Askim

Kolosi 1:16 i tok, long han bilong Pikinini bilong God, God “i bin wokim olgeta samting, na olgeta samting i bilong em yet.” Olsem wanem yumi ken tok olgeta samting God i bin wokim “bilong” Pikinini bilong em, Jisas?

Jehova i mekim wok long dispela wanpela Pikinini bilong em olsem saveman i bosim wok bilong wokim olgeta narapela samting​—⁠Jisas yet nogat. (Sindaun 8:​27-30; Jon 1:⁠3) I stret Pikinini i kisim amamas long ol dispela wok, na long dispela as i olsem ol dispela samting “i bilong” em yet.

Yumi save olsem planti taim ol papamama i laik kisim amamas long samting ol i kamapim​—⁠ol pikinini man na pikinini meri. Olsem na wanpela savetok bilong Baibel i toktok long pikinini man em ‘papa i save laikim tumas.’ (Sindaun 3:12; 29:17) I wankain tu long God Jehova​—⁠em i bin kisim amamas long Israel taim ol manmeri bilong em i bin stap gut long em. (Song 44:3; 119:108; 147:11) Em i save kisim amamas tu long ol manmeri bilong em i stap gut long em i kam inap long taim bilong yumi.​—⁠Sindaun 12:22; Hibru 10:⁠38.

Olsem na, i stret God i mas mekim na bai wanwok bilong em, Jisas, i kisim amamas long ol wok em i bin mekim. Sindaun 8:​30, 31 i tok, Pikinini ‘i bin amamas tumas long lukim ol samting em i bin wokim. Em bin amamas long lukim ol manmeri.’ Olsem na long dispela as Kolosi 1:16 i tok: “Em i bin wokim olgeta samting, na olgeta samting i bilong em yet.”