Wanpela Pikinini i Helpim Papa

JAMES, em i bilong Inglan, em i gat 32 krismas samting, na em i gat bikpela sik long tingting. Tasol inap planti yia pinis em i bin go long ol miting bilong ol Witnes Bilong Jehova wantaim mama na susa bilong em. Tasol papa bilong em i no tingim tumas bilip bilong ol. Long wanpela apinun long miting, ol i mekim soim long pasin bilong singautim ol man i kam long Memorial bilong tingim i dai bilong Krais, na taim ol i go bek long haus, kwiktaim James i go long rum bilong em. Mama bilong em i tingting planti na i bihainim em i go na em i lukim James i skelim skelim ol olpela nius Wastaua na Kirap! Long laspela pes bilong wanpela nius em i lukim kopi bilong pepa bilong singautim man i kam long Memorial, na em i kisim dispela na hariap i go long papa bilong em. Em i makim pinga long piksa i stap long nius na bihain em i makim pinga long papa na i tok “Yu!” Mama na papa bilong James ol i luksave olsem James i singautim papa bilong em long i go long Memorial, na ol i kirap nogut na lukluk long narapela narapela. Papa i tok olsem ating em bai go.

Long apinun bilong Memorial, James i go long kabot bilong papa em ol klos i stap long en, na em i makim wanpela trausis, na kisim i go long papa, na em i makim long han olsem papa i mas putim dispela trausis. Papa i tok olsem em i no inap i go long Memorial. Olsem na James na mama tasol ol i go long Haus Kingdom.

Sampela taim bihain, James i no laik harim tok taim mama bilong em i laik helpim em long redi long i go long ol miting bilong kongrigesen. Em i laik stap long haus wantaim papa bilong em. Bihain, long wanpela moning long Sande, James i mekim wankain pasin gen​—em i no laik harim tok taim mama i laik helpim em long redi long i go long miting. Mama bilong James i kirap nogut taim papa i tanim lukluk long James na tok, “James, sapos nau mi go long miting, bai yu go tu?” Pes bilong James i lait. Em i tromoi han na holim papa na tok “Yes!” na tripela wantaim ol i go long Haus Kingdom.

Kirap long dispela de, papa bilong James i go oltaim long ol miting long Sande, na bihain liklik em i tokaut olsem sapos em i laik kamap strong, orait em i mas i go long ol narapela miting tu. (Hibru 10:​24, 25) Em i mekim olsem na tupela mun bihain em i kirap stadi oltaim long Baibel. Em i senisim kwik ol pasin bilong em na i no longtaim na em i kirap na go insait long wok bilong autim tok bilong Kingdom. Wanpela yia bihain long em i kirap stadi, em i dediketim laip bilong em long Jehova na em i kamapim klia dispela dediket bilong em long rot bilong kisim baptais long wara. Long nau em i mekim wok long kongrigesen olsem wanpela kongrigesen sevent. Na olgeta long famili i stap wanbel long mekim wok bilong Jehova.