“Yupela i Mas Mekim Olsem Bilong Tingim Mi”
Bai Yumi Tingim Indai Bilong Jisas Long Epril 2
1 Long Epril 2, 2007, planti milion manmeri long olgeta hap bilong graun bai bung wantaim bilong tingim indai bilong Jisas. Jisas i dai, long wanem, em i sambai long wok king bilong Papa bilong em. Long dispela rot Jisas i kamapim klia olsem tok Satan i bin sutim long ol man, olsem ol i tingim ol samting ol bai kisim na ol i mekim wok bilong God, dispela tok em i giaman. (Jop 2:1-5) Na tu, bung bilong Kaikai Bilong Bikpela i save kirapim yumi long tingim dispela samting: Jisas em i gutpela olgeta na i no gat sin, na long rot bilong indai bilong em, em i “givim laip bilong em bilong baim bek planti manmeri.” (Mt. 20:28) Olsem na Jisas i tokim ol disaipel bilong em olsem: “Yupela i mas mekim olsem bilong tingim mi.” (Lu. 22:19) Olsem wanem? Yu pilim tru dispela gutpela presen God i givim na yu kirap pinis long redim ol samting bilong tingim dispela nambawan pasin laikim?—Jo. 3:16.
2 Redim Bel Bilong Yu: Taim yumi skelim ol samting i kamap long ol laspela de bilong Jisas long i stap olsem man long graun, yumi inap redim bel bilong yumi long tingim Memorial. (Esr. 7:10) Bilong helpim yumi long mekim olsem, i gat sediul bilong Baibel ritim i stap long buklet Skelim Sampela Tok Bilong Baibel Long Olgeta De—2007 na long 2007 Calendar. Ol i bihainim kalenda bilong yumi long nau na ol i mekim sediul bilong Baibel ritim bilong ol skripsa i stori long ol samting i bin painim Jisas paslain long em i dai. Ol de na det i stap long Baibel em ol de kalenda bilong ol Juda i makim. Ol de long kalenda bilong Juda i kirap long taim san i go daun i go inap long neks de taim san i go daun. Ol i tingim dispela pasin bilong kaunim ol de na ol i bihainim long nau taim ol i makim Baibel ritim bilong Memorial. Taim yumi ritim gen stori bilong ol samting i painim Jisas na yumi beten na tingim tingim pasin bilong God long laikim tru ol man, dispela bai mekim na Memorial bai helpim yumi.
3 Singautim Ol Narapela Long i Kam: Namel pepa long Wok Kingdom bilong Februeri i tokaut long spesel wok bilong singautim ol manmeri long i kam long dispela bikpela bung. Olsem wanem? Yu stretim ol samting na bai yu inap insait tru long dispela wok? Yu wokim wanpela lista bilong ol manmeri yu laik singautim i kam long Memorial, na yu kirap pinis long toksave long ol? Stretim rot bilong i go paslain long bung i kirap na bai yu ken tok welkam long ol man yu singautim i kam na ol narapela husat i gat laik long harim tok. Ating i gutpela yu sindaun wantaim ol na yu ken stretim rot bilong ol i ken lukim Baibel na buk singsing. Kisim ol i go bungim ol narapela long kongrigesen. Bihain long miting, lusim haptaim bilong bekim ol askim bilong ol. Singautim ol long i kam na harim spesel pablik tok bai kamap long Epril 15. Ol elda i mas tingim tru ol lain i bin bung wantaim kongrigesen bipo tasol nau ol i slek, na singautim ol i kam long Memorial na spesel pablik tok.
4 Helpim Ol Nupela Man na Ol Pablisa i Slek Long Kamap Strong: Brata i mekim tok bilong Memorial bai stori liklik long pasin bilong yumi long mekim Baibel stadi na kirapim ol nupela man i kam long kisim save moa long Jehova. Yu ken stori liklik long dispela tok em i mekim bilong tokim ol lain yu singautim long kisim save moa long Jehova. Sapos ol i no stadi yet long Baibel, orait yu mas i go kwiktaim bihain long Memorial na soim ol long pasin bilong mekim Baibel stadi i no gat pe bilong en. Bilong ol i ken kamap strong, ol i mas i kam long ol miting bilong kongrigesen tu. (Hi. 10:24, 25) Kirapim ol long i kam long olgeta miting. Ol elda i mas i go lukim ol Kristen i slek, em ol i bin kam long Memorial, na kamapim sampela tok moa bilong helpim ol. Ating dispela inap kirapim ol long kam bung gen wantaim kongrigesen.
5 Bung bilong Memorial i gutpela rot bilong helpim yumi long tingim tingim ol samting Jehova na Jisas i bin mekim bilong helpim yumi. Taim yumi mekim olsem, dispela bai strongim pasin bilong yumi long laikim tupela na dispela bai mekim sampela samting moa long pasin bilong yumi. (2 Ko. 5:14, 15; 1 Jo. 4:11) Nau em i taim bilong yumi mas kirap na redim yumi yet na ol man i gat laik long harim tok, long dispela bikpela de we yumi bai ‘tokaut long dai bilong Bikpela.’—1 Ko. 11:26.
[Askim Bilong Stadi]
1. Bilong wanem Epril 2, 2007, em i wanpela bikpela de?
2. Olsem wanem yumi ken redim bel bilong yumi long tingim Memorial?
3. Olsem wanem yumi ken helpim ol man i gat laik long harim tok na ol man i slek long kisim helpim long Memorial?
4. Olsem wanem yumi ken helpim ol man i kam long Memorial long kamap strong long ol samting bilong spirit?
5. Taim yumi mekim Memorial, dispela inap mekim wanem long yumi?