Ol Haus Bilong Mekim Lotu—Yumi Mas i Gat?
‘Planti tausen manmeri i kam lotu ol i pasim ol klos i gat kala kala na ol i kam long kain kain hap bilong kantri, na ol man i paitim kundu na sampela lain Indian i mekim ol danis bilong bipo, em ol danis ol man i bin mekim paslain long taim ol Spen i kisim dispela hap, na sampela manmeri i kisim bikpela pen taim ol i wokabaut long skru namel long ol planti manmeri na i go long alta, na ol i bung bung long haus lotu na long ol rot klostu long en.’
DISPELA em tok bilong wanpela nius (El Economista) i stori long wanpela bikpela lain manmeri long Disemba 2001. Long dispela taim inap olsem 3 milion manmeri i kam long wanpela bikpela haus lotu long Mexico City bilong kamapim olsem ol i bilip long Virgo Bilong Guadalupe. Sampela narapela haus lotu tu i save pulim planti manmeri tru long kam lukim, olsem Sios Bilong Santu Pita long Rom.
Ol haus lotu i bikpela samting long planti manmeri em ol i gat laik long lotuim God. Maria bilong Brasil i tok: “Long mi, haus lotu i bin i stap olsem wanpela ples mi inap i stap klostu long God. Em wanpela ples holi. Mi bin ting, pasin bilong i go long haus lotu i save mekim bel i stap klin, na mi mekim sin sapos mi no go long Misa na konpesio long olgeta Sande.” Consuelo bilong Meksiko i tok: “Haus lotu i bin kirapim tru bel bilong mi; mi bin amamas tru long go long haus lotu. Taim mi stap long en, mi pilim olsem mi stap long heven.”
Tru, sampela i ting ol haus lotu i bikpela samting, tasol sampela i gat tupela tingting long en olsem i mas i gat haus bilong lotuim God o nogat. Peter Sibert, wanpela pris bilong Misin Katolik long Inglan, em i stori olsem i no planti man i save go lotu, na em i tok: “Ol man i save bihainim ol samting bilong lotu em ol i save laikim. Planti lapun i Katolik na ol i bihainim bilip bilong ol—tasol planti yangpela i no save ting lotu i wanpela samting ol i mas bihainim.” Wanpela nius (Daily Telegraph) bilong London, bilong Novemba 20, 1998, i tok: “Kirap long 1979 i kam inap nau, ol i bin pasim 1,500 haus lotu long Inglan, na ol i opim 495 nupela haus lotu na wokim gen 150.”
Long 1997 wanpela nius (Süddeutsche Zeitung) bilong Munich, Jemani, i tok: “Sampela haus lotu ol i wokim i kamap haus piksa na ol flet: Ol man i no save go long haus lotu, na ol i wokim ol haus lotu i kamap olsem ol haus bilong mekim kain kain narapela wok long en. . . . Samting ol i save mekim longtaim pinis long Netelan o long Inglan, ol i save mekim nau long Jemani.” Nius i tok moa: “Inap sampela yia pinis, ol man inap painim 30 o 40 haus lotu long Jemani ol i laik salim.”
Olsem wanem? I mas i gat ol haus lotu bilong lotu long God? I gat sampela stori long Baibel long lain bilong God i bin wokim ol bikpela haus lotu i gat kain kain bilas long en na yumi mas bihainim dispela pasin? Wanem kain haus lotu ol i bin mekim wok long en bilong lotu long dispela God tru i stap laip? Ol dispela haus lotu inap skulim yumi olsem wanem long yumi mas i gat ol haus bilong mekim lotu na long ol samting i mas kamap long ol dispela haus?