Jehova—Nambawan Piksa Long Mekim Gutpela Pasin
“Yumi mas tenkyu long Bikpela I Gat Olgeta Strong. Em i save mekim gut tru long yumi.”—JEREMAIA 33:11.
1. Bilong wanem bel bilong yumi i kirapim yumi long litimapim nem bilong God long gutpela pasin em i save mekim?
GOD JEHOVA i win olgeta long mekim gutpela pasin. Profet Nahum i tokaut olsem: “Bikpela em i save mekim gutpela pasin long yumi.” (Nahum 1:7) Tru tumas, gutpela pasin bilong God i kamap ples klia long olgeta wok Jehova i bin mekim bilong redim graun bambai yumi ken i stap amamas long en. (Stat 1:31) Taim God i wokim ples antap na graun, em i bin putim ol lo bilong bosim ol dispela samting, tasol inap long olgeta taim bihain yumi no inap kisim save long olgeta dispela lo. (Saveman 3:11; 8:17) Tasol liklik save yumi kisim pinis i kirapim yumi long litimapim nem bilong God, long wanem, em i save mekim gutpela pasin tru.
2. Bai yu stori olsem wanem long gutpela pasin?
2 Gutpela pasin em i wanem kain pasin? Em i olsem pasin i stret olgeta, o i nambawan tru. Tru, i no gat wanpela pasin nogut insait long en, tasol i no dispela samting tasol, nogat. Gutpela pasin em wanpela pasin spirit i save kamapim long man, na dispela pasin i save kamapim gutpela wok. (Galesia 5:22, 23) Taim yumi mekim sampela gutpela wok bilong helpim ol man, em nau, yumi mekim gutpela pasin. Long ol lain bilong dispela graun, pasin i gutpela long tingting bilong sampela lain, em i pasin nogut long tingting bilong narapela lain. Tasol bilong yumi ken i stap bel isi na amamas, i mas i gat wanpela lo tasol i makim wanem pasin i gutpela. Orait husat wanpela tasol inap makim dispela lo?
3. Stat 2:16, 17 i givim wanem tingting long yumi long lo i makim gutpela pasin?
3 God i save putim lo bilong makim gutpela pasin. Jehova yet i bin tokim namba wan man: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” (Stat 2:16, 17) Yes, ol man bilong graun i mas lukluk i go long Man bilong wokim ol bambai ol i ken save wanem pasin i gutpela na wanem pasin i nogut.
God i Mekim Gutpela Pasin Long Ol Man
4. Bihain long taim Adam i mekim sin, God i mekim wanem bilong helpim ol man?
4 Taim Adam i mekim sin na em i no laik tokaut olsem God yet i mas makim wanem pasin i gutpela, i olsem ol man bilong graun i no gat rot moa long i stap amamas inap oltaim oltaim na skin i gutpela olgeta. (Stat 3:1-6) Tasol taim ol pikinini bilong Adam i no kamap yet na kisim sin na dai long em, God i tok profet long wanpela Pikinini bai kamap, em i gutpela olgeta. Jehova i givim tok long “snek bilong bipo yet,” em Satan, olsem: ‘Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [“pikinini,” NW] bilong meri. Bai [em] i krungutim het bilong yu, na bai yu kaikaim lek bilong [em].’ (KTH 12:9; Stat 3:15) Em laik bilong Jehova long kisim bek ol man bilong graun i gat sin. Na tru tumas, maski ol i sinman tasol, Jehova i kamapim gutpela pasin bilong em—em i wokim rot bilong kisim bek ol man i bilip long ofa bilong gutpela Pikinini bilong em bilong baim bek ol man.—Matyu 20:28; Rom 5:8, 12.
5. Long rot bilong Adam yumi bin kisim tingting bilong mekim ol pasin nogut, tasol olsem wanem na yumi inap mekim sampela gutpela pasin?
5 Adam i bin mekim sin na long dispela rot yumi kisim tingting bilong mekim ol pasin nogut. (Stat 8:21) Tasol gutpela tru, Jehova i save helpim yumi long mekim sampela gutpela pasin. Taim yumi holim strong ol tok yumi bin lainim long buk bilong God, dispela i save ‘givim gutpela tingting long yumi na bai God i kisim bek yumi,’ na i “mekim yumi i redi long mekim olgeta kain gutpela wok,” na i save helpim yumi long mekim ol samting i gutpela long ai bilong God. (2 Timoti 3:14-17) Tasol bilong kisim gutpela helpim long ol tok Baibel i skulim yumi long en na bilong mekim gutpela pasin, yumi mas i gat wankain tingting olsem man bilong raitim song, em i tok: “[Jehova] yu gutpela tumas na yu save marimari long mi. Yu mas skulim mi gut long lo bilong yu.”—Song 119:68.
Ol i Litimapim Gutpela Pasin Bilong Jehova
6. Taim King Devit i kisim Bokis Kontrak i kam pinis long Jerusalem, ol Livai i mekim wanpela singsing i gat wanem tok insait long en?
6 King Devit bilong Israel i bin tokaut long gutpela pasin bilong God na em i laik bai God i soim rot long em. Em i tok: “Bikpela i gutpela na i stretpela olgeta. Em i save skulim ol man i save mekim sin long pasin em i laik ol i bihainim.” (Song 25:8) God i bin givim tok long ol Israel bilong skulim ol, na insait long ol dispela tok i gat tenpela bikpela lo, ol i kolim Tenpela Lo, em God i bin raitim long tupela plet ston na ol i putim i stap insait long Bokis Kontrak. Taim Devit i kisim Bokis Kontrak i kam long Jerusalem, em nambawan biktaun bilong Israel, ol Livai i mekim singsing i gat dispela tok insait long en: “Yumi mas tok tenkyu long Bikpela, long wanem, pasin bilong en i gutpela olgeta, na oltaim em i save laikim yumi tumas.” (1 Stori 16:34, 37-41) Ating em i gutpela tru long harim ol dispela tok long maus bilong ol Livai.
7. Taim ol i kisim Bokis Kontrak i kam insait long Rum Tambu Tru na Solomon i mekim pinis beten bilong dediketim tempel, wanem samting i kamap?
7 Ol i bin mekim dispela wankain tok bilong litimapim nem bilong God long taim ol i dediketim tempel bilong Jehova em Solomon, pikinini bilong Devit, i bin wokim. Taim ol i putim pinis Bokis Kontrak insait long Rum Tambu Tru bilong nupela tempel, ol Livai i kirap litimapim nem bilong Jehova, “long wanem, em i gutpela tru long yumi. Oltaim oltaim em i save laikim yumi tru.” Long dispela taim, long rot bilong mirakel wanpela klaut i pulimapim tempel, na dispela klaut i makim olsem Jehova i stap long en. (2 Stori 5:13, 14) Taim Solomon i mekim pinis beten bilong dediketim tempel, “orait God i salim paia bilong heven i kam daun na kukim ol ofa bilong paia i kukim olgeta na ol arapela ofa.” Ol Israel i lukim dispela samting na “ol i brukim skru na putim het bilong ol i go daun long ol ston ol i bin lainim long graun insait long banis bilong haus bilong Bikpela. Na ol i lotu long Bikpela na litimapim nem bilong en olsem, ‘Bikpela em i gutpela tumas long yumi. Oltaim oltaim em i save laikim yumi tru.’ ” (2 Stori 7:1-3) Ol i mekim wanpela bung bilong lotu inap 14 de pinis, na bihain ol Israel i go bek long haus bilong ol na “ol i amamas tru, long wanem, ol i tingting long olgeta gutpela samting Bikpela i bin mekim long Devit na long Solomon na long ol Israel, ol manmeri bilong em.”—2 Stori 7:10.
8, 9. (a) Tru, ol Israel i litimapim nem bilong Jehova, long wanem, em i bin mekim gut tru long ol, tasol bihain ol i mekim wanem? (b) Long maus bilong Jeremaia, Jehova i mekim wanem tok profet long Jerusalem? Dispela tok profet i kamap tru olsem wanem?
8 Tasol sori tru, ol Israel i no wok long bihainim pasin i stret wantaim ol singsing bilong ol long litimapim nem bilong God. Bihain ol manmeri bilong Juda i ‘litimapim nem bilong God long maus bilong ol tasol.’ (Aisaia 29:13) Ol i no bihainim lo bilong God i makim wanem pasin i gutpela—ol i kirap mekim pasin nogut. Ol i mekim wanem ol pasin nogut? Ol i lotuim ol god giaman, mekim pasin pamuk, mekim nogut long ol rabisman, na ol narapela bikpela rong! Olsem na ol Babilon i kam bagarapim Jerusalem na kisim ol manmeri bilong Juda i go kalabus long Babilon long yia 607 B.C.E.
9 Em nau, Jehova i skulim na stretim lain bilong em. Tasol long maus bilong profet Jeremaia em i tok profet olsem, long Jerusalem bai ol i harim nek bilong ol man i tok olsem: “Yumi mas tenkyu long Bikpela I Gat Olgeta Strong. Em i save mekim gut tru long yumi. Oltaim oltaim em i save laikim yumi tumas.” (Jeremaia 33:10, 11) Na dispela samting i kamap tru. Taim kantri Juda i stap nating inap 70 yia pinis, long yia 537 B.C.E., liklik hap lain bilong Juda ol i kam bek long Jerusalem. (Jeremaia 25:11; Daniel 9:1, 2) Ol i wokim gen alta long ples tempel i bin stap long en long maunten Moria na ol i kirap wokim ol ofa long dispela alta. Long namba tu yia bilong ol i kam bek, ol i putim ol bikpela ston bilong wokim tempel antap long en. Man! Em taim bilong amamas tru! Esra i tok: “Taim ol wokman i putim ol bikpela ston long as bilong banis bilong haus bilong God, orait ol pris i pasim klos pris na kisim biugel na i kam sanap long ples bilong wok. Na ol Livai bilong lain Asap i kam sanap wantaim ol. Na olgeta wan wan i holim tupela plet kapa bilong paitim na mekim musik. Na ol i bihainim tok King Devit i bin raitim na ol i litimapim nem bilong Bikpela. Ol i singim song bilong amamas long Bikpela . . . olsem, ‘Bikpela i save mekim gutpela pasin oltaim, na oltaim em i save laikim ol Israel.’ ”—Esra 3:1-11.
10. Wanem bikpela tok i stap long kirap na pinis bilong Song 118?
10 Long sampela song moa i gat wankain tok bilong litimapim nem bilong Jehova long gutpela pasin em i mekim. Wanpela em Song 118, em ol famili Israel i singim long pinis bilong kaikai bilong Pasova. Long kirap na pinis bilong dispela song ol i mekim tok olsem: “Yumi mas tenkyu long Bikpela. Em i bin mekim gutpela pasin long yumi. Oltaim oltaim em i save laikim yumi tumas.” (Song 118:1, 29) Ating dispela em i laspela tok bilong litimapim nem bilong God em Jisas Krais i bin singim wantaim ol gutpela aposel bilong em long nait paslain long taim em i dai long 33 C.E.—Matyu 26:30.
“Soim Mi Bikpela Lait Bilong Pes Bilong Yu”
11, 12. Taim Moses i lukim liklik hap lait bilong God, em i harim wanem tokaut?
11 Sampela handet yia paslain long taim bilong Esra, Jehova i kamapim klia long namba wan taim olsem gutpela pasin bilong em i wok wantaim pasin sori bilong em. Taim ol Israel i lotuim bulmakau gol long ples drai nating na Jehova i kilim i dai ol man i bin mekim dispela rong, bihain long en Moses i askim Jehova: “Mi laik yu soim mi bikpela lait bilong pes bilong yu.” Jehova i save pinis, sapos Moses i lukim pes bilong Em bai em i dai, olsem na Jehova i tok: “Mi bai soim yu gutpela pasin bilong mi.”—Kisim Bek 33:13-20.
12 Long de bihain long en, long maunten Sainai, Jehova i soim gutpela pasin bilong em long Moses. Long dispela taim Moses i lukim liklik hap lait bilong Jehova na em i harim tokaut olsem: “Jehova, Jehova, em i God bilong marimari na sori, na em i no save belhat kwik; pasin sori i pulap tru long em na em i save tok tru oltaim, na em i save mekim gutpela pasin sori long planti tausen manmeri, na lusim rong na asua na sin bilong ol, tasol em i no ken larim man i abrusim strafe. Em bai givim strafe long ol pikinini man na ol tumbuna pikinini long rong papa bilong ol i bin mekim, na long namba 3 na namba 4 lain tumbuna pikinini i kamap bihain long em.” (Kisim Bek 34:6, 7, NW ) Dispela tok i makim olsem gutpela pasin bilong Jehova i poroman wantaim pasin sori na sampela pasin moa bilong em. Taim yumi skelim ol dispela pasin, dispela bai helpim yumi long mekim gutpela pasin. Orait pastaim yumi ken tingim dispela pasin em tupela taim God i bin kolim taim em i tokaut long gutpela pasin bilong em.
“Pasin Sori i Pulap Tru Long Em”
13. Long dispela tokaut bilong gutpela pasin bilong God, wanem pasin em i kolim tupela taim? Bilong wanem dispela i stret?
13 “Pasin sori i pulap tru long [ Jehova] . . . , na em i save mekim gutpela pasin sori long planti tausen manmeri.” Tok Hibru ol i tanim olsem “pasin sori,” yumi ken tanim tu olsem “laikim tru.” Em dispela pasin tasol God i bin kolim tupela taim long dispela tokaut em i mekim long Moses. Na dispela i stret tru, long wanem, nambawan pasin Jehova i strong tru long mekim, em pasin sori! (1 Jon 4:8) Dispela tok bilong litimapim nem bilong Jehova, olsem “em i bin mekim gutpela pasin long yumi” na “oltaim oltaim em i save laikim yumi tumas,” dispela tok i kamapim klia dispela pasin bilong em.
14. Wanem lain em God i save strong moa long mekim gutpela pasin na pasin sori long ol?
14 Wanpela samting i kamapim klia gutpela pasin bilong Jehova i olsem: “Pasin sori i pulap tru long em.” Dispela i kamap klia tru long pasin bilong em long lukautim gut ol wokman bilong em i dediket pinis long em na ol i stap gut long em. (1 Pita 5:6, 7) Em i save ‘laikim tru’ ol man i laikim em tumas na i mekim wok bilong em, na ol Witnes Bilong Jehova inap tokaut stret long dispela pasin bilong em. (Kisim Bek 20:6) Lain Israel bilong skin i sakim Pikinini bilong Jehova, olsem na em i no mekim pasin sori moa long ol, o laikim tru ol. Tasol ol Kristen bilong olgeta kantri ol i stap gut long God, em bai mekim gutpela pasin long ol na laikim tru ol i go inap oltaim oltaim.—Jon 3:36.
Jehova—God Bilong Marimari na Sori
15. (a) Wanem namba wan tok bilong dispela tokaut Moses i bin harim long maunten Sainai? (b) Wanem ol samting i insait long pasin marimari?
15 Dispela tokaut Moses i bin harim long maunten Sainai, namba wan tok bilong en i olsem: “Jehova, Jehova, em i God bilong marimari na sori.” Long tok Hibru, ating dispela tok “marimari” i makim “ol rop bilong bel,” na i kain olsem dispela tok “bel” long tok Hibru. Olsem na dispela tok marimari i makim pasin bilong sori tru i stap insait long bel bilong man. Tasol marimari i no olsem yumi bel sori long man na em tasol, nogat. Em i mas kirapim yumi long mekim sampela samting bilong helpim ol man i gat hevi. Olsem: Ol elda Kristen i gat pasin sori ol i lukim olsem ol i mas marimari long ol wanbilip, olsem ‘sori long ol na amamas long helpim ol,’ sapos i stret long mekim olsem.—Rom 12:8; Jems 2:13; Jut 22, 23.
16. I gat wanem as na yumi ken tok Jehova em i Man bilong sori?
16 Na gutpela pasin bilong God i save kamap ples klia long pasin sori em i save mekim. Man bilong sori i save tingim gut ol narapela na em i save mekim gutpela pasin long ol man, na moa yet long ol man nating i no gat nem. Jehova em i nambawan piksa tru long mekim pasin sori long ol gutpela wokman bilong em. Olsem: Long rot bilong ol ensel, God i mekim pasin sori na strongim lapun profet Daniel na i toksave long meri singel, Maria, olsem em bai karim Jisas. (Daniel 10:19; Luk 1:26-38) Yumi ol lain bilong Jehova yumi amamas tru long gutpela pasin bilong em long givim tok long yumi long rot bilong Baibel. Yumi litimapim nem bilong em long dispela gutpela pasin em i mekim, na yumi laik painim rot bilong mekim gutpela pasin long ol narapela man. Ol man i winim mak long ol samting bilong spirit, taim ol i stretim wanpela wanbilip long “pasin isi,” ol i laik mekim gutpela pasin na pasin sori long em.—Galesia 6:1.
Em i No Save Belhat Kwik
17. Bilong wanem yumi ken tenkyu long Jehova i “no save belhat kwik”?
17 “God . . . em i no save belhat kwik.” Dispela tok i soim yumi long narapela samting i kamapim klia gutpela pasin bilong Jehova. Jehova i isi long yumi na i no save les kwik long ol pasin kranki bilong yumi, na em i givim taim long yumi bilong stretim ol bikpela pasin kranki na kamap strong long ol samting bilong spirit. (Hibru 5:12–6:3; Jems 5:14, 15) Na pasin bilong God long isi long man i save helpim ol man i no kirap yet long lotuim em. Ol i gat hap taim yet long bilip long tok bilong Kingdom na tanim bel. (Rom 2:4) Tasol maski Jehova i save isi long ol man, sampela taim gutpela pasin bilong em i kirapim em long kamapim belhat bilong em, olsem em i bin mekim taim ol Israel i lotuim bulmakau gol long maunten Sainai. Klostu nau na Jehova bai kamapim moa yet belhat bilong em taim em i pinisim pasin nogut bilong dispela graun Satan i bosim.—Esekiel 38:19, 21-23.
18. Long pasin bilong tok tru, olsem wanem Jehova i narapela kain long ol hetman bilong graun?
18 “Jehova, em i God bilong . . . tok tru oltaim.” Man! Jehova i narapela kain tru long ol hetman bilong graun, em ol i save mekim ol bikpela tok promis tasol ol i no truim ol dispela tok! Tasol ol manmeri i lotuim Jehova ol inap bilip long olgeta tok i stap long Baibel, em Tok bilong em. God i save tok tru oltaim, olsem na oltaim yumi inap bilip long ol tok promis bilong em. Long gutpela pasin bilong em, Papa bilong yumi long heven i save harim beten bilong yumi taim yumi askim em long givim tok i tru bilong spirit long yumi, na em i save givim moa yet long yumi.—Song 43:3; 65:2.
19. Wanem gutpela pasin tru Jehova i bin mekim long ol sinman i tanim bel?
19 “Jehova, em i God bilong . . . lusim rong na asua na sin bilong ol.” Gutpela pasin bilong Jehova i mekim na em i redi long lusim rong bilong ol man i tanim bel. Yumi tenkyu tru long gutpela Papa bilong yumi long heven, long wanem, long ofa bilong Jisas Em i bin wokim rot bilong lusim ol rong bilong yumi. (1 Jon 2:1, 2) Yumi amamas tru olsem olgeta manmeri i bilip long ofa bilong baim bek ol man, Jehova inap orait long ol na ol i ken wet long kisim laip i stap oltaim long nupela taim em i tok promis long kamapim. Em nau, i gat as tru na yumi ken litimapim nem bilong Jehova, em i bin mekim gutpela pasin tru long ol man!—2 Pita 3:13.
20. Wanem samting i kamapim klia olsem God i no orait long pasin nogut?
20 “Jehova . . . i no ken larim man i abrusim strafe.” Em narapela as na yumi ken litimapim nem bilong Jehova long gutpela pasin em i mekim. Bilong wanem? Long wanem, man i save mekim gutpela pasin em i no orait long ol pasin nogut. Na tu, “long taim Bikpela Jisas wantaim olgeta strongpela ensel bilong en i lusim heven na i kamap ples klia,” strafe bai painim “ol man i no laik save long God na i no bihainim gutnius bilong Jisas, Bikpela bilong yumi.” Ol dispela man “bai i kisim pe nogut olsem. Ol bai i . . . bagarap i stap oltaim oltaim.” (2 Tesalonaika 1:6-9) Em nau, ol manmeri i lotuim Jehova na ol i abrusim dispela bagarap, ol inap i stap amamas tru, na ol i no ken kisim hevi moa long ol man i givim baksait long God, em ol i “birua long olgeta gutpela pasin.”—2 Timoti 3:1-3.
Bihainim Gutpela Pasin Bilong Jehova
21. Bilong wanem yumi mas mekim gutpela pasin?
21 Yes, i gat planti as na yumi ken litimapim nem bilong God na tok tenkyu long gutpela pasin bilong em. Yumi ol wokman bilong em i mas wok strong tru long bihainim dispela pasin bilong em, a? Tru tumas, long wanem, aposel Pol i tokim ol wanlain Kristen: “God i save laikim yupela tru, na yupela i stap pikinini bilong em. Olsem na yupela i mas bihainim ol pasin em yet i save mekim.” (Efesus 5:1) Long olgeta taim Papa bilong yumi long heven i save mekim gutpela pasin, na yumi tu i mas mekim olsem.
22. Long stori i kamap bihain long dispela, bai yumi toktok long wanem samting?
22 Sapos yumi dediket long Jehova long bel bilong yumi olgeta, orait yumi gat bikpela laik tru long bihainim gutpela pasin bilong em. Yumi pikinini bilong sinman Adam, olsem na yumi save hatwok long mekim pasin i gutpela. Tasol long stori i kamap bihain long dispela, bai yumi lukim olsem i gat wanem as na yumi inap mekim gutpela pasin. Na bai yumi skelim sampela samting yumi inap mekim—na yumi mas mekim—bilong bihainim pasin bilong Jehova, em i nambawan piksa tru long mekim gutpela pasin.
Bai Yu Bekim Olsem Wanem?
• Gutpela pasin em i wanem kain pasin?
• Wanem tok bilong Baibel i kamapim klia gutpela pasin bilong Jehova?
• Wanem sampela pasin bilong Jehova i kamapim klia gutpela pasin bilong em?
• Bilong wanem yumi mas bihainim gutpela pasin bilong Jehova?
[Piksa long pes 12]
Jehova i bin skulim na stretim lain bilong em bilong bipo, long wanem, ol i no bihainim tok ol i bin mekim bilong litimapim nem bilong em
[Piksa long pes 12]
Hap lain i stap gut long Jehova ol i kam bek long Jerusalem
[Piksa long pes 13]
Moses i harim wanpela gutpela tokaut tru long gutpela pasin bilong God
[Piksa long pes 15]
Gutpela pasin bilong Jehova i kamap ples klia long pasin bilong em long givim tok long yumi long rot bilong Baibel