Yu Bilip Tru Tru Olsem Krais Em i Lida Bilong Yu?
“Ol i no ken kolim yupela ‘Hetman’ [“lida,” NW]. Yupela i gat wanpela hetman [“Lida,” NW] tasol, em man God i makim bilong kisim bek ol manmeri bilong en.”—MATYU 23:10.
1. Husat tasol i Lida bilong ol trupela Kristen?
EM Tunde, Nisan 11. Tripela de bihain ol bai kilim Jisas Krais i dai. Em laspela taim em i go long tempel. Long dispela de stret, Jisas i givim wanpela bikpela tok long ol disaipel na long ol manmeri i kam bung long dispela hap. Em i tok: “Ol man i no ken kolim yupela ‘Tisa.’ Nogat. Wanpela tasol em i tisa bilong yupela, na yupela olgeta i stap brata brata. Na long graun hia yupela i no ken kolim wanpela man em i papa bilong yupela. Wanpela tasol em i Papa bilong yupela, na em i stap long heven. Na ol i no ken kolim yupela ‘Hetman [lida].’ Yupela i gat wanpela hetman [Lida] tasol, em man God i makim bilong kisim bek ol manmeri bilong en.” (Matyu 23:8-10) Tru tumas, Jisas Krais em i Lida bilong ol trupela Kristen.
2, 3. Taim yumi harim tok bilong Jehova na aninit long Lida em i bin makim, dispela i save mekim wanem long i stap bilong yumi?
2 Wok lida bilong Jisas i save helpim tru ol man i laik aninit long en. Long maus bilong profet Aisaia, God Jehova i bin tokaut long dispela Lida em bai kam, olsem: “Yupela ol manmeri i dai long dring wara, yupela kam long mi. Yupela kam na dring. Na yupela ol lain i no gat mani, yupela kam long mi, na yupela kisim kaikai. Kam na kisim wain na susu, i no gat pe bilong en. . . . Putim gut yau long tok bilong mi, na mekim olsem mi tok, na bai yupela i pulap tru long ol kain kain gutpela kaikai mi givim yupela. . . . Mi bin mekim em i kamap bikman [“lida,” NW ].”—Aisaia 55:1-4.
3 Aisaia i tok piksa long ol samting ol man i save gut long en—wara, susu, wain—bilong helpim yumi long save long ol samting pasin bilong harim tok bilong Jehova na bihainim dispela Lida bai mekim long yumi. Yumi kisim nupela strong. I kain olsem taim yumi dring kolwara long taim bilong bikpela san. Yumi kisim save long tok i tru na stretpela pasin na nek i no drai moa long kisim ol dispela samting. Na olsem susu i save strongim ol bebi na helpim ol long kamap bikpela, “gutpela susu i kam long God” bai helpim yumi long kamap strong long spirit na pas gut wantaim God. (1 Pita 2:1-3) Long ol bung bilong amamas, wain inap mekim na ol man i amamas. Na olsem tasol, taim yumi lotuim trupela God na bihainim pasin bilong dispela Lida God i bin makim, dispela i save mekim na yumi “amamas tru.” (Lo 16:15) Olsem na yumi olgeta—ol yangpela na lapun, man na meri—yumi mas soim olsem yumi bilip tru tru olsem Krais em i Lida bilong yumi. Tasol long i stap bilong yumi long olgeta de, yumi ken mekim wanem bilong soim olsem Krais em i Lida bilong yumi?
Ol Yangpela—Mekim ‘Save Bilong Yupela i Kamap Gutpela Tru’
4. (a) Taim Jisas i gat 12-pela krismas na em i go long Jerusalem long taim bilong Pasova, wanem samting i kamap? (b) Olsem wanem long save bilong Jisas taim em i gat 12-pela krismas tasol?
4 Tingim pasin em Lida bilong yumi i bin mekim bilong ol yangpela i ken bihainim. Yumi no save long planti samting i bin kamap long i stap bilong Jisas taim em i pikinini, tasol i gat wanpela samting i bin kamap na em inap givim tingting long yumi. Taim Jisas i gat 12-pela krismas, papamama i kisim em i go long Jerusalem bilong mekim Pasova, olsem ol i save mekim long olgeta yia. Em i givim bel long toktok wantaim sampela tisa long ol tok bilong Baibel, na taim famili bilong em i lusim Jerusalem, pastaim ol i no save Jisas i no stap wantaim ol. Papamama bilong em, Josep na Maria, i painim painim em inap tripela de, na bihain ol i lukim em long tempel. “Em i sindaun i stap namel long ol tisa. Em i wok long harim tok bilong ol, na long askim ol tu.” Na “ol man i harim tok bilong en, ol i kirap nogut long save bilong en na long tok em i bekim long ol.” Tingim, taim Jisas i gat 12-pela krismas tasol, em inap kamapim ol askim bilong Baibel bilong kirapim tingting bilong ol dispela tisa, na tu, em inap bekim gut ol askim bilong ol! Yumi ken ting olsem samting i bin helpim gut Jisas, em ol wok papamama i bin mekim bilong skulim em.—Luk 2:41-50.
5. Ol yangpela i ken mekim wanem bilong skelim tingting bilong ol long famili-stadi?
5 Ating yu wanpela yangpela. Sapos papamama i stap olsem gutpela wokman bilong God, ating long haus bilong yu bai i gat famili-stadi long Baibel long olgeta wik. Wanem tingting bilong yu long famili-stadi? I gutpela sapos yu tingim ol askim olsem: ‘Mi save sapotim gut famili-stadi? Mi save helpim gut dispela stadi na mi no mekim sampela samting bilong pasim rot long dispela stadi i ken kamap long taim ol i makim?’ (Filipai 3:16) ‘Mi save insait long stadi na bekim sampela tok? Long taim i stret long mekim, mi save kamapim sampela askim bilong ol tok bilong stadi na stori long insait bilong en? Taim mi wok long kamap strong long ol samting bilong spirit, mi kisim pasin bilong laikim tumas “strongpela kaikai em i bilong ol man i kamap bikpela pinis”?’—Hibru 5:13, 14.
6, 7. Sapos ol yangpela i ritim Baibel long olgeta de, dispela inap helpim ol olsem wanem?
6 Pasin bilong ritim Baibel long olgeta de, dispela tu i bikpela samting. Man bilong raitim song i tok: “Man i no save bihainim tok bilong ol man nogut, . . . dispela man i ken amamas tru. Dispela man i save laikim tumas lo bilong God, na em i save tingting long dispela lo long san na long nait.” (Song 1:1, 2) Senis bilong Moses, em Josua, em i save ‘ritim buk bilong lo long san na long nait.’ Dispela samting i bin helpim em long bihainim gutpela tingting, na wok God i givim em long mekim, em i kamap gutpela tasol. (Josua 1:8, NW ) Lida bilong yumi, Jisas Krais, em i tok: “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’ ” (Matyu 4:4) Yumi mas kisim kaikai bilong skin long olgeta de, tasol i bikpela samting moa long yumi mas kisim kaikai bilong spirit long olgeta de!
7 Nicole, em i gat 13 krismas, em i save em i sot long ol samting bilong spirit, olsem na em i kirap long ritim Baibel long olgeta de.a Nau em i gat 16 krismas na em i bin ritim Baibel olgeta inap wanpela taim pinis na em i kirap gen long ritim na i kam inap long namel. Samting em i mekim i no gat hatwok long en. Em i tok: “Mi strong long ritim wanpela sapta long olgeta de.” Olsem wanem? Pasin bilong ritim Baibel long olgeta de i bin helpim em? Em i bekim tok olsem: “I gat planti samting nogut long nau i laik pulim mi. Long olgeta de long skul i gat sampela samting i givim hevi long mi na i laik daunim bilip bilong mi. Pasin bilong ritim Baibel long olgeta de i save helpim mi long tingim bek kwik ol lo na ol stiatok bilong Baibel i bilong strongim mi long sakim ol dispela samting. Dispela i mekim na mi pilim olsem mi stap klostu moa long Jehova na Jisas.”
8. Jisas i save bihainim wanem pasin taim em i go long haus lotu? Olsem wanem ol yangpela i ken bihainim pasin bilong em?
8 Em pasin bilong Jisas long go long haus lotu na harim ol man i ritim Tok Bilong God, na em tu i save ritim. (Luk 4:16; Aposel 15:21) Taim ol yangpela i bihainim dispela pasin bilong Jisas na go oltaim long ol miting Kristen, em ples ol i ritim na stadi long Baibel, dispela i save helpim gut ol! Richard, em i gat 14 krismas, em i pilim tru gutpela wok bilong ol miting, na em i tok: “Ol miting i save helpim gut mi. Oltaim ol i kirapim mi long tingim wanem pasin i gutpela o i nogut, na wanem pasin i stret o i no stret, na wanem pasin i bilong Krais o i no bilong Krais. I no olsem mi mas mekim sampela pasin nogut na kisim hevi long en na bai mi ken lain long wanem pasin i gutpela na wanem pasin i nogut.” Yes, “tok bilong Bikpela em i samting yumi inap bilip tru long en. Em i save givim gutpela tingting long ol man i no gat planti save.” (Song 19:7) Nicole tu i save go long ol 5-pela miting bilong kongrigesen long olgeta wik. Na tu, em i save lusim 2-pela o 3-pela aua long skelim ol tok bai kamap long ol miting.—Efesus 5:15, 16.
9. Ol yangpela i ken mekim wanem na bai “save bilong [ol] i kamap gutpela tru”?
9 Taim ol pikinini i yangpela yet, em gutpela taim long ol i kisim ‘save long God tru na long Jisas Krais.’ (Jon 17:3) Ating yu save long sampela yangpela em ol i save lusim planti aua long ritim komik, lukim televisen, pilaim video-gem, o mekim wok long Intenet. Yu no ken bihainim pasin bilong ol, mobeta yu bihainim gutpela pasin bilong Lida bilong yumi. Taim em i mangi yet, em i amamas tru long kisim save long Jehova. Na wanem samting i kamap? Jisas i laikim tru ol samting bilong spirit, olsem na “save bilong en i kamap gutpela tru.” (Luk 2:52) Dispela samting inap painim yu tu.
“Stap Aninit Long Ol Arapela”
10. Wanem samting bai helpim famili long stap bel isi na amamas?
10 Famili inap i stap olsem ples em bel isi i stap long en o ples bilong kros na pait. (Sindaun 21:19; 26:21) Taim yumi kam aninit long wok lida bilong Krais, dispela i save helpim famili long stap amamas na bel isi. Jisas i stap gutpela piksa bilong ol wan wan bilong famili i ken bihainim. Baibel i tok: “Yupela i mas ting long Krais em i Bikpela bilong yupela, na yupela wan wan i mas i stap aninit long ol arapela manmeri bilong God. Yupela meri, yupela i mas aninit long ol man bilong yupela, olsem yupela i save aninit long Bikpela. Long wanem, man em i het bilong meri bilong en, olsem Krais em i het bilong sios. Sios em i bodi bilong Krais, na Krais i bin kisim bek em. . . . Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios.” (Efesus 5:21-25) Aposel Pol i tokim kongrigesen long Kolosi: “Yupela pikinini, yupela i mas bihainim tok bilong papamama bilong yupela long olgeta samting. Bikpela i save laikim dispela kain pasin.”—Kolosi 3:18-20.
11. Man marit i ken mekim wanem bilong soim olsem em i bilip tru tru olsem Krais em i lida bilong em?
11 Dispela tok i makim olsem man i mas i go pas long famili, na meri bilong em i mas helpim em na sambai long em, na ol pikinini i mas bihainim tok bilong papamama. Tasol man i mas bosim famili long gutpela pasin bambai wok bilong em olsem het bilong famili i ken kamapim amamas. Man marit i gat gutpela tingting em i mas lain long mekim wok bos long rot bilong bihainim pasin bilong Het na Lida bilong em, Krais Jisas. (1 Korin 11:3) Bihain, maski Jisas i kamap “het tru bilong olgeta samting, na long dispela pasin em i stap het bilong sios,” em i no bin i kam long graun “bilong ol man i ken mekim wok bilong helpim em. Nogat. Em i kam bilong helpim ol.” (Efesus 1:22; Matyu 20:28) Na olsem tasol, taim man marit Kristen i mekim wok olsem het bilong famili, em i no mekim bilong helpim em yet, nogat, em i mekim bilong helpim meri pikinini bilong em—yes, famili olgeta. (1 Korin 13:4, 5) Em i wok strong long bihainim ol gutpela pasin bilong het bilong em, Jisas Krais. Olsem Jisas, em tu i save mekim pasin isi long ol man na i save daunim em yet. (Matyu 11:28-30) Taim em i popaia, i no hatwok long em i tokaut olsem “mi sori tru” o “yu tok stret.” Gutpela pasin bilong em i mekim na meri i no hatwok long stap “poroman” na “helpim” bilong em—meri i kisim skul long em na i wok gut wantaim em.—Stat 2:20; Malakai 2:14.
12. Wanem samting bai helpim meri long stap aninit long man bilong em?
12 Meri marit i mas aninit long man bilong em. Tasol sapos em i bihainim tingting bilong dispela graun, ating dispela bai paulim tingting bilong em long man i stap het bilong famili, na em i no gat laik long stap aninit long wanpela man. Baibel i tok ol meri i mas aninit long man bilong ol, tasol dispela i no makim olsem man i ken bosim strong meri, nogat. (Efesus 5:24) Baibel i tok man marit o papa i mas lukautim famili, na taim em i bihainim dispela tok, dispela i helpim famili long stap gut na stap isi wantaim.—Filipai 2:5.
13. Olsem wanem Jisas i stap gutpela piksa long pasin bilong aninit long papamama na ol pikinini i ken bihainim?
13 Ol pikinini i mas bihainim tok bilong papamama. Long dispela samting, Jisas i stap gutpela piksa tru. Yumi stori pinis long taim Jisas i gat 12-pela krismas na em i stap long tempel inap 3-pela de. Orait bihain “em i go bek wantaim [papamama bilong em], na ol i kamap long Nasaret, na oltaim em i save bihainim tok bilong tupela.” (Luk 2:51) Taim ol pikinini i stap aninit long papamama, dispela i save helpim famili long stap bel isi na stap gut wantaim. Taim olgeta insait long famili i aninit long wok lida bilong Krais, dispela i mekim na amamas i kamap insait long famili.
14, 15. Taim hevi i kamap insait long famili, wanem samting bai helpim famili long stap amamas? Stori long dispela.
14 Taim hevi i kamap insait long famili, pasin bilong bihainim Jisas na larim em i stiaim ol, em rot bilong stretim ol dispela hevi. Olsem: Jerry i gat 35 krismas na taim em i marit long Lana, em mama bilong pikinini meri i gat 13 krismas samting, dispela i kamapim wanpela hevi em tupela i no bin ting em bai kamap. Jerry i tok: “Mi save pinis, bilong mekim gut wok olsem het bilong famili, mi mas bihainim ol stiatok bilong Baibel i bin helpim ol narapela famili long i stap amamas. Tasol i no longtaim na mi kisim save olsem mi mas bihainim ol dispela stiatok long pasin bilong gutpela tingting na pasin bilong skelim gut ol samting.” Pikinini meri i ting nupela papa i mekim na mama i no pas gut moa wantaim em, na em i bel nogut tru long nupela papa. Jerry i mas i gat pasin bilong skelim gut ol samting bambai em i ken save olsem dispela tingting bilong pikinini i stiaim ol tok na ol samting pikinini i mekim. Jerry i mekim wanem? Em i tok: “Mitupela Lana i pasim tok olsem pastaim Lana bai lukautim wok bilong stretim pikinini, na mi bai wok strong long pas gut wantaim em. Bihain gutpela samting i kamap long dispela.”
15 Taim hevi i kamap insait long famili, yumi mas i gat pasin bilong skelim gut ol samting na bai yumi ken save wanem samting i kirapim ol wan wan bilong famili long mekim ol tok na pasin ol i save mekim. Na tu, yumi mas i gat gutpela tingting na save bambai yumi inap bihainim gut ol stiatok bilong Baibel. Tingim pasin Jisas i bin mekim long wanpela meri i bin karim blut inap 12-pela yia pinis. Jisas i save long as na dispela meri i putim han long em, na em i marimari long meri na mekim pasin i gat gutpela tingting long en. (Wok Pris 15:25-27; Mak 5:30-34) Gutpela tingting na pasin bilong skelim gut ol samting ol i pasin bilong Lida bilong yumi. (Sindaun 8:12) Bai yumi amamas sapos yumi bihainim pasin bilong Jisas long ol samting yumi mekim.
“Wok Pastaim Long Painim Kingdom”
16. Wanem samting i mas stap nambawan samting long laip bilong yumi? Jisas i mekim wanem na i kamapim klia dispela samting long i stap bilong em?
16 Jisas i kamapim klia wanem samting i mas i stap olsem nambawan samting long laip bilong ol man i kam aninit long wok lida bilong em. Em i tok: “Yupela i mas wok pastaim long painim kingdom bilong God wantaim stretpela pasin bilong em.” (Matyu 6:33, Nupela Testamen na Ol Sam) Long pasin em yet i bihainim, em i soim yumi long rot bilong mekim olsem. Taim Jisas i baptais pinis, em i no kaikai inap 40 de na em i beten na tingim tingim ol samting long bel, na nau traim i painim em. Satan i tok em bai givim “olgeta strongpela kantri bilong dispela graun” long em bilong bosim. Tingim gutpela sindaun Jisas inap kisim sapos em i bin orait long dispela samting! Tasol Krais i tingting strong long bihainim laik bilong Papa bilong em. Na em i save, kain sindaun olsem long dispela graun bilong Satan i bilong sotpela taim tasol. Kwiktaim em i sakim Satan na i tok: “Buk bilong God i tok, ‘Yu mas aninit long God, Bikpela bilong yu. Na yu mas lotu long em wanpela tasol.’ ” Bihain liklik, Jisas “i stat long autim tok long ol manmeri. Em i tok olsem, ‘Yupela i mas tanim bel, long wanem, kingdom bilong heven em i kam klostu pinis.’ ” (Matyu 4:2, 8-10, 17) I go inap long taim em i dai, Krais i wok fultaim long autim tok long Kingdom bilong God.
17. Yumi ken mekim wanem bilong soim olsem ol samting bilong Kingdom em i nambawan samting long i stap bilong yumi?
17 Yumi mas bihainim pasin bilong Lida bilong yumi na no ken larim ol samting bilong dispela graun bilong Satan i pulim yumi na bai yumi givim bel long kisim bikpela wok i gat bikpela pe na dispela samting i kamap nambawan samting long tingting bilong yumi. (Mak 1:17-21) Em longlong pasin tru sapos yumi larim ol wok bilong dispela graun i kalabusim yumi olsem umben na nau ol samting bilong Kingdom i stap nambatu tasol! Jisas i bin givim wanpela wok long yumi bilong lukautim, em wok bilong autim tok bilong Kingdom na kamapim ol disaipel. (Matyu 24:14; 28:19, 20) Maski yumi gat famili o sampela wok moa yumi mas lukautim, yumi amamas long mekim wok long ol apinun na ol Sarere Sande long mekim wok Kristen bilong yumi long autim tok na lainim ol man, a? Long sevis yia bilong 2001, inap 780,000 i wok fultaim long autim tok, olsem painia!
18. Wanem samting i save helpim yumi long kisim amamas long wok autim tok?
18 Ol stori bilong Gutnius i kamapim olsem Jisas em i man bilong mekim wok na man bilong bel sori long ol narapela. Taim em i lukim olsem ol man i sot long ol samting bilong spirit, em i sori tru long ol na i laik helpim ol. (Mak 6:31-34) Bai yumi kisim amamas long wok bilong autim tok sapos samting i kirapim yumi long mekim dispela wok, em yumi sori long ol man na yumi gat laik tru long helpim ol. Tasol olsem wanem yumi inap kisim dispela laik? Yangpela man Jayson i tok: “Taim mi gat 13 krismas samting, mi no amamas tumas long wok autim tok.” Wanem samting i helpim em long kisim pasin bilong laikim dispela wok? Jayson i tok: “Famili bilong mi i save makim ol Sarere moningtaim long go autim tok. Dispela i helpim mi, long wanem, taim mi go autim tok planti taim, mi lukim ol gutpela samting dispela wok i kamapim na mi kirap long kisim amamas long en.” Oltaim yumi tu mas insait long wok autim tok na wok strong long mekim.
19. Yumi tingim wok lida bilong Krais na yumi mas tingting strong long mekim wanem?
19 Tru tumas, taim yumi aninit long wok lida bilong Krais, yumi save kisim amamas na nupela strong. Taim yumi mekim olsem, orait taim bilong i stap yangpela em i taim bilong kisim save na gutpela tingting. Bel isi na amamas i stap insait long famili, na yumi kisim bikpela amamas long wok bilong autim tok. Olsem na long i stap bilong yumi long olgeta de na long ol samting yumi tingting long mekim, yumi mas tingting strong long soim olsem yumi bilip tru tru olsem Krais em i Lida bilong yumi. (Kolosi 3:23, 24) Tasol Jisas Krais i stap Lida bilong yumi long narapela rot tu—long rot bilong kongrigesen Kristen. Stori i kam bihain long dispela bai toktok long olsem wanem kongrigesen Kristen inap helpim yumi.
[Futnot]
a Mipela i bin senisim sampela nem.
Yu Tingim Yet?
• Taim yumi bihainim Lida em God i bin makim, dispela i save helpim yumi olsem wanem?
• Ol yangpela i ken mekim wanem bilong soim olsem ol i laik bihainim Lida bilong ol, em Jisas?
• Taim ol wan wan bilong famili i aninit long wok lida bilong Krais, sindaun bilong famili bai i olsem wanem?
• Olsem wanem wok bilong yumi long autim tok inap kamapim klia olsem yumi bilip tru tru olsem Krais em i Lida bilong yumi?
[Ol Piksa long pes 9]
Taim yumi yangpela yet, dispela em i gutpela taim bilong kisim save long God na long Lida bilong yumi Em i bin makim
[Piksa long pes 10]
Pasin bilong stap aninit long wok lida bilong Krais em i kamapim amamas insait long famili
[Ol Piksa long pes 12]
Jisas i tingting pastaim long painim Kingdom. Yu save mekim olsem?