Long Tebol Bilong Kepten
OL GUTPELA manmeri, naispela kaikai, na gutpela toktok, em ol samting i mekim na ol man i save amamas taim ol i kaikai long tebol bilong kepten long sip. Tasol wanpela toktok i kamap long tebol bilong Kepten Robert G. Smith, bilong kampani White Star Line, i bin kamapim wanpela bikpela kaikai bilong spirit.—Aisaia 25:6.
Long yia 1894, taim Robert i gat 24 krismas, em i kamap kepten bilong sip Kinclune of Dundee, na em namba wan taim long em bai raun i go long olgeta hap bilong graun. Bihain em i bin kepten bilong ol sip bilong kampani White Star, olsem Cedric, Cevic, na Runic.a Taim Robert i lusim New York long wanpela bilong ol dispela sip na brukim solwara Altantic bilong i go long Liverpool, Inglan, Charles Taze Russell i bin stap long tebol bilong em. Stori Robert i mekim wantaim Russell i kirapim laik bilong em long save long tok bilong Baibel, na bilong helpim em long kisim sampela save moa, em i kisim long Russell ol buk Studies in the Scriptures.
Russell i salim ol pas long Robert, na dispela i kirapim em moa yet long kisim save long tok bilong Baibel. Robert i tokim meri bilong em tu long nupela save em i kisim. I no longtaim na tupela wantaim i kamap ol strongpela Sumatin Bilong Baibel, em nem bilong ol Witnes Bilong Jehova long dispela taim. Bihain Robert i mekim ol tok bilong Baibel. Olsem: Long Brisbane, Australia, em i mekim tok long “Marasin Bilong Gileat” na em i kamapim ol tok bilong Baibel i stori long “rot bilong pinisim olgeta hevi bilong graun.” Long Inglan, meri na ol yangpela pikinini bilong em, ol i helpim wok bilong soim piksa “Photo-Drama of Creation”—ol i pilaim pikap i gat ol tok bilong Russell long en taim wan wan piksa slait i kamap.
Robert i helpim ol pikinini bilong em tu long kisim tok i tru bilong Kingdom. Long nau, bihain long 5-pela lain tumbuna bilong Robert i kamap pinis, inap 18 bilong ol i wok strong long autim gutnius long ol man—ol i amamas tru long kaikai bilong spirit i bin kamap long tebol bilong kepten.
Long rot bilong ol buk na nius na wok bilong ol long skulim ol man long Baibel, ol Witnes Bilong Jehova i wok long helpim ol manmeri long olgeta hap long kisim save long tok bilong Baibel—em dispela tok i bin kirapim tingting bilong Kepten Smith. Yu tu inap kisim save long dispela tok i bin kamap long tebol bilong kepten.
[Futnot]
a Wanpela bilong dispela lain sip, em Titanic, i bin stap aninit long wok kepten bilong E. J. Smith (em i no wanblut bilong Robert G. Smith) taim em i painim bagarap long namba wan raun bilong en.
[Piksa long pes 8]
Robert G. Smith
[Piksa long pes 8]
Charles T. Russell