Yu Laik Givim Wanem Askim Long God?

OL PIPEL long olgeta hap i gat ol bikpela askim long ol samting bilong laip bilong ol. Olsem wanem long yu? Planti ol i bin kamapim askim bilong ol long ol tisa bilong lotu, tasol ol i no amamas long bekim ol i kisim. Sampela ol i stap ol yet tasol na wok long tingting long ol dispela askim. Sampela ol i bin prea long kisim helpim bilong stiaim ol. Olsem wanem? Yu inap kisim bekim long God long ol samting yu tingting planti long en? Daunbilo yumi lukim sampela askim planti man i laik givim long God.

God, yu husat tru?

Pasin bilong ples, lotu bilong papamama, na tingting na laik bilong man yet i save bosim tingting ol man i holim long God. Sampela i save kolim wanpela nem stret taim ol i toktok long God; sampela i tok God tasol. Dispela em i bikpela samting o nogat? I gat wanpela trupela God tasol husat i kamapim em yet na nem bilong em long yumi?

Bilong wanem i gat planti pen na hevi?

Sapos man i save mekim nabaut na em i no save was gut o em i pamuk nabaut na dispela i mekim na helt bilong em i bagarap o em i stap rabis, ating em inap toktok planti long dispela. Tasol ating em i save pinis long as na ol dispela pen na hevi i painim em.

Tasol planti manmeri i kisim bikpela pen na hevi, maski ol i no bin mekim wanpela samting i save kamapim kain hevi olsem. Sampela i gat sik i save stap oltaim. Sampela i hatwok tru long lukautim famili bilong ol long haus na kaikai. Planti milion i kisim taim nogut long rot bilong ol raskol, woa, pasin pait na bagarapim man, ol bagarap olsem bikpela win o guria, o ol man i gat namba i mekim nogut long ol.

Olsem na yumi save long as na planti man i gat askim olsem: ‘Bilong wanem ol dispela kain pasin i wok long kamap long olgeta hap? Bilong wanem God i larim ol dispela pen na hevi i stap?’

I gat wanem as na mi stap? Mi stap bilong mekim wanem?

Ol dispela kain askim i save kamap taim man i pilim olsem em i no kisim amamas tru long ol samting em i save mekim long ol wan wan de​—⁠na planti man i pilim olsem. Planti milion man i bilip olsem God i makim pinis olgeta samting i mas painim olgeta wan wan man. Olsem wanem? Dispela tingting em i tru? Sapos tru tru God i makim gutpela samting long yu mas mekim, ating yu gat laik long save long dispela, a?

I gat planti buk i stap, tasol i gat wanpela i tokaut klia olsem spirit bilong God i bin kamapim ol tok bilong en. Dispela buk i olsem wanpela pas God i salim long olgeta man, olsem na i stret ol i bin tanim dispela buk long planti tok ples, winim olgeta narapela buk. Dispela buk em Baibel. Insait long dispela buk, Man bilong wokim heven na graun, em God yet, i kamapim klia em i husat na wanem nem bilong em. Olsem wanem? Yu save long dispela nem? Yu save Baibel i tok God em i wanem kain Man? Yu save Baibel i tok wanem long ol samting God i laik bai yu mas mekim?

[Piksa Kredit Lain long pes 2]

COVER: Chad Ehlers/Index Stock Photography

[Piksa Kredit Lain long pes 3]

Mountain: Chad Ehlers/Index Stock Photography