Askim

Long 1 Pita 4:​3, yumi ritim olsem paslain long sampela man i kamap Kristen ol i bin “sakim lo bilong God na mekim lotu long ol giaman god.” Ating olkain pasin bilong lotuim ol giaman god i brukim lo bilong God na God i tambuim, a?

Yes, long tingting bilong God, olkain pasin bilong lotuim giaman god i brukim lo. Ol man i laik bai God i orait long ol, ol i no inap insait long dispela pasin.​—⁠1 Korin 5:11; KTH 21:⁠8.

Tasol i luk olsem, aposel Pita i stori long narapela kain tingting long pasin bilong lotuim giaman god. Olsem: Long planti kantri bilong bipo tru, planti man i insait long pasin bilong lotuim god giaman, na ol hetman bilong graun i no gat tok long dispela. Olsem lo bilong gavman i no tambuim kain pasin olsem. Na tu, sampela pasin bilong lotuim god giaman i insait long sampela wok gavman. Olsem na taim ol i no kamap Kristen yet, sampela i bin insait long ‘pasin bilong lotuim giaman god em lo i no pasim ol man long mekim.’ (Baibel New World Translation, bilong 1950) Yumi ken tingim King Nebukatnesar bilong Babilon, em i bin wokim wanpela imis gol, tasol ol wokboi bilong Jehova, em Satrak, Mesak, na Abetnego, ol i no laik tru long lotuim dispela imis.​—⁠Daniel 3:​1-12.

Narapela tingting i olsem: Planti pasin ol man i mekim bilong lotuim giaman god i nogut tru na i pait long lo bilong bel, em stretpela tingting God i givim long olgeta man. (Rom 2:​14, 15) Aposel Pol i stori long sampela pasin nogut tru em pasin “God i no wokim ol manmeri long mekim” na pasin “i gat sem,” na planti taim ol kain pasin olsem i insait long sampela wok bilong mekim lotu. (Rom 1:​26, 27) Ol man na meri i insait long dispela pasin bilong sakim lo na lotuim giaman god, ol i sakim lo i stap long bel bilong man. Na i stret ol man i laik kamap Kristen i lusim ol dispela pasin nogut.

Na tu, ol kain pasin olsem bilong lotuim giaman god em ol man i no bilong lain Juda i bihainim, God Jehova i tambuim ol dispela samting. Olsem na man i insait long dispela samting, em i sakim lo.a​—⁠Kolosi 3:​5-7.

[Futnot]