“Mipela i Laik Tok Tenkyu long Yupela”
INAP 800 samting yia bipo, long ol gutpela ples daun namel long ol maunten long hap bilong saut long Frans, wanpela lain bilong lotu ol i stap, ol i kolim ol olsem Ol Waldenses. Ol dispela manmeri i laik tru long save long tok i tru. Ol i bilip olsem ol tok bilong Baibel em i tok tru bilong God, na ol i wok strong long bihainim ol dispela tok. Ol i lainim ol tok bilong Baibel na ol i autim ol dispela tok long ol narapela man. Long dispela samting ol i kisim hevi. Misin i birua long ol na tok, ol i man bilong bikhet na lusim bilip, na ol man i mekim nogut long ol. Planti ol i ranawe bambai ol inap abrusim dispela hevi. Sampela ol i ranawe i go long hap bilong not long Itali. I gat lain Waldenses i stap yet long dispela hap. Tasol ol i lusim pinis planti tok bilong Baibel na pasin bilong Ol Waldenses bilong pastaim.
Long dispela taim sampela Waldenses long hap bilong not long Itali ol i kirap lainim tok bilong Baibel wantaim Ol Witnes Bilong Jehova, na ol i salim pas long brens-ofis bilong Sosaiti Was Taua long Itali. Ol i tok olsem:
“Yumi olgeta yumi save long hevi [i painim Ol Waldenses] bilong bipo. Tasol planti man i no save, dispela lain long nau ol i kirap bihainim gen pasin haiden na ol i no bihainim moa ol tok bilong Baibel.
“I gat wanpela samting tasol long nau na yumi ken save long ol manmeri bilong dispela lain, em mak bilong ol (kruse bilong ol Hiugeno), ol i save pasim long liklik sen na i stap long windo bilong ka bilong ol o i hangamap long ol liklik botol junipa o long narapela samting ol i wokim bilong ol turis i ken baim.
“Mipela i laik tok tenkyu long yupela ol brata sista bilong lain Witnes Bilong Jehova, em yupela i redi long lusim bikpela hap taim bilong opim ai bilong tingting bilong mipela na putim tok i tru i go insait long het ston bilong mipela. . . . Dispela taim yupela i givim bilong helpim mipela i helpim tru mipela, winim mani. Yupela i sori tru long ol narapela man (yupela i no hambak liklik long dispela pasin bilong yupela) na dispela samting i makim yupela i disaipel tru bilong Jisas olsem em i tok long Jon 13:35 na Matyu 24:45. Mipela i bin skelim Ol Waldenses bilong bipo na mipela i save, ol i bin kolim nem bilong God, em Jehova. . . . Tasol nau Ol Waldenses i strong long sakim dispela nem, maski Aposel 15:14 i tok bai God i kisim wanpela lain bilong em na bai nem bilong em i stap long ol. Nau mipela i save, dispela lain manmeri bilong God, em nem bilong Em i stap long ol, em lain Witnes Bilong Jehova. Ol tasol i save holim dispela Nem. (Aisaia 43:10-12) ‘Mipela bai go wantaim yupela, long wanem mipela harim ol i tok God i stap wantaim yupela.’ (Sekaraia 8:23)”
(Mipela i tanim ol tok bilong dispela pas long tok Pisin.)