Helpim Ol Narapela na Bai Ofa Bilong Krais i Ken Helpim Ol
Memorial Bilong Indai Bilong Krais Bai Kamap Long Epril 12
1 “Yumi mas tenkyu long God long dispela presen.” (2 Ko. 9:15) Dispela tok i kamapim ples klia tingting bilong yumi long gutpela pasin na gutpela-pasin-sori God i soim long ol man long ro t bilong ofa bilong Pikinini bilong em, Jisas Krais. Taim yumi bung long Memorial bilong indai bilong Krais long Epril 12 yumi kamapim ples klia olsem yumi tenkyu long God.
2 Long olgeta yia inap olsem 10 milion manmeri i save bung wantaim ol Witnes Bilong Jehova bilong tingim Memorial. Taim ol i mekim olsem ol i kamapim olsem ol i tingim ofa bilong Krais. Tasol bilong ofa bilong Krais i ken helpim ol, ol i mas bilip long en. (Jo. 3:16, 36) Olsem wanem yumi ken helpim ol long kisim kain bilip olsem? Long mun Mas na Epril, yumi ken kirapim ol long stadi long Baibel na go long ol miting bilong kongrigesen. Tingim sampela samting yumi ken mekim:
3 Stadi Long Baibel: Taim yu singautim wanpela nupela long kam long Memorial, traim long kirapim Baibel stadi wantaim em long buk Baibel i Tok. O yu ken tokim em yu laik stori wantaim em long bung bilong Memorial, na nau yu ken opim buk long pes 206-8 na skelim ol tok aninit long het tok “Kaikai Bilong Bikpela—Wanpela Bung i Litimapim Nem Bilong God.” Ating yu inap stori long ol dispela tok long wanpela o tupela visit, na yu inap mekim olsem stadi taim yu sanap long dua bilong haus. Taim yu pinisim ol dispela tok, ating man bai orait long skelim sapta 5, “Pe Bilong Baim Bek Ol Man—Nambawan Gutpela Presen God i Givim.” Taim yu mekim dispela samting pinis, yu ken kirap stadi wantaim em long sapta 1 i go 4 bilong dispela buk.
4 Yumi ken bihainim dispela pasin na kirapim Baibel stadi wantaim husat? Ating sampela wanwok, wanskul o neiba bilong yu bai orait long yu stadi wantaim ol. Sapos i gat wanpela sista long kongrigesen i gat man i no stap long tok i tru, ol brata i ken tokim em olsem ol i laik stadi wantaim em. Na tingim tu ol famili bilong yu em ol i no Witnes. Na tu, yumi laik wok strong long singautim ol man i kam long Memorial em bipo ol i save kam long ol miting. (Lu. 15:3-7) Yumi laik wok strong long helpim ol dispela man na bai ofa bilong Krais i ken helpim ol.
5 Miting Bilong Kongrigesen: Planti taim Memorial em i namba wan miting ol Baibel sumatin na ol narapela man i laik harim tok ol i save kam long en. Tasol olsem wanem yumi inap strongim ol long kam long ol narapela miting bilong kongrigesen? Wok Kingdom bilong Epril 2005, pes 8, i mekim ol dispela tok: “Yu ken kolim nem bilong pablik tok bai kamap long narapela wik. Soim ol hap bilong Wastaua em kongrigesen bai skelim long Stadi Wastaua na buk em yupela i stadi long en long Buk Stadi Bilong Kongrigesen. Stori long Skul Tiokratik Bilong Autim Tok na Miting Bilong Wok Autim Tok. Taim yu gat tok bilong mekim long skul, ating yu ken mekim traim wantaim ol. Yu ken tokim ol long ol gutpela tok yu bin harim long ol miting. Mekim wok long ol piksa i stap insait long ol buk na nius bilong yumi bilong helpim ol long lukim long tingting wanem samting i save kamap long ol miting. Kirap long namba wan taim yu mekim stadi wantaim ol Baibel sumatin, yu mas singautim ol i kam long miting.”
6 Taim ol man i gat gutpela bel i stadi long Baibel long olgeta wik na kam long olgeta miting bilong kongrigesen, ol i save kamap strong hariap long ol samting bilong spirit. Olsem na yumi laik strongim ol narapela long kisim helpim long ol dispela gutpela samting bilong spirit na long nambawan gutpela presen i kam long God—em ofa bilong Krais.
[Askim Bilong Stadi]
1. Wanem wanpela rot na lain bilong God i kamapim tenkyu bilong ol long ofa bilong Krais?
2. Ol Witnes Bilong Jehova na husat moa i save kam long Memorial? Ol i mas mekim wanem na bai ofa bilong Krais i ken helpim ol?
3. Olsem wanem yumi ken kirapim man long stadi long Baibel taim yumi singautim em i kam long Memorial?
4. Long mun Mas na Epril yumi ken kirapim Baibel stadi wantaim husat?
5. Olsem wanem yumi ken strongim ol Baibel sumatin na ol narapela man i laik harim tok long kam long ol miting bilong kongrigesen?
6. Long wanem tupela rot yumi ken helpim ol man i gat gutpela bel na bai ofa bilong Krais i ken helpim ol?