Tupela Pasto i Litimapim Ol Rait Bilong Russell

LONG 1891, Charles Taze Russell, em man i mekim gutpela wok namel long ol Kristen tru i lotuim Jehova, em i raun long Yurop long namba wan taim. Sampela ripot i tok, Russell i bin stap liklik taim long Pinerolo, Itali, na long dispela taim em i bungim Profesa Daniele Rivoire, bipo Daniele i wanpela pasto bilong lain lotu ol i kolim Waldens.a Maski Rivoire i bin lusim pinis wok pasto em i stap gut yet wantaim lain Waldens, na em ritim planti buk na nius C. T. Russell i bin raitim.

Long 1903, Rivoire i tanim wanpela buk bilong Russell (The Divine Plan of the Ages) i go long tok ples Itali na mekim wok long mani bilong em yet bilong prinim. Em i mekim dispela wok paslain long taim Russell i tanim dispela buk long tok ples Itali na ol i prinim. Long tok i go pas long dispela buk, Rivoire i tok: “Mipela i putim dispela buk long han bilong Bikpela bilong lukautim. Em bai blesim maski i gat sampela popaia long en, na dispela buk bai helpim wok bilong litimapim bikpela nem holi bilong em na strongim ol pikinini bilong em i save mekim tok ples Itali long givim bel tru long em. Mipela i laik bai olgeta man i ritim dispela buk, bel bilong ol i ken pilim tru ol gutpela samting bilong en, olsem gutpela tingting na save, na save long samting God i tingting pinis long mekim na sori bilong em, na ol i tenkyu long God yet, long wanem, long laik bilong em dispela buk i kamap.”

Na tu, Rivoire i kirap tanim nius Zion’s Watchtower and Herald of Christ’s Presence i go long tok ples Itali. Dispela nius, em nem bilong nius Wastaua long bipo, i kamap 4-pela taim long 1903. Maski Profesa Rivoire i no kamap wanpela Sumatin Bilong Baibel, em nem bilong ol Witnes Bilong Jehova long bipo, em i kamapim olsem em i laikim tru wok bilong autim tok bilong Baibel olsem ol buk bilong ol Sumatin Bilong Baibel i stori long en.

“Wantu i Olsem Ai Bilong Mi i Op”

Narapela pasto bilong lain Waldens i save litimapim ol buk na nius bilong Russell, em Giuseppe Banchetti. Papa bilong Giuseppe i bin lusim lotu Katolik na kisim bilip bilong ol Waldens, na Giuseppe i kisim skul long ol samting bilong ol Waldens. Long 1894, Giuseppe i kamap wanpela pasto na em i mekim wok long hap bilong Apulia na Abruzzi, na long ailan Elba na ailan Sicily.

Ol i prinim dispela buk bilong Russell, Divine Plan of the Ages, long tok ples Itali long 1905. Banchetti i raitim gutpela tok i litimapim dispela buk. Dispela tok i kamap long nius La Rivista Cristiana bilong lotu Tatatala. Banchetti i tok: “Long mipela,” buk bilong Russell “i olsem wanpela gutpela lait tru na samting bilong stiaim tru ol Kristen em ol i laik kisim helpim bilong mekim gutpela stadi long Baibel Holi . . . Taim mi ritim, wantu i olsem ai bilong mi i op, na mi lukim olsem rot bilong kisim save long God em i stret tasol na i no gat hatwok tumas. Pastaim i olsem planti tok i pait wantaim, tasol nau nogat. Ol bilip em bipo i hatwok long save gut long insait bilong en ol i kamap klia na mipela i wanbel long en. Ol samting bipo mipela i no save tru long as bilong en em i kamap klia. Gutpela laik bilong God long kisim bek ol man bilong graun long rot bilong Krais, em i bikpela samting tru long tingting bilong mi na dispela i kirapim mi long mekim tok olsem wanpela Aposel: Olaman! Ol gutpela pasin bilong God na tingting na save bilong en i pulap tru, na i daun tumas olsem solwara!”​—⁠Rom 11:⁠33.

Long 1925 Remigio Cuminetti i tok, Banchetti i kamapim klia olsem em i “wanbel tru” long wok bilong ol Sumatin Bilong Baibel na em i “bilip tru” long ol bilip ol i kamapim. Na tu, Banchetti yet i painim rot bilong autim ol dispela bilip long ol man.

Olsem ol Witnes Bilong Jehova, Banchetti i bilip long ol daiman bai kirap bek na stap long graun olsem Baibel i tokaut long en, na ol rait bilong em i kamapim klia dispela samting. Na tu, em i wanbel wantaim ol Sumatin Bilong Baibel taim em i stori olsem God i bin makim yia em Jisas i bin dai long en na Em i kamapim dispela long tok profet bilong Daniel long 70 wik. (Daniel 9:​24-27) Planti taim, long ai bilong ol man em i tok pait long ol bilip bilong misin, olsem em i bilip long Memorial bilong tingim indai bilong Jisas Krais ol i mas mekim wanpela taim tasol long olgeta yia, em “long de stret olsem ol i bin mekim long bipo.” (Luk 22:​19, 20) Em i sakim stori nating bilong Darwin long evolusen, na em i tokaut long ol Kristen i no ken insait liklik long ol pait.​—⁠Aisaia 2:⁠4.

Wanpela taim, Banchetti i stori long ol rait bilong Russell wantaim wanpela man, nem bilong em J. Campbell Wall. Bilong bekim ol tok bilas bilong Wall, Banchetti i tok: “Mi save olsem sapos yu ritim dispela 6-pela buk bilong Russell, bai yu kisim bikpela amamas, na bel bilong yu bai pilim tru na yu tenkyu long mi. Mi no hambak long ol dispela bilip; tasol mi ritim ol dispela buk inap 11-pela yia i go pinis, na long olgeta de mi tenkyu long God long soim kain lait olsem long mi na mekim gut bel bilong mi long rot bilong wanpela wok em Baibel Holi i stap olsem strongpela as tru bilong en.”

“Harim, Harim, Harim”

Tupela pasto bilong ol Waldens​—⁠Daniele Rivoire na Giuseppe Banchetti​—⁠ol i kamapim olsem ol i wanbel long pasin bilong Russell long kamapim ol tok bilong Baibel. Banchetti i tok: “Mi tok olsem i no gat wanpela bilong mipela ol man bilong autim tok, na ol pasto bilong mipela tu, na ol saveman bilong ol samting bilong lotu, i save long olgeta samting, nogat. Mipela i gat planti samting tru bilong lainim. . . . [Mipela i mas] . . . stap na harim, mipela i no ken ting mipela i save long olgeta samting, na mipela i no ken sakim ol tok ol i givim long mipela bilong skelim, nogat. Mipela i mas harim, harim, harim.”

Long olgeta yia, planti tausen man i harim tok bilong Kingdom em ol Witnes Bilong Jehova i autim long ol haus bilong ol. Ol man long olgeta hap em ol i amamas long kisim save na nek bilong ol i drai long kisim save long tok i tru bilong Baibel, ol i bihainim singaut bilong Jisas, olsem: “Yu kam na bihainim mi.”​—⁠Mak 10:​17-21; KTH 22:⁠17.

[Futnot]

[Piksa long pes 28]

Profesa Daniele Rivoire

[Piksa long pes 29]

Giuseppe Banchetti

[Kredit Lain]

Banchetti: La Luce, April 14, 1926