Taim Pinis i Wok Long Kam Klostu, Kisim Pasin Bilong Bihainim Tok
“[Silo] bai i bosim olgeta lain manmeri.”—STAT 49:10.
1. (a) Bilong bihainim tok bilong Jehova long bipo, planti taim ol man i mas mekim wanem? (b) Jekop i mekim wanem tok profet long pasin bilong bihainim tok?
BILONG bihainim tok bilong Jehova long bipo, planti taim ol man i mas bihainim tok bilong ol man i stap olsem maus bilong em, olsem ol ensel, ol strongpela bilipman, ol jas, ol pris, ol profet, ol king. Olsem na ol i kolim sia king bilong ol king bilong Israel olsem sia king bilong Jehova. (1 Stori 29:23, NW ) Tasol sori tru, planti king bilong Israel i bin sakim tok bilong God, na dispela i bin kamapim bikpela hevi long ol yet na long ol man ol i bosim. Tasol Jehova i no lusim ol man i stap gut long em, nogat. Long rot bilong wanpela tok promis, em i mekim gut bel bilong ol—em i tok promis long putim wanpela gutpela King i stap, em ol stretpela man bai amamas long bihainim tok bilong em. (Aisaia 9:6, 7) Bilipman Jekop, taim em i laik i dai, em i bin tok profet long dispela King bihain bai kamap. Em i tok: “[Juda] i holim dispela stik i makim strong bilong king, na em bai i stap king oltaim. Em bai i holim dispela namba inap man bilong kisim dispela wok [“Silo,” NW ] i kamap, na em bai i bosim olgeta lain manmeri [“olgeta lain manmeri bai bihainim tok bilong em,” NW ].”—Stat 49:10, sta daunbilo.
2. Wanem insait bilong dispela tok “Silo”? Em bai bosim husat?
2 “Silo” em wanpela tok Hibru, insait bilong en em “Man Bilong Kisim Dispela Wok.” Yes, olsem dispela stik i makim, Silo bai kisim namba na strong bilong mekim wok king. Na em i no ken bosim ol tumbuna pikinini bilong Jekop tasol; em bai bosim “olgeta lain manmeri.” Dispela i stret wantaim tok promis Jehova i bin mekim long Abraham: “Ol tumbuna pikinini bilong yu bai bosim dua bilong taun bilong ol birua bilong ol. Na long rot bilong pikinini bilong yu olgeta lain bilong graun bai kisim blesing.” (Stat 22:17, 18, NW ) Long 29 C.E. Jehova i tokaut long dispela “pikinini” em i husat taim em i kapsaitim spirit holi long Jisas bilong Nasaret bilong kamap king.—Luk 3:21-23, 34; Galesia 3:16.
Namba Wan Kingdom Bilong Jisas
3. Taim Jisas i go antap long heven, em i kisim wok bilong bosim wanem lain?
3 Tru, taim Jisas i go antap long heven em i no kirap kwik long mekim wok king na bosim olgeta lain manmeri, nogat. (Song 110:1) Tasol em i kisim wanpela “kingdom” na bosim wanpela lain em ol i bihainim tok bilong em. Aposel Pol i kamapim klia dispela kingdom taim em i tok: “Yumi [ol Kristen God i makim] bin i stap aninit long strong bilong tudak, na [God] i bin kisim bek yumi na putim yumi insait long lain [“kingdom,” “NW”] bilong Pikinini bilong en.” (Kolosi 1:13) Dispela wok bilong kisim bek ol i bin kirap long Pentikos 33 C.E., taim spirit holi i kam daun long ol disaipel tru bilong Jisas.—Aposel 2:1-4; 1 Pita 2:9.
4. Olsem wanem ol disaipel bilong Jisas bilong pastaim i bin soim olsem ol i bihainim tok? Jisas i kolim dispela lain olgeta olsem wanem samting?
4 Ol dispela disaipel em spirit holi i bin makim, ol i stap olsem “maus bilong Krais,” na olsem Jisas i bin tokim ol long mekim, ol i kirap bungim sampela manmeri moa ol bai kamap “wanlain” bilong ol long dispela kingdom. (2 Korin 5:20; Efesus 2:19; Aposel 1:8) Ol i mas “stap wanlain tru long wankain tingting na wankain laik” bambai king bilong ol, Jisas Krais, i ken orait long ol. (1 Korin 1:10) Olgeta wantaim ol i wanpela “wokboi i gat gutpela tingting,” olsem wanpela lain bosboi i save mekim gut wok bilong en.—Matyu 24:45; Luk 12:42.
Ol i Bihainim “Bosboi” Bilong God na Kisim Blesing
5. Kirap long bipo yet, Jehova i bin skulim lain bilong em long wanem rot?
5 Kirap long bipo yet, Jehova i bin givim ol tisa long lain bilong em. Olsem: Taim ol Juda i lusim Babilon na kam bek long ples, Esra wantaim ol man i gat save ol i ritim Lo bilong God long ol manmeri na “autim as” bilong en bambai ol “i ken save gut.”—Nehemia 8:8.
6, 7. Long rot bilong Gavening Bodi, olsem wanem lain wokboi i bin kamapim kaikai bilong spirit long taim stret? Bilong wanem i stret lain bilong God i aninit long dispela lain wokboi?
6 Long taim bilong ol aposel, taim bikpela tok i kamap long yia 49 C.E. long pasin bilong katim skin, gavening bodi bilong dispela lain wokboi ol i tingim na beten long dispela samting, na tok ol i pasim i stret wantaim Tok Bilong God. Ol i salim pas i tokaut long dispela tok ol i pasim, na taim ol kongrigesen i kisim, ol i bihainim tok bilong en na God i mekim gut tru long ol. (Aposel 15:6-15, 22-29; 16:4, 5) Long nau tu, long rot bilong Gavening Bodi, gutpela wokboi i bin kamapim klia sampela bikpela tok, olsem: ol Kristen i no save insait long ol samting bilong dispela graun, blut em samting holi, na pasin bilong kisim drak na smok. (Aisaia 2:4; Aposel 21:25; 2 Korin 7:1) Jehova i bin mekim gut long lain bilong em, long wanem, ol i bin bihainim ol tok bilong Baibel na bilong gutpela wokboi.
7 Pasin bilong lain bilong God long i stap aninit long lain wokboi, dispela i kamapim klia olsem ol i stap aninit tu long Bikman, Jisas Krais. Pasin bilong stap aninit long dispela wokboi em i bikpela samting moa long nau, long wanem, Jisas i bin kisim bikpela namba moa, olsem Jekop i bin tok profet long en.
Silo i Kamap Bos Tru Bilong Graun
8. Krais i kisim namba bilong bosim husat moa? Wanem taim em i kisim dispela namba?
8 Jekop i tok profet olsem “olgeta lain manmeri bai bihainim tok bilong” Silo. Em nau, Krais i no ken bosim lain Israel bilong spirit tasol, nogat. Orait em bai bosim husat moa? Kamapim Tok Hait 11:15 i bekim dispela askim olsem: “Bikpela bilong yumi wantaim dispela man em i makim bilong kisim bek ol manmeri bilong en, tupela i kamap king bilong olgeta hap bilong graun. Na Bikpela bai i stap king oltaim oltaim.” Baibel i kamapim klia olsem Jisas i bin kisim dispela namba long pinis bilong “7-pela yia”—em “taim God i bin makim bilong ol arapela lain man”—long 1914.a (Daniel 4:16, 17; Luk 21:24) Long dispela yia, taim i kirap bilong Krais i kam i stap olsem King, na taim i kirap tu bilong em i mas “bosim ol birua bilong [em].”—Matyu 24:3; Song 110:2.
9. Taim Jisas i kisim Kingdom bilong em, em i mekim wanem? Dispela i mekim wanem long ol manmeri long graun, na moa yet long ol disaipel bilong em?
9 Namba wan samting Jisas i mekim taim em i kisim wok king, em i rausim dispela man bilong sakim tok—Satan—wantaim ol ensel nogut bilong em “i go daun long graun.” Kirap long dispela taim na i kam, ol dispela spirit nogut i bin kamapim planti bikpela hevi long graun, winim olgeta taim bipo, na ol i bin kamapim sampela kain pasin na bai i gat hatwok tru long bihainim tok bilong Jehova. (KTH 12:7-12; 2 Timoti 3:1-5) Nambawan lain Satan i mekim pait long ol, em ol manmeri Jehova i bin makim, em ol ‘i save bihainim ol lo bilong God na autim tok bilong Jisas,’ na em i mekim pait tu long ol poroman bilong ol, em “ol arapela sipsip.”—KTH 12:17; Jon 10:16.
10. Truim bilong wanem ol tok profet long Baibel i kamapim klia olsem Satan bai lus long dispela pait em i mekim long ol trupela Kristen?
10 Tasol Satan bai lus, long wanem, nau em “de bilong Bikpela,” na i no gat wanpela samting i ken pasim Jisas long “winim pait.” (KTH 1:10; 6:2) Olsem: Em bai mekim na olgeta 144,000 Israel bilong spirit bai kisim mak. Na tu, em bai lukautim wanpela bikpela lain ‘i no inap man i kaunim namba bilong ol, ol i bilong olgeta lain man na bilong olgeta kantri na bilong olgeta kain skin na bilong olgeta tok ples.’ (KTH 7:1-4, 9, 14-16) Tasol ol i narapela kain long ol poroman bilong ol em God i bin makim, long wanem, ol bai stap aninit long wok king bilong Jisas hia long graun na bihainim tok bilong em. (Daniel 7:13, 14) Dispela lain i stap pinis nau long graun na dispela i kamapim long ples klia olsem tru tru Silo i stap “king bilong olgeta hap bilong graun.”—KTH 11:15.
Nau Em Taim Bilong “Bihainim Gutnius”
11, 12. (a) Husat tasol bai abrusim bagarap taim dispela pasin nogut bilong nau i pinis? (b) Ol man i bihainim “spirit,” olsem tingting, bilong dispela graun, ol i bihainim wanem kain pasin?
11 Olgeta man i laik kisim laip oltaim, ol i mas lain long bihainim tok, long wanem, Baibel i tok klia, “ol man i no laik save long God na i no bihainim gutnius bilong Jisas, Bikpela bilong yumi,” bai ol i no inap winim de bilong God long bekim pe nogut. (2 Tesalonaika 1:8) Tasol pasin nogut bilong dispela graun em yumi stap namel long en wantaim pasin bilong en long bikhet long ol lo na ol stiatok bilong Baibel, dispela i mekim na i gat hatwok long bihainim gutnius.
12 Baibel i kolim dispela tingting bilong bikhet long God olsem “spirit bilong dispela graun.” (1 Korin 2:12) Aposel Pol i tokim ol Kristen long Efesus long samting dispela tingting inap mekim long ol manmeri. Em i tok: “Long dispela taim [“yupela i bin wokabaut long pasin bilong dispela graun, na yupela i bin bihainim pasin bilong hetman i bosim strong bilong win, em spirit i stap insait long bel bilong ol man i sakim tok,” NW ]. Bipo yumi olgeta i bin i stap wantaim dispela lain, na yumi bihainim laik nogut bilong olpela bel bilong yumi tasol. Yumi bihainim laik bilong dispela olpela bel na laik bilong tingting bilong yumi yet.”—Efesus 2:2, 3.
13. Olsem wanem ol Kristen i ken sakim tingting bilong dispela graun? Taim ol i mekim olsem, wanem gutpela samting inap kamap?
13 Gutpela tru, ol dispela Kristen long Efesus ol i no stap wokboi moa bilong dispela pasin bilong sakim tok. Ol i larim spirit holi bilong God i stiaim ol, na ol i bihainim ol gutpela pasin dispela spirit i save kamapim, na long dispela rot ol i kamap pikinini bilong God i save bihainim tok. (Galesia 5:22, 23) Na long nau tu, spirit bilong God—em nambawan bikpela strong long heven na graun—em i save helpim planti milion manmeri long bihainim tok bilong Jehova, na long dispela rot ol inap “wetim dispela taim God i makim bilong mekim gut long [ol].”—Hibru 6:11; Sekaraia 4:6.
14. Olsem wanem Jisas i bin helpim ol Kristen i stap long taim bilong las de long tingim ol samting bai traim pasin bilong ol long bihainim tok?
14 Tingim tu olsem Silo em i strongpela helpim tru bilong yumi, na em wantaim Papa bilong em ol i no ken larim wanpela birua—ensel nogut o man bilong graun—i traim pasin bilong yumi long bihainim tok na dispela traim i winim strong bilong yumi. (1 Korin 10:13) Bilong helpim yumi long sakim tingting bilong dispela graun, Jisas i stori long sampela hevi bai painim yumi long dispela taim bilong las de. Em i mekim olsem long rot bilong 7-pela pas, em i bin givim long aposel Jon long wanpela driman. (KTH 1:10, 11) Tru, ol pas i gat ol bikpela tok bilong helpim ol Kristen long taim bilong Jon, tasol tru tru ol dispela tok i bilong “de bilong Bikpela,” kirap long 1914. Olsem na i stret yumi tingim gut ol dispela tok!b
Les, Pamuk, Laikim Tumas Mani Kago
15. Bilong wanem yumi mas was gut, nogut yumi lusim pasin bilong laikim tru God olsem kongrigesen long Efesus i bin mekim? Yumi ken mekim wanem? (2 Pita 1:5-8)
15 Namba wan pas bilong Jisas i go long kongrigesen long Efesus. Taim em i givim pinis gutpela tok amamas long kongrigesen long ol i bin sanap strong na karim hevi, Jisas i tok: “Tasol mi gat tok long yu olsem, taim yu bilip nupela, yu bin laikim mi tru, tasol nau nogat.” (KTH 2:1-4) Long nau, sampela Kristen, em pastaim ol i strongpela Kristen, ol i bin lusim pasin bilong ol long laikim tru God. Dispela inap mekim na Kristen i no pas gut moa wantaim God, olsem na em i mas kirap kwik na stretim dispela pasin bilong em. Em i ken mekim olsem wanem? Em i mas stadi oltaim long Baibel, go long ol miting, beten, na tingim tingim long bel ol tok bilong God. (1 Jon 5:3) Tru, bilong mekim olsem, em i mas “wok strong tru,” tasol dispela wok bai i no lus nating. (2 Pita 1:5-8) Olsem na taim yu skelim yu yet, sapos yu lukim olsem yu bin lusim pasin bilong laikim tru God, orait kwiktaim stretim dispela pasin kranki, olsem Jisas i tokim yumi long mekim: “Bipo yu bin mekim gutpela pasin, tasol yu lusim dispela pasin na yu pundaun pinis. Olsem na yu mas tingim gen dispela pasin yu bin mekim bipo, na yu mas tanim bel na mekim kain pasin olsem pastaim yu save mekim.”—KTH 2:5.
16. Wanem kain pasin i stap long kongrigesen long Pergamum na Taiataira na dispela inap bagarapim ol long ol samting bilong spirit? Olsem wanem ol tok Jisas i givim long ol i stret long dispela taim nau?
16 Jisas i mekim gutpela tok amamas long ol Kristen long Pergamum na Taiataira long ol i stap gut long God, na sanap strong na karim hevi, na givim bel tru long God. (KTH 2:12, 13, 18, 19) Tasol em i gat tok long ol i larim sampela i stap long kongrigesen em ol i bihainim pasin nogut bilong Balam na Jesebel, em tupela i bin bagarapim gutpela pasin bilong ol Israel long bipo long rot bilong pasin pamuk na lotuim god Bal. (Namba 31:16; 1 King 16:30, 31; KTH 2:14, 16, 20-23) Orait olsem wanem long taim bilong yumi—em “de bilong Bikpela”? I gat wankain pasin nogut i stap? Yumi ken tok yes, long wanem, nambawan as na man i mas raus long lain bilong God, em pasin pamuk. Olsem na i bikpela samting long yumi no ken poroman liklik wantaim ol man—insait o ausait long kongrigesen—em ol inap pulim yumi long bihainim pasin nogut! (1 Korin 5:9-11; 15:33) Ol man i laik stap aninit long Silo na bihainim tok bilong em, ol bai givim baksait tu long ol amamas nogut, na ol piksa nogut bilong pasin sem i stap long ol buk na Intenet.—Amos 5:15; Matyu 5:28, 29.
17. Skelim tingting bilong Jisas wantaim tingting bilong ol Kristen long Sardis na Laodisia long ol i stap olsem wanem long ol samting bilong spirit.
17 Ol Kristen long kongrigesen long Sardis i no kisim sampela gutpela tok—wan wan tasol i kisim. Kongrigesen i gat nem olsem em i gat laip, tasol em i gat pasin bilong les long mekim wok bilong spirit, olsem na Jisas i tok em i “dai pinis.” Kongrigesen i no givim bel long bihainim tok bilong gutnius! (KTH 3:1-3) Na i wankain tu long kongrigesen long Laodisia. Em i tok, “Mi gat planti mani,” tasol long ai bilong Krais, dispela kongrigesen i ‘stap nogut tru na rabis tru na aipas na i stap as nating.’—KTH 3:14-17.
18. Kristen i ken mekim wanem na bai em i no slek long ol samting bilong spirit?
18 Long nau, sampela Kristen bipo ol i gutpela Kristen, ol tu i bin pundaun na bihainim dispela pasin bilong sakim tok. Ating ol i bin larim tingting bilong dispela graun i mekim na ol i no pilim moa olsem taim i sot pinis, olsem na ol i no strong moa long givim bel long stadi long Baibel, beten, go long ol miting Kristen, na autim tok. (2 Pita 3:3, 4, 11, 12) Olsem na i bikpela samting long ol dispela Kristen i mas bihainim tok bilong Krais na wok long kisim planti samting bilong spirit—ol i mas ‘baim gol long Krais, em paia i bin kukim na rausim olgeta samting nogut i stap long en’! (KTH 3:18) Ol i mas “mekim planti gutpela pasin bilong helpim ol arapela manmeri,” na “givim planti samting long ol manmeri i sot.” Taim yumi mekim olsem, yumi save ‘bungim planti samting bilong helpim yumi bihain, na yumi bai kisim dispela laip em i laip tru.’—1 Timoti 6:17-19.
Tok Amamas Long Ol i Bihainim Tok
19. Jisas i givim wanem tok amamas long ol Kristen long Smerna na Filadelfia, na em i strongim ol long mekim wanem?
19 Ol kongrigesen long Smerna na Filadelfia ol i stap gutpela piksa tru long pasin bilong bihainim tok. Yumi ken save long dispela, long wanem, long pas Jisas i salim long ol, i no gat sampela tok bilong stretim ol. Jisas i tokim ol Kristen long Smerna: “Mi save long ol hevi na pen i bin kamap long yu, na mi save olsem yu stap rabis tru. Tasol yu gat planti samting moa yet.” (KTH 2:9) Man! Ol i narapela kain tru long ol Kristen long Laodisia em ol i tok ol i gat planti mani samting, tasol long ai bilong Krais ol i stap rabis tru! Tasol Satan i no amamas long lukim ol i holimpas bilip na bihainim tok bilong Krais. Olsem na Jisas i givim tok lukaut long ol: “Bihain liklik yu bai karim pen, tasol dispela i no ken mekim yu i pret. Harim. Satan bai i mekim, na ol bai i kalabusim sampela man namel long yupela, bilong traim yupela. Na bai yupela i karim hevi na pen inap long 10-pela de. Tasol yu mas holim bilip, i go inap long taim yu dai, na bai mi givim yu laip olsem prais.” (KTH 2:10) Na Jisas i mekim tok amamas tu long ol Kristen long Filadelfia, em i tok: “Yu bin bihainim tok bilong mi, na yu no bin givim baksait long nem bilong mi. Bai mi kam long yu kwiktaim. Samting yu holim, em yu mas holim strong. Nogut wanpela man i stilim prais bilong yu.”—KTH 3:8, 11.
20. Long nau, planti milion manmeri i bin bihainim tok bilong Jisas na mekim wanem? Ol i bin mekim olsem long wanem kain taim?
20 Long “de bilong Bikpela,” kirap long 1914, lain remnan wantaim planti milion poroman bilong ol, em ol arapela sipsip, ol tu i bin bihainim tok bilong Jisas na givim bel long autim tok na holimpas bilip. Olsem ol brata bilong ol long taim bilong ol aposel, sampela i bin karim pen long bihainim tok bilong Krais, na sampela i bin kisim taim long kalabus na long ol banis kalabus nogut. Na sampela, maski ol i stap namel long ol man i gat planti gutpela samting bilong skin na i mangal long kisim planti samting moa, ol i bin bihainim tok bilong Jisas, em i tok ‘ai bilong ol i mas gutpela.’ (Matyu 6:22, 23) Yes, long olgeta kain taim, ol trupela Kristen i save bihainim tok na long dispela rot ol i wok yet long mekim Jehova i belgut tru.—Sindaun 27:11.
21. (a) Lain wokboi bai wok yet long inapim wanem wok bilong spirit? (b) Olsem wanem yumi ken soim olsem yumi gat laik tru long bihainim tok bilong Silo?
21 Taim bilong bikpela hevi tru i kam klostu pinis, na “wokboi i gat gutpela tingting” i strong yet long bihainim tok bilong Bikman, Krais. Olsem: Ol i save redim ol kaikai bilong spirit na givim long lain bilong God long taim stret. Olsem na yumi mas wok yet long tenkyu tru long gutpela oganaisesen tiokratik bilong Jehova na ol samting yumi kisim long en. Long dispela rot yumi soim olsem yumi stap aninit long Silo, em bai givim gutpela prais olsem laip i stap oltaim long olgeta man i bihainim tok bilong em.—Matyu 24:45-47; 25:40; Jon 5:22-24.
[Ol Futnot]
a Bilong kisim save long dispela “7-pela yia,” lukim sapta 10 bilong buk Save i Bringim Man Long Laip Oltaim, em ol Witnes Bilong Jehova i wokim.
b Bilong kisim sampela tok moa bilong dispela 7-pela pas olgeta, lukim buk Kamapim Tok Hait—Bikpela Samting Bilong En i Laik Kamap!, em ol Witnes Bilong Jehova i wokim, kirap long pes 33.
Yu Inap Tingim?
• Taim Jekop i laik i dai, em i tok profet long Jisas bai mekim wanem wok?
• Olsem wanem yumi save tokaut olsem Jisas em Silo? Yumi mas abrusim wanem kain pasin?
• Long ol pas bilong 7-pela kongrigesen long Buk Kamapim Tok Hait, i gat wanem ol tok i stret long yumi long nau?
• Olsem wanem yumi ken bihainim pasin bilong ol Kristen long kongrigesen long Smerna na Filadelfia?
[Ol Piksa long pes 18]
Jehova i save mekim gut long lain bilong em, long wanem, ol i bihainim tok bilong gutpela “bosboi”
[Piksa long pes 19]
Satan i mekim na i gat hatwok long bihainim tok bilong God
[Ol Piksa long pes 21]
Sapos yumi pas gut wantaim Jehova, dispela bai helpim yumi long bihainim tok bilong em