Mipela i No Stap Wanpis Taim Samting i Traim Bilip Bilong Mipela

Vicky i naispela pikinini meri​—⁠em i gat gutpela skin na i save amamas. Taim em i kamap long 1993, mipela i bin kisim bikpela amamas tru. Mipela i stap long wanpela liklik taun long hap saut bilong Swiden, na i stap bilong mipela i gutpela.

TASOL taim Vicky i gat wanpela krismas na hap, bikpela hevi i painim mipela. Em i sik inap longtaim liklik, olsem na mipela i kisim em i go long haus sik. Mipela i no inap lusim tingting long dispela taim em dokta i tokim mipela olsem pikinini meri bilong mipela i gat bikpela sik kensa bilong blut ol i kolim limfoblastik lukimia​—⁠wanpela kain sik kensa i save kamap long ol pikinini na i save bagarapim ol waitpela sel bilong blut.

Mipela i hatwok long tingim olsem liklik pikinini meri bilong mipela i kisim dispela bikpela sik. Nau tasol em i kirap long kisim save long ol samting em i lukim, na nau dispela sik inap kilim em i dai. Dokta i laik mekim gut bel bilong mipela na em i tokim mipela olsem ol inap helpim Vicky long kamap orait liklik long rot bilong givim kimoterapi na blut long em. Dispela samting tu i bagarapim bel na tingting bilong mipela.

Samting i Traim Bilip Bilong Mipela

Mipela i laikim tru pikinini meri bilong mipela na mipela i laik bai em i kisim nambawan gutpela marasin samting bilong oraitim sik bilong em. Tasol mipela i no laik tru bai ol i givim blut long em. Mipela i bilip strong long tok bilong Baibel olsem ol Kristen i mas abrusim blut. (Aposel 15:​28, 29) Mipela i save tu olsem blut inap kamapim sampela hevi. Planti tausen man i kisim blut ol i bin kisim sik long en na ol i dai. Wanpela rot tasol bilong oraitim sik bilong em na mipela i orait long en em olsem: Givim ol nambawan gutpela marasin samting long em, na no ken mekim wok long blut. Long dispela samting, pait bilong mipela long holimpas bilip i kirap.

Mipela inap mekim wanem? Mipela i askim Hospital Infomesen Sevis long brens-ofis bilong ol Witnes Bilong Jehova long Swiden long helpim mipela.a Wantu, ol i salim feks i go long ol narapela narapela haus sik long Yurop bilong painim wanpela haus sik na dokta i orait long givim kimoterapi na i no mekim wok long blut. Pasin bilong ol brata Kristen long givim bel long helpim mipela na pasin sori bilong ol, dispela i strongim tru bel bilong mipela. Ol i no larim mipela i stap wanpis long mekim dispela pait bilong holimpas bilip.

Insait long sampela aua tasol ol i painim wanpela haus sik na wanpela dokta long Hombek/Sar, Jemani. Ol i stretim rot bilong mipela long kisim balus i go long dispela hap long de bihain na bai ol i ken skelim gut sik bilong Vicky. Taim mipela i kamap, ol brata Kristen bilong mipela long kongrigesen bilong ol Witnes Bilong Jehova long Hombek na sampela wanblut ol i wetim mipela. Wanpela brata bilong Hospital Lieson Komiti i tok amamas long bungim mipela. Em i go wantaim mipela long haus sik na em i helpim tru mipela. Maski mipela i go long narapela kantri, ol brata spirit i helpim mipela na dispela i mekim gut bel bilong mipela.

Taim mipela i bungim pinis Dokta Graf, dispela i mekim isi bel bilong mipela. Em i pilim tru hevi bilong mipela na em i tok em bai mekim olgeta samting em inap long mekim bilong oraitim sik bilong Vicky na em i no inap mekim wok long blut. Maski mak bilong hemoglobin long blut bilong Vicky i go daun long 5 gram long olgeta wan wan desilita, em i orait long givim yet kimoterapi long em na blut nogat. Em i tok tu olsem pasin bilong kisim save kwik long sik bilong Vicky na bringim em i kam hariap long haus sik long Jemani, dispela inap helpim ol long oraitim sik bilong Vicky. Em i tokaut olsem dispela em i namba wan taim bilong em long givim kimoterapi na i no mekim wok long blut long kain sik olsem bilong Vicky. Mipela i tenkyu tru na amamas long pasin bilong Dokta Graf, olsem em i strongim bel na tingting strong long helpim mipela.

Hevi Bilong Mani

Nau i gat askim olsem: Olsem wanem bai mipela inap long baim haus sik na bai ol i ken givim ol marasin samting long Vicky? Mipela i kirap nogut taim ol i tokim mipela olsem pe bilong olgeta marasin samting ol bai givim long Vicky insait long 2-pela yia bai inap olsem 180,000 kina. Mipela i no gat kain mani olsem, tasol Vicky i mas kirap kwik long kisim ol marasin samting. Mipela i lusim Swiden na go long Jemani bilong lukim dokta, olsem na mipela i no gat rot long kisim helpim long ol helt insurens samting. Pikinini meri bilong mipela em i sik nogut tru na i gat dokta i redi long helpim mipela, tasol mani bilong mipela i no inap long baim haus sik.

Haus sik i helpim mipela na ol i tok ol bai kirap kwik long givim ol marasin samting long Vicky sapos mipela i baim 24,000 kina pastaim na sainim pepa bilong tokaut olsem bihain mipela bai baim hap mani i stap yet. Mipela i gat sampela mani mipela i bin bungim na ol pren na ol wanblut i helpim mipela na mipela i baim 24,000 kina​​—⁠tasol olsem wanem long hap mani i stap yet?

Wanpela samting i kamap na dispela i kirapim mipela long tingim gen olsem mipela i no stap wanpis long dispela pait bilong holimpas bilip. Wanpela brata spirit em mipela i no bin save long em pastaim, em i laik givim mani bilong inapim dispela pe. Tasol mipela i no gat wok long kisim dispela mani, long wanem, mipela i stretim ol narapela rot bilong inapim dispela pe.

Ol Dokta i Mekim Wok

Ol i kirap long givim kimoterapi long Vicky. Planti de na wik i lus. Sampela taim i hatwok tru long liklik pikinini bilong mipela na mipela yet. Tasol mipela i save amamas tru na tenkyu tru taim mipela i lukim olsem em i wok long kamap orait liklik. Inap 8-pela mun olgeta ol i givim kimoterapi long em. Mak bilong hemoglobin long blut bilong Vicky i bin go daun tru inap long 6 gram long olgeta wan wan desilita, na Dokta Graf i bihainim tok promis bilong em.

Winim 6-pela yia i lus na ol dokta i skelim gen blut bilong em na ol i lukim olsem sik lukimia i pinis olgeta. Nau em i stap amamas na sik i pinis olgeta long em. Yes, i kain olsem wanpela mirakel long Vicky i kamap orait gen. Mipela i save olsem planti pikinini i gat dispela sik ol i save dai maski ol i kisim kimoterapi na blut.

Mipela i bin winim dispela pait bilong holimpas bilip, na ol wanblut na ol brata sista Kristen na ol dokta i bin helpim mipela long winim dispela pait. Hospital Infomesen Sevis i bin helpim mipela long san na long nait. Dokta Graf na ol wanwok bilong em ol i bin mekim wok long save bilong ol bilong helpim Vicky long kamap orait. Mipela i tenkyu tru long olgeta dispela samting.

Bilip Bilong Mipela i Kamap Strong

Tasol bikpela samting tru, mipela i tenkyu long God bilong mipela, Jehova, long gutpela pasin bilong em long tingim tru mipela na strongim mipela long rot bilong ol tok bilong em long Baibel. Taim mipela i tingim gen ol dispela samting, mipela i luksave olsem mipela i bin lainim planti samting tru na dispela hevi i painim mipela em i strongim tru bilip bilong mipela.

Nau mipela i laik tru long pas gut wantaim God Jehova na skulim pikinini meri bilong mipela long em i bikpela samting long bihainim laik bilong God long i stap bilong yumi. Mipela i laik givim gutpela samting bilong spirit long em, bambai em i ken kisim laip oltaim long Paradais bai kamap long graun.​​—⁠Wanpela man i salim dispela stori i kam.

[Futnot]