Husat i God Bilong Yu?

BILONG WANEM dispela askim olsem, Husat i God bilong yu? i bikpela samting?— Em i bikpela samting, long wanem, ol man i save lotuim planti god. (1 Korin 8:5) Taim aposel Pol i kisim strong long Jehova bilong oraitim wanpela man i no inap wokabaut, ol manmeri i tok: “Ol god i kamap olsem man, na ol i kam daun long yumi”! Ol manmeri i laik lotuim Pol na pren bilong em, Barnabas. Ol i kolim Pol olsem Hermes na Barnabas olsem Sus, em nem bilong ol giaman god.

Tasol Pol na Barnabas i no larim ol manmeri i lotuim tupela. Ol i go namel long ol manmeri na tok: “Yupela i mas lusim ol dispela samting nating yupela i save lotu long en, na yupela i mas tanim i go long God i gat laip.” (Aposel 14:​8-15) Husat dispela “God i gat laip,” em i bin wokim olgeta samting?— Yes, em Jehova, ‘God Antap Tru i bosim olgeta hap bilong graun.’ Jisas i kolim Jehova olsem “yu wanpela tasol yu God tru.” Olsem na i stret yumi mas lotuim husat tasol?— Jehova tasol!—Song 83:18; Jon 17:3; KTH 4:​11.

Planti manmeri i lotuim ol narapela God, ol i no lotuim dispela ‘wanpela God tru.’ Ol i save lotuim ol samting ol i bin wokim long diwai, ston, o ain samting. (Kisim Bek 32:​4-7; Wok Pris 26:1; Aisaia 44:​14-​17) Sampela taim ol man i save kolim ol manmeri i gat nem olsem ol god, o sta, olsem ol ekta i gat nem. Yu ting i stret long litimapim nem bilong ol?—

Taim Sol i kamap aposel Pol, em i tok: “Giaman god bilong dispela graun, em i bin pasim tingting bilong ol dispela man i no bilip.” (2 Korin 4:4) Dispela god i husat?— Yes, em Satan! Satan i bin pulim ol man long lotuim planti man na ol samting i no gat laip.

Taim Satan i laik pulim Jisas long brukim skru na lotuim em, Jisas i tok wanem long Satan?— “Yu mas aninit long God, Bikpela bilong yu. Na yu mas lotu long em wanpela tasol.” (Matyu 4:​10) Olsem na Jisas i kamapim klia olsem yumi mas lotuim Jehova tasol. Yumi ken ritim stori bilong sampela yangpela man em ol i save long dispela samting. Nem bilong ol em Satrak, Mesak, na Abetnego.

Ol dispela yangpela Hibru ol i bilong lain Israel bilong God, na ol i bin kisim ol i go kalabus long Babilon. Long dispela hap, wanpela king nem bilong em Nebukatnesar i wokim wanpela traipela imis gol. Wanpela taim em i givim tok olsem taim musik i kirap, olgeta man i mas brukim skru long dispela imis. Em i tok: ‘Sapos wanpela man i no brukim skru na lotu long imis, mipela bai tromoi em i go insait long bikpela stov i gat paia i hat tumas.’ Sapos dispela samting i bin painim yu, bai yu mekim wanem?—

Satrak, Mesak, na Abetnego i save bihainim tok bilong king long olgeta samting. Tasol nau ol i no laik brukim skru long dispela imis. Yu save bilong wanem ol i mekim olsem?— Long wanem, lo bilong God i tok: ‘Yupela i mas bihainim mi wanpela tasol, yupela i no ken bihainim ol giaman god. Yupela i no ken wokim wanpela giaman god na brukim skru long en.’ (Kisim Bek 20:​3-5) Olsem na Satrak, Mesak, na Abetnego i bihainim lo bilong Jehova na ol i no bihainim tok bilong king.

King i kros nogut tru, olsem na kwiktaim em i tokim ol long bringim dispela tripela Hibru i kam long em. Em i askim ol olsem: ‘Ol i tok yupela i no lotu long ol god bilong mi. Em tru, a? Bai mi givim wanpela sans moa long yupela. Taim yupela i harim musik, yupela i mas brukim skru na lotu long dispela piksa. Sapos yupela i no mekim olsem, ol bai tromoi yupela i go long bikpela paia. Na wanem god inap helpim yupela na kisim bek yupela?’

Ol dispela yangpela man bai mekim wanem? Sapos dispela samting i bin painim yu, bai yu mekim wanem?— Ol i tokim king: ‘God mipela i save lotuim, em inap helpim mipela. Tasol sapos em i no helpim mipela, mipela i no inap lotuim ol god bilong yu. Mipela i no inap brukim skru long imis gol bilong yu.’

King i belhat moa yet. Em i tok: ‘Mekim paia i kamap hat nogut tru winim bilong bipo’! Em i tokim ol strongpela soldia bilong em long pasim Satrak, Mesak, na Abetnego na tromoi ol i go insait long paia! Paia i hat nogut tru na i kukim ol dispela soldia bilong king na ol i dai! Wanem samting i kamap long ol tripela Hibru?

Ol i tromoi Satrak, Mesak, na Abetnego i go namel stret long paia. Tasol ol i kirap sanap! Ol i no kisim bagarap. Na rop i no pasim ol moa. Olsem wanem dispela samting inap kamap?— King i lukluk i go insait long paia, na samting em i lukim i mekim em i pret. Em i askim olsem: ‘Yumi bin tromoi tripela man i go insait long paia, a?’ Ol wokman bilong em i tok: “Yes, bikman, yumi bin mekim olsem.”

Orait king i tok: ‘Mi lukim 4-pela man i wokabaut insait long paia, na paia i no kukim ol.’ Yu save dispela namba 4 man em i husat?— Em ensel bilong Jehova. Em i lukautim ol tripela Hibru na ol i no kisim bagarap.

Taim king i lukim dispela, em i go long dua bilong ples paia na em i singaut: “Satrak na Mesak na Abetnego, yupela wokman bilong God Antap Tru, yupela kam ausait”! Taim ol i kam ausait, olgeta man inap lukim olsem paia i no bin kukim ol. I no gat smel bilong paia tu long skin bilong ol. King i tok: ‘Litimapim nem bilong God bilong Satrak, Mesak, na Abetnego. Em i salim ensel i kam helpim ol wokman bilong em, long wanem, ol i no lotu long narapela god, nogat, ol i lotu tasol long God bilong ol yet.’—Daniel, sapta 3.

Dispela samting i kamap bipo inap skulim yumi long wanpela samting. Long nau tu, ol man i save wokim ol imis, o piksa samting bilong lotuim. Wanpela buk (The Encyclopedia Americana) i tok: “Fleg i holi, olsem kruse i holi.” Ol man i save yusim diwai, ston, ain, o laplap bilong wokim ol imis. Ol disaipel bilong Jisas long pastaim ol i no mekim wanpela pasin bilong lotuim empera bilong Rom, na saveman Daniel P. Mannix i tok dispela i wankain long pasin bilong “i no laik salut long fleg o mekim tok tru antap long i stap gut long gavman.”

Olsem na yu ting em i bikpela samting long God sapos ol man i yusim laplap, diwai, ston, o ain samting bilong wokim wanpela imis bilong lotu?— Yu ting i stret long wanpela wokman bilong Jehova i lotuim kain imis olsem?— Satrak, Mesak, na Abetnego i no bin mekim olsem, na Jehova i amamas long ol. Olsem wanem yu ken bihainim pasin bilong ol?—