BEKIM OL ASKIM BILONG BAIBEL

Bilong wanem ol i kolim Jisas olsem Pikinini Bilong God?

God i no gat meri we i kamapim ol pikinini bilong em. Em i Krieta bilong olgeta samting i gat laip. God i bin wokim ol man na inapim ol long kamapim ol pasin bilong em. Olsem na Baibel i kolim Adam, em fes man God i bin wokim, olsem “pikinini bilong God.” Na olsem tasol, Jisas tu em i “Pikinini bilong God,” bikos God i wokim em i kamap olsem em yet na Jisas i gat ol wankain pasin olsem Papa bilong em.—Ritim Luk 3:38; Jon 1:14, 49.

God i wokim Jisas long wanem taim?

God i wokim Jisas paslain long em i wokim Adam. God i wokim Jisas na i yusim Jisas bilong wokim olgeta narapela samting na ol ensel tu. Long dispela as Baibel i kolim Jisas olsem “fesbon bilong olgeta samting God i bin wokim.”—Ritim Kolosi 1:15, 16.

Paslain long Jisas i bon long Betlehem, em i stap long heven olsem wanpela spirit. Bihain, God i putim laip bilong Jisas long bel bilong Maria bambai Jisas inap bon olsem man.—Ritim Luk 1:30-32; Jon 6:38; 8:23.

Bilong wanem God i stretim rot na Jisas i bon long graun olsem man? Jisas bai mekim wanem spesel wok? Yu inap painim bekim bilong ol dispela askim long Baibel, na dispela bai helpim yu long kliagut na amamas moa long ol samting God na Jisas i bin mekim bilong helpim yu.