Yumi Inap Painim We Ol Gutpela Lo Bilong Stiaim Yumi?
RODOLPHE i tok: “Sapos yu laik bihainim wanpela lotu, long wanem, em lotu bilong ol tumbuna bilong yu, orait bihainim lotu Keltik ol tumbuna bilong 2,000 yia i go pinis i bin bihainim.” Yangpela i harim dispela tok em i lap liklik.
Rodolphe i tok: “Pasin bilong mi long pas gut wantaim God em i bikpela samting tru long mi. Mi no orait liklik long dispela tingting olsem mi mas bihainim lotu bilong ol tumbuna bilong mi o bilong ol tumbuna i bin i stap planti handet yia bipo.” Rodolphe i bin skelim gut ol samting; em i no tingim pasin bilong em long pas gut wantaim God i olsem samting em i bin kisim nating long ol tumbuna, nogat.
Maski pasin bilong kisim lotu long ol tumbuna i no strong olsem bipo, klostu olgeta man i pas yet long lotu bilong famili bilong ol. Tasol olsem wanem? Yu ting long olgeta taim i stret long bihainim ol bilip bilong lotu bilong papamama? Baibel i tok wanem?
Bihain long 40 yia long ples wesan nating, Josua, em senis bilong Moses, i givim rot long ol Israel long makim wanem lotu ol i laik bihainim: “Sapos yupela i no laik lotu long Bikpela, orait yupela i tingting gut nau. Bai yupela i lotu long husat? Yupela bai i lotu long ol dispela giaman god bilong ol tumbuna bilong yupela long Mesopotemia? O long ol giaman god bilong ol Amor, nau yupela i sindaun long graun bilong ol? Tasol mi wantaim famili bilong mi, mipela bai i lotu long Bikpela tasol.”—Josua 24:15.
Wanpela tumbuna Josua i stori long en, em Tera, papa bilong Abraham. Tera i stap long taun Ur, long hap is bilong wara Yufretis. Baibel i no stori planti long Tera, tasol wanpela samting Baibel i bin kamapim bilong em i olsem: Tera i bin lotuim ol god giaman. (Josua 24:2) Maski pikinini man bilong em, Abraham, i no save tru long ol samting God i tingting pinis long mekim, em i orait long lusim as ples bilong em taim Jehova i tokim em long mekim olsem. Yes, Abraham i makim wanpela lotu bilong bihainim i narapela kain long lotu bilong papa bilong em. Long dispela as, Abraham i kisim ol blesing God i bin tok promis long givim long em, na em i kamap dispela man em planti lotu i tingim olsem ‘namba wan tumbuna bilong olgeta man i bilip long God.’—Rom 4:11.
Baibel i mekim gutpela tok tu long Rut, em wanpela tumbuna meri bilong Jisas Krais. Rut em wanpela meri Moap i bin marit long wanpela Israel, tasol dispela man i dai pinis, na nau em i mas tingim wanem samting em bai mekim: stap long kantri bilong em yet o go wantaim tambu mama bilong em taim em i go bek long Israel. Rut i save olsem lotu bilong Jehova i gutpela tru, winim pasin bilong lotu long ol god giaman em papamama bilong em i save bihainim, olsem na em i tokim tambu mama: “Lain bilong yu bai i kamap lain bilong mi. Na God bilong yu bai i kamap God bilong mi.”—Rut 1:16, 17.
Buk Dictionnaire de la Bible i tok, stori bilong Rut long Baibel i stori long “wanpela meri bilong narapela kantri, em i bin kamap bikpela namel long wanpela lain haiden i birua long ol Israel na ol Israel i birua long ol, . . . na em i kamap wanpela tumbuna bilong King Devit, long wanem, em i laikim tru lain bilong Jehova na lotu bilong Em.” Rut i no surik long makim wanpela lotu i narapela kain long lotu bilong papamama bilong em, na dispela i mekim na em i kisim wanpela gutpela blesing i kam long God.
Stori bilong lotu Kristen i kamap nupela em i kamapim klia as na ol disaipel bilong Jisas i bin lusim lotu bilong ol tumbuna bilong ol. Aposel Pita i singautim ol man i harim tok bilong em: “Yupela i mas was gut, nogut yupela i bagarap wantaim ol dispela lain man bilong mekim ol kain kain pasin nogut.” Ol i mas hevi long ol rong ol i bin mekim na tanim bel na kisim baptais long nem bilong Jisas Krais. (Aposel 2:37-41) Wanpela man i stap gutpela piksa long mekim olsem, em wanpela man Juda i bin mekim nogut tru long ol Kristen, nem bilong em Sol. Long rot i go long Damaskus, Sol i kisim driman na i lukim Krais, na em i kamap wanpela Kristen na kisim nem olsem aposel Pol.—Aposel 9:1-9.
Klostu olgeta Kristen bilong pastaim i no bin kisim kain gutpela ekspiriens olsem. Tasol olgeta i bin lusim wanpela lotu—lotu Juda o pasin bilong lotuim ol god giaman. Ol dispela man i kisim lotu Kristen, pastaim ol i bin kisim save long olgeta samting bilong en—ating sampela i bin toktok gut wantaim ol long wok bilong Jisas olsem Mesaia. (Aposel 8:26-40; 13:16-43; 17:22-34) Ol dispela Kristen bilong pastaim ol i bin kisim save olsem ol i mas mekim sampela senis long i stap bilong ol. Singaut i bin go long olgeta man, ol Juda na ol man i no Juda, tasol tok ol i harim i wankain. Bilong mekim ol samting God i laikim, ol i mas kirap bihainim wanpela nupela lotu, em lotu Kristen.
Rot Yumi Yet i Mas Tingim
Long taim bilong ol aposel, ol man i mas strongim bel sapos ol i laik sakim lotu bilong famili bilong ol—olsem lotu Juda, lotuim empera, lotuim ol god giaman—na kam insait long wanpela lain em ol Juda na ol Rom i birua long en. I no longtaim na dispela samting ol i mekim i kirapim ol man long mekim nogut tru long ol. Long nau tu, man i mas strongim bel sapos em i no laik “bai ol narapela i pulim em long bihainim ol.” Dispela em tok bilong Hippolyte Simon, bisop Katolik bilong Clermont-Ferrand, long buk Vers une France païenne? (Frans i Kamap Haiden?) Man i mas strongim bel sapos em i laik bung wantaim wanpela liklik lain lotu—lain Witnes Bilong Jehova—em sampela taim ol man i sutim tok long en.
Paul, wanpela yangpela man long Bastia, Corsica, em i go bikpela insait long lotu Katolik, na sampela taim em i insait long sampela wok bilong sios, olsem salim ol kek bilong kisim mani bilong givim long wanpela lain Katolik i gat wok long helpim ol manmeri i sot. Em i laik kisim sampela save moa long Baibel, olsem na em i orait long toktok wantaim ol Witnes Bilong Jehova. Bihain, em i save olsem ol tok em i lainim inap helpim em inap oltaim oltaim. Olsem na Paul i kirap bihainim ol tok bilong Baibel na em i kamap wanpela Witnes Bilong Jehova. Papamama bilong em i daun long dispela laik bilong em—dispela laik bilong em i no bin pasim em long pas gut wantaim famili bilong em.
Amélie i sindaun long hap saut bilong Frans. Inap 4-pela lain tumbuna bilong em i bin stap Witnes Bilong Jehova. I gat wanem as na em i makim lotu bilong papamama bilong em long bihainim? Em i tok: “Mi no bin kamap wanpela Witnes Bilong Jehova long wanem papamama o bubu bilong mi i Witnes Bilong Jehova, nogat. . . . Mi insait long dispela lotu, long wanem, ol bilip bilong en em ol samting mi yet i bilip strong long en.” Olsem planti narapela yangpela Witnes Bilong Jehova, Amélie i save olsem ol dispela samting em i bilip strong long en i bin helpim em long save olsem i stap bilong em i gat as bilong en, na i mekim em i amamas tru.
Bihainim Ol Pasin God i Laikim
Buk Sindaun, sapta 6, ves 20, i strongim ol man i laik mekim ol pasin God i laikim, olsem: “Pikinini, yu mas harim tok bilong papamama bilong yu na yu no ken sakim tok bilong tupela.” Dispela tok i no laik kirapim ol yangpela long bihainim nating ol tok bilong papamama bilong ol, nogat; em i laik kirapim ol long bihainim ol pasin God i laikim, long rot bilong strongim bilip bilong ol na ol yet i mas kisim bilip long God. Aposel Pol i singautim ol poroman bilong em long “skelim gut olgeta tok na pasin” na bai ol i ken save olsem ol samting ol i skul long en i stret wantaim Tok Bilong God na laik bilong Em o nogat. Taim ol i save pinis, orait nau ol i mas mekim ol samting i stret wantaim dispela save.—1 Tesalonaika 5:21.
Maski ol i bin go bikpela insait long wanpela famili Kristen o nogat, winim 6 milion Witnes Bilong Jehova, em ol yangpela na lapun, ol i bin tingim wanem lotu ol i laik bihainim. Ol i bin stadi gut long Baibel na painim gutpela bekim bilong ol askim bilong ol, olsem ol i stap bilong mekim wanem, na ol i bin kisim gut save long laik bilong God long ol man. Taim ol i kisim dispela save, ol i kisim ol pasin God i laikim na ol i wok strong long bihainim laik bilong God.
Maski yu man bilong ritim dispela nius long olgeta taim o nogat, i gutpela sapos yu larim ol Witnes Bilong Jehova i helpim yu long skelim Baibel na ol lo bilong en bilong stiaim yu long ol samting bilong spirit. Long dispela rot bai yu inap ‘traim na lukim na save olsem Bikpela i gutpela tru,’ na kisim save, em taim yu bihainim, em bai bringim yu long laip oltaim.—Song 34:8; Jon 17:3.
[Piksa long pes 5]
Fopela lain tumbuna long wanpela famili bilong Witnes Bilong Jehova long Frans
[Piksa long pes 7]
Rut i tingting long lotuim Jehova, na ol god bilong ol tumbuna bilong em, nogat