“Tru Tumas, Bikpela i Kirap Bek!”

Tingim bikpela bel hevi bilong ol disaipel bilong Jisas taim ol man i kilim Bikpela bilong ol i dai. Ol gutpela samting ol i wetim bilong kamap bihain i olsem i dai pinis, na i olsem dispela bodi nau i no gat laip long en na Josep bilong Arimatea i putim long ples matmat. Ol i bin tingting olsem Jisas bai helpim ol Juda long rausim ol Rom na i no ken bosim ol moa, tasol nau i olsem dispela samting ol i wetim i dai pinis.

SAPOS Jisas i dai na em tasol, ating ol disaipel bilong Jisas bai pinis olsem ol disaipel bilong planti ol Mesaia giaman. Tasol Jisas i stap laip! Baibel i tok, bihain liklik long em i dai em i bin kamap long ol disaipel bilong em inap planti taim liklik. Olsem na dispela i kirapim sampela bilong ol long tok: “Tru tumas, Bikpela i kirap bek!”​​—⁠Luk 24:⁠34.

Ol disaipel i gat wok long autim bilip bilong ol long Jisas olsem em i dispela Man God i makim. Taim ol i mekim olsem, ol i tokaut long kirap bek bilong Jisas long matmat olsem strongpela as bilong makim olsem em i Mesaia. Tru tumas, “ol aposel ol i wok long autim tok long Bikpela Jisas i kirap bek, na tok bilong ol i gat bikpela strong.”​​—⁠Aposel 4:​33.

Sapos wanpela man i bin kamapim olsem tok bilong kirap bek bilong Jisas i giaman​​—⁠olsem ating em inap subim wanpela disaipel long tok olsem Jisas i no bin kirap bek o em i kamapim olsem bodi bilong Jisas i stap yet long matmat​​—⁠lotu Kristen i no inap kamap. Tasol nogat. Ol disaipel bilong Jisas i save olsem Krais i stap laip, olsem na ol i go long olgeta hap na autim tok olsem em i kirap bek pinis, na planti manmeri i bilip long Krais i kirap bek pinis.

I gat wanem as na yu tu inap bilip long kirap bek bilong Jisas? I gat wanem ol samting i makim olsem Jisas i bin kirap bek tru?

Bilong Wanem Yumi Mas Skelim Ol Samting?

Olgeta 4-pela Gutnius i kamapim stori bilong kirap bek bilong Jisas. (Matyu 28:​1-​10; Mak 16:​1-8; Luk 24:​1-​12; Jon 20:​1-​29)a Sampela tok moa bilong Ol Skripsa Grik i kamapim ol tok i soim olsem i tru Krais i bin kirap bek long matmat.

Olsem na i gat as na ol disaipel i autim tok long kirap bek bilong Jisas! Sapos i tru God i bin kirapim em bek, dispela i gutpela tok tru winim olgeta narapela tok ol man i bin harim. Dispela i makim olsem God i stap tru. Na tu, em i makim olsem Jisas i stap laip long nau.

Dispela i mekim wanem long yumi? Jisas i bin beten olsem: “Na laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:⁠3) Yumi inap kisim save long Jisas na Papa bilong em, na dispela save inap givim laip long yumi. Sapos yumi bihainim dispela save long i stap bilong yumi, maski yumi dai, yumi inap kirap bek, long wanem, Jisas i bin kirap bek. (Jon 5:​28, 29) Yumi inap wet long kisim laip oltaim long Paradais long graun aninit long Kingdom bilong God long heven long han bilong Pikinini bilong em i kisim biknem pinis, em Jisas Krais, King bilong olgeta king.​​—⁠Aisaia 9:​6, 7; Luk 23:​43, NW; KTH 17:⁠14.

Olsem na em i bikpela samting long yumi mas save Jisas i bin kirap bek o nogat. Dispela i mekim sampela samting long i stap bilong yumi long nau na long ol samting bai kamap bihain. Olsem na long dispela as mipela i singautim yu long skelim 4-pela samting i kamapim klia olsem Jisas i bin dai na em i kirap bek.

Jisas i Dai Long Pos

Sampela man i gat tupela tingting ol i tok ol birua i bin nilim Jisas long pos, tasol em i no dai taim em i hangamap yet long pos. Ol i tok em i hap dai tasol na kol bilong ples matmat i mekim na em i kisim strong gen. Tasol olgeta man i lukim Jisas i dai ol i tok Jisas i dai pinis taim ol i putim bodi bilong em long ples matmat.

Ol i bin kilim i dai Jisas long ai bilong planti man, olsem na i gat ol man i lukim em i dai antap long pos. Dispela kepten i go pas long kilim Jisas i dai i tokaut olsem Jisas i bin dai tru. Dispela kepten bilong ami em i gat wok long lukim olsem man i dai tru o nogat. Na tu, nambawan gavman bilong Rom, Pontius Pailat i larim Josep bilong Arimatea i kisim bodi bilong Jisas taim em i harim long maus bilong dispela kepten olsem Jisas i dai pinis.​​—⁠Mak 15:​39-​46.

Ples Matmat i Stap Nating

Ples matmat i stap nating i namba wan samting i kamapim klia long ol disaipel bilong Jisas olsem em i kirap bek pinis, na i kam inap long nau i no gat man inap sakim dispela samting. Ol i bin putim bodi bilong Jisas long wanpela nupela ples matmat, em ol man i no bin mekim wok liklik long en. Dispela ples matmat i stap klostu long hap ol i bin kilim em i dai, na long dispela taim ples matmat i stap ples klia tru. (Jon 19:​41, 42) Olgeta stori bilong Gutnius i kamapim olsem taim ol pren bilong Jisas i kamap long ples matmat long namba tu moning bihain long em i dai, bodi bilong em i no stap.​​—⁠Matyu 28:​1-7; Mak 16:​1-7; Luk 24:​1-3; Jon 20:​1-​10.

Ol birua bilong Jisas na ol pren bilong em ol i kirap nogut long ples matmat i stap nating. Ol birua bilong em ol i bin wok strong long lukim olsem em i mas i dai na ol i planim em. Taim ol inapim pinis samting ol i laik mekim, ol i putim wanpela soldia bilong was i stap long ples matmat. Tasol long moningtaim bilong namba wan de bilong wik, ples matmat i stap nating.

Olsem wanem? Ol pren bilong Jisas i rausim bodi bilong em long ples matmat? Ating nogat, long wanem, ol Gutnius i kamapim olsem ol i bin bel hevi tru taim ol birua i kilim i dai Jisas. Na tu, ol disaipel bilong em ol i no inap karim hevi na dai long han bilong ol birua sapos ol i save olsem Jisas i no bin kirap bek tru.

Husat i rausim bodi bilong Jisas long matmat? I stret yumi ken ting ol birua bilong Jisas i no inap kisim bodi bilong em. Sapos ol i bin kisim, ol bai kamapim long ples klia bilong daunim tok bilong ol disaipel olsem Jisas i kirap bek pinis na em i stap laip. Tasol i no gat wanpela samting olsem i kamap, long wanem, God yet i bin mekim ol dispela samting.

Sampela wik bihain, ol birua bilong Jisas i no mekim wanpela tok bilong daunim tok Pita i autim, em i tok: “Yupela man bilong Israel, putim yau long tok bilong mi. Mi laik tokim yupela long Jisas bilong Nasaret. Yupela yet i save long ol strongpela wok na ol kain kain mirakel God i bin wokim namel long yupela long han bilong dispela man. God i bin mekim olsem bai yupela i ken save, em yet i bin salim dispela man i kam. Na God i bin putim dispela man long han bilong yupela, olsem bipo yet em i bin tingim na i pasim tok pinis long mekim. Na long han bilong ol man nogut yupela i nilim em long diwai [pos] na kilim em i dai. Tasol God i kirapim bek dispela man na i no larim em i stap long ol pen nogut bilong dai, long wanem, dai i no inap holimpas dispela man. Na bipo Devit tu i bin tok olsem long em, ‘Mi lukim Bikpela i stap klostu tru long mi oltaim. . . . Mi wetim ol gutpela samting God i laik mekim long mi. Bai yu no larim mi i stap long ples bilong ol man i dai pinis. Na bai yu no larim man yu bin makim bilong yu yet i sting long matmat.’ ”​​—⁠Aposel 2:​22-​27.

Planti Man i Lukim Jisas Taim Em i Kirap Bek Pinis

Long Buk Aposel, man bilong raitim Gutnius, Luk, em i tok: “Pastaim em i bin karim pen na i dai, na bihain em i kisim laip gen na i kamap long ol aposel. Na em i mekim planti samting, bilong ol i ken save tru, em i stap laip. Inap long 40 de ol i lukim em, na em i tokim ol long kingdom bilong God.” (Aposel 1:​2, 3) Inap planti taim liklik, planti disaipel i lukim Jisas taim em i kirap bek pinis​​—⁠long wanpela gaden, long wanpela rot, long taim bilong kaikai, klostu long raunwara Taiberias.​​—⁠Matyu 28:​8-​10; Luk 24:​13-​43; Jon 21:​1-​23.

Ol man i no bilip long kirap bek bilong Jisas ol i tok ol dispela stori i no tru. Ol i tok ol man bilong raitim Gutnius i bin kamapim ol dispela stori long tingting bilong ol yet, na ol i tok sampela tok bilong ol dispela stori i pait wantaim. Tru, ol stori i no wankain olgeta, tasol dispela i kamapim olsem ol man bilong raitim Gutnius i no bin pasim tok wantaim na raitim ol dispela stori. Yumi kisim sampela save moa long i stap bilong Jisas long graun taim wanpela man bilong raitim Gutnius i skruim sampela tok moa long ol stori bilong narapela man bilong raitim Gutnius.

Olsem wanem? Tingting bilong ol aposel i paul nabaut taim Jisas i kirap bek pinis na kamap long ol? Kain tok olsem ol man i mekim i no stret, long wanem, planti man tru i bin lukim em. Sampela i lukim Jisas em ol man bilong kisim pis, ol meri, wanpela wokman bilong gavman, na aposel Tomas, em i bilip taim em i lukim samting i kamapim klia tru olsem Jisas i kirap bek pinis. (Jon 20:​24-​29) Sampela taim, ol disaipel bilong Jisas i no bin luksave kwik long Bikpela bilong ol i kirap bek pinis. Wanpela taim, winim 500 manmeri i lukim em, na planti bilong ol i stap laip yet taim aposel Pol i tokaut long dispela samting bilong kamapim klia olsem Jisas i bin kirap bek.​​—⁠1 Korin 15:⁠6.

Jisas i Stap Laip na Dispela i Mekim Sampela Samting Long Ol Man

Yumi no ken ting kirap bek bilong Jisas i olsem wanpela samting yumi mas save tasol long en o tok pait long en. Jisas i stap laip na dispela i kamapim gutpela samting long i stap bilong ol man long olgeta hap. Kirap long taim bilong ol aposel na i kam inap long nau, planti manmeri tru em pastaim ol i save les long harim tok o ol i save birua long lotu Kristen, bihain ol i bilip tru olsem em i trupela lotu. Wanem samting i mekim na ol i senisim tingting bilong ol? Ol i stadi long Baibel na ol i kisim save olsem God i bin kirapim bek Jisas na em i kisim laip olsem wanpela spirit i gat biknem long heven. (Filipai 2:​8-​11) Ol i bilip long Jisas na long rot God Jehova i stretim bilong kisim bek ol man long rot bilong ofa bilong Krais bilong baim bek man. (Rom 5:⁠8) Ol dispela kain manmeri ol i bin painim amamas tru taim ol i mekim laik bilong God na bihainim ol tok bilong Jisas long i stap bilong ol.

Tingim i stap bilong ol Kristen long taim bilong ol aposel. Taim ol i kamap Kristen ol i no kisim biknem, o strong, o planti mani kago samting. Nogat. Planti Kristen bilong pastaim ol i ‘amamas i stap na larim ol man i pulim ol samting bilong ol,’ long wanem, ol i laik holimpas bilip. (Hibru 10:34) Bilong stap Kristen tru, ol i mas redi long daunim laik bilong ol yet na larim ol birua i mekim nogut long ol na planti taim dispela i mekim na ol i dai.

Paslain long ol i kamap disaipel bilong Krais, sampela i gat rot long kisim biknem na planti mani kago samting. Sol bilong Tarsus i bin kisim skul aninit long wanpela tisa bilong Lo i gat nem, em Gamaliel, na em i kirap winim planti narapela Juda. (Aposel 9:​1, 2; 22:3; Galesia 1:​14) Tasol bihain Sol i kamap aposel Pol. Em na planti narapela ol i sakim biknem na strong dispela graun inap givim long ol. I gat wanem as na ol i mekim olsem? Long wanem, ol i laik tokim ol man long wanpela gutpela samting tru ol i wetim bilong kamap bihain em ol tok promis bilong God i as bilong en, na long tokaut olsem Jisas Krais i kirap bek pinis long matmat. (Kolosi 1:​28) Ol i redi long karim hevi long wanpela samting em ol i save olsem tok i tru i as bilong en.

Na i wankain tu long planti milion manmeri long nau. Yu inap painim ol long ol kongrigesen bilong ol Witnes Bilong Jehova long olgeta hap bilong graun. Ol Witnes i amamas long singautim yu long i go long bung bilong tingim i dai bilong Krais em ol i save mekim long olgeta yia, na em bai kamap taim san i go daun pinis long Sande, Epril 8, 2001. Ol bai amamas long yu stap long dispela bung na long olgeta miting bilong ol bilong lainim tok bilong Baibel long ol Haus Kingdom bilong ol.

Olsem wanem? Yu laik kisim sampela save moa long i dai na kirap bek bilong Jisas, na tu long i stap bilong em na ol tok em i skulim ol man long en? Em i singautim yumi long kam long em. (Matyu 11:​28-​30) Kirap nau long kisim stretpela save long God Jehova na Jisas Krais. Sapos yu mekim olsem, dispela inap helpim yu long kisim laip oltaim aninit long Kingdom bilong God long han bilong gutpela Pikinini bilong em.

[Futnot]

[Ol Piksa long pes 7]

Planti milion man ol i painim amamas tru taim ol i kamap disaipel bilong Jisas Krais

[Piksa Kredit Lain long pes 6]

From the Self-Pronouncing Edition of the Holy Bible, containing the King James and the Revised versions