Kisim Skul Long Mi
“Yupela kisim save [olsem skul ] long mi na aninit long tok bilong mi, . . . long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo.”—MATYU 11:29.
1. I gat wanem as na skul yumi kisim long Jisas inap helpim yumi?
LONG olgeta taim, tingting na pasin na ol tok bilong Jisas em i stret tasol. Em i stap sotpela taim tasol long graun, tasol insait long dispela hap taim, em i mekim wanpela wok i mekim em i belgut tru, na em i stap amamas. Em i bungim ol man bilong kamap disaipel bilong em na em i skulim ol long pasin bilong lotuim God, na laikim ol manmeri, na winim strong bilong dispela graun. (Jon 16:33) Em i tokim ol long wanpela gutpela samting ol inap wetim i kamap, na “long gutnius bilong em, em i mekim olgeta manmeri i save long laip i save stap oltaim.” (2 Timoti 1:10) Sapos yu wanpela disaipel bilong em, yu ting disaipel i gat wok long mekim wanem? Sapos yumi kisim save long ol tok bilong Jisas long wok disaipel, bai yumi inap lain long rot bilong mekim i stap bilong yumi i kamap gutpela. Bilong mekim olsem, yumi mas kisim wankain tingting olsem bilong em, na i gat sampela lo bilong stiaim tingting yumi mas bihainim.—Matyu 10:24, 25; Luk 14:26, 27; Jon 8:31, 32; 13:35; 15:8.
2, 3. (a) Disaipel bilong Jisas em i wanem kain man? (b) Bilong wanem i bikpela samting long yumi mas askim yumi yet: ‘Mi disaipel bilong husat?’
2 Long Ol Skripsa Grik, tok ol i tanim olsem “disaipel” em i makim man i putim tingting i go long wanpela samting, o man i lain na kisim save. Wanpela tok i kain olsem dispela em i stap long Matyu 11:29, em as skripsa bilong dispela stadi. Em i tok: “Yupela kisim save [olsem skul] long mi na aninit long tok bilong mi, . . . long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo.” Em nau, disaipel em i man bilong lain. Long 4-pela Gutnius, planti taim dispela tok “disaipel” i makim ol man i bihainim tru Jisas—ol i raun wantaim em taim em i autim tok na em i save skulim ol. Tasol sampela man i save bilip long ol tok bilong Jisas na em tasol, na sampela i bilip, tasol ol i haitim bilip bilong ol. (Luk 6:17; Jon 19:38) Ol man bilong raitim Gutnius ol i bin toktok tu long “ol disaipel bilong Jon [Bilong Baptais] na ol disaipel bilong ol Farisi.” (Mak 2:18) Jisas i tokim ol disaipel bilong em long ol i mas “lukaut long tok bilong ol Farisi,” olsem na yumi ken askim yumi yet, ‘Mi disaipel bilong husat?’—Matyu 16:12.
3 Sapos yumi disaipel bilong Jisas na yumi bin kisim skul long em, orait taim ol narapela i stap wantaim yumi, ol i mas pilim olsem ol i kisim nupela strong long ol samting bilong spirit. Ol i mas lukim olsem yumi kamap man i mekim pasin isi long narapela na yumi daunim yumi yet. Sapos yumi holim wok olsem maneja samting, o yumi papamama, o yumi holim wok wasman insait long kongrigesen Kristen, orait olsem wanem? Ol lain yumi lukautim ol i pilim olsem yumi mekim wankain pasin long ol olsem Jisas i bin mekim long ol narapela?
Pasin Jisas i Mekim Long Ol Man
4, 5. (a) Olsem wanem i no hatwok long kisim save long pasin Jisas i mekim long ol man i gat hevi? (b) Wanem samting i painim Jisas taim em i sindaun kaikai long haus bilong wanpela Farisi?
4 Yumi mas save long pasin Jisas i bin mekim long ol manmeri na long ol man i gat bikpela hevi tu. I no hatwok long kisim save long dispela, long wanem, Baibel i stori long planti samting Jisas i mekim taim em i bungim ol man i gat hevi o sik samting. Yumi ken tingim tu pasin ol Farisi na ol narapela hetman bilong lotu i bin mekim long ol man i gat hevi. Taim yumi skelim, yumi bai kisim save olsem pasin bilong Jisas i narapela kain stret long pasin bilong ol Farisi.
5 Long yia 31 C.E., taim Jisas i autim tok long Galili, “wanpela Farisi i singautim Jisas i kam kaikai wantaim em.” Jisas i orait long bihainim dispela singaut. “Jisas i go long haus bilong dispela Farisi na i sindaun long kaikai. Wanpela meri i save mekim ol kain kain pasin nogut em i stap long dispela taun. Em i harim tok long Jisas i kaikai long haus bilong dispela Farisi, olsem na dispela meri i kisim wanpela naispela botol ston i gat sanda na em i kam. Na em i go sanap baksait long Jisas klostu long lek bilong en, na em i krai i stap. Wara bilong ai bilong en i kapsait long lek bilong Jisas, na dispela meri i mekim drai long gras bilong het bilong em yet. Em i givim planti kis long lek bilong Jisas, na em i kisim dispela sanda na welim lek bilong en.”—Luk 7:36-38.
6. Ating i gat wanem as na dispela meri i mekim “planti sin” em i stap long haus bilong wanpela Farisi?
6 Long tingting bilong yu, yu inap lukim dispela samting i bin kamap? Wanpela buk i tok: “Dispela meri (ves 37) i bihainim pasin bilong ples i larim ol man i sot tru long ol samting long ol i ken go long kain kaikai olsem bilong kisim ol hap kaikai i stap yet, em ol man i no bin kaikai.” Dispela inap helpim yumi long save, olsem wanem man ol i no bin singautim em, em inap go long kaikai. Ating i gat sampela manmeri moa ol tu ol i stap na i laik kisim hap kaikai i stap yet. Tasol pasin bilong dispela meri i narapela kain. Em i no sanap nating tasol na wet long ol lain i kaikai pinis, nogat. Em i gat nem olsem wanpela sinmeri “i save mekim ol kain kain pasin nogut,” olsem na Jisas inap tok em i save long “ol planti sin” bilong em.—Luk 7:47.
7, 8. (a) Sapos yumi bin stap long dispela taim em Luk 7:36-38 i stori long en, ating bai yumi mekim wanem? (b) Saimon i tok wanem?
7 Tingim olsem yu stap long dispela taim bipo na samting i painim Jisas em i painim yu yet. Orait bai yu mekim wanem? Bai yu sem taim dispela meri i kam long yu? Bai yu pilim olsem wanem? (Luk 7:45) Bai yu kirap nogut tru?
8 Sapos yu bin stap namel long ol lain i bin kam long bung, bai tingting bilong yu i wankain olsem bilong dispela Farisi, Saimon, o olsem wanem? “Dispela Farisi i bin singautim Jisas i kam, em i lukim ol samting dispela meri i mekim, na em i tingting olsem, ‘Sapos dispela man em i profet tru, bai em i save long dispela meri i putim han long em, na bai em i save long pasin bilong en tu. Dispela meri em i meri bilong mekim sin.’ ” (Luk 7:39) Tasol Jisas i man bilong bel sori long narapela. Em i pilim tru hevi bilong dispela meri. Baibel i no tokim yumi long wanem samting i mekim na meri i kirap mekim pasin nogut. Tasol sapos tru tru em i wanpela pamukmeri, orait yumi ken save olsem, ol man bilong dispela taun, em ol Juda i save givim bel long God, ol i no bin helpim em liklik.
9. Jisas i tok wanem, na ating wanem samting i kam long dispela?
9 Tasol Jisas i laik helpim em. Em i tokim em. “Mi lusim pinis ol sin bilong yu.” Na bihain em i tok moa olsem: “Bilip bilong yu i mekim na nau yu stap gut wantaim God. Yu go, na bel bilong yu i ken i stap isi.” (Luk 7:48-50) Em pinis bilong dispela stori. Ating sampela bai tok olsem Jisas i no mekim planti samting bilong helpim em. Em i mekim sampela tok i mekim gut bel bilong em na em tasol. Tasol olsem wanem? Yu ting meri i kirap gen long mekim pasin nogut? Yumi no save, tasol tingim narapela tok Luk i mekim. Em i tok Jisas “i raun long ol taun na ol ples na em i wok long autim gutnius bilong kingdom.” Na Luk i tok “sampela meri” i wokabaut wantaim Jisas na ol disaipel bilong em na ol i “save givim ol samting bilong ol bilong helpim Jisas wantaim ol disaipel bilong en.” Yumi ken ting olsem dispela meri i pilim tru wok bilong Jisas na tanim bel em i wanpela bilong ol dispela meri. Em i kirap bihainim ol pasin God i laikim na nau bel bilong em i no gat tok, na i stap bilong em i gat as bilong en, na em i laikim God moa yet.—Luk 8:1-3.
Jisas i Narapela Kain Long Ol Farisi
10. Bilong wanem i gutpela sapos yumi tingim stori bilong Jisas na dispela meri taim ol i stap long haus bilong Saimon?
10 Dispela stori i lainim yumi long wanem samting? Em i kirapim bel bilong yumi, a? Tingim olsem yu stap long haus bilong Saimon. Bai yu pilim olsem wanem? Bai yu mekim wankain pasin olsem Jisas i bin mekim, o bai yu gat wankain tingting liklik olsem bilong dispela Farisi? Jisas em i Pikinini bilong God, olsem na yumi no inap pilim ol samting long bel wankain olsem Jisas i bin pilim na mekim wankain pasin olsem em i bin mekim. Tasol yumi no laik ting yumi wankain olsem dispela Farisi, Saimon, a? Ol man i no laik bai narapela i tingim ol olsem wanpela Farisi.
11. I gat wanem as na yumi no laik bai ol man i tingim yumi i wankain olsem ol Farisi?
11 Baibel na sampela buk bilong graun ol i helpim yumi long save olsem ol Farisi i save litimapim ol yet olsem wanpela lain bilong lukautim ol Juda na helpim kantri. Lo bilong God i klia na i no hatwok long man i kisim gut, tasol ol Farisi i no amamas long dispela. Taim ol i ting Lo i no tokaut klia long wanpela samting, ol yet i kamapim sampela lo bilong helpim dispela lo i no klia na bai ol man i no gat wok long bihainim maus bilong bel. Ol dispela hetman bilong lotu i wok long kamapim ol lo bilong bosim olgeta samting ol man i laik mekim, na ol liklik liklik samting tu.a
12. Ol Farisi i gat wanem tingting long ol yet?
12 Saveman Josifas, em wanpela Juda i bin stap long taim bilong ol aposel, em i tok ol Farisi i save tingim ol yet olsem man i mekim pasin isi long ol narapela, na helpim ol, na mekim wankain pasin long olgeta man, na ol inap tru long mekim wok bilong ol. Ating sampela i kain man olsem. Nikodemas em wanpela. (Jon 3:1, 2; 7:50, 51) Bihain sampela i kamap Kristen. (Aposel 15:5) Kristen aposel Pol i stori long sampela Juda, olsem ol Farisi, na em i tok: “Ol i strong tumas long bihainim pasin God i laikim. Tasol ol i no klia gut long laik tru bilong God, na ol i mekim.” (Rom 10:2) Tasol taim ol Gutnius i stori long ol Farisi, ol i kamapim tingting bilong ol man nating long ol—ol i ting ol Farisi ol i man bilong pasin antap, na hambak, na tingim ol yet i stretpela man, na ol i wok long painim popaia bilong ol man, na skelim pasin bilong man olsem em i stap long kot, na daunim ol man.
Tingting Bilong Jisas
13. Jisas i tok wanem long pasin bilong ol Farisi?
13 Jisas i tok ol saveman bilong lo na ol Farisi ol i man bilong tupela maus. Em i tok: “I olsem ol i save pasim karamap i hevi tumas na putim antap long sol bilong ol man, na ol man i hatwok tru long karim. Tasol ol yet i no laik putim pinga tasol bilong helpim ol man long karim.” Tru tumas, samting ol i givim ol long karim em i hevi tumas na i givim hatwok tru long ol. Jisas i tok ol saveman bilong lo na ol Farisi ol i “longlong.” Longlong man inap nogutim ol manmeri. Na tu, Jisas i kolim ol saveman bilong lo na ol Farisi olsem ol “aipas i laik soim rot long ol man,” na em i tok ol i “lusim pinis olgeta bikpela hap tok bilong lo, olsem tok bilong stretpela pasin bilong skelim man na pasin bilong marimari na pasin bilong bilip.” Yumi no laik bai Jisas i tingim yumi olsem man i mekim pasin olsem ol Farisi, a?—Matyu 23:1-4, 16, 17, 23.
14, 15. (a) Pasin Jisas i mekim long Matyu Livai i givim wanem tingting long yumi long ol pasin bilong ol Farisi? (b) Dispela stori inap lainim yumi long wanem bikpela samting?
14 Taim yumi ritim 4-pela Gutnius, yumi kisim save olsem ol Farisi ol i man bilong sutim tok long pasin bilong ol man. Taim Jisas i singautim Matyu Livai, em man bilong kisim takis, long kamap disaipel bilong em, Livai i mekim wanpela bikpela kaikai bilong Jisas. Baibel i tok: “Ol Farisi wantaim ol saveman bilong lo bilong lain Farisi ol i toktok planti long ol disaipel bilong Jisas. Ol i tok, ‘Watpo yupela i save kaikai na dring wantaim ol man bilong kisim takis na ol man bilong mekim sin?’ Na Jisas i bekim tok bilong ol olsem, ‘. . . Mi no kam bilong singautim ol stretpela man long tanim bel. Nogat. Mi kam bilong singautim ol man i save mekim sin.’ ”—Luk 5:27-32.
15 Livai yet i kisim gut narapela tok Jisas i bin mekim long dispela taim: “Yupela go kisim save long dispela tok i stap long buk blilong God, ‘Mi no laikim ol ofa nating yupela i save mekim. Mi laikim tumas bai yupela i mekim gutpela pasin long ol arapela.’ ” (Matyu 9:13) Ol Farisi i tok ol i bilip long ol tok em ol profet Hibru i raitim, tasol ol i no bihainim dispela tok bilong Hosea 6:6 em Jisas i kolim. Ol i strong long bihainim ol lo ol i bin kisim long maus bilong ol tumbuna na ol i putim dispela i go pas long pasin bilong mekim gut long narapela. Olsem na yumi olgeta wan wan i ken askim yumi yet: ‘Mi gat nem olsem man i strong tumas long narapela i mas bihainim sampela lo, em ol kain lo i save kamapim tingting bilong mi yet, o sampela pasin em planti i ting yumi mas bihainim? O ol man i tingim mi olsem man bilong marimari na mekim gutpela pasin long narapela?’
16. Wanem pasin bilong ol Farisi? Yumi mas mekim wanem na bai yumi no bihainim pasin bilong ol?
16 Ol Farisi i wok long skelim skelim pasin bilong ol man na sutim tok long ol. Ol i wok long painim olgeta rong ol man i mekim o ol i ting ol i mekim. Ol i wok long tokaut long ol pasin kranki bilong ol, olsem na ol lain i no stap isi. Ol Farisi i litimapim nem bilong ol yet olsem ol i man i strong long tilim ol liklik sayor samting bilong gaden long 10-pela hap na givim wanpela hap long God. Ol i save pasim ol narapela kain klos bambai ol man i ken ting ol i givim bel moa yet long God, na ol i strong long bosim ol dispela lain manmeri. Olsem na sapos yumi laik bihainim pasin bilong Jisas, yumi mas abrusim pasin bilong wok oltaim long painim na kamapim ol popaia bilong ol narapela.
Jisas i Mekim Wanem Bilong Stretim Ol Hevi?
17-19. (a) Stori long pasin Jisas i mekim long samting em bikpela hevi inap kamap long en. (b) Wanem samting i mekim na meri i no stap isi? (c) Sapos yu bin i stap long dispela taim meri i kam long Jisas, bai yu mekim wanem?
17 Pasin bilong Jisas long stretim hevi em i narapela kain olgeta long pasin bilong ol Farisi. Yumi ken tingim samting Jisas i bin mekim taim wanpela samting i kamap na bikpela hevi inap kamap long dispela. Wanpela meri i kam long Jisas, em i bin karim blut oltaim inap 12-pela yia. Yu ken ritim dispela stori long Luk 8:42-48.
18 Mak i tok dispela meri em i “pret na i guria.” (Mak 5:33) Bilong wanem? Long wanem, meri ya i save em i brukim Lo bilong God. Wok Pris 15:25-28 i tok, meri i karim blut, em i stap doti i go inap long blut i drai olgeta, na wanpela wik moa. Olgeta samting em i holim, na olgeta man na meri em i putim han long ol, ol i kamap doti. Bilong meri i ken kamap long Jisas, em i mas wokabaut namel long bikpela lain manmeri. Taim yumi ritim dispela stori i bin kamap 2,000 yia bipo, yumi pilim tru hevi bilong em.
19 Sapos yu bin stap long dispela taim bipo, bai yu mekim wanem? Bai yu tok wanem long dispela meri? Jisas i mekim gutpela pasin sori long em, na sapos sampela hevi i bin kamap long samting meri i mekim, Jisas i no kamapim liklik.—Mak 5:34.
20. Sapos Wok Pris 15:25-28 em wanpela lo long nau, orait dispela bai givim wanem wok long yumi?
20 Dispela stori inap lainim yumi long wanem samting? Orait, sapos yu wanpela elda long wanpela kongrigesen Kristen long nau. Na sapos lo bilong Wok Pris 15:25-28 em i wanpela lo ol Kristen long nau i mas bihainim na wanpela meri Kristen i brukim dispela lo na em i tingting planti na em i no save liklik long samting em i mas mekim. Orait bai yu mekim wanem? Bai yu givim strongpela tok long em i semim em long ai bilong ol man? Ating bai yu tok, ‘Nogat, mi no ken mekim kain pasin olsem! Bai mi bihainim pasin bilong Jisas na wok strong long mekim pasin isi long em.’ Em gutpela yumi tok olsem! Tasol bikpela samting em yumi mas bihainim dispela pasin bilong Jisas.
21. Jisas i lainim ol man long wanem samting bilong Lo?
21 Ol tok bilong Jisas i strongim tru bel bilong ol man na ol i kisim nupela strong. Taim i gat wanpela lo stret bilong God, orait ol i mas bihainim. Tasol sapos i no gat wanpela tok stret bilong samting, orait nau ol i mas bihainim maus bilong bel, na long rot bilong ol samting ol i tingting long mekim ol inap kamapim klia ol i laikim tru God. Lo i givim rot long ol long skelim samting ol i laik mekim. (Mak 2:27, 28) God i laikim tumas lain bilong em, na oltaim em i wok long helpim ol, na taim ol i pundaun, em i redi long marimari long ol. Jisas tu i kain man olsem.—Jon 14:9.
Ol Tok Bilong Jisas i Mekim Wanem?
22. Jisas i helpim ol disaipel long kisim wanem kain tingting?
22 Ol man i harim tok bilong Jisas na kamap disaipel bilong em, ol i pilim pinis olsem dispela tok bilong em i stret tru: “Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.” (Matyu 11:30) Em i no givim bikpela hevi long ol na daunim ol, nogat. Ol i stap fri, na amamas, na ol i pilim olsem ol i stap wanbel wantaim God na ol narapela, winim bilong bipo. (Matyu 7:1-5; Luk 9:49, 50) Jisas i helpim ol long save olsem man i go pas long helpim narapela long ol samting bilong spirit em i mas daunim em yet na mekim isi bel bilong narapela.—1 Korin 16:17, 18; Filipai 2:3.
23. Ol disaipel i bin raun wantaim Jisas na dispela i skulim ol long wanem bikpela samting? Dispela i kirapim ol long tingim wanem ol samting?
23 Na tu, planti ol i pilim olsem i bikpela samting long ol i mas pas wantaim Krais na bihainim pasin bilong em. Em i tokim ol disaipel: “Papa i save laikim mi tumas, na long wankain pasin mi bin laikim yupela. Oltaim yupela i mas i stap insait long dispela laikim bilong mi. Sapos yupela i bihainim gut ol lo na tok bilong mi, orait yupela bai i stap insait long laikim bilong mi, olsem mi bin bihainim gut ol lo na tok bilong Papa bilong mi, na mi stap insait long laikim bilong em.” (Jon 15:9, 10) Bilong ol i ken mekim gut wok bilong God olsem wokman bilong em, ol i mas wok strong long bihainim ol tok Jisas i bin skulim ol long en—long wok bilong autim tok na lainim ol man long ol gutpela tok bilong God, na long pasin ol i mekim long ol pren na famili. Taim ol disaipel i kamap planti na i gat ol kongrigesen i kamap, planti taim ol i mas tingim dispela samting olsem: Rot Jisas i makim, dispela em i stretpela rot. Ol tok em i bin skulim ol long en em i tru, na pasin na tingting ol i lukim em i bihainim, ol tu i mas wok long bihainim.—Jon 14:6; Efesus 4:20, 21.
24. Wanem sampela samting bilong Jisas yumi mas tingim gut na bihainim?
24 Olsem wanem? Taim yu tingim ol dispela samting yumi bin toktok long en, yu lukim sampela samting yu mas kamap gutpela moa long en? Yu wanbel long dispela tok olsem tingting na pasin bilong Jisas na ol tok em i bin skulim ol man long en, olgeta taim dispela em i stret? Sapos olsem, orait larim dispela gutpela tok bilong Jisas i strongim bel bilong yu, em i tok: “Yupela i save pinis long as tingting bilong dispela pasin mi mekim, na sapos yupela i bihainim gut, orait yupela i ken amamas.”—Jon 13:17.
[Futnot]
a ‘Yumi inap save pasin bilong Jisas na bilong ol Farisi em i narapela narapela kain taim yumi tingim dispela samting: Ol Farisi i tok God i save strong strong long ol man i mas bihainim tok bilong em, tasol Jisas i tok God i save bel sori long ol man na em i laik helpim ol. Tru, ol Farisi i save God em i Man bilong gutpela pasin na pasin sori, tasol ol i ting ol dispela pasin i bin kamap ples klia long dispela Lo yet em i bin givim long ol man na long pasin bilong mekim olgeta samting Lo i kolim. Ol i ting taim man i bihainim ol lo ol i bin kisim long maus bilong ol tumbuna, wantaim ol tok bilong kamapim insait bilong Lo, orait nau em inapim Lo. Tasol Jisas i litimapim pasin bilong laikim God na laikim ol narapela, olsem as tok bilong Lo em yumi ken bihainim (Mt. 22:34-40), na em i sakim strongpela pasin bilong ol lo ol man i bin kisim long maus bilong ol tumbuna. Em nau, dispela i mekim na tok bilong Jisas i pait wantaim tingting bilong ol Farisi.’—Buk The New International Dictionary of New Testament Theology.
Bai Yu Bekim Olsem Wanem?
• Yu ting man i stap disaipel bilong Jisas em i gat wok long mekim wanem?
• Jisas i save mekim wanem pasin long ol narapela?
• Pasin Jisas i bihainim long skulim ol man, dispela inap lainim yumi long wanem samting?
• Olsem wanem ol Farisi i narapela kain long Jisas?
[Ol Piksa long pes 18, 19]
Jisas i mekim pasin long ol man em i narapela kain long pasin bilong ol Farisi!