapim klia olsem God bai i no inap larim pasin nogut i stap oltaim, tasol taim God i pinisim pasin nogut, olsem wanem yumi inap save dispela pasin bai i no inap kamap gen? Dispela askim i stret, long wanem, bihain long bikpela tait, i no longtaim na pasin nogut i kamap gen na i go bikpela tru, na God i bin paulim ol tok ples bilong pasim ol long mekim ol samting nogut.​—⁠Stat 11:​1-8.

Nambawan as na yumi save bai i no gat pasin nogut i kamap gen olsem i bin kamap bihain long bikpela tait i olsem, ol man bai i no bosim moa ol samting bilong graun. Kingdom bilong God bai bosim. Kingdom bilong God i stap long heven, em bai stap gavman bilong dispela graun olgeta. (Daniel 2:44; 7:​13, 14) Husat man i laik kirapim gen pasin nogut, kwiktaim dispela gavman bai rausim em. (Aisaia 65:20) Bihain dispela gavman bai i bagarapim dispela man i kamapim ol pasin nogut, em Satan, na ol ensel nogut i bihainim em.​—⁠Rom 16:20.

Na tu, ol manmeri bai i no gat wok long tingting planti long painim kaikai, klos, haus, na gutpela wok samting​—⁠long nau, hatwok bilong kisim ol dispela samting i kirapim sampela long mekim pasin raskol. Tru tumas, paradais bai kamap long olgeta hap bilong graun, na graun bai kamapim planti samting inap long olgeta man.​—⁠Aisaia 65:​21-23; Luk 23:​43, NW.

Tasol bikpela samting moa i olsem, Kingdom bai skulim ol lain i stap aninit long en long pasin bilong stap wanbel wantaim ol narapela, na tu, em bai helpim ol manmeri long kamap gutpela olgeta. (Jon 17:3; Rom 8:21) Long dispela taim, ol manmeri bai i no gat hevi moa long sampela pasin kranki bilong ol yet o laik nogut bilong sin. Dispela i mekim na bai ol inap long bihainim olgeta lo bilong God na ol bai amamas long mekim, wankain olsem Jisas, em man i gutpela olgeta. (Aisaia 11:⁠3) Jisas i bin stap gut long God, maski em i gat ol bikpela traim na ol man i givim pen long em​—⁠tasol dispela ol samting i no inap kamap liklik long Paradais, nogat tru.​—⁠Hibru 7:⁠26.

Bilong Wanem Sampela i Go Long Heven?

Tasol planti man i ritim Baibel ol i tingim dispela tok bilong Jisas: “Long haus bilong Papa bilong mi i gat planti rum i stap, na mi go bilong redim ples bilong yupela.” (Jon 14:​2, 3) Ating dispela tok i pait wantaim bilip olsem yumi inap i stap oltaim long paradais long graun, a?

Tupela bilip hia i no pait wantaim. Nogat tru; narapela i helpim narapela. Pastaim yumi ken tingim tok bilong Baibel olsem i gat liklik lain bilipman Kristen​—⁠em 144,000 tasol​—⁠ol bai i kamap spirit na stap long heven. Bilong wanem ol i kisim dispela gutpela samting? Long wanem, ol i insait long dispela lain Jon i bin lukim long driman, em ol lain “i kisim laip, na ol i stap king wantaim Krais inap long 1,000 yia.” (KTH 14:​1, 3; 20:​4-6) Na taim yumi skelim namba bilong ol wantaim planti bilion manmeri long graun, dispela lain 144,000 i olsem wanpela “liklik lain sipsip” tasol. (Luk 12:32) Na tu, dispela liklik lain i save pinis long karim hevi bilong ol samting i save kamap long ol man, olsem na ol inap bihainim wankain pasin olsem bilong Jisas na “sori long yumi” taim ol i lukautim wok bilong helpim graun wantaim olgeta man long kamap gutpela.​—⁠Hibru 4:15.

Graun​—⁠Ol Man Bai Stap Oltaim Long En

Long rot bilong ofa bilong Jisas Krais, klostu 2,000 yia i go pinis God i kirap na bungim ol lain 144,000, na long nau ol samting i makim olsem God inapim pinis dispela namba. (Aposel 2:​1-4; Galesia 4:​4-7) Ofa bilong Jisas i no bilong karamapim sin bilong lain 144,000 tasol, “em i mekim bilong helpim olgeta manmeri i stap long graun.” (1 Jon 2:⁠2) Olsem na olgeta man i bilip long Jisas, ol i wet long kisim laip oltaim. (Jon 3:16) Ol lain i slip long matmat na stap long tingting bilong God, ol bai i no kirap bek na stap long heven, nogat, ol bai kisim laip gen long nupela graun. (Saveman 9:5; Jon 11:​11-13, 25; Aposel 24:15) Wanem samting bai painim ol long dispela hap?

Kamapim Tok Hait 21:​1-4 i bekim dispela askim olsem: “Harim. Nau haus bilong God i stap wantaim ol manmeri. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Tingim gutpela samting olsem, ol manmeri bai i no kalabus moa long i dai, na ol samting dai i kamapim, olsem bikpela pen na bel hevi, em bai pinis olgeta! Gutpela tru, laik bilong Jehova bilong pastaim tru long ol man na dispela graun, em bai i kamap tru.​—⁠Stat 1:​27, 28.

Dai o Stap Laip ​—⁠Em Bilong Yumi Long Makim

I no gat wanpela taim God i bin tokim Adam na Iv olsem ol i gat rot long go long heven. I gat tupela samting tasol ol i ken mekim​—⁠ol i ken bihainim tok bilong God na stap oltaim long paradais long graun, o ol i ken sakim tok bilong God na dai. Sori tru, ol i sakim tok bilong God na kamap “graun” gen. (Stat 2:​16, 17; 3:​2-5, 19) I no gat wanpela taim God i gat tingting olsem ol man bilong graun i mas i dai na go i stap long heven na pulimapim heven. God i bin wokim planti tausen ensel bilong stap long heven; na ol ensel i no ol manmeri i bin dai na kirap bek na go long heven.​—⁠Song 104:​1, 4; Daniel 7:⁠10.

Yumi mas mekim wanem bilong kisim dispela blesing bilong stap oltaim long Paradais long graun? Namba wan samting, em yumi mas stadi long tok bilong God i stap long Baibel. Jisas i beten na tok, “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”​—⁠Jon 17:⁠3.

Narapela samting yumi mas mekim bilong stap amamas oltaim long Paradais, em yumi mas bihainim ol dispela save yumi kisim. (Jems 1:​22-24) Ol man i larim tok bilong God i stiaim ol, ol i wet long lukim truim bilong ol gutpela tok profet olsem dispela tok long Aisaia 11: 9, i tok: “Long olgeta ples antap long maunten bilong Bikpela, olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”

[Futnot]

[Ol Piksa long pes 7]

“Ol stretpela man bai i kisim graun God i givim ol, na bai ol i stap oltaim long en.”​—⁠Song 37:29