Bilip Strong Olsem Abraham!

“Ol man i bilip . . . ol i pikinini tru bilong Abraham.”​—⁠GALESIA 3:⁠7.

1. Taim nupela hevi i kamap long Kenan, Abram i mekim wanem?

ABRAM i bin lusim gutpela sindaun bilong em long Ur olsem Jehova i tokim em long mekim. Ol hevi i painim em long ol yia bihain long dispela i no bikpela olsem hevi i painim em long Isip na i traim bilip bilong em. Baibel i stori long dispela na i tok: “Bihain, taim bilong bikpela hangre i kamap, na i no gat kaikai tru long dispela hap.” Abram inap bel nogut na toktok planti long dispela samting i painim em, tasol em i no mekim olsem. Em i mekim ol samting bambai em i ken painim kaikai bilong famili. “Abram wantaim ol lain bilong en i go i stap long kantri Isip.” Long Isip ol man bai lukim dispela bikpela lain bilong Abram. Olsem wanem? Jehova bai truim ol tok promis bilong em na lukautim Abram na bai em i no ken kisim bagarap?​—⁠Stat 12:10; Kisim Bek 16:​2, 3.

2, 3. (a) Bilong wanem Abram i no laik kamapim long ples klia olsem Sarai em meri bilong em? (b) Taim Abram i mekim olsem, em i mekim wanem kain pasin long meri bilong em?

² Stat 12:​11-13 i tok: “Taim ol i kamap klostu long Isip, Abram i tokim meri bilong en Sarai olsem, ‘Harim. Mi save yu naispela meri tru. Na taim ol man bilong Isip i lukim yu, ating bai ol i mangalim yu. Na sapos ol i save, yu meri bilong mi, orait inap ol i kilim mi na larim yu i stap. I gutpela yu tokim ol olsem, yu susa bilong mi. Sapos yu mekim olsem, bai ol i mekim gutpela pasin tasol long mi, na ol i no kilim mi i dai.’ ” Maski Sarai i winim pinis 65 krismas, em i stap yet olsem naispela meri tru. Dispela i mekim na Abram inap kisim bagarap.a (Stat 12:​4, 5; 17:17) Na bikpela samting tru, dispela bai pasim laik bilong Jehova, long wanem, em i bin tok, long rot bilong pikinini bilong Abram olgeta lain bilong graun bai kisim blesing. (Stat 12:​2, 3, 7) Abram i no gat pikinini yet, olsem na em i mas i stap laip.

³ Abram i toktok wantaim meri bilong em long mekim wanpela trik pasin em pastaim ol i bin pasim tok long mekim, olsem meri i mas tok em i susa bilong Abram. Tingim dispela: Abram i gat namba olsem bos bilong famili, tasol em i no strong long meri i mas bihainim laik bilong em, nogat. Em i laik bai meri i orait long wok gut wantaim em na helpim em. (Stat 12:​11-13; 20:13) Long dispela, Abram i stap olsem gutpela piksa bilong ol man marit long mekim wok bos bilong ol long pasin sori, na Sarai i daun long man bilong em na em i stap olsem gutpela piksa bilong ol meri marit long nau.​—⁠Efesus 5:​23-28; Kolosi 4:⁠6.

4. Ol gutpela wokman bilong God long nau i mas bihainim wanem kain pasin taim ol brata bilong ol inap kisim bagarap?

⁴ Sarai inap tok em i susa bilong Abram, long wanem, tupela i gat wanpela papa tasol. (Stat 20:12) Na tu, Abram i no gat wok long tokim ol man long ol samting i no samting bilong ol. (Matyu 7:⁠6) Ol gutpela wokman bilong God long nau ol i save bihainim tok bilong Baibel long mekim pasin i stret. (Hibru 13:18) Olsem: Taim ol i sanap long kot na mekim tok tru antap, ol i no inap giaman. Tasol taim ol brata bilong ol inap kisim bagarap long skin o long spirit, olsem long taim ol man i mekim nogut long ol o i gat kros pait insait long kantri, ol i save bihainim tok bilong Jisas long mekim pasin olsem snek na tingim gut ol samting pastaim, na mekim pasin olsem pisin balus na no ken tingting long mekim wanpela pasin nogut.​—⁠Matyu 10:16; lukim Wastaua, Novemba 1, 1996, pes 18, paragraf 19.

5. Bilong wanem Sarai i orait long mekim samting Abram i askim em long mekim?

⁵ Taim Abram i askim Sarai long helpim em, Sarai i mekim wanem? Aposel Pol i stori long ol meri i kain olsem Sarai na em i tok “ol i wetim God i mekim ol samting em i bin promis long mekim.” Olsem na ating Sarai i pilim tru olsem i gat sampela bikpela samting bilong spirit i insait long dispela. Na tu, em i laikim tru man bilong em na rispek long em. Olsem na long laik bilong em yet em i ‘stap aninit long man bilong em’ na em i no kamapim long ol man olsem em i meri bilong Abram. (1 Pita 3:⁠5) Tasol taim em i mekim olsem, i gat sampela hevi inap painim em. “Abram i kamap long Isip, na ol man bilong Isip i lukim meri bilong en i naispela tru, olsem em i bin tok. Na ol ofisa bilong king bilong Isip i lukim Sarai na ol i tokim king olsem, ‘Wanpela naispela meri tru i kam i stap.’ Orait ol i go kisim Sarai na bringim em i kam long haus king.”​—⁠Stat 12:​14, 15.

Jehova i Kisim Bek Sarai

6, 7. Wanem bikpela hevi i painim Abram na Sarai? Jehova i kisim bek Sarai olsem wanem?

⁶ Man! Ating Abram na Sarai i bel hevi stret long dispela samting! I luk olsem king bai trabel long Sarai. Na king i no save olsem Sarai em meri bilong Abram, olsem na em i givim planti presen long Abram, olsem “planti sipsip na meme na bulmakau na donki na kamel, na ol wokboi na wokmeri.”b (Stat 12:16) Ating Abram i lukim ol dispela presen olsem samting nogut tru! Em nau, maski i luk olsem bikpela hevi tru bai painim Abram, Jehova i no bin lusim em.

⁷ Orait nau “Bikpela i salim ol kain kain sik nogut long king bilong Isip wantaim ol lain i stap long haus king, long wanem, king i bin kisim Sarai, meri bilong Abram.” (Stat 12:17) Long wanpela rot Baibel i no tokaut long en, king i kisim save long as tru bilong ol dispela “sik nogut.” Wantu em i kirap mekim sampela samting: “Orait king i singautim Abram i kam na i tokim em olsem, ‘Watpo yu mekim dispela pasin long mi? Yu no bin tokim mi olsem Sarai em i meri bilong yu. Yu tok em i susa bilong yu, olsem na mi kisim em olsem meri bilong mi. Watpo yu mekim dispela pasin nogut? Orait kisim meri bilong yu, na yutupela i go.’ Orait king i tokim ol ofisa bilong em long ol i mas rausim Abram long Isip. Orait ol i rausim Abram wantaim meri bilong en na olgeta samting bilong en tu.”​—⁠Stat 12:​18-20; Song 105:​14, 15.

8. Jehova i tok promis long lukautim ol Kristen long nau olsem wanem?

⁸ Long nau, Jehova i no tokim yumi olsem em bai lukautim yumi na bai indai, o pasin raskol, o bikpela hangre, o tait wara o guria samting i no ken painim yumi, nogat. Jehova i tok promis olsem, long olgeta taim em bai wokim rot bilong lukautim yumi na bai yumi no ken kisim bagarap long ol samting bilong spirit. (Song 91:​1-4) Bilong mekim olsem, em i save givim tok lukaut long yumi long taim stret, long rot bilong Baibel na “wokboi i gat gutpela tingting.” (Matyu 24:45) Na olsem wanem sapos ol man i mekim nogut long yumi na tok long kilim yumi i dai? Tru, Jehova inap larim wan wan bilong yumi i dai, tasol em i no inap larim ol i pinisim lain bilong em olgeta. (Song 116:15) Na sapos indai i painim sampela em ol i bin stap gut long God, yumi ken bilip tru olsem ol bai kirap bek.​—⁠Jon 5:​28, 29.

Lusim Sampela Samting na Stap Wanbel

9. Wanem samting i makim olsem Abram i no sindaun olgeta long wanpela hap bilong Kenan?

⁹ Bikpela hangre long Kenan i pinis na bihain “[Abram] i lusim Isip na i go long hap bilong Negev [em wanpela ples drai long hap saut bilong ol maunten bilong Juda]. Em i kisim meri bilong en na olgeta samting bilong en, na Lot tu i go wantaim em.” Taim em i go, “em i gat planti sipsip na meme na bulmakau na planti silva na gol.” (Stat 13:​1, 2) Olsem na ol asples bai lukim em olsem man i gat strong na namba olsem bikman, na wanpela strongpela hetman. (Stat 23:⁠6) Abram i no gat laik long sindaun olgeta long wanpela hap na go insait long sampela wok politik bilong ol Kenan, nogat. “[Em] wantaim ol lain bilong en i lusim hap bilong Negev na i wokabaut i go olsem long hap not. Na ol i wokim ol kem i go inap ol i kamap long taun Betel. Ol i go kamap long ples bipo Abram i bin wokim kem bilong en namel long taun Betel na taun Ai.” Maski Abram i go we, em i putim wok bilong lotuim Jehova i go pas long ol narapela samting, olsem em i save mekim oltaim.​—⁠Stat 13:​3, 4.

10. Wanem hevi i kamap namel long ol wokman bilong Abram na Lot? Bilong wanem em i bikpela samting long ol i mas stretim hariap?

¹⁰ “Lot i wokabaut wantaim Abram. Em tu i gat planti meme na sipsip na bulmakau na i gat bikpela lain manmeri tu. Abram na Lot i gat planti samting, olsem na graun i no inap long tupela i stap wantaim. Na kros i kamap namel long ol wokman i save lukautim ol sipsip na meme bilong Lot na ol wokman i save lukautim ol sipsip na meme bilong Abram. Long dispela taim ol Kenan na ol Peres i stap yet long dispela hap.” (Stat 13:​5-7) Dispela graun i no gat planti wara na gras inap long ol lain sipsip samting bilong Abram na Lot wantaim. Olsem na kros i kamap namel long ol wokman i save lukautim ol dispela lain sipsip samting. Tasol i no stret long ol man bilong lotuim God tru ol i kros kros olsem. Sapos ol i mekim olsem i go, dispela inap mekim na Abram na Lot bai bruk olgeta. Olsem na Abram bai mekim wanem? Em i bin kisim Lot taim papa bilong Lot i dai pinis, na ating em i bin lukautim Lot olsem pikinini tru bilong em na mekim bikpela long em. Abram i bikpela long Lot, olsem na i stret Abram i mas kisim hap graun i gutpela tru, a?

11, 12. Abram i tok long givim wanem gutpela samting long Lot? Samting Lot i laik mekim, bilong wanem i no gat gutpela tingting long en?

¹¹ Tasol “Abram i tokim Lot olsem, ‘Mitupela i wanblut. Nogut mitupela i kros, na nogut ol wokman bilong mitupela tu i kros. Lukim bikpela hap graun i stap. Mobeta yu makim wanpela hap bilong yu yet, na yu lusim mi na yu go long en. Sapos yu laik i go long han sut, orait mi ken i go long han kais. Na sapos yu laik i go long han kais, orait bai mi go long han sut.’ ” Klostu long Betel i gat wanpela hap ‘i gat nem long Palestain olsem gutpela ples bilong sanap na lukluk i go long ol naispela ples.’ Ating long dispela hap yet “Lot i sanap na i lukluk i go. Na em i lukim olgeta graun long ples daun bilong wara Jordan na olgeta hap i go inap long taun Soar. Dispela hap graun olgeta i gat planti wara na em i gutpela tru olsem naispela gaden bilong Bikpela na olsem graun bilong ol Isip. Long dispela taim Bikpela i no bin bagarapim yet tupela taun Sodom na Gomora.”​—⁠Stat 13:​8-10.

¹² Tru, Baibel i kolim Lot olsem “stretpela man,” tasol em i no daun long Abram long dispela samting, na i olsem em i no bin askim Abram long samting em i ken mekim. I gat wanem as bilong dispela, em yumi no save. (2 Pita 2:⁠7) “Orait Lot i tok long em bai i kisim olgeta graun long ples daun bilong wara Jordan. Na em i lusim Abram na i go long hap bilong sankamap. Olsem na Lot na Abram i no moa i stap wantaim. Abram i sindaun long graun Kenan. Na Lot i go sindaun namel long ol taun i stap long ples daun bilong wara Jordan, na em i wokim kem bilong en klostu long Sodom.” (Stat 13:​11, 12) Sodom i gat planti wok bisnis na planti gutpela samting bilong skin. (Esekiel 16:​49, 50) Long ol samting bilong skin, i olsem Lot i bihainim gutpela tingting. Tasol long ol samting bilong spirit Lot i no bihainim gutpela tingting long dispela samting. Bilong wanem i olsem? Long wanem, Stat 13:13 i tok “ol manmeri bilong dispela taun ol i manmeri nogut tru. Ol i save mekim ol kain kain sin nogut tru long ai bilong Bikpela.” Bihain, tingting bilong Lot long i go sindaun long dispela hap bai givim bikpela hevi tru long famili bilong em.

13. Olsem wanem pasin bilong Abram inap helpim ol Kristen em ol i insait long sampela tok pait bilong mani?

¹³ Tasol Abram i soim olsem em i bilip long tok promis bilong Jehova olsem bihain ol lain tumbuna pikinini bilong em bai kisim dispela hap graun olgeta; em i no tok pait long kisim wanpela liklik hap bilong en. Em i mekim gutpela pasin i stret wantaim wanpela lo bilong stiaim tingting em yumi lukim long 1 Korin 10:24: “Yumi no ken ting long helpim yumi yet. Nogat. Yumi mas ting long helpim ol arapela.” Dispela em i wanpela gutpela tok ol Kristen i ken tingim sapos ol i insait long tok pait bilong wok bisnis samting wantaim wanpela wanbilip. Sampela i no bihainim tok i stap long Matyu 18:​15-17, nogat; ol i kisim ol brata bilong ol i go long kot. (1 Korin 6:​1, 7) Gutpela pasin bilong Abram i soim olsem mobeta yumi lus long sampela mani samting na yumi no bagarapim nem bilong Jehova o bagarapim pasin wanbel i stap long kongrigesen Kristen.​—⁠Jems 3:⁠18.

14. Olsem wanem God i praisim Abram long gutpela pasin em i bin mekim?

¹⁴ God i laik praisim Abram long gutpela pasin em i bin mekim. God i tok: “Bai mi mekim ol pikinini bilong yu i kamap planti tru olsem wesan. Sapos man i inap kaunim olgeta wesan, orait bai em i inap kaunim olgeta pikinini bilong yu.” Abram i no gat pikinini, olsem na dispela tok i mas strongim tru bel bilong em! Orait nau God i tokim em: “Yu kirap na yu wokabaut na lukim olgeta dispela graun. Bai mi givim olgeta long yu.” (Stat 13:​16, 17) God i no ken larim Abram i sindaun gut long wanpela taun, nogat. Em i mas i stap narapela kain long ol Kenan. Ol Kristen long nau tu i mas i stap narapela kain long ol lain bilong dispela graun. Tru, ol i no ting ol i winim ol narapela lain, tasol ol i no save prenim ol lain em ol inap pulim ol long mekim sampela pasin i no stret wantaim ol lo bilong Baibel.​—⁠1 Pita 4:​3, 4.

15. (a) Pasin bilong Abram long raun raun, ating dispela i gat wanem wok bilong en? (b) Abram i stap olsem gutpela piksa long wanem samting na ol famili Kristen long nau i ken bihainim?

¹⁵ Long taim bilong ol man i bin raitim Baibel, sapos wanpela man i laik kisim hap graun, pastaim em i ken i go lukim. Olsem na taim Abram i raun raun long Kenan, oltaim em inap tingting olsem bihain ol tumbuna pikinini bilong em bai kisim dispela graun. Abram i bihainim tok bilong God na em “i lusim dispela ples na i go i stap long taun Hebron. Na em i wokim kem klostu long ol bikpela diwai bilong Mamre. Na em i wokim alta bilong Bikpela long dispela ples.” (Stat 13:18) Em nau, Abram i kamapim gen olsem em i tingim lotu i bikpela samting tru. Olsem wanem? Famili-stadi, famili i beten wantaim, go long miting, ol i bikpela samting tru long famili bilong yu?

Ol Birua i Kam Pait

16. (a) Bilong wanem namba wan tok bilong Stat 14:1 (NW ) em samting bilong mekim man i pret? (b) I gat wanem as na 4-pela king bilong hap is ol i go pait long Kenan?

¹⁶ “Semeber em i king bilong taun Seboim, na Kedorlaomer em i king bilong kantri Elam.c . . . [Em] i singautim tripela pren bilong em, Amrafel, king bilong kantri Babilonia, wantaim Ariok, king bilong kantri Elasar, na Tidal, king bilong ol lain Goim. Dispela 4-pela king i go wantaim ami bilong ol na ol i pait.” Long tok Hibru, namba wan tok bilong ves 1 (olsem, “Orait long taim bilong . . . ”) em i wanpela tok bilong mekim man i pret, long wanem, em i makim “wanpela taim bilong hevi bai kamap, na long pinis bilong en bai i gat gutpela blesing.” (Stat 14:​1, 2, NW, long sta daunbilo) Dispela hevi i kirap taim dispela 4-pela king bilong hap is wantaim ol ami bilong ol i kam pait long Kenan. Ol i laik mekim wanem? Ol i laik daunim pasin bikhet bilong 5-pela taun, em Sodom, Gomora, Atma, Seboim, na Bela, em ol i no laik i stap aninit long ol. Ol dispela taun i wok strong long sakim ol, tasol ol i no inap. Orait dispela 4-pela “king wantaim ol ami bilong ol, ol i bung wantaim long ples daun bilong Sidim.” Lot wantaim lain bilong em ol i sindaun klostu long dispela ples.​—⁠Stat 14:​1-9.

17. Taim ol birua i kisim Lot i go, bilong wanem dispela i traim bilip bilong Abram?

¹⁷ Ol king bilong Kenan i pait strong bilong sakim ol dispela lain i kam pait long ol, tasol ol i lus olgeta long pait. “Kedorlaomer wantaim ol pren bilong em, ol i winim pait. Na ol i kisim olgeta samting long Sodom na Gomora, na ol i kisim olgeta kaikai tu i go. Lot, pikinini bilong brata bilong Abram, em i stap long Sodom, olsem na ol i kisim em tu wantaim olgeta samting bilong em.” I no longtaim na Abram i harim tok bilong dispela samting: “Wanpela man i ranawe long pait, na em i go long Abram . . . na em i tokim Abram long ol samting i bin kamap. Abram i stap klostu long ol bikpela diwai bilong Mamre. Mamre em i wanpela man bilong lain Amor, na em i gat tupela brata, Eskol na Aner. Dispela tripela man ol i pren bilong Abram. Abram i harim tok long ol birua i kisim Lot, pikinini bilong en.” (Stat 14:​10-14) Em nau, dispela bai traim bilip bilong Abram! Em bai bel nogut long Lot i bin kisim gutpela hap graun tru, o olsem wanem? Na tingim tu olsem ol dispela lain i bin kam pait, ol i bilong Babilonia, em kantri bilong em yet. Sapos em i go pait long ol, bihain bai em i no inap tru long go bek long ples. Na tu, olsem wanem Abram inap pait long wanpela ami em olgeta lain bilong Kenan wantaim i no inap daunim ol?

18, 19. (a) Olsem wanem Abram inap kisim bek Lot? (b) Husat tru i mekim na Abram i winim dispela pait?

¹⁸ Long dispela taim tu Abram i bilip strong long Jehova. “Em i singautim ol strongpela man long lain bilong en, namba bilong ol inap 318. Na ol i ranim ol dispela 4-pela king i go inap long taun Dan. Long dispela ples Abram i brukim lain bilong en long tupela lain. Na ol i pait long ol lain bilong dispela 4-pela king long nait, na ol i winim pait. Ol i ranim ol i go long hap not bilong taun Damaskus, inap long taun Hoba, na ol i kisim bek olgeta samting ol dispela king i bin karim i go. Abram i kisim bek pikinini bilong en, Lot, na olgeta samting bilong en wantaim ol meri na ol arapela manmeri.” (Stat 14:​14-16) Abram i bilip strong long Jehova na em wantaim liklik lain ami bilong em ol i winim pait, na em i kisim bek Lot wantaim lain bilong em. Orait nau Abram i bungim Melkisedek, em king na pris bilong Salem. “Melkisedek, em king bilong Salem na em i pris bilong God Antap Tru, em i bringim bret na wain i kam long Abram. Na Melkisedek i givim blesing long Abram olsem, ‘God Antap Tru i bin wokim heven na graun, em i ken mekim gut tru long yu. Yumi litimapim nem bilong em, long wanem, yu bin pait long ol birua na em i helpim yu long winim pait.’ Na olgeta samting Abram i bin kisim em i tilim long 10-pela hap na i givim wanpela hap long Melkisedek.”​—⁠Stat 14:​18-20.

¹⁹ Tru tumas, Jehova yet i bin helpim Abram long winim pait. Strongpela bilip bilong Abram i mekim na long dispela taim tu Jehova i kisim em bek long han bilong ol birua. Lain bilong God long nau ol i no save mekim pait tru bilong graun, tasol i gat planti traim na hevi i save painim ol. Stori i kamap bihain long dispela bai toktok long olsem wanem pasin bilong Abram inap helpim yumi long stap strong na winim ol dispela traim na hevi.

[Ol Futnot]

Yu Tingim?

• Olsem wanem dispela bikpela hangre i kamap long Kenan i traim bilip bilong Abram?

• Olsem wanem Abram na Sarai i stap olsem gutpela piksa bilong ol man na meri marit long nau?

• Pasin bilong Abram long stretim kros i kamap namel long ol wokman bilong em na ol wokman bilong Lot, dispela inap lainim yumi long wanem samting?

[Piksa long pes 22]

Abram i no strong long mekim samting i stret em i mekim; em i putim ol samting bilong helpim Lot i go pas long ol samting bilong helpim em yet

[Piksa long pes 24]

Taim Abram i kisim bek Lot, em i soim olsem em i bilip na wetim Jehova i helpim em