Yu Inap Bilip Long Lo Bilong Husat?
Wanpela man i kam nupela long Afrika em i kirap nogut long lukim wanpela man i sanap stret tru arere long rot. Em i luksave olsem insait long olgeta 5-pela 5-pela minit samting man i surik liklik i go long wanpela sait. Bihain man i nupela long dispela hap i kisim save long as na man i surik olsem. Man i laik hait long tewel bilong wanpela pos diwai em san i kamapim. Na tewel i wok long surik liklik taim san i bihainim rot bilong en.
OLSEM dispela tewel bilong pos san i kamapim i wok long senis senis, oltaim ol wok samting bilong ol man na ol lo ol i bihainim i wok long senis senis. Tasol God Jehova, em i “Papa i bin mekim kamap olgeta lait bilong skai,” em i no save senis senis. Disaipel Jems i tok: “Dispela Papa em i no save senisim nabaut pasin bilong en. Em i no olsem tewel bilong wanpela samting san i mekim i kamap, na em i go longpela na bihain em i go sotpela gen. Nogat.” (Jems 1:17) Profet Hibru Malakai i kamapim tok bilong God olsem: “Mi tasol mi Bikpela na mi no save senisim tingting bilong mi.” (Malakai 3:6) Long taim bilong Aisaia, God i tokim ol Israel: “Mi God bilong yupela, na bai mi lukautim yupela i go inap yupela i lapun pinis na i gat waitpela gras.” (Aisaia 46:4) Maski bikpela hap taim i lus pinis, dispela i no mekim na yumi no inap bilip moa long ol tok promis bilong God.
Lo i Skulim Yumi
Ol tok promis bilong Jehova i no save senis senis na yumi inap bilip long ol, na i wankain long ol lo bilong em i makim ol samting i stret na i no stret. Olsem wanem? Bai yu bilip long wanpela bisnisman i yusim tupela skel na wanpela tasol i stret? Nogat tru, a? Olsem tasol, “Bikpela i no laik tru long ol man i senisim mak long skel, bilong giamanim ol manmeri na pulim mani bilong ol. Tasol em i amamas tru long ol man i save skelim ol samting long mak stret.” (Sindaun 11:1; 20:10) Taim God i givim Lo long ol Israel, em i tokaut long wanpela lo olsem: “Taim yupela i metaim samting na skelim samting na kaunim ol samting bilong narapela man i baim, orait yupela i no ken giamanim em. Nogat. Yupela i mas metaim stret na skelim stret na kaunim stret ol samting. Mi Bikpela, mi God bilong yupela na mi bin kisim yupela long Isip na bringim yupela i kam.”—Wok Pris 19:35, 36.
Ol Israel i bihainim dispela lo, na dispela i mekim na God i amamas long ol, na tu, dispela i helpim ol long kisim planti gutpela samting bilong skin. Olsem tasol pasin bilong bihainim ol lo bilong Jehova, em long wok bilong skelim na metaim ol samting, na long olgeta narapela samting man i laik mekim, dispela i save givim ol gutpela blesing long ol man i lotuim God na bilip long em. God i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”—Aisaia 48:17.
Bilong Wanem Ol Lo i No Gat Strong Moa Long Nau?
Baibel i kamapim as na ol lo i no gat strong long bosim ol man long nau. Laspela buk bilong Baibel, em Kamapim Tok Hait, i stori long wanpela pait long heven, na i kam inap long nau ol man i karim hevi long ol samting pait i kamapim. Aposel Jon i tok: “Bikpela pait i kirap long heven. Maikel wantaim ol ensel bilong en ol i pait long dispela traipela snek. Na snek wantaim ol ensel bilong en ol i bekim pait long ol, tasol ol i no gat strong bilong winim pait. Olsem na ol i no inap i stap moa long heven, na ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.”—KTH 12:7-9.
Wanem samting i kamap taim pait i pinis? Jon i tok: “Olsem na yu heven, na yupela olgeta lain i stap long heven, yupela i ken amamas. Tasol yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.”—KTH 12:12.
“Bikpela hevi” i kamap long graun taim Namba Wan Pait i kirap long 1914, dispela pait i mekim na bikpela senis tru i kamap long tingting bilong ol man long wanem ol lo na pasin i stret. Wanpela meri bilong raitim stori bilong ol samting i bin kamap bipo, Barbara Tuchman, em i tok: ‘Bikpela Pait bilong 1914-1918 i stap olsem mak i brukim hap taim paslain long pait na hap taim bihain long en. Dispela pait i bin kilim i dai planti man em ol inap mekim ol gutpela wok samting long bihain, na bagarapim ol bilip bilong ol man, na senisim tingting bilong ol, na i mekim na ol man i pilim olsem i no gat gutpela samting inap kamap bihain; dispela pait i stap olsem wanpela traipela baret namel long tupela hap taim.’ Narapela saveman, Eric Hobsbawm, em i wanbel na i tok olsem: ‘Bihain long 1914 ol man i no strong moa long bihainim ol lo em bipo ol man long ol kantri i gat planti wok bisnis i wanbel long en . . . Ol man i kirap na insait gen long ol pasin nogut tru, ating ol tumbuna bilong yumi long 200 yia i go pinis bai tok em ol pasin bilong man i no gat save, na i no gat lo i bosim ol.’
Long wanpela buk (Humanity—A Moral History of the Twentieth Century) Jonathan Glover i tok: “Wanpela samting long taim bilong yumi i olsem, strong bilong lo long stretpela pasin i wok long pinis.” Dispela man i no bilip tumas olsem i gat lo bilong stretpela pasin i kam long wanpela God, tasol pasin bilong ol man long hap bilong Wes long lusim lotu i kirapim em long tok: “Maski sampela bilong mipela i no bilip long ol lo bilong lotu long stretpela pasin, i stret mipela i tingting planti long pasin bilong ol narapela man long lusim ol dispela lo.”
Pasin giaman bilong nau—maski em long samting bilong wok bisnis, wok politik, lotu, o bilong sampela pren o famili—wantaim ol hevi dispela pasin i kamapim, em ol samting i insait long wok bilong Satan long givim hevi long ol manmeri i stap long graun. Satan em i strong tru long pait i go inap long pinis na long pulim ol man i wok long bihainim ol stretpela lo bilong God long kisim bagarap wantaim em.—KTH 12:17.
Yu ting i gat rot bilong pinisim pasin giaman i save bagarapim pasin bilong bilip long narapela? Aposel Pita i bekim dispela askim olsem: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13) Yumi inap bilipim dispela tok promis, long wanem, God i gat strong long kamapim laik bilong em, na tu, em i tok promis pinis olsem em bai i truim. Jehova i tokaut olsem: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.” Em wanpela tok promis yumi inap bilip tru long en!—Aisaia 55:11; KTH 21:4, 5.
Bihainim Ol Lo Bilong God
Long nau ol lo i wok long senis senis o ol i no gat strong olsem bipo, tasol ol Witnes Bilong Jehova i wok long bihainim ol lo bilong Baibel. Dispela i mekim na ol i narapela kain long planti manmeri, na dispela i kirapim tingting bilong sampela manmeri, na i kirapim sampela narapela long bel nogut long ol.
Long wanpela kibung bilong ol Witnes Bilong Jehova long Landon, wanpela niusman i givim askim long wanpela Witnes i stap olsem mausman bilong ol narapela long kibung, na em i laik save ol Witnes Bilong Jehova ol i Kristen tru o nogat? Witnes i bekim dispela askim olsem: “Yes mipela i Kristen tru, long wanem, mipela i bihainim ol lek mak bilong Jisas. Planti man i save tingim ol yet tasol, tasol mipela i save tingim Jisas, em i rot, na as bilong tok i tru, na laip. Mipela i bilip olsem Jisas em i Pikinini bilong God, em i no hap bilong wanpela God Triwan, olsem na save bilong mipela long Baibel i no wankain olsem bilong ol bikpela lotu.”
Taim dispela stori i kamap long nius BBC long televisen, niusman i pinisim toktok bilong program olsem: “Mi kisim bikpela save moa long as na ol Witnes Bilong Jehova i kam long haus bilong yumi. Na mi no ting i gat wanpela taim mi bin lukim 25,000 pipel i bung wantaim na bilas gut na bihainim ol gutpela pasin olsem.” Em i gutpela tok tru i kam long wanpela man i no Witnes, na i kamapim klia gutpela tingting long pasin bilong bihainim ol lo bilong God i no save senis senis!
Tru, ating sampela bai les long bihainim ol lo ol yet i no kamapim, tasol mipela i laik kirapim yu long skelim Baibel bilong yu na lainim ol lo bilong God. Tasol no ken skelim ol bikpela tok tasol. Bihainim tok bilong aposel Pol, em i tok: “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.” (Rom 12:2) Go long Haus Kingdom i stap long hap bilong yu, na kisim save long ol Witnes i bung long en. Bai yu luksave olsem ol Witnes em ol manmeri tasol, na ol i bilip long ol tok promis bilong Baibel, na long rot bilong bihainim ol lo bilong em ol i kamapim klia olsem ol i bilip long God.
Yumi inap kisim ol gutpela blesing long laip bilong yumi taim yumi holimpas ol gutpela lo bilong God i no save senis senis. Bihainim dispela singaut i kam long God: “Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.”—Aisaia 48:18.
[Ol Piksa long pes 5]
Long nau, ol man i hatwok long bilip long ol samting bilong wok bisnis, wok politik, lotu, na famili