Givim Givim, Maski Yu Sot Olgeta
“YU KEN kolim mi olsem man bilong singaut long mani; mi no bel hevi long dispela. Mi singaut long mani bilong helpim Jisas.” Dispela tok bilong wanpela pasto Talatala i kamapim klia olsem i gat planti tok pait long pasin bilong ol lotu long kisim mani. I olsem ol misin i mas kisim bikpela mani bilong mekim wok bilong ol. Ol i mas i gat mani bilong baim ol man i save mekim wok lotu, na wokim ol haus lotu na lukautim, na mani bilong raun na autim tok bilong lotu. Ol i ken painim we ol dispela mani?
Planti lotu i save kisim dispela mani long kain rot olsem: Lain bilong ol i mas givim namba 10 hap bilong mani samting bilong ol long lotu. Wanpela evanjelis, Norman Robertson, i tok: “Pasin bilong givim namba 10 hap em pasin bilong God long kisim mani bilong kingdom bilong Em long graun. Dispela i save helpim ol man long autim tok bilong Gutnius.” Dispela man i no surik long tokim lain bilong em olsem ol i gat wok long givim mani, na em i tokaut strong: ‘I no olsem yu gat planti mani na yu inap givim namba 10 hap, nogat. Em i wanpela samting yu mekim bilong bihainim tok. Sapos yu no givim namba 10 hap, yu brukim ol lo bilong God. I olsem yu stilim mani.’—Tithing—God’s Financial Plan.
Ating bai yu wanbel long tok olsem pasin bilong givim mani i mas insait long lotu Kristen. Tasol yu pilim olsem pasin bilong singaut oltaim long mani i no stret tumas na yu bel nogut liklik long en? Wanpela tisa bilong lotu long Brasil, em Inácio Strieder, i sutim tok long ol lotu olsem ol i save singaut long ol man i mas givim namba 10 hap bilong ‘stretim hevi bilong lotu long mani,’ na dispela ‘i no stret, na i nogutim ol man, na i no stret wantaim wok lotu.’ Na em i tok, dispela pasin i mekim na ‘ol man i no gat wok mani, ol meri man bilong ol i dai pinis, ol rabisman, ol man i no inap skelim gut ol samting long tingting, ol i ting God i lusim ol pinis, na ol i mas givim planti mani long man bilong autim tok bilong lotu, olsem na famili bilong ol yet i no gat kaikai.’
Ating yu save tingting: ‘Ol lotu i singaut long kisim namba 10 hap, ol i bihainim stret tok bilong Baibel? O ating sampela lotu i mekim na ol man i pret long strafe bilong God, na long dispela rot ol i ken pulim mani bilong ol? Orait yu ting God i laik bai yumi givim givim, maski yumi sot olgeta?’