Ol i No Laik Brukim Skru

YU INAP tingim stori bilong dispela tripela yangpela man? Yes, em ol pren bilong Daniel, em ol i bin sakim sampela kaikai bilong Babilon. Ol Babilon i kolim nem bilong ol olsem Satrak, Mesak, na Abetnego. Tasol lukim ol nau. Bilong wanem ol i no brukim skru long dispela imis olsem ol arapela i mekim? Orait, yumi ken stori long dispela.

Yu tingim ol lo Jehova yet i bin raitim, em ol Tenpela Lo? Namba wan bilong ol dispela lo i tok: ‘Yupela i mas lotuim mi wanpela tasol, na yupela i no ken lotuim ol narapela god.’ Ol yangpela man hia i bihainim dispela lo maski i hatwok liklik long mekim olsem.

Nebukatnesar, em king bilong Babilon, em i bin singautim planti bikman i kam bilong lotuim dispela imis em i bin sanapim. Nau tasol em i tokim ol: ‘Taim yupela i harim krai bilong biugel na ol arapela musik, yupela i mas brukim skru na lotu long dispela imis gol. Husat man i no brukim skru na lotu long imis, mipela bai tromoi em i go insait long bikpela stov i gat paia i hat tumas.’

Taim Nebukatnesar i harim olsem Satrak, Mesak, na Abetnego i no bin brukim skru, em i kros nogut tru. Em i tok na ol i bringim dispela tripela man i go long em. Em i givim wanpela sans moa long ol i ken brukim skru. Tasol ol dispela yangpela man i bilip long Jehova. Ol i tokim Nebukatnesar: ‘God bilong mipela em inap long helpim mipela. Tasol maski em i no helpim mipela, mipela i no inap lotuim imis gol bilong yu.’

Taim Nebukatnesar i harim ol dispela tok, em i belhat moa yet. I gat wanpela bikpela stov i stap klostu, olsem na em i tok: ‘Mekim paia i kamap hat nogut tru, winim long bipo!’ Nau em i tokim sampela strongpela man long ami bilong em long pasim Satrak, Mesak, na Abetnego, na tromoi ol i go insait long paia. Ol i bin mekim paia i hat nogut tru, olsem na paia i kukim ol dispela strongpela man na kilim ol i dai. Tasol olsem wanem long dispela tripela yangpela man ol i bin tromoi i go insait long paia?

King i lukluk i go insait long paia na em i pret nogut tru. Em i tok: ‘Yumi bin pasim tripela man na tromoi ol long paia, a?’

Ol wokman bilong em i tok: ‘Yes, yumi bin mekim olsem.’

Orait king i tok: ‘Tasol mi lukim 4-pela man i wokabaut insait long paia. Rop i no pasim ol moa, na paia i no kukim ol. Na namba 4 man i luk olsem wanpela god.’ King i go klostu long dua bilong stov na em i singaut olsem: ‘Satrak! Mesak! Abetnego! Yupela wokman bilong God Antap Tru, yupela kam ausait!’

Taim ol i lusim paia na i kam ausait, olgeta inap lukim olsem paia i no bin bagarapim ol. Nau king i tok: ‘Ol man i mas litimapim nem bilong God bilong Satrak, Mesak, na Abetnego! Em i bin salim ensel bilong em i kam helpim ol, long wanem, ol i no laik lotuim narapela god.’

Ol i stap gut long Jehova na ol i makim gutpela pasin tru em yumi ken bihainim, a?