Rot Bilong Daunim Bel Hevi

● Asap i toktok planti olsem: “Mi bin lukaut gut na bel bilong mi i stap klin, na mi no bin mekim sampela sin. Ating dispela em i lus nating, a? Long wanem, God, yu givim pen long mi long san na long nait, na olgeta moningtaim yu mekim save long mi.”​​—⁠Song 73:​13, 14.

● Baruk i bel hevi na i tok: “Sori tru, mi gat planti hevi na pen, na Bikpela i skruim hevi bilong mi i go moa yet. Mi wok long krai i stap na mi les tru. Hevi bilong mi i no save pinis. Em i stap olsem tasol.”​​—⁠Jeremaia 45:​2, 3.

● Naomi i krai olsem: “God I Gat Olgeta Strong i bin mekim nogut long mi, . . . Taim mi lusim dispela ples, mi gat planti samting, tasol nau Bikpela i bringim mi i kam bek na mi no gat wanpela samting. Bilong wanem yupela i kolim mi meri bilong belgut? Bikpela, em God I Gat Olgeta Strong, em i bin tok na mi bagarap olgeta.”​​—⁠Rut 1:​20, 21.

BAIBEL i stori long planti man i lotu long Jehova na stap gut long em, tasol sampela taim ol i bin kisim bikpela bel hevi tru. Olsem man bilong graun i gat sin, sampela taim yumi olgeta i save bel hevi olsem. Ating sampela bilong yumi i save bel hevi planti taim, long wanem, sampela bikpela hevi i bin painim yumi, na dispela inap mekim na yumi sori sori long yumi yet.

Tasol sapos yumi no daunim ol dispela kain tingting, dispela inap bagarapim pasin bilong yumi long stap gut wantaim God Jehova na ol narapela. Wanpela meri Kristen i save sori sori long em yet, em i tok: “Taim ol manmeri long kongrigesen i bin singautim mi long go bung wantaim ol planti taim mi no bin i go, long wanem, mi pilim olsem mi no gutpela inap long mi ken bung wantaim ol.” Dispela kain tingting inap bagarapim tru i stap bilong yumi! Orait yu ken mekim wanem bilong daunim ol dispela kain tingting?

Go Klostu Long Jehova

Long Song 73, Asap i tokaut stret long hevi bilong em. Taim em i skelim i stap bilong em wantaim i stap bilong ol man nogut, em i bel kaskas long gutpela sindaun bilong ol. Em i lukim olsem ol man i givim baksait long God ol i hambak na paitim ol narapela, na i olsem ol i abrusim strafe. Orait nau Asap i tok em i ting pasin bilong bihainim stretpela pasin i no inap helpim em.​​—⁠Song 73:​3-​9, 13, 14.

Olsem Asap, yu bin lukim ol man i hambak long ol rong ol i mekim, tasol i luk olsem ol samting bilong ol i kamap gutpela? Asap i mekim wanem bilong daunim ol dispela tingting kranki bilong em? Em i tok moa: “Mi tingting planti na mi traim long painimaut as bilong dispela samting ol man nogut i mekim. Tasol i hat tumas long mi. God, mi traim i go i go inap long taim mi go insait long haus bilong yu. Mi stap long haus bilong yu na tingting bilong mi i klia, na mi save long ol samting bai i kamap long ol man nogut.” (Song 73:​16, 17) Asap i kirap mekim sampela samting​—⁠em i beten long Jehova. Asap i wok strong long kamap “man i gat Holi Spirit,” na long dispela rot em i daunim pasin bilong em olsem “man i no gat Holi Spirit.” Em i kisim bek stretpela tingting​—⁠em i save gut olsem Jehova i nolaik tru long pasin nogut, na bihain ol man nogut bai kisim strafe.​​—⁠1 Korin 2:​14, 15.

Em i bikpela samting tru long yu mas larim Baibel i helpim yu long kisim stretpela tingting long dispela samting! Jehova i tokim yumi olsem em i save pinis long ol samting ol man nogut i mekim. Baibel i tok: “Nogut yupela i giamanim yupela yet na yupela i ting yupela inap long trikim God. Yupela bai i no inap tru. Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu. . . . Olsem na yumi no ken les long mekim gutpela pasin.” (Galesia 6:​7-9) Jehova bai mekim ol man nogut “i wokabaut long rot i wel moa yet”; em bai mekim ol i “pundaun na ol i bagarap olgeta.” (Song 73:18) Stretpela kot bilong God bai win long olgeta taim.

Sapos oltaim yu kisim kaikai bilong spirit long tebol bilong Jehova na bung wantaim lain bilong Jehova ol i save bihainim gutpela pasin, dispela bai helpim yu long strongim bilip na daunim bel hevi na ol narapela kain tingting kranki. (Hibru 10:25) Olsem Asap, sapos yu stap klostu long God, em bai helpim yu. Asap i tok moa: “Tasol mi stap wantaim yu oltaim na yu save holim han bilong mi. Yu save givim mi gutpela tok bilong stiaim wokabaut bilong mi, na bihain bai yu kisim mi na mi stap wantaim yu.” (Song 73:​23, 24) Wanpela Kristen, ol i bin mekim nogut long em taim em i pikinini yet, em i kisim save olsem dispela tok bilong Asap i gat gutpela tingting long en. Em i tok: “Mi save bung wantaim ol manmeri bilong kongrigesen, na dispela i soim mi olsem i stap bilong yumi i no gat ol samting nogut tasol long en​—⁠i gat ol gutpela samting tu i stap. Mi kisim save olsem ol elda Kristen i save laikim tru yumi​—⁠ol i no mekim pasin olsem plisman; ol i mekim pasin olsem wasman bilong sipsip.” Tru tumas, ol elda Kristen i gat pasin sori ol i mekim bikpela wok bilong helpim yumi long rausim ol tingting kranki inap bagarapim tru bel bilong yumi.​​—⁠Aisaia 32:​1, 2; 1 Tesalonaika 2:​7, 8.

Kisim Gutpela Tok Jehova i Givim

Kuskus bilong profet Jeremaia, em Baruk, em i bel hevi, long wanem, wok bilong em i mekim na em i les tru. Tasol long gutpela pasin isi, Jehova i helpim Baruk long kisim stretpela tingting. Em i tok: “Bilong wanem yu laik bai ol gutpela samting tasol i ken kamap long yu? Yu mas lusim dispela kain tingting, long wanem, mi Bikpela, mi wok long mekim nogut long olgeta manmeri bilong graun. Tasol bai mi helpim yu, na maski yu go long wanem hap, bai ol i no inap long kilim yu i dai.”​​—⁠Jeremaia 45:​2-5.

Em nau, Jehova i tokaut stret olsem Baruk i tingim ol samting bilong em yet tasol na dispela i as na em i bel hevi. Baruk i laik kisim ol gutpela samting tasol, na taim dispela laik i stap em i no inap kisim amamas long dispela wok em i kisim long God. Ating yu tu bai lukim olsem: Bilong daunim bel hevi, yu mas abrusim pasin bilong tingting long ol samting bilong yu yet, na yu mas kisim bel isi i save kamap long pasin bilong i stap bel gut, em God i save givim long yumi.​​—⁠Filipai 4:​6, 7.

Taim man na tupela pikinini man bilong Naomi i dai, em i no larim bel hevi i daunim em olgeta na em i stap tasol long Moap. Tasol ol samting i kamapim long ples klia olsem inap liklik hap taim em i bel nogut. Em i sori sori long em yet na tupela tambu meri bilong em. Taim em i salim tupela i go, Naomi i tok: “Bikpela i bin mekim nogut long mi, na mi sori tumas long yutupela.” Na tu, taim em i kamap pinis long Betlehem, em i tokaut strong: “Yupela i no ken kolim mi Naomi, em i olsem meri bilong belgut. Nogat. God I Gat Olgeta Strong i bin mekim nogut long mi, olsem na yupela i mas kolim mi Mara, em i olsem meri bilong bel nogut.”​​—⁠Rut 1:​13, 20.

Tasol Naomi i no krai krai i stap na stap wanpis longwe long Jehova na lain bilong em, nogat. Long kantri Moab em i bin harim tok olsem, “Bikpela i givim pinis gutpela taim bilong kaikai long ol manmeri bilong en.” (Rut 1:⁠6) Em i save, bilong helpim em yet, em i mas stap wantaim lain bilong Jehova. Bihain Naomi wantaim tambu meri bilong em Rut ol i go bek long Juda, na Naomi i helpim em long save long pasin em i mas mekim long wanblut bilong ol, em Boas, em man bilong baim bek em.

Na i wankain tu long nau. Ol man i stap gut long God, em poroman marit bilong ol i dai pinis, ol i save wok strong insait long kongrigesen Kristen na dispela i helpim ol long daunim bel hevi bilong ol. Olsem Naomi, ol i wok long givim bel tru long ol samting bilong spirit, na kaunim Tok Bilong God long olgeta de.

Pasin Bilong Bihainim Gutpela Tingting Em Inap Helpim Yumi

Ol dispela stori bilong Baibel i helpim yumi long sampela samting yumi ken mekim bilong daunim bel hevi. Asap i go long haus lotu bilong Jehova bilong kisim helpim na em i stap isi na wetim Jehova long helpim em. Baruk i bihainim ol gutpela tok em i kisim na em i no larim mani kago samting i pulim em. Naomi i save mekim wok namel long lain bilong Jehova, na em i wok long redim yangpela meri Rut long ol wok em inap mekim insait long lotu bilong trupela God.​​—⁠1 Korin 4:7; Galesia 5:​26; 6:⁠4.

Yu inap daunim bel hevi na ol narapela kain tingting kranki sapos yu tingting oltaim long ol gutpela samting Jehova i bin mekim bilong helpim lain bilong em​—⁠em ol man wan wan na olgeta wantaim. Bilong mekim olsem, tingim tingim long bel bikpela pasin sori Jehova i bin mekim long kamapim pe bilong baim bek yu. Pilim tru pasin bilong ol brata Kristen, em narapela i laikim tru narapela. Putim tingting i go long i stap bilong yu long nupela taim klostu nau God bai kamapim. Na yu ken mekim tok olsem Asap: “Mi stap klostu long yu na dispela i gutpela tru. God, Bikpela, yu banis tru bilong mi, na mi laik tokaut long olgeta samting yu bin mekim.”​​—⁠Song 73:28.