Askim

Sapos ol Witnes Bilong Jehova i baim wanpela haus bilong narapela lotu na stretim i kamap wanpela Haus Kingdom, yu ting em i olsem pasin bilong bung wantaim narapela lotu?

Ol Witnes Bilong Jehova i save abrusim pasin bilong mekim kain wok olsem wantaim ol narapela lotu. Tasol dispela i no olsem pasin bilong bung wantaim narapela lotu. Yumi ken ting olsem em i wanpela wok bisnis ol i wokim wanpela taim tasol. Kongrigesen bilong ol Witnes Bilong Jehova i no wok wantaim narapela lain bilong lotu long wokim wanpela haus bilong lotu na bai tupela lotu wantaim i mekim wok long dispela haus, nogat.

Long tingting bilong Jehova, wanem samting i olsem pasin bilong bung wantaim narapela lotu? Tingim tok bilong aposel Pol, em i tok: “Ol haiden ol i narakain, olsem na yupela i no ken pas wantaim ol na wok bung wantaim ol. Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak? Ating Krais i save stap wanbel wantaim Satan, a? Man i bilip long Krais na man i no bilip, tupela i ken holim wanpela kain tingting, a? Olsem wanem, bai yumi bungim haus bilong God wantaim haus lotu bilong ol giaman god? . . . Olsem na Bikpela i tok moa olsem, ‘Yupela i mas lusim ol, na i go i stap long narapela hap. Na yupela i mas lukaut gut, nogut yupela i pas long ol samting i no klin long ai bilong God. Na bai mi yet mi kisim yupela.’ ” (2 Korin 6:​14-​17) Wanem insait bilong tok bilong Pol olsem “wok bung wantaim” na “bung wantaim”?

Dispela pasin bilong wok bung wantaim em Pol i toktok long en i makim pasin bilong mekim lotu wantaim ol man i save lotuim ol god giaman na ol man i no bilip na mekim ol wok bilong spirit wantaim ol. Em i givim tok lukaut long ol Korin olsem ol i no ken “kaikai long tebol . . . bilong ol spirit nogut.” (1 Korin 10:​20, 21) Olsem na pasin bilong bung wantaim narapela lotu i olsem: Mekim lotu wantaim lain bilong narapela lotu o bung wantaim ol long mekim sampela wok bilong spirit. (Kisim Bek 20:5; 23:13; 34:12) Taim ol Witnes i baim wanpela haus em narapela lotu i bin mekim wok long en, ol i kisim olsem wanpela haus tasol bilong wokim i kamap olsem Haus Kingdom. Paslain long mekim wok long en olsem Haus Kingdom, ol i save rausim olgeta piksa na imis bilong lotu giaman. Taim ol i stretim pinis, orait nau ol i dediketim long Jehova bilong mekim wok bilong lotuim em, na i no gat narapela wok. Lotu i tru i no bung wantaim lotu giaman bilong mekim lotu.

Bilong stretim ol samting bilong baim kain haus olsem, ol Witnes i no ken bung tumas wantaim ol lain ol i laik baim haus long ol​—⁠ol i mas toktok tasol long ol samting bilong baim haus. Ol lain bilong kongrigesen Kristen i mas tingim tok lukaut bilong Pol olsem ol i ‘no ken pas na wok bung wantaim ol haiden.’ Tru, yumi no ting olsem yumi winim ol manmeri bilong narapela bilip, tasol yumi no laik bung wantaim ol bilong pren wantaim ol o larim ol i pulim yumi long lotu wantaim ol.a

Olsem wanem sapos wanpela kongrigesen i rentim wanpela haus em bilong narapela lotu? Bilong rentim wanpela haus, ol Witnes i mas bung planti taim wantaim lain bilong narapela lotu, na i gutpela ol i abrusim dispela pasin. Maski ol i rentim kain haus olsem bilong yusim wanpela taim tasol, ol elda i mas tingim ol samting olsem: Olsem wanem? I gat sampela piksa o imis bilong lotu insait o ausait long dispela haus? Ol manmeri i sindaun klostu bai ting olsem wanem sapos ol Witnes i yusim dispela haus? Dispela bai mekim na sampela long kongrigesen bai pundaun? (Matyu 18:6; 1 Korin 8:​7-13) Ol elda i mas tingim dispela samting na skelim wanem samting ol i laik mekim. Ol i mas tingim tu maus bilong bel bilong ol yet na bilong ol brata sista bilong kongrigesen bilong save olsem ol i laik baim kain haus olsem na stretim bilong yusim olsem Haus Kingdom, o nogat.

[Futnot]

[Piksa long pes 27]

Pastaim dispela haus em i wanpela haus lotu, na ol i baim na wokim i kamap wanpela Haus Kingdom