Tok Bilong God i Gat Laip
Yu Laik Lotuim Wanpela Piksa o God Giaman?
Sapos yu no laik lotuim na ol man i tok long kilim yu i dai, bai yu mekim wanem? Bai yu pret na lotuim dispela piksa o god giaman? Kain samting olsem i bin kamap long Babilon 2,500 yia bipo.
KING Nebukatnesa i tokim ol man long wokim wanpela draipela (27 mita) piksa gol na sanapim dispela god giaman long ples stret bilong Dura. Bihain em i singautim olgeta hetman na kiap bilong olgeta hap bilong Babilon long i kam lotuim dispela piksa ol i bin sapim. Tripela man bilong lotuim Jehova ol tu i kam bung. Nem bilong tripela em Sadrak na Misak na Abednigo.
Wanpela man, em i olsem maus bilong king, em i singaut strong na em i tok: ‘Yupela olgeta i mas brukim skru na lotuim dispela piksa gol king Nebukatnesa i bin sanapim.’ Sapos yu bin i stap long dispela taim, bai yu mekim wanem? Olgeta man i brukim skru na lotu long dispela piksa; Sadrak na Misak na Abednigo tasol ol i no brukim skru. Ol i sanap i stap, long wanem ol i no laik sakim lo bilong God. God i tambuim lain bilong em long lotuim piksa ol man i bin wokim long han bilong ol o god giaman.—Eksodas 20:4, 5.
Ol i kisim dispela tripela man bilong lotuim Jehova i go long king. Em i tok: ‘Tru yupela i no save lotuim ol god bilong mi na dispela draipela piksa mi bin sanapim?’ Na bihain em i tok: ‘Sapos yu no laik lotuim, nau tasol bai ol i tromoi yupela long bikpela paia. Na husat bai helpim yupela? Wanem god inap kisim bek yupela long han bilong mi?”
Sapos dispela triam i bin painim yu, bai yu mekim wanem? Sadrak na Misak na Abednigo ol i pret. Ol i tokim king: ‘Sapos God bilong mipela i laik, em inap helpim mipela . . . na sapos nogat, maski mipela i no ken lotuim ol god bilong king, na dispela piksa king i bin sanapim mipela i no ken lotuim.’
King i belhat. Em i tok: ‘Hatim paia moa yet! Tromoi tripela i go insait long paia!’ Tasol wanem samting i painim Sadrak na Misak na Abendigo? Ol i go pundaun insait long paia, tasol wantu ol i kirap sanap na wokabaut insait long paia.
Taim king i lukim dispela samting em kirap nogut long wanem em lukim fopela man i wokabaut insait long paia na paia i no bagarapim ol! Namba foa man em i wanpela ensel Jehova i bin salim em i go laukautim dispela tripela gutpela wokboi bilong em. Nau king i pret na em i singautim tripela i kam ausait. Em i tok: ‘Sadrak, na Misak, na Abendigo, yupela ol wokboi bilong God i Antap Tru, yupela i lusim paia na i kam ausait!’ Na ol i mekim olsem —Daniel 3:1-30.
Dispela tripela wokboi bilong Jehova ol i bilip tru long Em na ol i no pret. Jehova i amamas long dispela samting. Jehova bai amamas long yumi tu sapos yumi sanap strong na yumi no lotuim ol piksa samting i olsem god giaman, em ol gavman i save putim.