Sanap Strong, na Winim Resis Bilong Kisim Laip
SAPOS yu mas raun long solwara em strongpela win i sakim nabaut, yu laik raun long wanem kain bot? Yu laik raun long wanpela dingi i no strong o long strongpela sip ol i bin wokim gut? Ating yu laik raun long sip, long wanem, sip inap raun gut namel long ol biksi em win i sakim strong.
Long dispela taim yumi stap long en i olsem strongpela win i sakim ol samting nabaut, na ol hevi yumi bungim i mekim na yumi no stap bel isi. Olsem: Tingting na pasin bilong ol man bilong dispela graun i paul, olsem na sampela yangpela i paul na ol i no stap bel isi. Sampela man husat i bin kirap bihainim rot Kristen long nau tasol, ol i no strong yet. Sampela strongpela Kristen i bin stap gut long wok bilong God inap planti yia pinis, ol traim inap painim ol tu, long wanem, ol samting ol i bin wet long en i no kamap yet.
Ol kain samting olsem i bin painim ol man long bipo tu. Ol wokman bilong Jehova i bin stap gut long em, olsem Moses, Jop, na Devit, sampela taim bel bilong ol i no stap isi. (Namba 11:14, 15; Jop 3:1-4; Song 55:4) Tasol pasin ol i bihainim long laip bilong ol i kamapim klia olsem ol i sanap strong na givim bel long Jehova. Gutpela pasin bilong ol i kirapim yumi long sanap strong, tasol Satan i laik pulim yumi long lusim resis bilong kisim laip oltaim oltaim. (Luk 22:31) Olsem wanem yumi ken sanap strong, na “stap strong long bilip”? (1 Pita 5:9) Na olsem wanem yumi ken strongim ol wanbilip bilong yumi?
Jehova i Laik Bai Yumi Sanap Strong
Sapos yumi stap gut long Jehova, oltaim em bai helpim yumi long stap strong. Planti hevi i bin painim Devit, em man bilong raitim song, tasol em i wet long God i helpim em, olsem na em inap tok: “Mi olsem man i stap insait long bikpela hul i daun tumas na mi laik bagarap, tasol Bikpela i pulim mi na mi kam antap. Mi pas long tais i olsem sup tru, na em i kamautim mi na sanapim mi long ples ston, na mi wokabaut strong gen.”—Song 40:2.
Jehova i strongim yumi long “ran long resis” na bai yumi ken “kisim laip i stap gut oltaim oltaim.” (1 Timoti 6:12) Em i givim tu ol samting na bai yumi ken sanap strong na winim dispela pait bilong spirit yumi stap long en. Aposel Pol i strongim ol Kristen long kisim ‘olgeta bikpela strong bilong Bikpela,’ na long ‘pasim olgeta klos pait God i save givim ol, na bai ol inap long sanap strong na sakim olgeta kain pasin bilong trik na giaman Satan i save hait na mekim.’ (Efesus 6:10-17) Tasol wanem ol samting inap mekim na yumi no stap bel isi? Na olsem wanem yumi inap sakim ol dispela samting?
Lukaut Long Ol Samting i Daunim Strong Bilong Yu
Em i gutpela long tingim dispela bikpela samting: Ol rot yumi makim bilong bihainim inap helpim o nogutim pasin bilong yumi ol Kristen long stap strong. Ol yangpela i mas makim rot ol i laik bihainim long ol samting bilong wok mani, skul, na marit. Ol man i bikpela pinis ol i mas wokim tingting, ol bai go sindaun long narapela hap o mekim sampela wok mani moa o nogat. Long olgeta de yumi makim ol samting yumi laik mekim long taim bilong yumi na planti narapela samting. Wanem samting bai helpim yumi long bihainim gutpela tingting long ol samting yumi mekim em dispela samting bai helpim yumi long stap strong olsem ol wokman bilong God? Wanpela sista i bin stap Kristen inap longpela taim, em i tok: “Mi askim Jehova long helpim mi taim mi mas makim ol samting mi laik mekim. Mi ting em i bikpela samting long bilip na bihainim ol tok yumi kisim long rot bilong Baibel, ol miting Kristen, ol elda, na ol buk na nius bilong Baibel.”
Taim yumi makim ol samting yumi laik mekim, yumi mas askim yumi yet olsem: ‘Bihain long faipela o tenpela yia, bai mi amamas yet long rot mi makim long nau, o bai mi bel hevi long en? Mi mekim ol samting na bai rot mi makim bilong bihainim i no bagarapim mi long ol samting bilong spirit, tasol em bai helpim mi long kamap strong long spirit?’—Filipai 3:16.
Sampela lain i baptais pinis ol i pundaun long traim o klostu ol i brukim sampela lo bilong God na dispela i mekim na ol i no stap strong. Sampela em kongrigesen i rausim ol, long wanem, ol i bikhet na mekim rong, ol i bin wok strong bilong kam bek insait long kongrigesen, tasol bihain kongrigesen i rausim ol gen—sampela ol i raus hariap—long wankain rong ol i bin mekim long bipo. Ating ol i no bin beten askim God long helpim ol long ‘givim baksait tru long pasin nogut, na pas tru long gutpela pasin.’ (Rom 12:9; Song 97:10) Yumi olgeta i mas “wokabaut long ol stretpela rot.” (Hibru 12:13) Olsem na nau yumi ken skelim sampela tok em inap helpim yumi long stap strong long ol samting bilong spirit.
Mekim Ol Wok Kristen Bilong Sanap Strong
Wanpela rot i helpim yumi long stap strong long resis bilong kisim laip em pasin bilong mekim bikpela wok bilong autim tok bilong Kingdom. Yes, wok Kristen bilong yumi em i wanpela gutpela samting i helpim yumi long putim bel na tingting long mekim laik bilong God na long gutpela pe yumi inap kisim em laip oltaim oltaim. Pol i tokim ol Korin: “Ol brata tru bilong mi, yupela i mas i stap strong, na i no ken surik liklik. Yupela i save olsem, hatwok yupela i save mekim long Bikpela, em bai i no inap lus nating. Olsem na oltaim yupela i mas wok strong long mekim wok bilong Bikpela.” (1 Korin 15:58) Dispela tok “stap strong” i makim olsem man i no inap senis. “No ken surik liklik” inap makim olsem man i no larim em yet long lusim ol samting em i bilip long en. Olsem na taim yumi givim bel long wok autim tok, dispela inap helpim yumi long stap strong long rot Kristen. Wok bilong helpim ol narapela manmeri long kisim save long Jehova i mekim na laip bilong yumi i gat as tru bilong en na yumi stap amamas.—Aposel 20:35.
Pauline, em wanpela Kristen i bin lusim inap 30 yia bilong mekim wok misineri na ol narapela wok fultaim bilong autim tok, na em i tok: “Wok autim tok i lukautim mi, long wanem, taim mi autim tok long ol narapela, dispela i strongim mi long bilip olsem mi insait long tok i tru.” Na taim yumi insait long ol narapela wok Kristen, olsem go long ol miting bilong mekim lotu na givim bel long stadi long Baibel, dispela tu bai strongim yumi long bilip olsem yumi insait long tok i tru.
Gutpela Lain Brata i Strongim Yumi
Yumi insait long wanpela oganaisesen i stap long olgeta hap em ol man insait long en ol i lotu tru long God, na dispela samting inap strongim tru yumi. Em i wanpela bikpela blesing tru long stap wantaim dispela lain brata i stap long olgeta hap em narapela i laikim tru narapela! (1 Pita 2:17) Na yumi inap helpim ol wanbilip bilong yumi long stap strong.
Tingim ol samting stretpela man Jop i mekim bilong helpim ol narapela. Elifas i sutim tok long Jop, tasol em i mas tokaut tu olsem: “Taim ol man i gat bikpela hevi na i pundaun pinis, yu bin givim gutpela tok long ol, na tok bilong yu i bin kirapim ol gen. Na yu bin helpim ol na ol i sanap strong.” (Jop 4:4) Olsem wanem? Yumi save helpim ol narapela? Yumi olgeta wan wan i gat wok long helpim ol brata na sista spirit bilong yumi long sanap strong long wok bilong God. Taim yumi stap wantaim ol, yumi ken bihainim dispela tok: “Yupela i mas strongim ol man i no gat strong na strongim tu bel bilong ol man i pret na guria.” (Aisaia 35:3) Olsem na gutpela sapos yu putim mak olsem yu laik strongim wanpela o tupela wanbilip Kristen long olgeta taim yu bung wantaim ol. (Hibru 10:24, 25) Ol gutpela tok amamas na tok tenkyu long ol samting ol i wok long mekim bilong amamasim Jehova inap helpim ol tru long sanap strong bilong winim resis bilong kisim laip.
Ol elda Kristen inap kamapim planti gutpela samting taim ol i strongim ol nupela man. Ating ol inap mekim olsem long rot bilong kamapim sampela tok bilong Baibel na ol gutpela tok em inap helpim ol nupela na long rot bilong autim tok wantaim ol. Oltaim aposel Pol i strongim ol narapela taim rot i op. Em i gat bikpela laik tru long lukim ol Kristen long Rom na bai em i ken helpim ol long stap strong long ol samting bilong spirit. (Rom 1:11) Em i ting ol gutpela brata na sista bilong em long Filipai ol i olsem ‘gutpela prais na em i save amamas long ol’ na em i tokim ol long “sanap strong long Bikpela.” (Filipai 4:1) Taim em i harim ol hevi ol brata bilong em long Tesalonaika i karim, Pol i salim Timoti long ‘strongim ol na helpim ol long bilip bilong ol, nogut hevi na pen ol i karim i mekim sampela bilong ol i tingting planti.’—1 Tesalonaika 3:1-3.
Aposel Pol na Pita i luksave na amamas tru long gutpela wok ol wanbilip bilong ol i mekim. (Kolosi 2:5; 1 Tesalonaika 3:7, 8; 2 Pita 1:12) Yumi tu i no ken tingting long ol pasin kranki bilong ol brata bilong yumi, nogat; yumi mas tingim ol gutpela pasin bilong ol na pait ol i mekim bilong sanap strong na litimapim nem bilong Jehova.
Sapos yumi tingting nogut o skelim skelim ol narapela, yumi inap mekim na narapela i hatwok moa long sanap strong long bilip. Em i gutpela long yumi tingim olsem ol brata bilong yumi “i stap nogut tru” long dispela taim nau! (Matyu 9:36) I stret ol i ting kongrigesen Kristen i mekim gut bel bilong ol na i givim nupela strong long ol. Olsem na yumi olgeta i mas wok strong long strongim ol wanbilip na helpim ol long sanap strong.
Sampela taim ol narapela inap mekim sampela pasin long yumi i daunim pasin bilong yumi long sanap strong. Olsem wanem? Bai yumi larim wanpela strongpela tok o pasin i no stret narapela i mekim i daunim yumi na yumi no givim bel moa long wok bilong Jehova? Yumi no ken larim wanpela man i mekim na yumi lusim pasin bilong sanap strong!—2 Pita 3:17.
Ol Promis Bilong God i Helpim Yumi Long Stap Strong
Jehova i tok promis long kamapim gutpela sindaun bihain aninit long Kingdom, olsem na yumi wet long ol gutpela samting bai kamap, na dispela i helpim yumi long sanap strong i stap. (Hibru 6:19) Na yumi bilip olsem oltaim God i save truim ol tok promis bilong em na dispela i kirapim yumi long “was gut na sanap strong long bilip.” (1 Korin 16:13; Hibru 3:6) Yumi inap ting God i lusim taim long inapim sampela tok promis bilong em na dispela inap traim bilip bilong yumi. Olsem na em i bikpela samting long yumi mas was gut, nogut sampela tok giaman i paulim yumi na yumi lusim pasin bilong wet long ol gutpela samting bai kamap.—Kolosi 1:23; Hibru 13:9.
Ol Israel i lus, long wanem, ol i no bilip long ol tok promis bilong Jehova, na dispela em i samting yumi mas tingim gut. (Song 78:37) Yumi no ken bihainim pasin bilong ol, nogat; yumi mas sanap strong, na mekim wok bilong God na tingim olsem taim i sot pinis nau long dispela taim bilong las de. Wanpela strongpela elda i tok: “Mi save ting olsem bikpela de bilong Jehova bai kam tumora na ol samting mi mekim long olgeta de i stret wantaim dispela tingting.”—Joel 1:15.
Yes, bikpela de bilong Jehova i klostu pinis. Tasol sapos yumi stap klostu long God, i no gat as na yumi mas pret long wanpela samting. Sapos yumi strong long bihainim ol stretpela lo bilong em na sanap strong, yumi inap winim dispela resis bilong kisim laip oltaim oltaim!— Sindaun 11:19; 1 Timoti 6:12, 17-19.
[Piksa long pes 23]
Yu save mekim olgeta samting yu inap mekim bilong helpim ol wanbilip Kristen long sanap strong?
[Piksa Kredit Lain long pes 21]
The Complete Encyclopedia of Illustration/J. G. Heck