Askim

I gat wanem as na long sampela Baibel namba ol i raitim long ol wan wan song na ves long Buk Song i no wankain?

Namba wan Baibel i gat ol sapta na ves long en, em wanpela Baibel long tok Frans em Robert Estienne i bin wokim long 1553. Tasol paslain tru long dispela, Buk Song i gat pinis ol wan wan hap bilong en​—⁠em ol wan wan song ol narapela narapela man i bin raitim.

I luk olsem Devit em namba wan man Jehova i bin givim wok long em long bungim ol song em ol man i save singim long taim ol i bung bilong lotu long God. (1 Stori 15:​16-​24) Tasol bihain, Jehova i givim wok long Esra, em wanpela pris na man i “save gut” long Lo bilong God, na em i stretim olgeta song na mekim i kamap wanpela buk. (Esra 7:⁠6) Em nau, Buk Song i gat ol narapela narapela song long en long dispela taim ol i mekim i kamap wanpela buk.

Long wanpela tok aposel Pol i mekim long haus lotu bilong ol Juda long Antiok (Pisidia) long namba wan raun bilong em olsem misineri, em i kamapim tok bilong Buk Song na i tok: “Tok bilong dispela samting i stap long namba 2 song bilong Buk Song. Dispela tok i olsem, ‘Yu pikinini bilong mi. Nau mi kamap papa bilong yu.’ ” (Aposel 13:33) Long ol Baibel long nau, dispela tok i stap yet long namba 2 song, ves 7. Tasol long sampela Baibel, i gat planti song we namba ol i raitim long ol i no wankain. Dispela i olsem, long wanem, as bilong ol tok bilong sampela Baibel em Baibel Hibru ol Masoret i bin wokim, tasol as bilong sampela narapela Baibel em Baibel Grik Septuagint, em ol i bin tanim long Baibel Hibru na wok bilong tanim em i pinis wan handet yia samting paslain long Krais. Olsem: Long Baibel Latin Vulgate, em tok bilong en i as bilong planti Baibel Katolik, ol i raitim wankain namba long ol song olsem i stap long Baibel Septuagint, tasol Baibel New World Translation na sampela Baibel moa, ol i bihainim ol namba olsem i stap long Baibel Hibru ol Masoret i bin wokim.

Wanem sampela samting i no wankain? Baibel Hibru i gat 150 song long en. Tasol Baibel Septuagint i bungim Song 9 na 10 wantaim, na Song 114 na 115 wantaim. Na tu, Baibel Septuagint i brukim sampela song​—⁠Song 116 na Song 147​—⁠i go long tupela song. Tru, taim yumi kaunim olgeta song, dispela namba, 150, i no senis, tasol taim yumi kaunim ol song kirap long Song 10 i go inap long Song 146 long Baibel Septuagint na skelim wantaim Baibel Hibru, namba bilong ol song i sot inap wanpela. Olsem na long Baibel Douay Version, dispela Song 23 em planti man i save long en, em i olsem Song 22. Dispela Baibel i bin raitim wankain namba long ol song olsem i stap long Baibel Vulgate, na Baibel Vulgate i bihainim Baibel Septuagint.

Na tu, ol namba ol i givim long ol ves long sampela song, long sampela Baibel ol dispela namba i no wankain. Bilong wanem? Long wanem, olsem buk McClintock and Strong’s Cyclopedia i tok, sampela Baibel i bihainim “pasin bilong ol Juda em ol i save kaunim het-tok bilong song olsem wanpela ves,” tasol sampela narapela Baibel i no mekim olsem. Na tu, sapos het-tok bilong song i longpela, planti taim ol i save brukim i go long 2-pela ves, na namba bilong ol ves long dispela song i go bikpela.