Wanpela Man Bilong Wokim Aiglas i Planim Pikinini Kaikai

Olsem wanem hatwok bilong wanpela man bilong wokim aiglas long Levov, Yukren, i mekim na ol i kamapim wanpela nupela kongrigesen bilong ol Witnes Bilong Jehova long tok Rasia long Haifa, Israel? Dispela kantri i stap longwe stret, inap olsem 2,000 kilomita. Dispela stori i soim olsem tok i stap long Saveman 11:6 i tru. Em i tok: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut.”

STORI bilong yumi i kirap long 1990 taim wanpela yangpela meri Juda, em Ella, i stap long Levov. Ella wantaim famili bilong em ol i wok long redim ol samting bilong go sindaun long Israel. Klostu long taim ol i laik go, Ella i makim taim bilong go lukim wanpela man bilong wokim aiglas, em wanpela Witnes Bilong Jehova. Long dispela taim gavman i bin tambuim wok bilong ol Witnes bilong Jehova long Yukren. Tasol dispela man bilong wokim aiglas em i kirap toktok wantaim Ella long ol bilip bilong em, em Baibel i as bilong en. Taim em i tokim Ella olsem God i gat nem, Ella i kirap nogut. Nau Ella i laik save moa, na ol i toktok long ol samting bilong Baibel.

Ella i amamas tru long dispela toktok ol i bin mekim, na em i askim sapos ol i ken toktok gen long wik bihain na long narapela wik bihain long en. Em i laik save moa, tasol i gat wanpela hevi. I no gat bikpela hap taim na famili bai go long Israel. Ella i gat planti samting moa em i mas lain long en! Bilong helpim em long mekim gutpela wok long hap taim i stap yet, Ella i askim sapos ol i ken stadi long Baibel long olgeta de i go inap long taim em i go. Maski Ella i no kirap stadi wantu taim em i kamap long Israel, pikinini kaikai bilong tok i tru i go daun pinis long bel bilong em. Long pinis bilong yia, em i wok strong gen long stadi long Baibel.

Pait i kirap long Persian Galf, na ol Irak i wok long sutim ol roket bom i go long Israel. Olgeta man i wok long toktok long dispela samting. Wanpela de taim Ella i stap long supamaket, em i harim wanpela famili bilong narapela kantri ol i nupela long dispela hap, na ol i toktok long tok Rasia. Maski Ella i stadi yet long Baibel, em i kirap toktok wantaim ol long gutpela taim bihain bai kamap, olsem Baibel i tok promis long en. Long dispela as tasol, bubu meri Galina, na mama Natasha, na pikinini man Sasha (Ariel), na pikinini meri Ilana, olgeta i bung wantaim Ella long Baibel-stadi bilong em.

Sasha em i namba wan man bilong famili long kisim baptais, maski planti hevi i bin painim em. Maski em i gutpela sumatin tru, ol i rausim em long skul, long wanem, program bilong skul i tok olgeta i mas lain long wok bilong ami, tasol maus bilong bel bilong Sasha, em Baibel i bin skulim, i gat tok long mekim dispela samting. (Aisaia 2:​2-4) Dispela samting i painim Sasha i kamap long Nambawan Kot Bilong Israel i stap long Jerusalem, na gutpela tru ol i tokaut olsem Sasha i mas go bek long skul na inapim skul bilong em. Dispela stori i kamap long TV na ol niuspepa long olgeta hap bilong kantri. Olsem na planti manmeri bilong Israel i kisim save long ol bilip bilong ol Witnes Bilong Jehova.a

Taim Sasha i pinisim haiskul, em i kirap mekim wok bilong God long olgeta de olsem wanpela Witnes. Nau em i mekim wok painia salim na em i wanpela elda long kongrigesen. Sista bilong em, Ilana, em tu i kirap mekim wok painia. Mama bilong ol na bubu meri bilong ol, ol i kamap Witnes i baptais pinis. Dispela pikinini kaikai em man bilong wokim aiglas i bin planim, i karim kaikai yet.

Ella i wok long kamap strong long ol samting bilong spirit, na i no longtaim na em i wok long autim tok long ol haus. Long namba wan haus em i go long en, Ella i bungim Faina, em nau tasol em i bin lusim Yukren na kam i stap. Faina i save bel hevi tru. Bihain Ella i kisim save olsem, paslain long em i paitim dua bilong Faina, dispela meri i bel hevi i bin beten long God olsem: “Mi no save yu husat, tasol sapos yu harim beten bilong mi, plis helpim mi.” Faina tupela Ella i toktok gut wantaim. Faina i mekim planti askim na em i skelim gut ol bekim em i kisim. Bihain em i bilip tru olsem, ol Witnes Bilong Jehova ol i skulim ol man long tok i tru bilong Baibel. Em i senisim program bilong em long stadi long Yunivesiti, bilong em i ken lusim sampela hap taim moa wantaim kongrigesen na bilong autim tok. Long Me 1994, Faina i kisim baptais. Em tu i kirap mekim wok painia, na bilong lukautim em yet long ol samting bilong skin em i kisim wok haptaim long wok kompiuta samting.

Long Novemba 1994, taim Ella i wok long autim tok, wantu tasol em i pilim olsem strong bilong em i pinis. Taim em i go long haus sik, ol i painimaut olsem em i gat sua long bel bilong em. Long nait mak bilong blut (hemoglobin) i go daun long 7.2. Wanpela elda i stap long kongrigesen bilong Ella, em siaman bilong Hospital Lieson Komiti (HLC) long hap ol i stap long en, na em i givim sampela tok bilong helpim ol dokta long save long ol narapela marasin ol i ken mekim wok long en na no gat wok long blut.b Dokta i katim Ella na em i no givim blut long em, na ol samting i wok gut na Ella i kamap gutpela gen.​—⁠Aposel 15:​28, 29.

Dokta bilong ol meri Ella i save go lukim, em Karl, em i wanpela Juda mama i bin karim em long Jemani, na em i kirap nogut long dispela samting i bin painim Ella. Tasol bihain Karl i tingim olsem papamama bilong em ol i bin save long ol Witnes Bilong Jehova taim ol i stap long ol kalabus nogut bilong ol Natsi. Karl i mekim planti askim. Maski Karl i gat planti wok long wok dokta bilong em, em i stretim rot bilong em i gat taim bilong stadi long Baibel. Long yia bihain, em i go long ol miting Kristen long olgeta wik.

Wanem samting i bin kamap long rot bilong dispela pikinini kaikai man bilong wokim aiglas i bin planim? Yumi harim pinis wanem samting i painim Sasha na famili bilong em. Na Ella, em i mekim wok painia salim. Pikinini meri bilong em, Eina, em i pinisim haiskul nau tasol, na em tu i kirap mekim wok painia. Faina tu i mekim wok painia salim. Na Karl, dispela dokta, nau em i wanpela Witnes i baptais pinis na wanpela wokman bilong kongrigesen, na em i wok long autim tok long ol sikman i kam lukim em na long ol narapela tu. Em i autim dispela tok bilong Baibel i gat strong bilong stretim hevi bilong man.

Dispela liklik lain i mekim tok Rasia na ol i olsem namba wan hap lain bilong kongrigesen tok Hibru i stap long Haifa, nau ol i kamap wanpela kongrigesen bilong tok Rasia i gat 120 strongpela pablisa bilong Kingdom. Wanpela as na ol dispela samting inap kamap, em olsem: Long Levov wanpela man bilong wokim aiglas, em i planim wanpela pikinini kaikai taim rot i op.

[Ol Futnot]

[Mep long pes 29]

(Bilong save ol dispela rait i stap we long pes, lukim buk o magasin)

YUKREN

ISRAEL

[Kredit Lain]

Mountain High Maps® Copyright © 1997 Digital Wisdom, Inc.

[Ol Piksa long pes 30]

Ella na pikinini meri bilong em, Eina

[Piksa long pes 31]

Wanpela lain Witnes i mekim tok Rasia long Haifa. Long han kais i go long han sut: Sasha, Ilana, Natasha, Galina, Faina, Ella, Eina, na Karl