Rot Bilong Go Klostu Long God
Jems 4:8 i tok: “Yupela i mas i go klostu tru long God, na em bai i kam klostu tru long yupela.” Jehova i gat bikpela laik tru long ol man i pas gut wantaim em, na em i kamapim klia dispela samting taim em i givim Pikinini bilong em bilong helpim yumi.
APOSEL Jon i tok long dispela gutpela pasin bilong Jehova olsem: ‘Yumi save laikim God, long wanem, God i bin laikim yumi pastaim.’ (1 Jon 4:19) Tasol i gat sampela samting yumi mas mekim bilong i go klostu long God. Ol dispela samting i wankain long ol dispela 4-pela rot bilong pas gut wantaim ol narapela man, em yumi stori pinis long en long stori i kamap paslain long dispela. Nau yumi ken skelim gut ol dispela samting.
Tingim Ol Gutpela Pasin Bilong God
God i gat planti gutpela pasin, na sampela bikpela pasin bilong em, em pasin sori, gutpela tingting na save, stretpela pasin, na bikpela strong. Gutpela tingting na save na bikpela strong bilong em i kamap ples klia long olgeta samting i stap long ples antap na long graun, olsem ol bikpela lain sta na ol liklik liklik atom. Man bilong raitim Song i tok: “Skai i soim yumi olsem God em i nambawan tru. Olgeta samting bilong antap i soim yumi gutpela wok bilong em.”—Song 19:1; Rom 1:20.
Olgeta samting God i bin wokim i kamapim tu pasin sori bilong em. Olsem: Pasin bilong God long wokim yumi, i soim olsem God i laik bai yumi amamas long i stap bilong yumi. Em i wokim yumi bilong yumi inap long lukim ol kala, pilim swit bilong kaikai na smelim ol samting, amamas long harim musik, lap, amamas long lukim ol naispela samting, na em i givim yumi planti narapela samting moa, em ol i no samting yumi mas i gat bilong i stap laip. Tru tumas, God i save givim yumi planti gutpela samting, na mekim gutpela pasin, na laikim yumi tumas—ol dispela pasin bilong em i kamapim klia olsem em i “as bilong pasin tru bilong amamas.”—1 Timoti 1:11; Aposel 20:35.
Jehova i amamas tru long pasin sori em i as bilong wok king bilong em, na long wankain as ol wokboi bilong em i helpim dispela wok. (1 Jon 4:8) Tru, Jehova em i King bilong heven na graun, tasol pasin em i save mekim long ol man i wankain olsem pasin wanpela gutpela papa i save mekim long ol pikinini bilong em, na em i save mekim gutpela pasin moa yet long ol gutpela wokboi bilong em. (Matyu 5:45) Em i no save pasim wanpela samting i gutpela bilong helpim ol. (Rom 8:38, 39) Olsem yumi tok pinis, em i givim Pikinini bilong em bilong helpim yumi. Tru tumas, pasin bilong God long laikim yumi tru em i as na yumi stap laip na wet long kisim laip oltaim bihain.—Jon 3:16.
Jisas i helpim yumi long save gut long pasin bilong God, long wanem, em i bin bihainim stret pasin bilong Papa bilong em. (Jon 14:9-11) Em i no save tingim em yet, em i tingim gut ol narapela. Wanpela taim ol i bringim wanpela man i yaupas na i no save toktok gut i go long Jisas. Ating yu ken pilim olsem dispela man bai i no inap stap bel isi namel long planti manmeri. Tasol Jisas i kisim dispela man i go long wanpela hap em tupela tasol i stap long en, na em i oraitim sik bilong em. (Mak 7:32-35) Olsem wanem? Yu save amamas long ol manmeri i pilim gut ol tingting i stap long bel bilong yu, na tingim yu olsem man i gat nem? Sapos olsem, bai yu go klostu moa long Jehova na Jisas taim yu kisim sampela save moa long tupela.
Tingting Long Ol Pasin Bilong God
Maski wanpela man i gat ol gutpela pasin tru, yumi mas tingting long em bambai yumi ken i go klostu long em. Na i wankain tu long Jehova. Pasin bilong tingim tingim ol pasin bilong em long bel, em i namba tu bikpela samting yumi mas mekim bilong i go klostu long em. King Devit, em i wanpela man i laikim tru Jehova na “bel bilong [Jehova] i laikim” em tru, em i tok olsem: “Nau mi tingting gen long ol samting i bin kamap bipo. Na mi tingting long ol samting yu bin mekim na long ol gutpela wok bilong yu.”—Aposel 13:22; Song 143:5.
Olsem wanem? Taim yu lukim ol gutpela samting God i bin wokim o kaunim Tok bilong God, em Baibel, yu save bihainim pasin bilong Devit na tingim tingim ol dispela samting long bel? Tingim wanpela pikinini man i kisim pas long papa bilong em, em i save laikim tru. Em bai ting olsem wanem long dispela pas? Em bai i no kaunim hariap tasol na tromoi i go insait long kabot, a? Nogat, em bai skelim gut olgeta liklik liklik samting bilong en. Olsem tasol, yumi mas ting Tok Bilong God em i wanpela gutpela samting tru, olsem man bilong raitim Song i bin mekim, na em i tok: “Mi laikim tru lo bilong yu. Mi save tingting long en long san na long nait.”—Song 119:97.
Wok Long Toktok Gut Wantaim
Pasin bilong toktok gut wantaim em i bikpela samting tru bilong strongim pasin bilong pren gut wantaim. Dispela i makim olsem, yu toktok na putim gut yau long tok bilong narapela—yu givim bel na tingting long mekim olsem. Yumi save toktok wantaim Man bilong wokim yumi long rot bilong beten, na dispela i wanpela pasin bilong lotuim God na toktok long em. Jehova i save amamas long harim beten bilong ol man i laikim em na i mekim wok bilong em, na ol i bilip olsem Jisas em i nambawan mausman bilong God.—Song 65:2; Jon 14:6, 14.
Long bipo, God i save toktok long ol man long kain kain rot, olsem long rot bilong ol driman na ol ensel. Tasol nau long taim bilong yumi, em i save toktok long yumi long rot bilong Tok bilong em, em Baibel. (2 Timoti 3:16) I gat planti gutpela samting bilong Tok ol i bin raitim. Yumi inap kaunim long wanem wanem taim yumi laik kaunim. Olsem wanpela pas, yumi inap long kaunim tok bilong Baibel planti taim. Na tok bilong en i no save senis, olsem i save kamap long ol stori ol man i kamapim long maus tasol. Olsem na tingim olsem Baibel i gat planti pas long en em gutpela Papa bilong yu long heven i salim i kam long yu, na larim em i toktok long yu long rot bilong ol dispela pas long olgeta de.—Matyu 4:4.
Olsem: Baibel i tokim yumi long wanem samting i stret na wanem samting i no stret long ai bilong Jehova. Em i tokaut long laik bilong em long ol man na long graun. Na em i stori long ol samting God i bin mekim long kain kain man na lain, long ol lain i stap gut long lotuim em na ol lain i birua long em. Ol samting Jehova i bin mekim long ol man i stap long Baibel, na long dispela rot em i kamapim klia tru olgeta pasin bilong em. Em i kamapim pasin sori bilong em, pasin bilong amamas, bel hevi, kros, pasin marimari, na pasin bilong tingim gut ol narapela. Tru tumas, em i kamapim ol tingting bilong em na ol samting em i save pilim long bel, na as bilong ol dispela samting—olgeta dispela samting em i kamapim long pasin ol man inap save long en.—Song 78:3-7.
Taim yu kaunim pinis wanpela hap bilong Baibel, yu inap mekim wanem bambai dispela tok inap helpim yu? Na bikpela samting moa, olsem wanem yu inap i go klostu moa long God? Pastaim, tingim ol samting yu kaunim na kisim save long pasin bilong God, na larim ol dispela samting i go daun long bel. Na bihain long rot bilong beten, tokim Jehova long tingting bilong yu long ol samting yu kisim save long en, na olsem wanem yu bai traim long bihainim, bilong dispela tok i ken helpim yu. Dispela em i pasin bilong toktok gut wantaim narapela. Tru, sapos yu tingting long ol narapela samting tu, yu ken kamapim ol dispela samting long beten bilong yu.
Mekim Ol Samting Wantaim God
Baibel i tok sampela bilipman bilong bipo ol i bin wokabaut stret long ai bilong God. (Stat 6:9; 1 King 8:25) Dispela i makim wanem samting? Dispela i makim olsem long olgeta de, ol i save tingim olsem God i stap wantaim ol long olgeta samting ol i mekim. Tru, ol i no stretpela man. Tasol ol i laikim tumas ol lo bilong Jehova na ol i bihainim laik bilong God long i stap bilong ol. Jehova i save laikim ol kain man olsem, na em i save tingim tru ol olsem Song 32:8 i tok: “Bikpela i tok olsem, ‘Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.’ ”
Jehova inap kamap wanpela gutpela pren bilong yu tu—em bai wokabaut wantaim yu, tingim yu tru, na givim ol gutpela tok bilong helpim yu olsem wanpela gutpela papa. Profet Aisaia i tok, Jehova em i man bilong “skulim yupela na soim yupela long ol stretpela pasin yupela i mas bihainim na bai yupela i stap gut.” (Aisaia 48:17) Taim yumi kisim ol dispela gutpela samting, yumi bai pilim olsem Jehova “i stap klostu na i givim strong” long yumi, olsem Devit i bin pilim.—Song 16:8.
Nem Bilong God—Kamapim Ol Pasin Bilong Em
Planti ol lotu na planti Baibel moa i no mekim wok na tokaut long nem bilong God. (Song 83:18) Tasol long Baibel Hibru bilong pastaim tru, dispela nem—Jehova—i stap inap 7,000 taim! (Tasol maski ol i rausim nem bilong God, planti man bilong tanim tok bilong Baibel ol i larim nem bilong ol god giaman i stap olsem i bin stap long ol rait bilong bipo, olsem Bal, Bel, Merodak, na Satan tu!)
Sampela man i ting em i no bikpela samting long rausim nem bilong God. Tasol tingim: Yu ting em i hatwok moa o isi moa long pas gut wantaim wanpela man yu no save long nem bilong em? Ol biknem olsem God na Bikpela (em ol i save kolim olsem long ol god giaman tu) inap kirapim yumi long tingim strong bilong Jehova, wok bos, o namba bilong em, tasol nem bilong em i makim olsem em i narapela kain long ol narapela god. (Kisim Bek 3:15; 1 Korin 8:5, 6) Nem bilong God i kamapim ol pasin bilong em. Wanpela tisa bilong lotu, em Walter Lowrie, em i tok tru olsem: “Man i no save long nem bilong God, em i no save long pasin tru bilong em.”
Tingim stori bilong Maria, em wanpela meri i stap long Ostrelia na em i save givim bel tru long misin Katolik. Taim ol Witnes Bilong Jehova i bungim em long namba wan taim, em i larim ol i soim em long nem bilong God long Baibel. Em i mekim wanem? “Mi krai taim mi lukim nem bilong God long namba wan taim long Baibel. Dispela save i kirapim tru bel bilong mi, olsem mi inap save na mekim wok long nem bilong God.” Maria i wok long stadi long Baibel, na long namba wan taim long laip bilong em, em i kisim save long pasin tru bilong Jehova, na em inap long pas gut wantaim em.
Tru tumas, yumi inap “i go klostu tru long God,” maski yumi no inap lukim em long ai tru bilong yumi. Yumi inap “lukim” ol gutpela pasin bilong em long tingting na long bel bilong yumi, na dispela inap kirapim yumi long laikim em moa yet. Kain pasin olsem bilong laikim tru narapela “em i nambawan pasin bilong mekim ol man i stap wanbel.”—Kolosi 3:14, NW.
[Blok/Piksa long pes 6]
Jehova i Save Tingim Pasin Bilong Yu Long Laikim Em
PASIN bilong pren gut wantaim i gat tupela hap bilong en. Taim yumi wok long go klostu long God, em tu bai kam klostu moa long yumi. Tingim pasin bilong em long tingim lapun Simeon na Ana, em Baibel i stori long tupela. Man bilong raitim Gutnius, em Luk, em i tok olsem, Simeon em i “man bilong mekim stretpela pasin na em i man bilong lotu long God,” na em i wetim dispela Man God i Makim. Jehova i lukim ol gutpela pasin bilong Simeon na em i kamapim pasin bilong em long laikim tru dispela gutpela lapun man taim em i tokim em olsem, “em bai i no inap i dai kwik. Nogat. Pastaim em i mas lukim dispela man Bikpela i bin promis long salim i kam.” Jehova i tingim promis bilong em na em i stiaim Simeon i go long bebi Jisas, em papamama bilong em ol i bringim em i go long tempel long Jerusalem. Simeon i amamas tru na em i pilim tru dispela gutpela pasin bilong God, na em i holimpas bebi Jisas na beten: “Bikpela, mi wokboi bilong yu, na nau yu ken larim mi i go, na bel bilong mi i ken i stap isi, olsem bipo yu tok. Ai bilong mi i lukim pinis samting yu mekim bilong kisim bek mipela.”—Luk 2:25-35.
“Long dispela taim” yet, Jehova i kamapim pasin bilong em long laikim tru lapun Ana em i gat 84 krismas, na em i stiaim em tu i go long Jisas. Baibel i tokim yumi olsem, dispela gutpela meri wanpis, em i save stap long tempel olgeta taim na “holim wok bilong God long san na long nait.” Em i amamas tru, na olsem Simeon i mekim em i tok tenkyu long Jehova long gutpela pasin bilong em, na bihain em i toktok long dispela pikinini long “olgeta manmeri i wet long God i kisim bek ol manmeri bilong Jerusalem.”—Luk 2:36-38.
Tru tumas, Jehova i lukim pasin bilong Simeon na Ana long laikim em tru na pret long em, na ol i tingting long laik bilong God i mas kamap. Olsem wanem? Kain stori olsem bilong Baibel i bringim yu i go klostu long Jehova?
Olsem Papa bilong em, Jisas tu i save lukluk long bel bilong ol man. Taim em i wok long skulim ol man long tempel, em i lukim wanpela “rabismeri man bilong en i dai pinis, em i tromoi tupela liklik mani i go long bokis.” Ol narapela man i lukim dispela ol i ting em i samting nating, tasol Jisas i no ting olsem. Em i litimapim nem bilong dispela meri, long wanem, em i givim olgeta samting bilong em. (Luk 21:1-4) Olsem na yumi ken bilip tru olsem Jehova na Jisas i save amamas tru long yumi sapos yumi givim ol gutpela samting bilong yumi, maski samting yumi givim i bikpela o liklik.
Jehova i save amamas long ol manmeri i laikim em, tasol em i save bel hevi tru taim ol man i lusim em na i bihainim pasin i no stret. Long Stat 6:6, Baibel i tokim yumi olsem Jehova “i bel hevi tru,” long wanem, ol manmeri i mekim pasin nogut tru paslain long bikpela tait long taim bilong Noa. Bihain, olsem Song 78:41 i tok, olgeta taim lain Israel i “traim God bilong Israel, . . . na mekim em i kros tru long ol.” Tru tumas, God i no olsem wanpela “As” tasol bilong ol samting i bin kamap na i no save tingim yumi. Em i wanpela man tru, em ol pasin bilong em i stret tasol na em i no gat wanpela pasin kranki olsem bilong yumi.
[Ol Piksa long pes 7]
Pasin bilong tingim ol samting Jehova i bin wokim, em i wanpela rot bilong go klostu tru long em