Tingim Ol Strongpela Wok Bilong God
“God, Bikpela bilong mi, yu bin mekim planti gutpela wok bilong helpim mipela. I no gat man i olsem yu. Yu winim ol tru.”—SONG 40:5.
1, 2. Wanem samting i kamapim klia ol strongpela wok bilong God? Dispela i mas kirapim yumi long mekim wanem?
TAIM yu ritim Baibel, yu inap lukim olsem God i bin mekim gutpela pasin tru long lain bilong em long bipo, em lain Israel. (Josua 3:5; Song 106:7, 21, 22) Tasol maski Jehova i no mekim ol wankain samting long ol manmeri long nau, yumi inap lukim planti samting i kamapim klia ol strongpela wok bilong em. Olsem na i gat as na yumi ken mekim wankain tok olsem man bilong raitim Song i bin mekim: “Bikpela, yu bin wokim planti samting. Yu gat bikpela save na yu wokim olgeta dispela samting. Ol samting yu bin wokim i pulap tru long dispela graun.”—Song 104:24; 148:1-5.
2 Planti man long nau ol i givim baksait o ol i sakim ol samting i kamapim klia ol wok bilong Man bilong wokim olgeta samting. (Rom 1:20) Tasol em i gutpela tru sapos yumi tingim ol dispela samting na skelim i stap bilong yumi long ai bilong God na tingim ol samting em i laik yumi mas mekim. Jop sapta 38 i go 41 i helpim yumi long mekim olsem, long wanem, long ol dispela sapta Jehova i kirapim Jop long tingim sampela strongpela wok bilong em. Tingim sampela bikpela tok God i kamapim.
Ol Strongpela na Gutpela Wok
3. Olsem Jop 38:22, 23, 25-29 i kamapim, God i mekim ol askim long wanem ol samting?
3 God i askim Jop olsem: “Olsem wanem? Yu bin i go lukim ol bakstua ais na ren ais i stap long en, a? Mi bin putim ol dispela samting i stap redi bilong mekim save long ol lain manmeri i mekim nogut na kirapim pait long ol arapela lain.” Ais na ren ais i save pundaun long planti hap. God i tok moa: “Husat i bin wokim baret antap long skai bai bikpela ren i ken bihainim na kapsait i kam daun long graun? Na husat i bin wokim rot bilong lait bilong klaut i ken bihainim na sut i go nabaut long taim klaut i pairap? Husat i mekim ren i pundaun long ples drai i no gat man i stap long en? Pastaim dispela graun i bin i stap nating na i no gat ol diwai na gras samting i kamap long en. Tasol ren i inapim tru dispela graun, na planti gras i kamap. Olsem wanem? Ating ren na wara bilong nait i gat papa, a? Na husat i mama bilong ais na bilong ren ais i save pundaun long graun?”—Jop 38:22, 23, 25-29.
4-6. Olsem wanem yumi ken tok ol man i no save gut long ol samting bilong ais?
4 Sampela ol i save sindaun long hap ol man i save mekim hariap ol samting, na ol i no laik bai wanpela samting i pasim wokabaut na raun bilong ol, olsem na ating ol bai ting ais em samting i save kamapim hevi. Tasol planti man i ting ais em i gutpela samting, na i opim rot long ol man i ken mekim kain kain spot samting bilong taim bilong kol. Tingim askim God i bin kamapim long Jop na askim yu yet olsem: Yu save gut long ol samting bilong ais, na yu save ais i luk olsem wanem? Tru, yumi save bikpela hip ais i luk olsem wanem—ating yumi yet i bin lukim o yumi lukim long piksa. Tasol olsem wanem long wan wan hap ais ol i kolim snoflek? Yu save ol i luk olsem wanem, o yu bin skelim ol gut long hap ol i save kam long en?
5 Sampela man i bin skelim ol snoflek na kisim piksa bilong ol inap planti yia pinis. Wanpela snoflek i gat 100 liklik liklik hap ais long en, em ol i gat kain kain naispela mak. Buk Atmosphere i tok: “I gat planti kain kain mak bilong ol snoflek, na maski ol saientis i tok i no gat wanpela lo i pasim mak bilong ol snoflek long kamap wankain, ol i no bin painim tupela snoflek i gat wankain mak long en. Wilson A. Bentley i bin bosim bikpela wok bilong skelim dispela samting, na em i bin lusim 40 yia bilong skelim na kisim piksa bilong ol snoflek long maikroskop, na em i no bin painim tupela snoflek i gat wankain mak long en.” Na maski wan wan taim tupela snoflek i luk wankain, bai yumi kirap nogut yet long planti kain kain mak bilong ol snoflek, a?
6 Tingim askim bilong God: “Yu bin i go lukim ol bakstua ais na ren ais i stap long en, a?” Planti ol i ting ol klaut em i ples ais i save kamap long en, olsem bakstua bilong en. Sapos yu inap i go long kain bakstua olsem bilong skelim hamas narapela narapela kain snoflek i stap, na skelim ol snoflek i save kamap olsem wanem, bai yu kirap nogut long en, a? Wanpela buk bilong saiens i tok: “Ol i no save ol liklik liklik samting bilong ol hap ais i kamap olsem wanem, em ol dispela samting i bikpela samting bilong tanim ren i kamap ais long bikpela kol olsem 40 digri Selsias.”—Song 147:16, 17; Aisaia 55:9, 10.
7. Ol man i gat wanem kain save long ol samting bilong ren?
7 Olsem wanem long ren? God i bin askim Jop olsem: “Olsem wanem? Ating ren na wara bilong nait i gat papa, a?” Dispela buk bilong saiens i tok: “Ol samting i kamap long ples antap i narapela kain, na planti kain kain smok na ol liklik liklik samting i save stap long win, olsem na ol saveman i no inap stori gut long olsem wanem ol klaut na ren na ais samting i save kamap.” Ol saientis i bin kamapim tingting bilong ol, tasol ol i no inap stori gut long ol samting bilong ren. Tasol yu save olsem ren i save pundaun, na i givim wara long graun na i lukautim ol plaua na diwai, na long dispela rot yumi inap i stap laip na stap gut.
8. Bilong wanem tok bilong Pol i stap long Aposel 14:17 i stret tru?
8 Ating bai yu wanbel wantaim tok bilong aposel Pol. Em i laik kirapim ol man long luksave olsem ol dispela gutpela wok i tokaut long dispela Man i bin wokim ol. Pol i tok long God Jehova olsem: “Em i no bin hait olgeta bai ol man i no ken save long em. Nogat. Oltaim em i save mekim gutpela pasin long yupela. Em i mekim ren i lusim skai na i kam daun long yupela, na em i mekim planti gutpela kaikai i kamap. Em i givim yupela planti kaikai na i mekim bel bilong yupela i amamas.”—Aposel 14:17; Song 147:8.
9. Olsem wanem ol gutpela wok bilong God i save kamapim klia bikpela strong bilong em?
9 Yumi ken save tru olsem Man i bin wokim ol dispela gutpela samting i save helpim yumi, em i gat bikpela save na strong. Bilong kamapim klia bikpela strong bilong em, tingim dispela samting: Ol i tok, bikpela ren wantaim klaut i pairap i save kamap inap 45,000 taim long olgeta wan wan de, winim 16 milion taim long olgeta yia. Long olgeta hap, bikpela ren olsem i wok long kamap inap 2,000 taim long nau stret. Ol klaut bilong bikpela ren wantaim klaut i pairap i save tantanim wantaim bikpela strong i wankain olsem strong bilong 10-pela bom nuklia ol i bin tromoi long Namba Tu Pait. Yu save lukim hap bilong dispela strong taim klaut i bruk na lait bilong en i sut i go. Lait bilong klaut i gat bikpela strong, na tu, em i helpim wok bilong kamapim ges naitrojen, em dispela samting i save go long graun, na ol diwai na plaua samting i save kisim olsem gris bilong graun. Olsem na taim klaut i bruk, dispela i save kamapim bikpela strong, tasol tu em i helpim ol samting bilong graun.—Song 104:14, 15.
Yu Kisim Wanem Tingting Long Dispela?
10. Olsem wanem bai yu bekim ol askim i stap long Jop 38:33-38?
10 Tingim olsem yu yet yu Jop, na God i Gat Olgeta Strong i givim ol askim long yu. Ating bai yu wanbel long tok olsem planti man i no save tingim tumas ol gutpela wok bilong God. Long Jop 38:33-38 yumi ken ritim ol samting Jehova i askim yumi long en. “Ating yu save long ol lo em ol sta bilong skai i save bihainim, laka? Yu inap long mekim ol samting bilong graun tu i bihainim ol dispela lo? Ating yu inap bikmaus long ol klaut na ol i harim tok bilong yu na kapsaitim bikpela ren antap long yu, a? Na sapos yu tokim lait bilong klaut long i go long wanpela hap, ating lait bilong klaut bai i tokim yu olsem, ‘Mi redi tasol long mekim wok bilong yu.’ Husat i bin givim save long ol pisin ol i kolim longpela nek long wanem taim haiwara bai i kamap? Na husat i bin givim save long ol kakaruk long singaut long taim tulait i laik kamap? Husat i gat save inap long kaunim olgeta klaut? Ol klaut i olsem sospen wara i stap long skai, na husat inap kapsaitim ol na mekim ren i pundaun na das bilong graun i kamap malumalum na i pas long graun gen?”
11, 12. Wanem sampela samting i soim olsem God em i Man bilong mekim ol strongpela wok?
11 Yumi bin skelim wan wan samting tasol em Elihu i bin tokim Jop long en, na yumi bin stori long sampela askim Jehova i bin tokim Jop long bekim olsem wanpela “man tru.” (Jop 38:3) Mipela i tok “sampela,” long wanem, long Jop sapta 38 na 39, Jehova i toktok long ol narapela bikpela samting em i bin wokim. Olsem: Em i toktok long ol sta bilong heven. Husat i save long ol lo bilong ol? (Jop 38:31-33) Jehova i toktok long Jop long sampela animal, olsem laion na kotkot, wel meme bilong maunten na sibra, wel bulmakau na muruk, hos na tarangau. Ating Jop i bin kamapim ol pasin bilong ol dispela animal bambai ol inap i stap laip na kamap gut, a? Nogat. Ating bai yu amamas long stadi gut long ol dispela sapta, na bai yu amamas moa long mekim olsem sapos yu save laikim ol hos o ol narapela animal.—Song 50:10, 11.
12 Yu inap skelim tu Jop sapta 40 na 41, em long ol dispela sapta Jehova i askim Jop long bekim ol askim long tupela kain animal. Dispela tupela animal em hipopotamus i gat traipela na strongpela skin, na bikpela pukpuk bilong wara Nail (Leviatan). Tupela wantaim i gutpela samting God i bin wokim na i stret yumi tingim ol. Orait yumi mas kisim wanem kain tingting long dispela? Nau bai yumi stori long en.
13. Ol askim bilong God i mekim wanem long Jop? Ol dispela samting i mas mekim wanem long yumi?
13 Jop sapta 42 i soim yumi long ol samting ol askim bilong God i mekim long Jop. Pastaim Jop i bin tingting tumas long em yet na long ol narapela man. Tasol taim em i harim tok Jehova i mekim bilong stretim em, em i senisim tingting bilong em. Em i tok: “Bikpela, mi save nau, yu tasol inap mekim olgeta samting. Na taim yu laik mekim ol wok bilong yu, i no gat wanpela samting inap pasim yu. Yu bin askim mi olsem, ‘Husat dispela man i no gat gutpela tingting na save na i laik paulim ol samting mi laik mekim?’ Sori tumas, mi bin mekim planti kranki toktok long ol samting mi no klia olgeta long as bilong en. Ol dispela narakain gutpela samting mi bin toktok long en, ol i winim tru tingting na save bilong mi.” (Jop 42:2, 3) Em nau, taim Jop i tingim ol gutpela wok bilong God, em i tok ol dispela gutpela samting i winim tru tingting na save bilong em. Taim yumi skelim pinis ol dispela gutpela samting, yumi tu i mas pilim tru bikpela save na strong bilong God. Tasol olsem wanem? Em i mas kirapim yumi long tingim bikpela strong na save bilong God na em tasol? O em i mas kirapim yumi long mekim sampela samting moa?
14. Devit i ting olsem wanem long ol strongpela wok bilong God?
14 Long Song 86 yumi ken lukim tok bilong Devit, em pastaim em i bin tok olsem: “Skai i soim yumi olsem God i nambawan tru. Olgeta samting bilong antap i soim yumi gutpela wok bilong em. Olgeta de i save tokaut long dispela samting. Na olgeta nait i tokim yumi gen.” (Song 19:1, 2) Tasol Devit i mekim sampela tok moa. Song 86:10, 11 i tok: “Yu tasol yu gat bikpela strong. Na yu tasol yu save mekim kain kain gutpela gutpela samting. Yu wanpela yu God tru. Bikpela, yu mas skulim mi gut long pasin yu laik mi mekim, na oltaim bai mi bihainim laik bilong yu. Lainim mi gut bai mi tingting long yu wanpela tasol, na mi mekim wok bilong yu oltaim.” Devit i kirap nogut long ol gutpela samting God i bin mekim, na em i daun na pret long Em. Yu inap save long as bilong dispela pasin bilong Devit. Em i no laik mekim sampela samting em Man bilong mekim ol dispela strongpela wok em i no laikim. Yumi tu i no laik mekim pasin God i no laikim.
15. Bilong wanem i stret na Devit i pret long God?
15 Devit i save olsem God i save bosim ol bikpela strong bilong heven na graun, olsem na em inap mekim wok long ol dispela strong bilong bagarapim ol man em i no orait long ol. Dispela i makim olsem samting nogut bai painim ol. God i askim Jop: “Olsem wanem? Yu bin i go lukim ol bakstua ais na ren ais i stap long en, a? Mi bin putim ol dispela samting i stap redi bilong mekim save long ol lain manmeri i mekim nogut na kirapim pait long ol arapela lain.” Ais, ren ais, bikpela ren, win, na klaut i bruk, em ol samting God i ken mekim wok long en bilong mekim pait. Na ol dispela samting i gat bikpela strong tru!—Jop 38:22, 23.
16, 17. Wanem samting i kamapim klia bikpela strong bilong God? Olsem wanem em i bin yusim dispela strong long bipo?
16 Ating yu inap tingim sampela bikpela bagarap i bin kamap long hap bilong yu em bikpela win ren, ren ais, o bikpela tait i bin kamapim. Olsem: Long pinis bilong yia 1999, ol strongpela win i kamap long hap saut-wes bilong Yurop. Ol saveman bilong tokaut long taim san o ren o win bai kamap, ol tu i kirap nogut long dispela. Win i spit i go inap 200 kilomita long wanpela aua, na em i rausim rup bilong planti tausen haus, na daunim planti pos bilong paua, na kapsaitim ol trak. Tingim dispela: Ol strongpela win i rausim o brukim inap 270 milion diwai—10,000 bilong ol dispela diwai i stap long pak bilong Vesai, ausait long Paris. Planti milion haus i no gat paua. Klostu olsem 100 man i dai. Olgeta dispela samting i bin kamap insait long liklik hap taim tasol. Man! Win i gat bikpela strong tru, a?
17 Man inap tok ol bikpela win i save kamap nating na i no gat samting i save stiaim raun bilong en. Tasol wanem samting bai kamap sapos dispela God i gat olgeta strong na i save mekim ol strongpela wok, em bai stiaim na mekim wok long ol dispela strong? Em i bin mekim olsem long taim bilong Abraham, em dispela man i bin kisim save olsem Jas bilong skelim graun olgeta em i skelim pinis pasin nogut bilong tupela taun, Sodom na Gomora. Pasin bilong ol i nogut tru, na God i harim krai bilong ol man i gat tok long dispela samting, na em i helpim ol stretpela man long lusim dispela tupela taun i laik bagarap. Baibel i tok: “Bikpela i salim ol hatpela ston wantaim paia i pundaun antap long” dispela tupela taun. Dispela tu em i wanpela strongpela wok bilong God, olsem em i save lukautim ol stretpela man na bagarapim ol man nogut.—Stat 19:24.
18. Aisaia sapta 25 i stori long wanem ol narakain samting?
18 Bihain, God i pasim tok long bagarapim taun Babilon bilong bipo, na ating Aisaia sapta 25 i tok long dispela taun. God i tok profet olsem wanpela taun bai bagarap: “Yu bin mekim ol biktaun i kamap hip pipia na ol taun i gat strongpela banis i bagarap olgeta. Ol strongpela biktaun bilong ol birua i pinis olgeta, na ol bai i no inap kirapim gen.” (Aisaia 25:2) Long nau ol man i go lukim hap em taun Babilon i bin stap long en long bipo, ol i ken tok dispela tok em i tru. Olsem wanem? Dispela samting i kamap nating tasol? Nogat. Yumi ken bilip long tok Aisaia i mekim: “Bikpela, yu God bilong mi, na mi laik litimapim nem bilong yu. Yu save mekim ol narakain samting tru bilong helpim mipela. Yu inapim tru olgeta samting bipo yet yu bin tok long mekim.”—Aisaia 25:1.
Ol Gutpela Wok Bai Kamap Bihain
19, 20. Yumi ken wetim wanem samting bai kamap bilong truim tok bilong Aisaia 25:6-8?
19 God i truim dispela tok profet long bipo, na em bai mekim ol gutpela samting long bihain tu. Aisaia i tok long “ol narakain samting” bilong God, na long ol ves i stap klostu yumi lukim wanpela tok profet em truim bilong en bai kamap bihain, olsem tok profet bilong bagarapim Babilon i bin kamap tru. Em i tok promis long wanem “ol narakain samting” bai kamap? Aisaia 25:6 i tok: “Long maunten Saion, Bikpela I Gat Olgeta Strong bai i redim bikpela kaikai tru. Bai i gat planti gutpela gutpela abus na nambawan wain tru bilong dring. Na ol manmeri bilong olgeta kantri bai i kam bung long dispela kaikai.”
20 Dispela tok profet bai kamap tru long nupela taim i klostu pinis, em God i bin tok promis long kamapim. Long dispela taim, ol hevi i save daunim planti man long nau, ol bai pinis. Tok profet i stap long Aisaia 25:7, 8, i tok promis olsem God bai mekim wok long strong bilong em long mekim ol nambawan gutpela samting tru: “Em bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri. Na em bai i pinisim sem i stap long ol manmeri bilong en long olgeta hap bilong graun. Bikpela i tok pinis long mekim olsem.” Bihain aposel Pol i kolim dispela tok taim em i toktok long God bai kirapim bek ol man i dai pinis. Em i wanpela gutpela wok tru, a?—1 Korin 15:51-54.
21. God bai mekim wanem gutpela wok long ol man i dai pinis?
21 Narapela as na aiwara bilong bel hevi bai pinis em olsem: Olgeta kain sik bai pinis. Taim Jisas i stap long graun, em i oraitim sik bilong planti man, ol aipas i lukluk gen, ol yaupas i harim gen, na ol man em skin bilong ol i bagarap i kisim strong gen. Jon 5:5-9 i stori long Jisas i oraitim wanpela man i no bin wokabaut inap 38 yia. Ol man i lukim dispela, ol i ting em i narakain tru na i nambawan gutpela wok. Na tru tumas, em i olsem! Tasol Jisas i tokim ol long wanpela samting i gutpela moa yet—ol man i dai pinis ol bai kirap bek: “Yupela i no ken tingting planti long dispela tok bilong mi. Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait. Ol manmeri i bin mekim gutpela pasin, ol bai i kirap bek na i stap laip.”—Jon 5:28, 29.
22. Ol man i stap rabis na ol man i karim pen na hevi, bilong wanem ol i ken wet long gutpela samting bai kamap?
22 Dispela samting bai kamap tru, long wanem, Jehova yet i tok promis olsem. Yu inap bilip tru olsem taim em i mekim wok long bikpela strong bilong em, ol samting bai kamap gutpela tru. Song 72 i kamapim klia ol samting em bai mekim long rot bilong Pikinini bilong em, em i King. Long dispela taim ol stretpela manmeri bai stap strong. Gutaim bai stap long olgeta hap. God bai helpim ol man i stap rabis na ol man i karim pen na hevi. Em i tok promis olsem: “Planti rais na wit samting i ken kamap long ol gaden bilong ol manmeri, inap olsem i save kamap long Lebanon [bilong bipo]. Na ol manmeri i ken kamap planti long ol taun, olsem gras i save kamap planti long olgeta hap.”—Song 72:16.
23. Ol gutpela wok bilong God i mas kirapim yumi long mekim wanem?
23 Tru tumas, i gat as tru na yumi mas tingim ol strongpela wok bilong Jehova—ol samting em i bin mekim long bipo, na ol samting em i wok long mekim long nau, na ol samting em i bin tok promis long mekim long bihain. Baibel i tok: “Litimapim nem bilong God, Bikpela bilong ol Israel. Em wanpela tasol i save mekim ol dispela gutpela samting. Litimapim gutpela nem bilong em oltaim oltaim. Biknem bilong en i ken inapim olgeta graun. I tru tumas.” (Song 72:18, 19) Oltaim yumi mas givim bel long toktok long ol dispela samting wantaim ol wanblut na ol narapela man. Em nau, yumi “mas tokim olgeta lain manmeri long biknem bilong em na long olgeta gutpela wok em i bin mekim.”—Song 78:3, 4; 96:3, 4.
Bai Yu Bekim Olsem Wanem?
• Olsem wanem ol askim God i mekim long Jop i kamapim klia olsem save bilong ol man i sot?
• Wanem sampela strongpela wok bilong God em Jop sapta 37 i go 41 i tok long en i kirapim tru tingting bilong yu?
• Yumi mas mekim wanem taim yumi tingim sampela gutpela wok bilong God?
[Ol Piksa long pes 10]
Yu kisim wanem kain tingting taim yu tingim planti kain kain mak bilong ol snoflek na bikpela strong bilong klaut i bruk na lait i sut i go?
[Kredit Lain]
snowcrystals.net
[Ol Piksa long pes 13]
Toktok long ol gutpela wok bilong God long olgeta taim