“Yupela i Mas Mekim Olsem Yet” Bung Bilong Memorial Long Epril 5
1. Bilong wanem Memorial em i bikpela samting?
1 “Yupela i mas mekim olsem yet bilong tingim mi.” (Luk 22:19) Jisas i tokim ol disaipel bilong em long ol i mas tingim dai bilong em. Ol Kristen i tingim ol samting em pe bilong baim bek man i bin mekim, olsem na nambawan bikpela de long ol em Memorial bilong tingim indai bilong Jisas long olgeta yia, na i no gat wanpela de i olsem dispela de. Taim dispela bung bilong Epril 5 i kam klostu, bai yumi mekim wanem bilong soim Jehova olsem yumi tenkyu long Em?—Kol. 3:15.
2. Yumi ken mekim wanem bilong soim olsem yumi pilim tru ol samting i kamap long Memorial?
2 Redi: Taim wanpela bikpela samting i laik kamap, planti taim yumi save redi pastaim. Ol famili olgeta i ken redim bel bilong ol long Memorial long rot bilong stadi na skelim wantaim ol samting i bin kamap long ol laspela de bilong Jisas long graun na tingim tingim long bel ol dispela samting. (Esr. 7:10) Kalenda na buklet Skelim Sampela Tok Bilong Baibel Long Olgeta De, i gat sampela skripsa yupela i ken ritim, na tu, sampela skripsa moa we ol i stret wantaim sampela sapta long buk Nambawan Man Tru, em yupela i ken lukim long Wastaua, Februeri 1, 2011, pes 23-24.
3. Yumi ken mekim wanem bilong kamapim olsem yumi pilim tru Memorial?
3 Autim Tok: Yumi ken kamapim tenkyu bilong yumi long rot bilong insait moa long wok bilong autim tok. (Luk 6:45) Bikpela wok bilong singautim ol man i kam long Memorial bai kirap long Sarere, Mas 17. Olsem wanem? Yu inap stretim sediul bilong yu bambai yu ken insait moa long wok autim tok, olsem mekim wok painia haptaim? I gutpela sapos famili i ken toktok wantaim long dispela samting long neks Famili Lotu.
4. Taim yumi go long Memorial, dispela i helpim yumi olsem wanem?
4 Taim yumi go long Memorial long olgeta yia, olsem wanem dispela i helpim yumi? Pasin bilong yumi long amamas na laikim Jehova bai go bikpela taim yumi tingim tingim pasin bilong Jehova long givim Pikinini bilong em olsem pe bilong baim bek yumi. (Jon 3:16; 1 Jon 4:9, 10) Dispela i kirapim yumi long yumi no ken bihainim laik bilong yumi yet. (2 Kor. 5:14, 15) Na tu, dispela i kirapim laik bilong yumi long litimapim nem bilong Jehova long ai bilong olgeta man. (Sng. 102:19-21) Tru tumas, yumi ol wokman bilong Jehova i amamas long wetim Memorial em bai kamap long Epril 5 na yumi ‘tokaut long indai bilong Bikpela.’—1 Kor. 11:26.