Yu Save Long Safan na Famili Bilong Em?

TAIM yu ritim Baibel, yu bin lukim sampela tok i stori long Safan na famili bilong em, em dispela lain i gat namba na nem? Ol i husat? Ol i mekim wanem? Pasin bilong ol inap skulim yumi long wanem samting?

Namba wan taim Baibel i toktok long “Safan, . . . pikinini man bilong Asalia na tumbuna pikinini bilong Mesulam,” em long stori i toktok long Josaia i stretim bek lotu i tru long 642 B.C.E. (2 King 22:⁠3) Insait long 36 yia bihain, inap long taim Jerusalem i kisim bagarap long 607 B.C.E., Baibel i stori long 4-pela pikinini man bilong em, Ahikam, Elesa, Gemaria, na Jasania, na tupela tumbuna pikinini man bilong em, Mikaia na Gedalia. (Lukim blok.) Buk Encyclopaedia Judaica i tok: “Famili bilong Safan ol i holim bikpela wok [long kingdom bilong Juda] na ol i stap kuskus bilong king, kirap long taim bilong Josaia i go inap long taim ol Juda i go kalabus long Babilon.” Ol tok Baibel i kamapim bilong Safan na famili bilong em bai helpim yumi long save long ol samting ol i mekim bilong helpim profet Jeremaia na lotu tru bilong Jehova.

Safan i Helpim Lotu i Tru

Long 642 B.C.E., taim King Josaia i gat 25 krismas, Safan i stap kuskus bilong king. (Jeremaia 36:10) Em i mekim wanem kain wok? Buk Encyclopaedia Judaica i tok, kuskus bilong king i save givim gutpela tingting long king, na lukautim ol samting bilong mani, na save gut long ol samting bilong politik, gavman, lo, na bisnis. Olsem na Safan, olsem kuskus bilong king, em i gat bikpela namba tru insait long kingdom bilong Juda.

Tenpela yia paslain, yangpela Josaia i bin “stat long lotu long God bilong tumbuna bilong en, King Devit.” Krismas bilong Safan i winim tru krismas bilong Josaia, olsem na em inap tru long givim gutpela tingting long Josaia long ol samting bilong spirit na sapotim em long namba wan taim em i mekim wok bilong stretim bek lotu i tru.a​​—⁠2 Stori 34:​1-8.

Taim ol i mekim wok bilong stretim bek tempel, ol i painim “buk i gat tok bilong lo bilong Bikpela,” na Safan “i opim buk na i ritim tok long king.” Josaia i kirap nogut taim em i harim ol tok bilong en na em i salim sampela man em i bilip tru long ol i go long profet meri Hulda bilong askim Jehova long ol samting buk i toktok long en. King i soim olsem em i bilip tru long Safan wantaim pikinini bilong em Ahikam taim em i salim tupela i go wantaim dispela lain.​​—⁠2 King 22:​8-​14; 2 Stori 34:​14-​22.

Baibel i stori long dispela samting tasol em Safan yet i mekim. Ol narapela ves i stori long Safan ol i toktok long em olsem wanpela papa na wanpela tumbuna na em tasol. Ol pikinini bilong Safan i bin helpim profet Jeremaia.

Ahikam na Gedalia

Olsem yumi stori pinis, namba wan taim Baibel i toktok long Ahikam, pikinini man bilong Safan, em long dispela taim king i salim sampela man i go lukim profet meri, Hulda. Wanpela buk i tok: “Maski Baibel Hibru i no kamapim biknem bilong Ahikam, ol samting i kamapim klia olsem em i holim bikpela namba.”

Inap 15 yia bihain long dispela, bagarap i laik painim Jeremaia. Taim em i tokim ol man olsem Jehova bai bagarapim Jerusalem, “ol pris na ol profet na olgeta manmeri . . . i holimpas em na i tok, ‘Yu mas i dai.’ ” Orait wanem samting i kamap? Baibel i tok: “Taim ol manmeri i laik kilim Jeremaia i dai, Ahikam, pikinini man bilong Safan, i helpim Jeremaia na ol i no mekim nogut long em.” (Jeremaia 26:​1-​24) Dispela i kamapim wanem samting? Buk The Anchor Bible Dictionary i tok: “Dispela samting i kamapim klia olsem Ahikam i gat namba na strong, na tu, i kamapim klia olsem em i laik helpim Jeremaia, olsem ol narapela long famili bilong Safan i bin mekim.”

Inap olsem 20 yia bihain long dispela, taim ol Babilon i bagarapim Jerusalem long 607 B.C.E. na kisim planti manmeri i go kalabus long Babilon, ol i makim Gedalia, em pikinini bilong Ahikam na tumbuna pikinini bilong Safan, long kamap gavena na bosim ol Juda i stap yet long ples. Olsem wanem? Em i lukautim gut Jeremaia olsem ol narapela long famili bilong Safan i bin mekim? Baibel i tok: “Jeremaia i go long Gedalia long taun Mispa. Na Jeremaia i stap wantaim em.” Insait long sampela mun tasol, ol i kilim i dai Gedalia, na ol Juda i stap yet ol i kisim Jeremaia na bringim em i go wantaim ol long Isip.​​—⁠Jeremaia 40:​5-7; 41:​1, 2; 43:​4-7.

Gemaria na Mikaia

Pikinini man bilong Safan, Gemaria, na tumbuna pikinini bilong em, Mikaia, ol i bin mekim bikpela wok insait long ol samting Jeremaia sapta 36 i stori long en. Em yia 624 B.C.E., long namba 5 yia bilong King Jehoiakim. Baruk, kuskus bilong Jeremaia, i stap long haus bilong Jehova, long “rum bilong Gemaria, pikinini bilong Safan,” na i ritim ol tok bilong Jeremaia i stap long buk. Olsem na “Mikaia, pikinini man bilong Gemaria, na tumbuna pikinini bilong Safan, em i . . . harim Baruk i ritim tok bilong Bikpela long dispela buk.”​​—⁠Jeremaia 36:​9-​11.

Mikaia i toksave long papa bilong em na ol narapela ofisa long dispela buk, na olgeta i laik harim ol tok bilong en. Taim ol i harim pinis, ol i mekim wanem? “Ol i harim olgeta tok bilong dispela buk na ol i pret na kirap nogut na ol i lukluk long ol yet. Na ol i tokim Baruk olsem, ‘Tru tumas, mipela i mas i go tokim king long ol dispela samting.’ ” Tasol pastaim ol i tokim Baruk: “Yu go na kisim Jeremaia na yutupela go hait, nogut . . . wanpela man i save long ples yutupela i hait long en.”​​—⁠Jeremaia 36:​12-​19.

King i sakim ol tok i stap long dispela buk, olsem ol i bin ting em bai mekim, na em i kukim olgeta hap bilong en long paia. Sampela ofisa, na pikinini bilong Safan, em Gemaria, i “strong long king i no ken kukim buk, tasol king i no harim tok bilong ol.” (Jeremaia 36:​21-​25) Buk Jeremaia​​—⁠An Archaeological Companion i tok: “Gemaria i givim bel tru long helpim Jeremaia long haus bilong King Jehoiakim.”

Elesa na Jasania

Long 617 B.C.E., ol Babilon i kirap bosim kingdom bilong Juda. Ol i kisim planti tausen Juda, em “olgeta ofisa na strongpela soldia bilong ami . . . [na] olgeta man i gat save long wokim ol kain kain samting na ol man i gat save long wokim ol samting long ain,” na profet Esekiel tu, na bringim ol i go long kalabus long Babilon. Matania, em ol Babilon i senisim nem bilong em na kolim em Sedekaia, em i kamap nupela king aninit long king bilong Babilon. (2 King 24:​12-​17) Bihain Sedekaia i salim Elesa, pikinini bilong Safan, wantaim Gemaria, i go long Babilon. Jeremaia i givim wanpela pas long Elesa i gat wanpela bikpela tok bilong Jehova long en, bai em i ken karim i go long ol Juda i stap kalabus long Babilon.​​—⁠Jeremaia 29:​1-3.

Olsem na ol tok Baibel i mekim long Safan, na tripela pikinini man bilong em, na tupela tumbuna pikinini bilong em, i kamapim olsem ol i mekim wok long namba na nem bilong ol long helpim lotu i tru na profet Jeremaia. Olsem wanem long pikinini man bilong Safan, em Jasania? Em i no olsem ol narapela long famili bilong Safan, nogat; em i save lotuim ol god giaman. Long namba 6 yia bilong Esekiel i stap kalabus long Babilon, olsem 612 B.C.E., dispela profet i kisim wanpela driman na long driman em i lukim 70 man i kukim paura i gat gutpela smel na lotu long ol god giaman long tempel long Jerusalem. Namel long ol em Jasania, na Baibel i kolim nem bilong em wanpela tasol. Dispela inap makim olsem em i go pas long ol narapela insait long dispela lain. (Esekiel 8:​1, 9-​12) Pasin bilong Jasania i soim olsem maski man i go bikpela insait long wanpela famili i lotuim Jehova, dispela yet i no inap mekim na man i kamap wanpela man i lotu tru long Jehova. Olgeta wan wan i gat wok long skelim wanem rot em yet i laik bihainim.​​—⁠2 Korin 5:​10.

Safan na Famili Bilong Em

Long taim Safan na famili bilong em i insait long ol samting i kamap long Jerusalem, planti man long Juda i save mekim bikpela wok long ol hap ston samting ol i bin katim nem bilong man long en na i olsem mak bilong em. Ol i save mekim wok long ol dispela mak taim ol i mas putim mak long pepa kontrak samting. Ol i wokim ol dispela mak long ol gutpela ston, ain, tit bilong elefan, o glas. Long ol dispela mak ol i save katim nem bilong man, na nem bilong papa bilong em, na sampela taim biknem tu bilong em.

Ol i painim pinis planti mak Hibru, em ol i bin putim long graun malumalum na bihain em i go strong olsem ston samting. Profesa Nahman Avigad, em wanpela saveman bilong ol rait Hibru long bipo, i tok: “Ol rait Hibru ol i bin katim long ston long bipo i no gat nem bilong sampela man em Baibel i kolim​—⁠ol dispela mak tasol ol i gat nem bilong sampela.” Olsem wanem? Ol i bin painim sampela mak i gat nem bilong Safan o bilong sampela long famili bilong em? Yes, i gat. Nem bilong Safan na pikinini man bilong em Gemaria i stap long dispela mak em piksa bilong en i stap long pes 19 na 21.

Ol saveman i tok tu olsem i gat sampela mak, olsem ol i bin putim long graun malumalum, i gat nem bilong 4-pela moa bilong dispela famili​—⁠em Asalia, papa bilong Safan; Ahikam, pikinini man bilong Safan; Gemaria, pikinini man bilong Safan; na Gedalia, na mak i kamapim tu biknem bilong Gedalia olsem “hetman bilong wanpela lain.” Ol i ting namba 4 bilong ol dispela mak i bilong Gedalia, tumbuna pikinini bilong Safan, tasol mak i no kolim nem bilong papa bilong em, Ahikam. Biknem bilong Gedalia long dispela mak i makim olsem em i holim bikpela namba tru long gavman.

Ol Inap Skulim Yumi Long Wanem Samting?

Safan na famili bilong em ol i stap gutpela piksa tru long pasin bilong mekim wok long namba na nem bilong ol long helpim lotu i tru na gutpela man Jeremaia! Yumi tu i ken mekim wok long namba na mani samting bilong yumi long helpim oganaisesen bilong Jehova na ol wanbilip bilong yumi.

Bilong helpim tru yumi na strongim bilip, oltaim yumi mas ritim Baibel, tasol i gutpela tu sapos yumi skelim gut ol tok bilong en na save long ol witnes bilong Jehova long bipo, olsem Safan na famili bilong em. Ol tu i bilong “ol dispela manmeri bilong bipo ol i . . . raunim yumi i stap olsem bikpela klaut,” em ol i stap olsem gutpela piksa yumi ken bihainim.​​—⁠Hibru 12:⁠1.

[Futnot]

[Blok long pes 22]

Hulda​​—⁠Wanpela Profet Meri i Gat Nem

Taim King Josaia i harim Safan i ritim “buk i gat tok bilong lo” ol i bin painim long tempel, em i tokim Safan na 4-pela ofisa moa i gat bikpela namba, long go “askim” Jehova long ol tok bilong dispela buk. (2 King 22:​8-​20) Dispela lain i ken go lukim husat bilong kisim bekim bilong askim bilong king? Jeremaia, na ating Nahum na Sefanaia tu, em ol i profet na man bilong raitim Baibel, ol i sindaun long Juda long dispela taim. Tasol dispela lain i go lukim profet meri Hulda.

Buk Jerusalem​​—⁠An Archaeological Biography i tok: “Taim dispela stori i toktok long ol man i go lukim wanpela meri, em i no kamapim olsem samting ol i mekim em i narapela kain pasin, nogat. I no gat wanpela i ting olsem i no stret long ol man i ken kisim Buk bilong Lo i go long wanpela meri bambai meri i ken skelim. Taim meri i tokaut olsem em tok bilong Bikpela, i no gat wanpela i gat tok long dispela. Planti saveman i no tingim dispela stori taim ol i skelim wok ol meri long Israel long bipo ol i save mekim.” Tasol tok ol dispela man i kisim i no bilong dispela meri yet, nogat, em i kam long Jehova tasol.

[Sat/Piksa long pes 21]

(Bilong save ol dispela rait i stap we long pes, lukim buk o magasin)

Famili Bilong Safan

Mesulam

↓

Asalia

↓

Safan

↓ ↓ ↓ ↓

Ahikam Elesa Gemaria Jasania

↓ ↓

Gedalia Mikaia

[Piksa long pes 20]

Gemaria na sampela moa ol i strong long Jehoiakim i no ken kukim buk i gat ol tok bilong Jeremaia long en

[Piksa long pes 22]

Long wanpela driman, Esekiel i lukim Jasania, em wanpela long famili bilong Safan, i lotu long ol god giaman

[Piksa Kredit Lain long pes 19]

Courtesy Israel Antiquities Authority

[Piksa Kredit Lain long pes 21]

Courtesy Israel Antiquities Authority