Yumi Mas Soim Tenkyu Bilong Yumi Bai Yumi Mekim Memorial Long Epril 17
1. Man bilong raitim song i mekim wanem tok i stret tru long taim bilong Memorial?
1 Planti taim Jehova i mekim pasin marimari na kisim bek man, na dispela i kirapim man bilong raitim song long tok: “Bikpela i bin mekim gut tru long mi. Olsem na bai mi givim wanem samting long em?” (Sng. 116:12) Long nau i gat as tru na ol wokboi bilong God i mas tenkyu long en. Inap planti handret yia bihain long man bilong raitim song i raitim dispela tok, Jehova i givim nambawan gutpela presen long ol man—em pe bilong baim bek ol man. Nau taim yumi redim ol samting bilong tingim indai bilong Krais long Epril 17, i gat as tru na yumi mas soim tenkyu bilong yumi.—Kol. 3:15.
2. Bilong wanem yumi amamas long pe bilong baim bek man?
2 Pe Bilong Baim Bek Man—Ol Blesing Bilong En: Long rot bilong dispela pe, “ol sin bilong yumi i tekewe.” (Kol. 1:13, 14) Dispela i mekim na yumi inap lotuim Jehova wantaim klinpela maus bilong bel. (Hib. 9:13, 14) Na tu, yumi no surik long kamapim tingting bilong yumi long Jehova taim yumi beten long en. (Hib. 4:14-16) Ol man husat i bilip long pe bilong baim bek man ol inap kisim laip oltaim!—Jon 3:16.
3. Yumi ken mekim wanem bilong soim olsem yumi tenkyu long Jehova long pe bilong baim bek man?
3 Soim Tenkyu: Wanpela rot we yumi ken soim tenkyu bilong yumi, em yumi ken mekim Baibel ritim bilong Memorial long olgeta de na tingim tingim long bel. Ol i bin raitim wanpela stori long Wastaua bilong Februeri 1, 2011, bilong helpim yumi long mekim olsem, nem bilong en “Yu Redi Long Nambawan Bikpela De Bilong Yia?” Na tu, yumi ken beten na tokim Jehova olsem yumi pilim tru wok bilong dispela pe bilong baim bek man. (1 Tes. 5:17, 18) Taim yumi bihainim tok bilong Jisas na go long bung bilong Memorial, dispela i soim tenkyu bilong yumi. (1 Kor. 11:24, 25) Na tu, yumi inap bihainim pasin laikim bilong Jehova na singautim planti man long kam bung wantaim yumi.—Ais. 55:1-3.
4. Yumi mas i gat wanem kain tingting?
4 Ol gutpela wokboi bilong Jehova bai i no tingim Memorial olsem wanpela miting i wankain olsem ol narapela miting, nogat. Em i nambawan bikpela miting bilong yia! Taim Memorial i wok long kam klostu, yumi mas i gat wankain tingting olsem man bilong raitim song husat i tok: “Mi mas litimapim nem bilong Bikpela, na mi no ken lusim tingting long ol gutpela samting em i bin mekim long mi.”—Sng. 103:2.