Askim

Olsem wanem yumi inap save olsem stori bilong “gutpela na stretpela tingting” long Sindaun 8:​22-​31 i makim Jisas Krais long taim em i no kamap man yet long graun?

Long Buk Sindaun, Baibel i stori long gutpela na stretpela tingting olsem: “Bipo bipo tru, long taim Bikpela i laik wokim ol samting, em i wokim mi pastaim. Na bihain em i wokim olgeta arapela samting. . . . Mi kamap . . . long taim em i no bin wokim ol bikpela na liklik maunten. . . . Mi stap wantaim Bikpela long taim em i wokim skai. . . . Long taim Bikpela i mekim ol dispela wok, mi stap wantaim em na em i makim mi olsem saveman i bosim wok. Olgeta de mi bin mekim em i amamas . . . Mi bin amamas long lukim dispela graun na ol manmeri.”

Taim dispela skripsa i stori long gutpela na stretpela tingting​—olsem savetingting​—em i no stori tasol long savetingting bilong God o long savetingting i olsem wanpela pasin, nogat. Bilong wanem? Long wanem, dispela savetingting skripsa i stori long en, em samting God i bin “wokim”​—taim God i kirap wokim ol samting, em i wokim em pastaim. God Jehova i bin i stap oltaim oltaim, olsem na savetingting bilong em, em tu i bin i stap olgeta taim. (Song 90:​1, 2) Savetingting bilong Jehova i no gat kirap bilong en​—em i no samting God i bin wokim o mekim i “kamap.” Na narapela samting, long dispela skripsa i olsem savetingting inap toktok na mekim wok, olsem wanpela man i save mekim.​​—Sindaun 8:1.

Buk Sindaun i tok, bipo bipo tru, gutpela na stretpela tingting i bin i stap wantaim Jehova, em Man Bilong Wokim olgeta samting, na God i bin makim em olsem “saveman i bosim wok.” Dispela tok i makim stret Jisas. Paslain tru long em i kam daun long graun, Jisas i bin wok wantaim Jehova. Baibel i tok long em olsem: “Taim olgeta dispela samting i no kamap yet, em i stap. Na em i save mekim olgeta samting i stap gut na i wok gut wantaim.”​​—Kolosi 1:​17; KTH 3:​14.

Taim Baibel i mekim tok piksa na tok Pikinini Bilong God i olsem savetingting, dispela i stret, long wanem, Jisas em dispela Man i bin kamapim long ples klia ol laik na ol tok bilong Jehova i gat savetingting long en. Taim Jisas i no kamap man yet long graun, em i bin stap olsem Tok, o Mausman, bilong God. (Jon 1:1) Baibel i stori long Jisas olsem em i “strong bilong God, na em i save bilong God.” (1 Korin 1:​24, 30) Man! Em ol naispela tok tru i makim stret Pikinini Bilong God, em pasin bilong em long amamas long ol manmeri i bin kirapim em long givim laip bilong em bilong baim bek ol!​​—Jon 3:​16.

[Piksa long pes 31]

‘Mi kamap long taim em i no bin wokim ol maunten’