Bilong Wanem Yumi Mas Kisim Gutpela Pasin Tru?

WANPELA man Japan i lapun liklik, nem bilong em Kunihito, em i go sindaun long Amerika.a Em i stap sampela wik tasol na wanpela samting inap bagarapim wok mani bilong em i kamap. Kunihito i tok: “Taim bos bilong mi i askim mi olsem mi inap mekim wanpela wok, mi pilim olsem mi inap tru long mekim dispela wok. Tasol papamama i bin lainim mi olsem pasin daun em i wanpela gutpela pasin tru, olsem na mi bekim tok long bos olsem: ‘Mi no klia olsem mi inap mekim o nogat, tasol bai mi wok strong long mekim.’ Bos em wanpela man Amerika, na long ai bilong em dispela tok mi mekim i makim olsem mi no inap mekim dispela wok na mi no bilip olsem mi inap mekim. Taim mi kisim save long dispela, mi save olsem mi mas senisim sampela tingting bilong mi.”

Maria i stap long Nu Yok Siti, em i smatpela sumatin na em i amamas long helpim ol wanklas. Pedro em i wanpela wanklas bilong Maria na sampela taim em i save askim Maria long helpim em. Tasol dispela yangpela man i gat laik long Maria na em i traim long mekim ol samting bambai Maria i ken laikim em. Maski Maria i laik bihainim stretpela pasin, Pedro i pulim em na ol i mekim pasin pamuk.

Em i hatwok long mekim gutpela pasin tru long nau, long wanem, ol man bilong kain kain ples na pasin i sindaun wantaim, na ol man i save mekim pasin i no stret. Olsem na bilong wanem yumi laik wok long kisim gutpela pasin tru? Long wanem, taim yumi bihainim gutpela pasin tru dispela i save mekim God i amamas, na ating yumi olgeta i laik bai em i ken orait long yumi.

Baibel i tokim yumi olsem yumi mas wok long kisim gutpela pasin tru. Olsem aposel Pol i tok: “Oltaim yupela i mas tingting tasol long . . . olgeta pasin i nambawan tru [olsem gutpela pasin tru].” (Filipai 4:⁠8) Na aposel Pita i tokim yumi long “wok strong tru long mekim gutpela pasin.” (2 Pita 1:⁠5) Tasol gutpela pasin tru em i wanem samting? Man inap lain long mekim dispela pasin long wanpela skul? Olsem wanem yumi inap kisim dispela pasin?

[Futnot]