Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w01 9/1 p. 27-30
  • Rot Bilong Skelim Gut Ol Samting Yu Mas Mekim

No gat vidio bilong dispela seksen.

Sori, popaia kamap long lodim vidio.

  • Rot Bilong Skelim Gut Ol Samting Yu Mas Mekim
  • Wastaua i Tokaut Long Kingdom Bilong Jehova—2001
  • Ol Liklik Het Tok
  • Wankain Infomesen
  • Yumi Mas Kisim Helpim
  • Olsem Wanem Long Nau?
  • Ol Samting Yumi Pasim Tok Long En
  • Ol Samting Rot Yumi Makim i Kamapim
  • Yu Mas Bilip​—⁠Mekim Gutpela Disisen!
    Wastaua i Tokaut Long Kingdom Bilong Jehova (Stadi Edisen)—2017
  • Wokim Ol Disisen i Givim Biknem Long God
    Wastaua i Tokaut Long Kingdom Bilong Jehova—2011
  • ‘Olgeta Man Wan Wan Bai i Karim Hevi Bilong Ol Yet’
    Wastaua i Tokaut Long Kingdom Bilong Jehova—2006
  • Rot Bilong Wokim Ol Gutpela Disisen
    Stap Amamas Oltaim!—Stadi Long Baibel
Lukim Moa
Wastaua i Tokaut Long Kingdom Bilong Jehova—2001
w01 9/1 p. 27-30

Rot Bilong Skelim Gut Ol Samting Yu Mas Mekim

PASIN bilong stap fri long makim wanem rot yumi laik bihainim em i wanpela presen i kam long God. Sapos yumi no stap fri olsem, orait yumi no inap bosim pasin yumi mekim​—⁠bai yumi olsem wanpela masin robot i no gat tingting. Tasol dispela pasin bilong stap fri i givim sampela hatwok long yumi. Em i mekim na yumi skelim gut ol samting yumi mas mekim.

Tru, sampela samting yumi mas pasim tok long en i no bikpela samting tumas. Tasol ol narapela samting yumi mas pasim tok long en inap mekim bikpela samting long laip bilong yumi long bihain. Olsem: Wanem wok bai yumi mekim o bai yumi marit o nogat. Na sampela narapela samting yumi pasim tok long en i save mekim sampela samting long i stap bilong ol narapela. Sampela samting papamama i pasim tok long en inap mekim bikpela samting long laip bilong pikinini bilong ol. Na tu, God bai skelim yumi long ol samting yumi mekim.​—⁠Rom 14:⁠12.

Yumi Mas Kisim Helpim

Planti samting ol man i tingting pinis long mekim i bin kamapim ol samting nogut. Wanpela samting olsem i bin kamap long taim bilong namba wan man na meri. Iv i tingting long kisim prut em God i bin tambuim ol long kisim. Laik nogut i kirapim em long mekim dispela samting, na dispela i kirapim man bilong em tu long sakim tok bilong God, na dispela samting i bin kamapim bikpela pen na hevi long ol manmeri. Planti taim ol laik nogut i as bilong ol samting ol man i pasim tok long mekim, ol stretpela lo, nogat. (Stat 3:​6-19; Jeremaia 17:⁠9) Na taim yumi mas pasim tok long sampela bikpela samting, yumi save olsem yumi no inap mekim stret olgeta samting.

Olsem na taim ol man i mas pasim tok long ol bikpela samting, planti ol i save askim ol spirit samting long helpim ol. Baibel i stori long wanpela taim Nebukatnesar i insait long pait na em i mas skelim samting em i mas mekim. Em i wanpela king, tasol em i ting em i mas “mekim ol pasin bilong painimaut dispela samting,” olsem askim ol spirit. Baibel i tok: ‘Em i mekim nais long ol spia. Na tu em i askim ol giaman god bilong en, na bihain em i lukluk gut long lewa bilong abus ol i bin kilim bilong mekim ofa.’ (Esekiel 21:21) Long nau tu, planti man i save go lukim ol glasman, ol man bilong lukluk long ol sta, o long sampela narapela rot ol i askim ol spirit long helpim ol. Tasol ol kain man olsem i save giamanim na paulim ol man.​—⁠Wok Pris 19:⁠31.

I gat wanpela Man yumi inap bilip tru long em, na oltaim em i bin helpim ol man long bihainim gutpela tingting taim ol i skelim ol samting ol i laik mekim. Dispela man em i God Jehova tasol. Olsem: Long bipo tru, God i givim tupela ston long lain bilong em, Israel, bilong ol i ken kisim save long laik bilong God taim ol bikpela samting i painim ol. Long rot bilong dispela tupela ston, Jehova i bekim askim bilong ol na helpim ol bikman bilong lain Israel long save olsem, ol samting ol i pasim tok long en i stret wantaim laik bilong God o nogat.​—⁠Kisim Bek 28:30; Wok Pris 8:8; Namba 27:⁠21.

Tingim stori bilong Gideon. Taim ol i askim em long go pas long ami bilong lain Israel bilong pait long ol Midian, em i mas skelim bai em i kisim dispela gutpela wok o nogat. Gideon i laik save olsem Jehova bai sapotim em, olsem na em i askim God long givim wanpela mak long em. Em i beten askim God long mekim wara bilong nait i kamap long gras bilong sipsip, tasol graun em gras bilong sipsip i stap long en i mas drai. Long de bihain, em i askim God long mekim wara bilong nait i kamap long graun em gras bilong sipsip i stap long en, tasol gras bilong sipsip i mas drai. Jehova i kamapim ol dispela mak olsem Gideon i askim. Olsem na Gideon i makim stretpela rot bilong bihainim, na long helpim God i givim long em, em i daunim olgeta birua bilong Israel.​—⁠Hetman 6:​33-40; 7:​21, 22.

Olsem Wanem Long Nau?

Long nau tu Jehova i save helpim ol wokboi bilong em taim ol i mas skelim ol bikpela samting ol i mas mekim. Olsem wanem em i helpim ol? Yu ting yumi mas askim Jehova long givim sampela kain mak long yumi bilong soim rot yumi mas bihainim, olsem em i bin givim long Gideon? Olsem: Tupela marit i tingting long i go mekim wok long hap i sot long ol man bilong autim tok. Bilong helpim ol long skelim gut samting ol i mas mekim, ol i wokim wanpela traim. Ol i putim toksave bilong salim haus bilong ol na ol i makim pe bilong haus. Sapos ol man i baim haus long det ol i tingting long en na ol i baim haus long pe ol i makim o antap long en, orait ol bai ting dispela i makim olsem God i laik bai ol i go mekim wok long narapela hap. Sapos ol man i no baim haus, ol i ting dispela i makim olsem God i no laik bai ol i go.

Ol man i no baim haus. Yu ting dispela i makim olsem Jehova i no laik bai tupela marit i go long hap i sot long ol man bilong autim tok? I no stret long yumi kolim ol samting Jehova i save o i no save mekim bilong helpim ol wokboi bilong em. Yumi no inap tok olsem long nau Jehova i no save mekim ol samting bilong kamapim klia laik bilong em long yumi. (Aisaia 59:⁠1) Tasol taim yumi mas skelim ol bikpela samting yumi mas mekim, i no stret long yumi ting God i mas kamapim klia laik bilong em, olsem yumi givim wok long God long makim ol samting yumi mas mekim, nogat. Long olgeta narapela taim Gideon tu i mas skelim ol samting em i laik mekim, em i no ken wet long Jehova i givim ol mak long em!

Tasol Baibel i tok God i save stiaim ol man. Baibel i tok long taim bilong yumi olsem: “Taim yupela i wokabaut na yupela i paul long wanem rot yupela i mas bihainim, rot bilong han sut o rot bilong han kais, orait em bai i stap baksait long yupela na em bai i tokim yupela long rot yupela i mas bihainim.” (Aisaia 30:21) Taim yumi mas skelim ol bikpela samting yumi mas mekim, i stret yumi askim God long helpim yumi bambai ol samting yumi mekim i ken stret wantaim laik bilong em na i kamapim gutpela tingting bilong em. Olsem wanem yumi inap mekim? Long rot bilong skelim Baibel na larim tok bilong en i stap ‘olsem lam bilong helpim yumi long wokabaut stret, na olsem lait bilong soim rot long yumi.’ (Song 119:105; Sindaun 2:​1-6) Bilong mekim olsem, oltaim yumi mas wok long kisim stretpela save i kam long Baibel. (Kolosi 1:​9, 10) Na taim yumi mas pasim tok long sampela samting, yumi mas skelim gut olgeta lo na tok Baibel i kamapim long dispela samting. Dispela bai helpim yumi long “skelim gut wanem ol samting i bikpela samting tru.”​—⁠Filipai 1:​9, 10, NW.

Yumi mas toktok tu long Jehova long rot bilong beten, na bilip olsem em bai harim beten bilong yumi. Em i mekim gut bel bilong yumi taim yumi tokim gutpela God bilong yumi long ol samting yumi mas pasim tok long en, na long ol narapela narapela rot yumi wok long skelim! Bihain long dispela, yumi ken askim em long stiaim yumi long makim stretpela rot. Planti taim spirit holi bai helpim yumi long tingim ol tok bilong Baibel i stret long samting yumi wok long skelim, o em bai helpim yumi long save gut long wanpela skripsa i stret long ol samting i painim yumi.​—⁠Jems 1:​5, 6.

Jehova i givim tu ol strongpela brata long kongrigesen bilong yumi ken toktok wantaim ol long ol samting yumi tingting long mekim. (Efesus 4:​11, 12) Tasol taim yumi laik kisim tingting bilong ol narapela, yumi no ken bihainim pasin bilong sampela em ol i save askim planti man i go i go inap long ol i painim wanpela man i mekim tok ol i laik harim, na nau ol i bihainim tok bilong em. Yumi mas tingim tu pasin bilong Rehoboam. Taim em i mas skelim samting em i mas mekim, em i kisim sampela gutpela tok tru long ol lapun ofisa i bin wok wantaim papa bilong em. Tasol em i no bihainim tok bilong ol, na em i askim ol yangpela man i bin go bikpela wantaim em long kamapim tingting bilong ol. Em i bihainim tok bilong ol, olsem na em i no bihainim gutpela tingting na em i lus long bosim bikpela hap bilong Israel.​—⁠1 King 12:​1-17.

Taim yu laik kisim tingting bilong narapela man, askim ol man i gat gutpela save long ol samting bilong laip na tok bilong Baibel, na ol i save tingim tru ol lo bilong en. (Sindaun 1:5; 11:14; 13:20) Taim yu inap, lusim hap taim bilong tingim tingim ol lo bilong dispela samting na save yu bin kisim long rot bilong ol buk bilong Baibel samting. Taim yu kisim save long Tok bilong Jehova, ating bai yu luksave long wanem rot i gutpela long bihainim.​—⁠Filipai 4:​6, 7.

Ol Samting Yumi Pasim Tok Long En

Sampela taim i no hatwok long pasim tok long ol samting. Taim ol man i tokim ol aposel long ol i no ken autim tok, ol aposel i save ol i mas autim tok yet long Jisas, na wantu tasol ol i tokim kaunsil olsem ol bai bihainim tok bilong God, tok bilong man, nogat. (Aposel 5:​28, 29) Ating i gat sampela samting yumi mas skelim gut tru taim yumi laik makim rot bilong bihainim, long wanem, i no gat wanpela tok long Baibel i toktok stret long dispela samting. Tasol ol tok bilong Baibel bilong stiaim tingting i givim gutpela save long yumi bambai yumi ken bihainim gutpela tingting. Olsem: Maski planti samting bilong amamas long nau i no bin stap long taim bilong Jisas, Baibel i tokaut klia long ol samting Jehova i save laikim na ol samting em i no laikim. Olsem na Kristen i painim ol amamas i gat pasin pait, pasin pamuk, o pasin bikhet long en, em i no bihainim gutpela tingting.​—⁠Song 97:10; Jon 3:​19-21; Galesia 5:​19-23; Efesus 5:​3-5.

Sampela taim tupela rot wantaim i stret long bihainim. Em i wanpela gutpela wok tru long mekim wok long hap i sot long ol man bilong autim tok, na dispela wok inap givim planti gutpela blesing long man. Tasol sapos man i no mekim olsem, em i ken mekim yet gutpela wok long kongrigesen bilong em yet. Ating sampela taim yumi mas pasim tok long sampela samting em inap opim rot long yumi ken kamapim pasin bilong givim bel long Jehova, o long ol samting i nambawan bikpela samting long laip bilong yumi. Olsem na Jehova i larim yumi yet i makim rot bilong yumi ken kamapim bel bilong yumi.

Planti taim ol samting yumi tingting pinis long mekim i save mekim sampela samting long ol narapela. Olsem: Ol Kristen long taim bilong ol aposel i amamas long stap fri long planti samting bilong Lo i save pasim tumas ol man. Olsem na ol i ken kisim o sakim sampela kaikai em Lo i tok i no klin. Tasol em i gutpela long ol i tingim maus bilong bel bilong ol narapela taim ol i skelim olsem ol bai kisim dispela kaikai o nogat. Long planti samting yumi mas mekim yumi ken bihainim tok bilong Pol, em i tok: “Yupela i no ken mekim olkain pasin inap long mekim ol [narapela] i pundaun.” (1 Korin 10:32) Yumi no laik pundaunim ol narapela, olsem na ating dispela inap helpim yumi long bihainim gutpela tingting taim yumi skelim ol samting yumi laik mekim. Na tu, pasin bilong laikim tru ol narapela em i nambatu bikpela lo.​—⁠Matyu 22:​36, 39.

Ol Samting Rot Yumi Makim i Kamapim

Taim yumi skelim gut samting yumi mas mekim na yumi bihainim maus bilong bel na ol lo bilong Baibel, orait ol samting yumi tingting pinis long mekim, oltaim dispela bai karim gutpela kaikai long bihain. Tru, ating inap sotpela hap taim ol samting yumi tingting pinis long mekim em inap kamapim sampela hevi long yumi. Olsem: Taim ol aposel i tokim kaunsil long ol bai autim tok yet long Jisas, paslain long ol i larim ol aposel i go, ol i wipim ol. (Aposel 5:40) Taim tripela Hibru​—⁠Satrak, Mesak, na Abetnego​—⁠i no laik brukim skru long imis gol bilong Nebukatnesar, laip bilong ol inap bagarap. Ol i redi long karim hevi bilong samting ol i pasim tok long en​—⁠ol inap i dai. Tasol ol i save God bai orait na blesim ol samting ol i pasim tok long mekim.​—⁠Daniel 3:​16-19.

Sapos sampela hevi i painim yumi taim yumi bihainim rot i stret wantaim maus bilong bel, yumi no ken ting samting yumi pasim tok long en i no stret. “Taim nogut i save painim yumi olgeta,” na dispela inap mekim na sampela samting yumi pasim tok long en​—⁠maski em i gutpela samting​—⁠i no kamap gut. (Saveman 9:11) Na tu, sampela taim Jehova i larim ol hevi i kamap bilong traim pasin bilong yumi long givim bel. Jekop i pait long wanpela ensel inap nait olgeta bambai em i ken kisim blesing. (Stat 32:​24-26) Ating yumi tu i mas karim sampela hevi, maski samting yumi mekim i stret long mekim. Tasol taim ol samting yumi pasim tok long en i stret wantaim laik bilong God, yumi ken bilip tru olsem em bai helpim yumi long karim hevi na bihain em bai blesim wok bilong yumi.​—⁠2 Korin 4:⁠7.

Olsem na taim yu mas skelim wanpela bikpela samting yu mas mekim, yu no ken bilip long save bilong yu yet. Painim ol tok bilong Baibel i stret wantaim samting yu wok long skelim. Toktok wantaim Jehova long dispela samting. Sapos yu inap, toktok wantaim ol narapela strongpela Kristen. Orait nau strongim bel bilong yu. Mekim gutpela wok long pasin bilong stap fri em God i bin givim long yu long makim ol samting yu laik mekim. Skelim gut samting yu mas mekim na soim long Jehova olsem bel bilong yu i gutpela.

[Piksa long pes 28]

Taim yu mas skelim ol bikpela samting yu mas mekim, skelim Baibel pastaim

[Ol Piksa long pes 28, 29]

Toktok wantaim Jehova long ol samting yu tingting long mekim

[Piksa long pes 30]

Yu ken toktok wantaim ol strongpela Kristen long ol bikpela samting yu mas mekim

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim