“Yupela i Mas i Go Klostu Tru Long God, na Em Bai i Kam Klostu Tru Long Yupela”
Paslain na Bihain—Laip Bilong Em i Senis Olgeta
SORI TRU! I stap bilong Matsepang i no gat as bilong en, na em i no amamas liklik! Em wanpela yangpela meri long Lesoto, wanpela kantri i stap long Saut Afrika. Matsepang i kamap bikpela long lotu Katolik. Tasol lotu i no helpim em long go klostu long God. Inap planti yia ol sister Katolik i mekim nogut long em na ol i givim em grismani bilong pulim em long insait long pasin sem samting.
Dispela i mekim na Matsepang i no amamas long lotu na em i no inap tru long bilip olsem Man bilong wokim yumi em i gat pasin sori na em i save tingim tru ol man em i wokim. Ol i no lukautim em na ol i mekim nogut long em, olsem na bel bilong Matsepang i bagarap tru, na em i pilim olsem em i nogut olgeta. Em i go bikpela na i kamap olsem meri bilong kros pait, na bihain em i kirap mekim pasin raskol.
Bihain Matsepang i go insait long wanpela lain raskol i save stilim ol samting bilong ol lain i kalap long tren. Polis i holim em na em i go kalabus long Saut Afrika. Bihain ol i salim em i go long as ples bilong em long Lesoto, na long dispela hap em i mekim yet pasin stil, dring longlong, pait, na pamuk.
Taim em i bel hevi nogut tru, em i beten long God long helpim em. Em i tok promis olsem: “God, sapos yu larim mi i stap laip, bai mi mekim ol samting mi inap mekim bilong lotuim yu.”
I no longtaim na ol misineri bilong ol Witnes Bilong Jehova i bungim Matsepang na ol i toktok wantaim em. Ol i tokim em olsem ol i laik stadi wantaim em long Baibel. Taim em i stadi, em i kisim save olsem God em i Man bilong tingim tru ol man. Na tu, em i kisim save olsem Satan, em “papa tru bilong pasin bilong tok giaman,” em i mekim kain kain trik na giaman pasin long ol man na bai ol i pilim olsem ol i nogut tasol na Jehova i no inap laikim ol.—Jon 8:44; Efesus 6:11.
Bel bilong Matsepang i stap isi taim em i kisim save olsem yumi ken amamas long yumi yet sapos yumi tanim bel long ol pasin nogut yumi mekim bipo, na askim God long lusim rong bilong yumi, na strong long mekim ol samting Jehova i laikim! Ol misineri Witnes i bin helpim Matsepang long save gut olsem “sori bilong God i bikpela tru, winim bel bilong yumi” na tingting bilong em long yumi i narapela kain long tingting yumi gat long yumi yet.—1 Jon 3:19, 20, NW.
Matsepang i amamas tru long ritim tok bilong Devit, em man bilong raitim song, em i tok: “God i save stap klostu long ol manmeri i gat hevi. Na em i save helpim ol manmeri bilip [“bel,” NW] bilong ol i bagarap.” (Song 34:18) ‘Bel bilong em i bagarap,’ na em i kisim save olsem Jehova i no save givim baksait long ol wokboi bilong em, maski bel bilong sampela i bagarap o ol i pilim olsem ol i samting nating. Bel bilong Matsepang i amamas long kisim save olsem God i save tingim olgeta sipsip bilong em na em i strongim ol long taim ol i gat hevi. (Song 55:22; 1 Pita 5:6, 7) Na em i pilim moa yet dispela tok: “Yupela i mas i go klostu tru long God, na em bai i kam klostu tru long yupela.”—Jems 4:8.
Strong bilong Tok Bilong God, em Baibel, i kamap ples klia long laip bilong Matsepang. Em i kirap long go oltaim long ol miting Kristen na lusim ol pasin nogut em Baibel i no orait long en. Wanem samting i kamap long dispela rot? Em i no moa pilim olsem God i no laikim em. Kirap long taim em i kisim baptais olsem wanpela Witnes Bilong Jehova, em i lusim planti tausen aua long mekim wok Kristen olsem man bilong autim gutnius bilong Kingdom. Maski em i bel hevi yet long ol samting i bin painim em bipo, i stap bilong Matsepang long nau i gat as bilong en na em i stap amamas. Man! Samting i painim Matsepang i kamapim ples klia strong bilong tok bilong Baibel long helpim man long i stap gutpela!—Hibru 4:12.
[Rait long pes 9]
“God, sapos yu larim mi i stap laip, bai mi mekim ol samting mi inap mekim bilong lotuim yu”
[Blok long pes 9]
Ol Stiatok i Mekim Wok
Em hia sampela stiatok bilong Baibel i helpim ol man em ol narapela i bin mekim nogut long ol:
“Taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.” (Song 94:19) Ol tok bilong Jehova long Baibel bilong ‘mekim bel i stap isi’ inap mekim gut tru bel bilong yumi. Pasin bilong tingim tingim ol dispela tok na beten i helpim yumi long daunim ol tingting nogut na i strongim bilip bilong yumi long God olsem em i wanpela Pren i save tingim gut yumi.
“Em [Jehova] i save mekim orait ol manmeri, hevi i bagarapim tingting bilong ol na ol i pilim nogut. Na em i pasim ol sua bilong ol.” (Song 147:3) Sapos yumi pilim tru marimari bilong Jehova na ol samting em i mekim bilong karamapim ol sin bilong yumi long rot bilong ofa bilong Jisas, yumi inap go klostu long God na yumi no inap pilim olsem yumi nogut tasol. Dispela inap mekim bel na tingting bilong yumi i stap isi.
“I no gat wanpela man inap i kam long mi [ Jisas Krais] long laik bilong em yet. Nogat. Papa i mas kirapim tingting bilong en na bringim em i kam long mi. Na long las de bai mi kirapim em long matmat.” (Jon 6:44) Long rot bilong spirit holi na autim tok, Jehova i bringim yumi i go klostu long Pikinini Man bilong em na yumi inap wet long kisim laip i stap oltaim.