Wok Long Tingim Ol Man Olsem Jehova i Save Tingim Ol

“[God i] no save skelim ol man olsem ol man i save skelim.”​​—⁠1 SAMUEL 16:⁠7.

1, 2. Tingting bilong Jehova long Eliap i narapela kain long tingting bilong Samuel olsem wanem? Dispela i lainim yumi long wanem samting?

KLOSTU long yia 1100 B.C.E., Jehova i salim profet Samuel i go mekim wanpela wok i stap hait. Em i tokim Samuel long go long haus bilong wanpela man, nem bilong em Jesi, na makim wanpela pikinini bilong em long kamap king bilong Israel. Taim Samuel i lukim namba wan pikinini bilong Jesi, em Eliap, em i ting em i painim pinis dispela man God i bin makim. Tasol Jehova i tok: “Yu no ken ting long em i longpela bun o long em i luk naispela na bai mi makim em. Nogat. Mi no laik bai dispela man i kamap king. Long wanem, mi no save skelim ol man olsem ol man i save skelim. Nogat. Ol man i save lukluk long bodi. Tasol mi save lukim tingting na laik bilong man na mi skelim ol.” (1 Samuel 16:​6, 7) Samuel i no bin lukim Eliap olsem Jehova i lukim em.a

² Em nau, i no hatwok long ol man i popaia taim ol i skelim ol narapela! Ating man nogut i gat naispela skin, dispela inap giamanim yumi. Tasol man i gat gutpela bel, sapos pasin bilong em i skrapim bel bilong yumi, ating yumi no isi long em.

3, 4. (a) Sapos wanpela hevi i kamap namel long tupela Kristen, tupela i mas tingting strong long mekim wanem? (b) Sapos yumi bin tok pait wantaim wanpela wanbilip, yumi ken givim wanem ol askim long yumi yet?

³ Hevi inap kamap taim yumi kirap kwik na skelim ol narapela​—⁠maski inap planti yia pinis yumi bin save long ol. Ating yu bin tok pait wantaim wanpela Kristen em bipo em i gutpela pren bilong yu. Olsem wanem? Yu laik kamap wanbel gen wantaim em? Wanem samting bai helpim yu long mekim olsem?

⁴ Lukim gut ol gutpela tingting na pasin bilong dispela brata o sista Kristen bilong yu. Na taim yu mekim olsem, tingim dispela tok bilong Jisas: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jon 6:​44) Orait nau askim yu yet: ‘I gat wanem as na Jehova i bin bringim dispela man i kam long Pikinini bilong Em? Dispela man i gat wanem ol gutpela pasin? Ating mi no bin tingim o pilim tru ol dispela gutpela pasin bilong em? Olsem wanem na pastaim mitupela i bin kamap gutpela pren? Wanem samting i bin mekim na mi laikim dispela man i stap pren bilong mi?’ Ating pastaim i hatwok long tingim ol gutpela pasin bilong em, na i hatwok moa yet sapos longtaim liklik yu bin bel nogut long em. Tasol dispela em wanpela bikpela samting yu mas mekim sapos yu laik kamap pren gen wantaim em. Bilong kamapim klia olsem wanem yumi ken mekim olsem, yumi ken tingim sampela gutpela pasin bilong tupela man em sampela taim ol man i tingim ol krankipasin tasol bilong ol. Dispela tupela man em profet Jona na aposel Pita.

Tingim Jona

5. Jehova i bin givim wanem wok long Jona? Jona i mekim wanem?

⁵ Jona i bin stap profet long lain Israel long hap not, long taim bilong King Jeroboam Namba 2, pikinini bilong Joas. (2 King 14:​23-​25) Wanpela taim Jehova i tokim Jona long lusim kantri Israel na go long Nineve, em biktaun bilong strongpela Gavman Asiria. Em bai mekim wanem wok? Em i mas toksave long ol lain bilong Nineve olsem bikpela taun bilong ol bai bagarap. (Jona 1:​1, 2) Tasol Jona i ranawe, em i no bihainim tok bilong God! Em i kalap long wanpela sip i laik go long Tarsis, longwe tru long Nineve.​​—⁠Jona 1:⁠3.

6. Bilong wanem Jehova i bin makim Jona olsem man em i laik salim i go long Nineve?

⁶ Taim yu tingim Jona, yu tingim wanem samting? Yu tingim em olsem wanpela profet i bin sakim tok? Sapos yu lukim hariap stori bilong em, ating bai yu gat tingting olsem. Tasol olsem wanem? God i bin makim Jona long mekim wok profet, long wanem, em i man bilong sakim tok? Nogat! Jona i gat sampela gutpela pasin tru. Tingim ol samting em i bin mekim olsem profet.

7. Olsem wanem long kantri Israel taim Jona i mekim wok bilong Jehova long dispela hap? Dispela i mekim wanem long tingting bilong yumi long Jona?

⁷ Jona i bin stap gut long wok bilong autim tok long ol Israel, maski ol man i no putim yau long ol tok em i autim. Profet Amos i bin stap long wankain taim olsem Jona, na em i tok ol Israel bilong dispela taim ol i man bilong laikim tumas mani kago na ol amamas bilong skin.b Kain kain pasin nogut i stap long kantri Israel, tasol ol Israel i no tingim. (Amos 3:​13-​15; 4:4; 6:​ 4-6) Tasol long olgeta de, Jona i stap gut long dispela wok em i bin kisim long autim tok long ol. Sapos yu wanpela man bilong autim gutnius, orait yu save pinis i hatwok tru long toktok wantaim ol man i save pilim olsem ol i no sot long wanpela samting na ol i les long harim tok. Olsem na taim yumi tingim ol pasin kranki bilong Jona, yumi mas tingim tu ol gutpela pasin bilong em​—⁠em i bin stap gut long autim tok long ol Israel i no bilip na em i bin sanap strong na i no les.

8. Wanem samting i gat hatwok tru long en i wetim Jona long Nineve?

⁸ Tasol dispela asainmen bilong i go long Nineve i gat hatwok moa long en. Bilong kamap long dispela biktaun, Jona i mas wokabaut olsem 800 kilomita​—⁠dispela i gat hatwok tru long en na em i mas lusim wanpela mun long mekim olsem. Taim em i kamap pinis, Jona i mas autim tok long ol Asiria, em ol i gat nem olsem wanpela lain i save mekim nogut tru long ol lain ol i daunim long pait​—⁠ol i save givim bikpela pen tru long ol. Ol Asiria i save tok hambak tu long ol pasin nogut ol i mekim. Olsem na ol lain bilong Nineve i gat nem long “kilim ol man i dai”!​​—⁠Nahum 3:​1, 7.

9. Taim biksi i kamap na i laik bagarapim ol boskru, Jona i kamapim wanem ol gutpela pasin?

⁹ Jona i surik long mekim dispela wok Jehova i tokim em long mekim, na em i kalap long wanpela sip i kisim em i go long narapela hap longwe tru long asainmen bilong em. Tasol Jehova i no les long dispela profet o kisim narapela profet olsem senis bilong em, nogat. Jehova i kirap mekim sampela wok bilong helpim Jona long stretim tingting bilong em. God i mekim na biksi i kamap. Sip i karim Jona i seksek nabaut. I luk olsem ol man i no gat asua bai kisim bagarap, long wanem, Jona i bin ranawe long asainmen bilong em! (Jona 1:⁠4) Jona bai mekim wanem? Em i no laik bai ol boskru bilong sip i dai long pasin em yet i bin mekim, olsem na Jona i tokim ol: “Yupela kisim mi na tromoi mi i go long solwara, na bai si i dai.” (Jona 1:​12) Em i no save olsem taim ol boskru i tromoi em i go long solwara, Jehova bai kisim em bek long solwara, nogat. (Jona 1:​15) Tasol Jona i redi long i dai bambai ol boskru i no ken bagarap. Em nau, long dispela pasin Jona i mekim, yumi lukim olsem em i gat strongpela bel, na pasin daun, na pasin sori.

10. Jehova i givim dispela wok gen long Jona, na wanem samting i kamap?

¹⁰ Bihain, Jehova i kisim bek Jona. Tasol em i bin ranawe long wok bilong em, olsem na yu ting dispela inap mekim na em i no ken mekim moa wok bilong God olsem wanpela profet? Nogat. Long gutpela pasin sori na marimari Jehova i tokim Jona gen long go autim tok long ol Nineve. Taim Jona i kamap pinis long Nineve, em i strongim bel na tokim ol Nineve olsem God i lukim planti pasin nogut ol i mekim na bihain long 40 de, biktaun bilong ol bai i bagarap olgeta. (Jona 1:2; 3:⁠4) Taim ol i harim Jona i tokaut klia olsem, ol Nineve i tanim bel, na biktaun bilong ol i no bagarap.

11. Wanem samting i soim olsem Jona i bin lainim wanpela bikpela samting?

¹¹ Tasol Jona i holim yet tingting kranki. Olsem na long rot bilong wanpela samting Jona inap lukim, Jehova i helpim Jona long save olsem Em i no save skelim ol man long ai nating tasol. Em i save lukim bel bilong ol man na skelim ol. (Jona 4:​5-​11) Yumi save Jona i bin lainim wanpela bikpela samting, long wanem, em i raitim stori bilong dispela samting na kolim stret ol samting i bin kamap. Em i no pret long kamapim ol pasin kranki bilong em yet na dispela tu i kamapim klia olsem em i gat pasin daun. Na yumi save man i mas i gat strongpela bel bilong kamapim pasin kranki bilong em yet!

12. (a) Olsem wanem yumi save Jisas i gat wankain tingting long ol man olsem Jehova? (b) Yumi tu mas holimpas wanem tingting long ol man yumi autim gutnius long ol? (Lukim blok long pes 18.)

¹² Planti handet yia bihain, Jisas Krais i mekim wanpela gutpela tok long samting i bin kamap long i stap bilong Jona. Em i tok: “Jona i bin i stap tripela san na tripela nait insait long bel bilong bikpela pis, na olsem tasol Pikinini Bilong Man bai i stap tripela san na tripela nait insait long graun.” (Matyu 12:40) Taim Jona i kirap bek pinis, em bai kisim save olsem Jisas i bin skelim hap taim Em i bin stap long matmat wantaim dispela hap taim Jona i no inap mekim wanpela wok. Yumi amamas tru long mekim wok bilong dispela God i no save les kwik long ol wokboi bilong em long taim ol i mekim sampela pasin kranki, a? Man bilong raitim song i tok: “Papa i save sori long ol pikinini bilong en. Olsem tasol Bikpela i save sori long ol manmeri i pret long em. Em i save olsem em i bin kisim graun na wokim yumi na em i tingim yumi i olsem das tasol.” (Song 103:​13, 14) Tru tumas, dispela “das”​​—⁠ol manmeri i no gutpela olgeta long nau tu​​—⁠ol inap kamapim bikpela wok taim spirit holi bilong God i strongim ol!

Stretpela Tingting Long Pita

13. Wanem sampela pasin bilong Pita yumi tingim? Tasol i gat wanem as na Jisas i makim em long kamap wanpela aposel?

¹³ Orait nau yumi ken tingim aposel Pita. Sapos ol i askim yu long stori long Pita em i wanem kain man, orait olsem wanem? Kwiktaim bai yu tingim em olsem man bilong kirap kwik tumas long mekim ol samting, na man bilong hambak tu? Tru, sampela taim Pita i bin mekim kain pasin olsem. Tasol yu ting Jisas bai makim Pita long kamap wanpela bilong ol 12 aposel bilong em sapos tru tru Pita em man bilong kirap kwik na mekim ol samting na em i no save tingting gut pastaim, o em i gat pasin bilong hambak? (Luk 6:​12-​14) Nogat tru! Jisas i no tingim ol dispela pasin kranki​—⁠em i lukim ol gutpela pasin tasol bilong em.

14. (a) Ating i gat wanem as na i olsem Pita i man bilong tokaut stret na i no pret? (b) Bilong wanem yumi ken tenkyu olsem planti taim Pita i kamapim ol askim?

¹⁴ Sampela taim Pita i stap olsem mausman bilong ol arapela aposel. Ating sampela bai ting olsem dispela i kamapim klia em i no gat pasin daun. Tasol i no olsem, nogat. Sampela i bin tok, Pita i gat bikpela krismas moa long ol narapela aposel​​—⁠na ating bikpela krismas moa long Jisas yet. Sapos olsem, orait ating dispela inap helpim yumi long save long as na planti taim Pita i go pas long mekim tok. (Matyu 16:22) Tasol i gat narapela samting bilong tingim. Pita i save tingim ol samting bilong spirit. Em i gat bikpela laik tru long kisim save, na dispela i bin kirapim em long kamapim ol askim. Ol dispela askim i bin helpim yumi yet. Jisas i bin kamapim planti gutpela tok bilong bekim ol askim bilong Pita, na ol dispela tok i stap yet long Baibel. Olsem: Bilong bekim wanpela askim bilong Pita, Jisas i bin stori long “bosboi i gat gutpela tingting.” (Luk 12:​41-​44) Na tingim dispela askim bilong Pita: “Mipela i bin lusim olgeta samting na bihainim yu. Bai mipela i kisim wanem samting?” Dispela i bin kirapim Jisas long mekim dispela gutpela tok promis: “Olgeta manmeri i bin ting long nem bilong mi na i lusim haus o brata o susa o papa o mama o pikinini o gaden, bai ol i kisim 100 moa, na bai ol i kisim laip i stap gut oltaim oltaim.”​​—⁠Matyu 15:15; 18:​21, 22; 19:​27-​29.

15. Olsem wanem yumi ken tok, Pita i bin stap gut tru long Jisas?

¹⁵ Pita i gat narapela gutpela pasin​​—⁠em i save stap gut long narapela. Taim planti disaipel i lusim Jisas, long wanem, i gat wanpela tok bilong Em ol i no kisim gut, Pita i tokaut na kamapim tingting bilong ol 12-pela aposel. Em i tok: “Bikpela, bai mipela i go long husat? Tok bilong yu tasol i save givim laip i stap gut oltaim oltaim.” (Jon 6:​66-​68) Dispela tok i mekim gut bel bilong Jisas! Bihain, taim wanpela lain i kam holim Jisas, klostu olgeta aposel i ranawe. Tasol Pita i stap longwe liklik na bihainim ol i go na em i go insait long banis bilong haus bilong hetpris. Pasin bilong strongim bel​—⁠pasin bilong pret, nogat​—⁠i bin kirapim em long mekim olsem. Taim ol i wok long sutim tok long Jisas, Pita i go sanap wantaim sampela Juda ol i stap klostu long paia na hatim skin bilong ol. Wanpela wokboi bilong hetpris i luksave long Pita na i tok em i bin i stap wantaim Jisas. Tru, Pita i tok em i no save long Jisas, tasol yumi no ken lusim tingting olsem, long dispela pasin bilong stap gut long Jisas na tingim em, Pita i bin redi long kisim bagarap, em samting klostu olgeta narapela aposel i no redi long mekim.​​—⁠Jon 18:​15-​27.

16. I gat wanem as na yumi bin stori long ol gutpela pasin bilong Jona na Pita?

¹⁶ Ol gutpela pasin bilong Pita i bin winim tru ol pasin kranki bilong em. Na i wankain tu long Jona. Orait nau yumi gat stretpela tingting long Jona na Pita, winim bilong bipo, yumi mas lain long kisim stretpela tingting moa long ol brata sista bilong yumi long spirit long nau. Taim yumi mekim olsem, dispela bai helpim yumi long pas gut moa wantaim ol. Bilong wanem i gat wok long kisim stretpela tingting moa long ol brata sista?

Long Nau

17, 18. (a) I gat wanem as na hevi inap kamap namel long tupela Kristen? (b) Wanem ol tok bilong Baibel inap helpim yumi long stretim ol hevi i kamap namel long yumi na ol wanbilip?

¹⁷ Long nau, ol man meri pikinini bilong kain kain skin na sindaun ol i wanbel long lotuim Jehova. (KTH 7:​9, 10) Yumi lukim ol manmeri insait long kongrigesen Kristen ol i gat ol narapela narapela kain pasin! Planti taim yumi save bung wantaim na mekim wok bilong God, olsem na ating sampela taim liklik kros bai kamap.​​—⁠Rom 12:10; Filipai 2:⁠3.

¹⁸ Tru, yumi save ol brata bilong yumi ol i gat ol pasin kranki, tasol yumi no wok long tingim tingim. Yumi wok strong long bihainim pasin bilong Jehova, em man bilong raitim song i bin stori long em olsem: “Sapos yu kaunim olgeta sin bilong mipela bai husat inap long winim kot bilong yu?” (Song 130:⁠3) Yumi mas “bihainim olgeta pasin i save mekim yumi i stap wanbel, na olgeta pasin i save strongim bilip bilong ol arapela”​—⁠nogut yumi tingim tingim ol pasin em inap long brukim lain bilong yumi. (Rom 14:19) Yumi mas wok long tingim ol man olsem Jehova i save tingim ol​—⁠yumi mas tingim ol gutpela pasin bilong ol, ol pasin kranki na popaia bilong ol, nogat. Taim yumi mekim olsem, dispela i save helpim yumi long ‘karim hevi’ bilong ol popaia na pasin kranki bilong narapela.​​—⁠Kolosi 3:​13.

19. Kolim sampela gutpela samting Kristen i ken mekim bilong stretim ol bikpela kros.

¹⁹ Olsem wanem sapos sampela kros i kamap em yu no inap stretim na nau bel i no stap isi? (Song 4:⁠4) Kain samting olsem i bin kamap namel long yu na wanpela wanbilip? Sapos olsem, orait traim long stretim dispela hevi. (Stat 32:​13-​15) Namba wan samting, beten askim Jehova long soim rot long yu. Orait nau tingim ol gutpela pasin bilong dispela wanbilip na go toktok wantaim em long “pasin bilong gutpela tingting na save.” (Jems 3:​13) Tokim em yu laik kamap wanbel gen wantaim em. Tingim dispela tok: “Yupela olgeta i mas putim yau kwik long harim tok, tasol yupela i no ken hariap long mekim toktok, na yupela i no ken kros kwik.” (Jems 1:​19) Dispela tok, “no ken kros kwik,” i makim olsem narapela inap kamapim wanpela tok o mekim wanpela samting na dispela inap mekim yu i kros. Sapos dispela samting i kamap, orait askim Jehova long helpim yu long bosim gut bel. (Galesia 5:​22, 23) Larim brata bilong yu i kamapim bel hevi bilong em, na putim gut yau. No ken katim tok bilong em, maski yu no wanbel long olgeta tok em i mekim. Na maski tingting bilong em long sampela samting i no stret, yu mas save olsem, dispela em tingting bilong em long dispela taim. Traim long tingim dispela hevi olsem em i save tingim. Bilong mekim olsem, ating yu mas lukim yu yet olsem brata bilong yu i lukim yu.​​—⁠Sindaun 18:⁠17.

20. Taim yu wok long stretim hevi, wanem sampela samting moa yu ken mekim bilong helpim yu long kamap wanbel gen wantaim narapela?

²⁰ Long taim bilong yu long mekim toktok, mekim long gutpela pasin. (Kolosi 4:⁠6) Tokim brata bilong yu long ol samting bilong em yu laikim. Tok sori long samting yu yet i bin mekim bilong kamapim dispela kros. Sapos ol samting yu mekim long pasin daun i helpim yutupela long kamap wanbel gen, orait tok tenkyu long Jehova long dispela. Sapos yutupela i no kamap wanbel, orait wok yet long askim Jehova long soim rot long yu na wet long rot i op gen long yu ken traim long kamap wanbel.​​—⁠Rom 12:⁠18.

21. Olsem wanem dispela stori i bin helpim yu long tingim ol narapela olsem Jehova i save tingim ol?

²¹ Jehova i save laikim tru olgeta wokboi bilong em. Em i amamas long givim wok long yumi olgeta, maski yumi gat ol pasin kranki. Taim yumi kisim sampela save moa long tingting bilong em long ol narapela, bai yumi laikim moa yet ol brata na sista. Sapos yumi no laikim tumas wanpela Kristen olsem long pastaim, orait i gat rot long laikim em gen. Bai yumi kisim gutpela pe tru sapos yumi wok strong long soim olsem yumi gat stretpela tingting long ol narapela​​—⁠yes, tingim ol olsem Jehova i save tingim ol!

[Futnot]

Bai Yu Bekim Olsem Wanem?

• Jehova i gat wanem tingting long ol gutpela wokboi bilong em ol i mekim sampela pasin kranki?

• Wanem sampela gutpela pasin bilong Jona na Pita?

• Yu tingting strong long holimpas wanem kain tingting long ol brata Kristen bilong yu?

[Blok lon pes 18]

Tingim Ol Narapela i Stap Olsem Wanem Long Ai Bilong God

Olsem wanem? Taim yu tingim tingim hap bilong Baibel i stori long Jona, yu luksave olsem yu mas kisim nupela tingting long ol man yu save autim tok long ol? Ating i luk olsem ol i amamas long laip bilong ol o ol i les long harim tok, wankain olsem ol Israel bilong bipo, o ol i birua long tok bilong God. Tasol ol i stap olsem wanem long ai bilong God Jehova? Ating sampela bikman bilong dispela graun ol tu bai kirap na wok long painim Jehova, olsem king bilong Nineve i bin tanim bel taim em i harim tok bilong Jona.​​—⁠Jona 3:​6, 7.

[Piksa long pes 15]

Olsem wanem? Yu save tingim ol narapela olsem Jehova i tingim ol?

[Piksa long pes 16, 17]

Jisas i mekim wanpela gutpela tok long samting i bin painim Jona