I Stret Yu Skelim Ol Narapela Lotu?

MIGUEL, nau em i wanpela Witnes Bilong Jehova long Saut Amerika, em i tok: “Mi bin go long ol miting Kristen klostu wanpela yia, na mi amamas tru long tokim ol narapela long Kingdom bilong God. Bihain mi kirap long putim yau long ol program bilong lotu long redio, na lukim ol man i autim tok long televisen. Mi ting ol kain program olsem bai helpim mi long save gut long tingting bilong ol manmeri bilong ol narapela lotu. Mi luksave olsem ol samting ol i skulim ol man long en i no stret wantaim Baibel, tasol mi laik kisim sampela save moa long ol.”

Long wankain kantri, Jorge i save givim bel tru long skulim ol narapela long lotu i tru. Tasol em tu i kirap long putim yau long ol program bilong lotu long redio na long televisen. Em i save tok olsem, “yu mas save long tingting bilong ol narapela.” Taim ol i askim em long ol samting nogut inap painim em sapos em i kisim save long ol bilip giaman, em i save tok: “I no gat wanpela samting inap bagarapim bilip bilong man i save long tok i tru bilong Baibel.” Ol dispela stori i kamapim wanpela bikpela askim olsem: I gutpela long putim yau long bilip bilong ol narapela o nogat?

Luksave Long Lotu Kristen Tru

Bihain long taim ol aposel i dai, ol pasin bilong lotu Kristen giaman i wok long kam insait long lotu i tru na i bagarapim em. Jisas i save olsem dispela samting bai kamap, olsem na em i tokaut long wanpela rot bilong luksave long lotu Kristen giaman na long lotu Kristen tru. Pastaim em i tok: “Yupela lukaut long ol giaman profet. . . . Ol i olsem ol weldok i pasim skin bilong sipsip, bai ol i ken i go klostu long ol sipsip na holimpas ol.” Na em i tok moa: “Yupela lukim pasin bilong ol na bai yupela i save, ol i giaman profet, o nogat.” (Matyu 7:​15-​23) Ol disaipel tru bilong Jisas i save bihainim tok bilong em, na i no hatwok long luksave long ol long rot bilong ol gutpela pasin bilong ol. Olsem Jisas yet i bin mekim, ol i save go lukim ol manmeri na skulim ol long Kingdom bilong God long rot bilong Baibel. Ol i bihainim pasin bilong Jisas na ol i klia olgeta long ol wok politik na long ol samting bilong sindaun bilong ol man em ol i save tok pait long en. Ol i bilip tru olsem Baibel em i Tok Bilong God na ol i daun long en olsem tok i tru. Ol i save tokaut long nem bilong God. Na ol i save wok strong long bihainim pasin bilong laikim ol narapela olsem God i skulim ol long mekim, olsem na ol i no save insait long ol pait bilong graun. Ol i save mekim gutpela pasin long ol narapela olsem brata bilong ol.​​—⁠Luk 4:​43; 10:​1-9; Jon 13:​34, 35; 17:​16, 17, 26.

Baibel i tok, yumi inap lukim olsem “stretpela man i narapela kain long man nogut, na man i mekim wok bilong God i narapela kain long man i no bin mekim wok bilong God.” (Malakai 3:​18, NW ) Ol manmeri i lotu tru long God long nau, ol i mekim wankain pasin olsem ol Kristen long taim bilong ol aposel i bin mekim, ol i stap wanbel long tingting na long pasin. (Efesus 4:​4-6) Taim yu save pinis long lain Kristen tru, bilong wanem yu laik save long bilip bilong ol narapela?

Lukaut Long Ol Tisa Giaman

Baibel i tok, maski yumi kisim save pinis long tok i tru bilong Baibel, ol bilip giaman inap bagarapim yumi long ol samting bilong spirit. Aposel Pol i toksave olsem: “Yupela i mas lukaut gut, nogut wanpela man i autim olkain giaman save na toktok nating long yupela na em i mekim yupela i bihainim tingting bilong en. Ol dispela kain man i save kisim tingting bilong ol tumbuna na bilong ol spirit i save bosim ol samting bilong skai na graun. Ol i no save bihainim tingting bilong Krais.” (Kolosi 2:⁠8) Dispela skripsa i kamapim gut dispela samting! Olsem ol wel animal i laik kisim yu i go bilong kaikai, ol tisa giaman inap tru long bagarapim yu.

Tru, Pol i save long bilip bilong ol narapela. Wanpela taim em i kirapim tok bilong em olsem: “Yupela man bilong Atens, mi lukim yupela i strong moa long mekim olgeta kain pasin bilong lotu. Pastaim mi wokabaut i go, na mi lukim ol samting yupela i save lotu long en. Na mi lukim wanpela alta tu, ol i bin raitim tok long en olsem, ‘Dispela alta em i bilong wanpela god mipela i no save long en.’ ” (Aposel 17:​22, 23) Tasol Pol i no save wok oltaim long kisim save long ol tingting bilong ol saveman bilong Grik.

Ating em i gutpela long save long bilip bilong ol narapela lotu na long as bilong ol, tasol em i no gutpela long givim bel long skelim na kisim save long ol long olgeta taim.a Jehova i makim “wokboi i gat gutpela tingting” long skulim yumi long ol tok bilong em long Baibel. (Matyu 4:4; 24:45) Pol i tok: “Na i no inap yupela i kaikai long tebol bilong Bikpela na long tebol bilong ol spirit nogut tu. Ating yumi laik mekim Bikpela i bel nogut na kros long yumi, a?”​​—⁠1 Korin 10:​20-​22.

Ating pastaim sampela tisa giaman ol i Kristen tru, tasol bihain ol i lusim tok i tru na i bihainim rot nogut. (Jut 4, 11) Yumi no ken kirap nogut long dispela. Taim Jisas i toktok pinis long “wokboi i gat gutpela tingting” em lain Kristen God i makim, em i toktok long ol ‘wokboi nogut’ em ol i save toktok planti olsem, “Bikman bilong [mipela] bai i no inap i kam kwik,” na ol i kirap long paitim ol wanwok bilong ol. (Matyu 24:​48, 49) Planti bilong ol dispela lain wokboi nogut wantaim ol man i bihainim ol, ol i no gat ol bilip stret bilong ol, tasol ol i laik bagarapim tasol bilip bilong ol narapela. Aposel Jon i toktok long ol olsem: “Sapos wanpela man i kam long yupela, na em i no bringim dispela kain tok i kam, orait yupela i no ken givim gude long em, na yupela i no ken kisim em i go long haus bilong yupela.”​​—⁠2 Jon 10; 2 Korin 11:​3, 4, 13-​15.

Ol man i gat gutpela bel na ol i painim tok i tru, i gutpela long ol i skelim gut tok ol i harim long ol narapela narapela lotu. Bihain, God bai blesim ol man i gat gutpela bel na i painim tok i tru. Baibel i tok long tingting bilong God olsem: “Na yu mas wok hat long painim gutpela tingting, olsem man i wok long painim silva ol i bin haitim insait long graun na olsem man i wok long painim mani samting ol i bin haitim. Sapos yu mekim ol dispela samting . . . bai yu save gut long God.” (Sindaun 2:​4, 5) Ol Kristen tru ol i kisim save pinis long God long rot bilong Baibel na kongrigesen Kristen. Na ol i lukim ol gutpela blesing Jehova i save givim long ol man i larim dispela save i bosim wokabaut bilong ol, olsem na ol i no wok long putim yau long tok bilong ol bilip giaman.​​—⁠2 Timoti 3:​14.

[Futnot]