Askim

Wanem insait bilong dispela tok, yumi mas lotu long Jehova ‘long spirit’?

Taim Jisas Krais i autim tok long wanpela meri Samaria em i bin kam kisim wara long hul wara bilong Jekop klostu long taun Sikar, em i tok: “God em i Spirit. Na ol man i lotu long em, ol i mas lotu long [spirit] . . . na long pasin i tru.” (Jon 4:24) Bilong lotu tru long God, yumi mas lotuim em long “pasin i tru,” olsem yumi mas bihainim ol tok God Jehova i kamapim long Baibel long ol samting bilong em yet na long laik bilong em. Na tu, yumi mas lotuim God long spirit, olsem yumi mas givim bel long lotuim em, na pasin bilong laikim tumas Jehova na bilip bilong yumi i mas kirapim yumi long mekim olsem. (Taitus 2:14) Tasol ol ves i stap klostu long tok bilong Jisas olsem yumi ‘mas lotu long God long spirit,’ ol i kamapim long ples klia olsem em i no makim tasol tingting yumi holim bilong lotuim Jehova.

Taim Jisas i toktok wantaim dispela meri long hul wara, em i no toktok long pasin bilong givim bel long lotu o i no givim bel tumas long lotu, nogat. Man i lotuim god giaman, em tu inap givim bel tru long lotu. Tasol taim Jisas i tokaut pinis olsem bihain ol man i no inap lotuim Papa bilong em long maunten long Samaria na long tempel long Jerusalem​—⁠em ol ples tru tru​—⁠Jisas i makim wanpela nupela pasin bilong lotu, em pasin tru tru bilong God i as bilong en. (Jon 4:21) Jisas i tok: “God em i Spirit.” (Jon 4:24) God tru i no kain olsem yumi man, na yumi no inap lukim o holim em. Bilong lotuim em yumi no ken go long wanpela tempel tru o long wanpela maunten. Olsem na Jisas i toktok long wanpela pasin bilong lotu i winim pasin bilong lotuim God long wanpela ples tru.

Yumi mas lotu long God long pasin i tru, na tu, bilong God i ken orait long lotu bilong yumi, yumi mas larim spirit holi i stiaim yumi​—⁠em strong bilong God. Aposel Pol i tok: “Holi Spirit i save lukluk gut long olgeta samting, na em i save lukim tu olgeta tingting hait bilong God.” Na em i tok moa: “Mipela i no bin kisim spirit bilong dispela graun. Nogat. Mipela i kisim Spirit i kam long God, bai mipela i ken save long olgeta presen God i bin givim long mipela.” (1 Korin 2:​8-12) Bilong lotuim God long pasin em i laikim, yumi mas kisim spirit bilong em na larim dispela spirit i stiaim yumi. Na tu, em i bikpela samting long spirit bilong yumi, olsem tingting bilong yumi, i kamap wanbel wantaim tingting bilong God long rot bilong stadi na pasin bilong yumi long bihainim Tok Bilong God.

[Piksa long pes 28]

Yumi mas lotuim God long ‘spirit na long pasin i tru’