“Kam Long Mi na Bai Mi Givim Malolo Long Yupela”
Ol Miting i Kirapim Yumi Long Laikim Narapela na Mekim Gutpela Pasin
LONG olgeta hap bilong graun, inap sampela taim long olgeta wik planti milion Witnes Bilong Jehova na ol pren bilong ol i save go long ol ples bung bilong ol bilong lotu. Sampela bilong ol dispela manmeri i go lotu em ol papa i save wok strong na skin i les bihain long ol i wok de olgeta; ol meri marit na ol mama em ol i save mekim kain kain wok long haus wantaim ol liklik pikinini; ol yangpela i gat strongpela skin em ol i save skul long de olgeta; ol lapun em skin i no gat strong na ol i no inap wokabaut hariap, long wanem, ol i gat pen long skin; ol meri em man bilong ol i dai pinis na ol pikinini em papamama bilong ol i dai pinis; na ol manmeri em hevi i daunim tru ol na i mas i gat man bilong mekim gut bel bilong ol.
Ol dispela Witnes i mekim wok long kain kain rot bilong kam long ol miting—long tren i save spit tru na ol donki, long ol sabwe i pulap long ol man na long ol trak. Sampela i mas brukim ol wara i gat ol pukpuk na sampela i mas draiv long ol rot bilong ol biktaun i gat planti ka tru long en. Bilong wanem ol dispela manmeri i taitim bun tru bilong mekim olsem?
Nambawan bikpela as em olsem: Pasin bilong go long ol miting Kristen na insait long en, em i bikpela rot bilong mekim lotu long Jehova. (Hibru 13:15) Aposel Pol i kolim narapela as, olsem: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, . . . Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.” (Hibru 10:24, 25) Pol i kamapim tingting bilong Devit, olsem: “Ol i tokim mi olsem, ‘Goan, yumi go long haus bilong Bikpela.’ Ol i tok olsem na mi belgut tru.”—Song 122:1.
Bilong wanem ol Kristen i amamas long i stap long ol miting? Long wanem, ol man i stap long ol miting ol i no kam bilong lukluk tasol. Ol miting i givim rot long narapela i kisim save long narapela. Na tu, ol dispela miting i opim rot long narapela i ken givim samting long narapela, i no bilong kisim tasol, na i kirapim ol long laikim ol narapela na mekim ol gutpela pasin long ol. Dispela i mekim na ol miting i kamap olsem ol bung bilong narapela i strongim narapela. Na tu, ol miting i olsem wanpela rot bilong Jisas i truim promis bilong em, olsem: “Kam long mi na bai mi givim malolo long yupela.”—Matyu 11:28.
Em Ples Bilong Mekim Gut Bel na Tingim Narapela
I gat planti as na ol Witnes i tingim ol miting bilong ol i olsem ol bung bilong kisim nupela strong. Wanpela samting em olsem: Long ol miting “wokboi i gat gutpela tingting” i save givim kaikai bilong spirit long taim stret long ol. (Matyu 24:45) Na tu, ol miting i mekim bikpela wok long helpim ol wokman bilong Jehova long kamap gutpela tisa bilong Baibel na long givim bel long mekim olsem. Na long Haus Kingdom yumi inap painim ol gutpela pren i save mekim pasin sori na lukautim gut narapela, na ol i redi long helpim na mekim gut bel bilong narapela long taim ol i gat hevi.—2 Korin 7:5-7.
Dispela samting i painim Phillis, em wanpela meri em man bilong em i dai taim ol pikinini bilong em i gat 5-pela na 8-pela krismas. Em i stori long nupela strong em na ol pikinini i kisim long ol miting, na tok: “Bel bilong mi i stap gutpela taim mi go long Haus Kingdom, long wanem, long rot bilong holimpas mi, na ol tok bilong Baibel, o holim strong han bilong mi, ol wanbilip i kamapim olsem ol i laikim mi na tingim mi. Em ples mi gat laik tru long i stap long en.”—1 Tesalonaika 5:14.
Bihain long dokta i katim pinis Marie, dokta i tok inap 6-pela wik i mas lus pastaim na Marie i ken kamap orait gen. Long ol dispela wik taim em i wok long kamap orait, Marie i no inap go long ol miting. Dokta i luksave olsem Marie i no amamas olsem bipo. Taim em i save olsem Marie i no go long ol miting, em i strongim Marie long go. Marie i tokim dokta olsem man bilong em, em i no wanbilip bilong Marie, em i tingting long helt bilong Marie na em i no inap larim Marie i go. Olsem na dokta i raitim wanpela pas i tok Marie i mas go long Haus Kingdom bilong bung wantaim ol gutpela poroman bambai ol i ken strongim em. Marie i pinisim tok olsem: “Taim mi go pinis long wanpela miting, mi pilim gutpela tru. Mi kirap long kaikai, mi slip gut long nait olgeta, mi no kisim planti marasin bilong daunim pen, na mi kirap gen long lap na amamas!”—Sindaun 16:24.
Ol gutpela samting i kamap long ol miting Kristen i no stap hait long ai bilong ol man ausait. Sumatin bilong wanpela skul koles i mas raitim stori long wanpela kos bilong em (ethnology class). Bilong mekim olsem, pastaim em i mas skelim gut ol Witnes Bilong Jehova. Long pepa bilong em, em i stori long pasin bilong ol long ol miting, olsem: ‘Mi kirap nogut tru long gutpela pasin amamas ol i mekim long mi taim mi go long miting. Ol Witnes i strong tru long mekim gutpela pasin pren, na dispela pasin i olsem bikpela samting long lotu bilong ol.’—1 Korin 14:25.
Long dispela graun i gat planti hevi, ol kongrigesen Kristen i stap olsem gutpela ples tru bilong kisim ol samting bilong spirit. Em ples bilong i stap bel isi na laikim ol narapela. Taim yu stap long ol miting, yu inap luksave olsem tok bilong man bilong raitim song em i tru: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut.”—Song 133:1.
[Blok/Piksa long pes 25]
INAPIM WANPELA BIKPELA WOK
Olsem wanem ol miting Kristen inap helpim ol yaupas? Long olgeta hap bilong graun, ol Witnes Bilong Jehova i wok long kirapim ol kongrigesen bilong ol yaupas. Insait long 13 yia i go pinis, ol i bin kirapim 27 kongrigesen na 43 grup bilong ol yaupas long Amerika. Long 40 narapela kantri, nau i gat olsem 140 kongrigesen bilong ol yaupas. Ol i redim ol buk samting na putim long video long 13 tok ples bilong ol yaupas.
Kongrigesen Kristen i givim rot long ol yaupas long litimapim nem bilong Jehova. Odile, bipo em i wanpela Katolik long Frans, em i gat bikpela bel hevi na em i bin tingting long kilim i dai skin bilong em yet, em i amamas tru long skul bilong Baibel em kisim long ol miting Kristen. Em i tok: “Skin bilong mi i kamap strong gen na mi kisim amamas long i stap bilong mi. Tasol bikpela samting moa, mi bin painim tok i tru. Nau i stap bilong mi i gat as tru bilong en.”