Wai na Baibel i Kolim Jisas Olsem Pikinini Bilong God?
Bekim bilong Baibel
Planti taim Baibel i kolim Jisas olsem “Pikinini Bilong God.” (Jon 1:49) Dispela tok “Pikinini Bilong God” i kamapim klia olsem God em Krieta, o As, bilong olgeta samting i gat laip, Jisas tu. (Buk Song 36:9; Revelesen 4:11) Baibel i no skulim yumi olsem God i kamapim wanpela pikinini kain olsem ol man bilong graun i save kamapim pikinini, nogat.
Baibel i kolim ol ensel tu olsem “ol pikinini bilong God tru.” (Jop 1:6) Na Baibel i tok olsem fes man, Adam, em i “pikinini bilong God.” (Luk 3:38) Tasol bikos Jisas em i fes samting God i bin wokim na God yet i bin wokim em, olsem na Baibel i kolim Jisas olsem nambawan Pikinini Bilong God.
Yu ting Jisas i bin stap long heven paslain long em i bon long graun?
Yes. Jisas em i wanpela spirit i bin stap long heven paslain long em i bon olsem wanpela man long graun. Jisas yet i tok: “Mi lusim heven na kam daun.”—Jon 6:38; 8:23.
God i wokim Jisas pastaim na bihain em i wokim olgeta narapela samting. Baibel i tok long Jisas olsem:
“Em i fesbon bilong olgeta samting God i bin wokim.”—Kolosi 1:15.
“Em i kirap bilong ol samting God i bin wokim.”—Revelesen 3:14.
Jisas i inapim tok profet i tok long man “i bin kamap bipo tru, em i bilong bipo yet.”—Maika 5:2; Matyu 2:4-6.
Jisas i bin mekim wanem paslain long em i kam long graun?
Em i holim wok i gat bikpela namba tru long heven. Jisas i bin kolim dispela namba em i bin holim taim em i beten: “Papa, givim glori long mi. . . . Dispela glori mi bin i gat taim mi bin stap wantaim yu paslain long ol manmeri i kamap long graun.”—Jon 17:5.
Em i helpim Papa bilong em long wokim olgeta samting. Jisas i wok klostu long God “olsem wanpela saveman bilong wok.” (Provep 8:30) Baibel i tok long Jisas olsem: “Long rot bilong dispela man, God i wokim olgeta arapela samting long heven na long graun.”—Kolosi 1:16.
Long rot bilong Jisas God i wokim olgeta samting i kamap. Olgeta samting i makim tu olgeta samting spirit, na tu olgeta samting yumi lukim long yunivers. (Revelesen 5:11) Tupela i wok gut wantaim, dispela pasin i wankain long akitek i wok gut wantaim man bilong wokim haus. Akitek i wokim plen bilong haus; man bilong wokim haus i bihainim dispela plen na sanapim haus tru.
Em i mekim wok olsem Tok. Taim Baibel i stori long laip bilong Jisas paslain long em i bon long graun, Baibel i kolim Jisas olsem “Tok.” (Jon 1:1) Dispela i makim olsem God i yusim Pikinini bilong em long bringim ol tok na in straksen i go long ol narapela spirit.
Na tu, i luk olsem Jisas i mekim wok olsem Mausman Bilong God long bringim tok i kam long ol man long graun. I luk olsem God i toktok long rot bilong Jisas olsem Tok taim em i givim instraksen long Adam na Iv long gaden Iden. (Stat 2:16, 17) Ating Jisas em ensel husat i bin go pas long lain Israel bilong bipo taim ol i wokabaut i go long ples nating na em man lain Israel i mas bihainim tok bilong em.—Kisim Bek 23:20-23.a
a God i no yusim Tok tasol bilong toktok wantaim ol, nogat. Eksampel, em i yusim tu ol narapela ensel—em i no yusim tasol Fesbon bilong em—long givim Lo bilong em long lain Israel bilong bipo.—Aposel 7:53; Galesia 3:19; Hibru 2:2, 3.