Rot Sampela i Kisim Bekim Long En
PLANTI milion manmeri i save prea. Sampela i bilip tru olsem God i save harim prea bilong ol. Sampela i gat tupela tingting, God i harim prea bilong ol o nogat. Sampela i laik painim bekim bilong ol askim bilong ol, tasol ol i no bin tingting long beten askim God long dispela.
Baibel i tok God tru i “save harim beten” bilong yumi. (Song 65:2) Sapos yu save prea, yu save prea long God tru? Ol prea yu mekim em ol kain prea God i save harim o nogat?
Long olgeta hap bilong graun planti man i save tok yes bilong bekim dispela tupela askim. Olsem wanem ol i save God i bin harim prea bilong ol? Ol i bin kisim wanem save?
God—Em i Husat?
Sampela sister na pris i bin skulim wanpela tisa long Potugal husat i bin givim bel long mekim lotu. Tisa i paul taim misin i senisim na lusim sampela pasin bilong lotu, em ol pasin ol i bin lainim dispela tisa olsem em ol bikpela samting. Em i raun long ol narapela kantri na em i kisim save long pasin bilong ol man bilong Esia long lotu, na dispela i kirapim em long ting, i gat wanpela trupela God o nogat. Em i mas mekim lotu olsem wanem? Taim em i givim askim long pris long ol samting bilong Baibel, pris i no bekim, na dispela i mekim na em i bel hevi.
Long dispela siti tisa i stap long en, Misin Katolik i bin givim ol man wanpela pepa i tokim ol long ol i no ken toktok wantaim ol Witnes Bilong Jehova. Tasol ol askim bilong tisa i stap yet. Wanpela de taim ol Witnes i kam long haus bilong em, em i putim yau na em i laikim ol tok em i harim. Em i namba wan taim em i bin toktok wantaim ol.
Bilong kisim bekim bilong ol askim bilong em, dispela meri i kirap stadi long Baibel wantaim ol Witnes. Long olgeta wik em i redim wanpela longpela lista i gat ol askim bilong em. Em i laik save long nem bilong God, i gat wanpela trupela God tasol o nogat, em i orait long man i yusim ol imis bilong lotuim em, na planti askim moa. Em i luksave olsem olgeta bekim i kam long Baibel, i no tingting bilong wanpela man, olsem na em i kirap nogut long dispela na em i amamas long ol save em i wok long kisim. Isi isi em i kisim bekim bilong olgeta askim bilong em. Long nau, em i save lotu long Jehova long spirit na pasin i tru, olsem Jisas Krais i bin tok “olgeta man i laik lotu tru” ol bai mekim.—Jon 4:23.
Long Sri Lanka, wanpela famili i save ritim Baibel wantaim long olgeta taim, tasol ol i no kisim bekim bilong planti askim i bikpela samting long ol. Ol i laik kisim helpim, tasol pris bilong ol i no inap helpim ol. Tasol ol Witnes Bilong Jehova i bin kam lukim ol na lusim sampela buk samting Baibel i as bilong en na dispela i bin helpim ol. Bihain, taim ol Witnes Bilong Jehova i givim ol gutpela bekim long ol askim bilong ol long Baibel, ol i tok orait long kirap stadi long Baibel. Ol i laikim tru ol samting ol i lainim.
Tasol ol samting misin i bin lainim mama bilong famili taim em i liklik pikinini, dispela i mekim na em i hatwok tru long kisim save olsem Papa bilong Jisas Krais em ‘wanpela tasol em God tru,’ olsem Jisas yet i bin tok. (Jon 17:1, 3) Misin i bin lainim em olsem Jisas em i wankain stret olsem Papa na i no stret long givim askim long dispela “tok hait” bilong lotu. Em i bel hevi na em i laik tru long save long tok i tru, olsem na em i prea long Jehova, na kolim nem bilong em, na em i askim Jehova long soim em Jisas em i husat. Orait, nau em i skelim gut gen ol skripsa i stori gut long dispela samting. (Jon 14:28; 17:21; 1 Korin 8:5, 6) Taim em i mekim olsem i olsem ai bilong em i op tru na em i save gut tru olsem Jehova—Man bilong wokim heven na graun na Papa bilong Jisas Krais—em i God tru.—Aisaia 42:8; Jeremaia 10:10-12.
Pen na Hevi—Bilong Wanem?
Jop i bin kisim bikpela pen na hevi tru. Wanpela bikpela win i bin kilim i dai olgeta pikinini bilong em, na em i kamap rabisman. Em i kisim tu wanpela sik i givim bikpela pen long em na ol pren giaman i givim hevi long em. Taim ol dispela samting i wok long painim Jop, em i no tingting gut na em i mekim sampela tok i no stret. (Jop 6:3) Tasol God i tingim ol samting i bin painim Jop. (Jop 35:15) Em i save long bel bilong Jop na em i givim tok kaunsel i stret long Jop. Em i save mekim wankain pasin long ol man long nau tu.
Long Mosambik, Castro i gat 10-pela krismas taim mama bilong em i dai. Bel bilong em i bagarap stret. Em i tok: “Bilong wanem mama i mas i dai na lusim mipela?” Maski papamama i bin stap aninit long God na mekim bikpela long em, em i paul long ol samting i painim em. Wanem samting inap mekim gut tingting na bel bilong em? Taim em i ritim Baibel long tok ples Sisawa na toktok wantaim ol bikbrata bilong em long samting em i ritim, dispela i mekim gut bel bilong em.
Isi isi, Castro i kisim save olsem i no asua bilong God na mama i dai, nogat, em i dai, long wanem, em i kisim sin long Adam. (Rom 5:12; 6:23) Tok promis bilong Baibel long kirap bek i mekim gut bel bilong em, long wanem, dispela i strongim bilip bilong em olsem em bai lukim gen mama bilong em. (Jon 5:28, 29; Aposel 24:15) Tasol sori tumas, 4-pela yia bihain papa bilong em i dai. Tasol long dispela taim Castro i redi moa long karim dispela hevi. Long nau, em i laikim tumas Jehova na em i yusim laip bilong em long mekim wok bilong God. Olgeta man i save long Castro inap lukim amamas em i bin painim.
Ol tok i tru bilong Baibel i bin mekim gut bel bilong Castro i bin mekim gut bel bilong planti manmeri em wanpela pren o wanblut bilong ol i bin dai. Sampela man husat i bin painim taim nogut long han bilong ol man nogut i gat wankain askim olsem Jop: “Bilong wanem God i save larim ol man bilong mekim pasin nogut na ol i stap gut na kamap lapun?” (Jop 21:7) Taim ol man i bihainim ol tok God i mekim long Baibel bilong bekim dispela askim, ol i kisim save olsem pasin bilong God long stretim ol samting i save helpim ol gut tru.—2 Pita 3:9.
Barbara, em i go bikpela long Amerika, na em yet i no lukim ol samting nogut woa i save kamapim. Tasol em i go bikpela taim planti kantri i wok long pait wantaim. Long olgeta wan wan de i gat ol ripot bilong ol samting nogut i kamap long ol woa. Taim em i stadi long skul long ol samting i bin kamap long bipo, em i save paul na tingting planti, long wanem, i luk olsem ol man i no inap luksave pastaim long olsem wanem ol dispela samting bai kamap. Wanem samting i mekim na i olsem? God i bin tingim ol dispela samting taim ol i wok long kamap? Barbara i bilip olsem God i stap, tasol em i gat tupela tingting long em.
Tasol taim Barbara i poroman wantaim ol Witnes Bilong Jehova, isi isi tingting bilong em i senis. Em i putim yau long tok bilong ol na em i stadi long Baibel wantaim ol. Em i go long ol miting long Haus Kingdom. Na em i bin go long wanpela bikpela kibung bilong ol. Na tu, taim em i kamapim ol askim, em i luksave olsem em i no kisim narapela narapela tingting long ol narapela narapela Witnes. Nogat. Olgeta Witnes i bekim wankain tok, long wanem, ol i kisim tingting bilong ol long Baibel.
Ol Witnes i soim em long Baibel olsem ol man bilong dispela graun i stap aninit long strong bilong Satan, em bos bilong dispela graun, na ol man i bihainim tingting bilong em. (Jon 14:30; 2 Korin 4:4; Efesus 2:1-3; 1 Jon 5:19) Ol i tok ol samting i bin kamap em Barbara i paul long en, Baibel i bin tok profet long en. (Daniel, sapta 2, 7 na 8) God i bin tok profet long ol dispela samting, long wanem, em inap save long ol samting bai kamap bihain, taim em i gat laik long mekim olsem. Sampela bilong ol dispela samting, God yet i bin kamapim. Sampela em i larim i kamap tasol. Ol Witnes i soim Barbara olsem Baibel i tok profet long ol gutpela samting na ol samting nogut i wok long kamap long taim bilong yumi, na Baibel i kamapim mining bilong ol dispela samting. (Matyu 24:3-14) Ol i soim em ol tok promis Baibel i mekim long nupela graun i gat stretpela pasin i stap long en na ol pen na hevi bai i no stap moa.—2 Pita 3:13; KTH 21:3, 4.
Isi isi, Barbara i kisim save olsem God Jehova i no as bilong ol pen na hevi, tasol em i no pasim ol dispela pen na hevi long kamap long rot bilong fosim ol man long bihainim ol lo bilong em taim ol i no laik mekim olsem. (Lo 30:19, 20) God i stretim rot na bai yumi inap i stap amamas oltaim, tasol em i larim yumi long kamapim long ples klia olsem yumi laik bihainim ol stretpela lo bilong em o nogat. (KTH 14:6, 7) Barbara i pasim tok long bel olsem em i laik lainim ol stretpela lo bilong God na bihainim. Na tu, namel long ol Witnes Bilong Jehova em i painim dispela kain pasin bilong laikim tru narapela, em Jisas i bin tok em i mak bilong ol disaipel tru bilong em.—Jon 13:34, 35.
Ol samting i bin helpim em inap helpim yu tu.
Laip i Gat As Bilong En
Long ai bilong yumi i luk olsem i stap bilong sampela man i gutpela, tasol ol tu inap i gat sampela askim ol i tingting planti long ol. Olsem: Wanpela yangpela man long Inglan, Matthew, oltaim em i bin i gat laik tru long painim trupela God na as bilong i stap bilong man. Papa bilong em i bin dai taim Matthew i gat 17 krismas. Bihain, Matthew i kisim yunivesiti digri long musik. Na em i kirap pilim olsem pasin bilong givim bel long kisim mani kago samting i no gat as bilong en. Em i lusim ples na i go sindaun long London. Long dispela hap em i kirap kisim ol drak, raun long ol klap, wok long lukluk long ol sta bilong painim save, insait long ol samting bilong ol spirit nogut, insait long lotu ol i kolim Sen Buda na ol narapela kain tingting bilong ol man. Em i mekim olsem bilong painim sindaun i gutpela tru na i gat as bilong en. Em i bel hevi na em i singaut long God i ken helpim em long painim tok i tru.
Tupela de bihain em i bungim wanpela pren bilong bipo na em i stori long hevi bilong em. Dispela pren i bin stadi wantaim ol Witnes Bilong Jehova. Taim pren i soim em 2 Timoti 3:1-5, Matthew i kirap nogut olsem Baibel i kolim stret ol samting i wok long kamap long nau. Taim em i ritim tok Jisas i bin mekim antap long maunten, em i pilim tru dispela tok long bel bilong em. (Matyu, sapta 5-7) Pastaim em i no laik toktok wantaim ol Witnes, long wanem, em i bin ritim wanpela stori i bin tok bilas long ol, tasol bihain em i kirap go long ol miting long wanpela Haus Kingdom i stap klostu.
Matthew i amamas long ol tok em i harim na em i kirap stadi long Baibel wantaim wanpela elda bilong kongrigesen. Kwiktaim em i kisim save olsem ol samting em i lainim i olsem bekim bilong beten em i bin mekim long God long pastaim. Ol gutpela samting i painim em taim em i wok long lusim ol pasin Jehova i no laikim. Taim em i wok long kisim pasin bilong pret long God, dispela i kirapim em long bihainim ol lo bilong God long laip bilong em. Matthew i kisim save olsem kain laip olsem i gat as tru bilong en.—Saveman 12:13.
I no olsem God i makim pinis olsem Matthew na ol narapela yumi bin stori long ol bai painim gutpela sindaun ol i amamas long en, nogat. Tasol ol i bin kisim save olsem God Jehova i tingting pinis long mekim ol samting bilong helpim ol man husat i amamas long bihainim ol lo bilong em. (Aposel 10:34, 35) Em i tingting pinis long givim laip oltaim long ol man na ol bai stap long graun i no gat woa, bikpela sik na hangre, na indai. (Aisaia 2:4; 25:6-8; 33:24; Jon 3:16) Yu gat laik long kisim kain sindaun olsem? Sapos olsem, orait long rot bilong ol miting em Baibel i as bilong en na i kamap long Haus Kingdom, yu inap kisim save moa long olsem wanem yu inap kisim laip i gat as bilong en. Mipela i laik singautim yu long mekim olsem.
[Piksa long pes 7]
Prea strong long God, na yusim nem tru bilong em
[Piksa long pes 7]
Stadi long Baibel wantaim ol lain husat tru tru i lainim man long ol tok i stap long en
[Ol Piksa long pes 7]
Go long ol miting long Haus Kingdom
[Piksa Kredit Lain long pes 4]
Hiker: Chad Ehlers/Index Stock Photography