Redi Long Memorial na Mekim Wantaim Amamas
1. Long taim bilong Memorial, rot i op long mekim wanem?
1 Memorial bai kamap long Tunde, Mas 26, na dispela i gutpela rot bilong kamapim amamas bilong yumi long samting God i mekim bilong kisim bek yumi. (Ais. 61:10) Dispela amamas i kirapim yumi tu long redi gut paslain long Memorial i kamap. Bai yumi mekim wanem bilong redi gut long Memorial?
2. Wanem samting i kirapim yumi long redi gut long Memorial?
2 Redi Long Memorial: Bung bilong Kaikai Bilong Bikpela i no gat ol bilaspasin long en, tasol em i bikpela samting. Olsem na yumi mas redi gut paslain bambai yumi no ken lusim tingting long ol bikpela samting. (Snd. 21:5) Makim taim na ples bilong mekim Memorial. Kisim wain samting i stret. Klinim na redim gut ples. Brata ol i makim bilong mekim tok i mas redi gut, na ol brata bilong tilim bret na wain na ol atendan i mas kliagut long samting ol i mas mekim. Ating yupela i mekim pinis ol dispela samting. Amamas bilong yumi long pe bilong baim bek man i kirapim yumi long mekim ol samting bilong redi long dispela gutpela bung.—1 Pita 1:8, 9.
3. Yumi ken mekim wanem bilong redim gut bel bilong yumi long Kaikai Bilong Bikpela?
3 Redim Gut Bel: Em i bikpela samting tu long redim gut bel bilong yumi long pilim tru ol bikpela samting bilong Memorial. (Esr. 7:10) Bilong mekim olsem, yumi mas makim taim bilong mekim ol Baibel ritim bilong Memorial na tingim tingim long bel ol samting i bin kamap long ol laspela de bilong Jisas long graun. Taim yumi tingim tingim long bel pasin bilong Jisas long daunim laik bilong em na givim laip bilong em long helpim yumi bai kirapim yumi long bihainim pasin bilong em.—Gal. 2:20.
4. Wanem wanpela bilong ol gutpela samting em dai bilong Jisas i mekim i givim bikpela amamas long yu?
4 Dai bilong Krais i kamapim long ples klia olsem Jehova i nambawan bos. Em i tekewe yumi long sin na dai. (1 Jon 2:2) Em i opim rot bilong kamap wanbel wantaim God na long kisim laip oltaim. (Kol. 1:21, 22) Na tu, em i strongim yumi long stap gut long dediket bilong yumi long Jehova na stap strong olsem disaipel bilong Krais. (Mat. 16:24) Sapos yu redi gut na kam long Memorial, amamas bilong yu bai go bikpela moa!