Bilip Strong na Mekim Yet Wok Bilong Jehova
“God, long bel bilong mi, mi bilip strong long yu.”—SONG 57:7.
1. Olsem wanem na yumi inap kisim bilip kain olsem bilong Devit?
JEHOVA inap helpim yumi ol wokboi i dediket pinis long em long stap strong long bilip, bambai yumi inap holimpas lotu Kristen tru. (Rom 14:4) Olsem na yumi inap kisim bilip kain olsem bilong Devit, man bilong raitim song, em i tok: “God, long bel bilong mi, mi bilip strong long yu.” (Song 108:1) Sapos long bel yumi bilip strong, orait bel bai kirapim yumi long inapim dediket yumi bin mekim long God. Na sapos yumi lukluk i go long God bilong stiaim tingting bilong yumi na strongim yumi, dispela bai helpim yumi long stap gut long God na bilip strong na i no ken surik liklik, na oltaim bai yumi “wok strong long mekim wok bilong Bikpela.”—1 Korin 15:58.
2, 3. Olsem wanem yumi inap bihainim tok bilong Pol long 1 Korin 16:13?
2 Aposel Pol i givim tok long ol disaipel bilong Jisas long Korin, na dispela tok i stret long ol Kristen long nau tu. Em i tok: “Yupela i mas was gut na sanap strong long bilip. Yupela i mas i stap strong, na yupela i no ken pret long wanpela samting.” (1 Korin 16:13) Hap tok Grik ol i kisim dispela tok long en i makim olsem man i mas mekim ol dispela samting i go i go. Orait olsem wanem yumi inap bihainim dispela tok bilong Pol?
3 Yumi inap “was” i stap long ol samting bilong spirit long rot bilong sakim Satan na stap klostu long God. (Jems 4:7, 8) Pasin bilong bilip na wetim Jehova, dispela i save helpim yumi long stap wanbel wantaim na ‘sanap strong long bilip Kristen.’ Yumi bihainim pasin bilong “no ken pret” taim yumi mekim wok bilong God na autim tok bilong Kingdom. (Song 68:11) Yumi “stap strong” taim yumi lukluk i go oltaim long Papa bilong yumi long heven long givim strong long yumi long bihainim laik bilong em.—Filipai 4:13.
4. Yumi bin mekim wanem ol samting paslain long yumi kisim baptais na kamap Kristen?
4 Yumi soim olsem yumi bin kisim tok i tru taim yumi dediket tru long Jehova na kisim baptais long wara. Tasol yumi bin mekim wanem ol samting pastaim na bihain yumi kisim baptais? Namba wan samting em yumi kisim stretpela save long Tok Bilong God. (Jon 17:3) Dispela i bin kirapim yumi long bilip na tanim bel, olsem hevi tru long ol rong bipo yumi bin mekim. (Aposel 3:19; Hibru 11:6) Bihain, yumi baut—yumi lusim ol pasin nogut na bai yumi inap bihainim ol pasin i stret wantaim laik bilong God. (Rom 12:2; Efesus 4:23, 24) Bihain long dispela, yumi beten na dediketim laip olgeta bilong yumi long Jehova. (Matyu 16:24; 1 Pita 2:21) Yumi askim God long mekim bel bilong yumi i kamap klin long ai bilong em na yumi kisim baptais bilong makim olsem yumi dediket pinis long em. (1 Pita 3:21) Sapos yumi wok long tingim ol dispela samting yumi bin mekim, dispela bai helpim yumi long wok strong oltaim long truim dediket bilong yumi na bilip strong na mekim yet wok bilong Jehova.
Wok Yet Long Kisim Stretpela Save
5. I gat wanem as na yumi mas wok yet long kisim save long Baibel?
5 Bilong bihainim dediket bilong yumi, yumi mas wok yet long kisim save long Baibel—dispela save bai helpim bilip bilong yumi long kamap strong. Namba wan taim yumi kisim save long tok i tru bilong God, yumi amamas tru long kisim dispela kaikai bilong spirit, a? (Matyu 24:45-47) Dispela kaikai i gutpela tru na i bin strongim gut yumi long ol samting bilong spirit. Orait nau yumi ol wokboi bilong Jehova i dediket pinis long em, yumi mas wok yet long kisim gutpela kaikai bilong spirit na bai yumi inap holimpas strongpela bilip.
6. Ating wanem samting i bin helpim yu long pilim tru tok i tru bilong Baibel?
6 Bilong kisim sampela save moa bilong Baibel, yumi mas hatwok. I kain olsem wok bilong painim silva o mani samting i hait long graun—yumi mas taitim bun tru. Tasol taim yumi kisim pinis ‘save long God,’ yumi amamas tru! (Sindaun 2:1-6) Taim wanpela pablisa bilong Kingdom i kirap stadi wantaim yu long Baibel, ating em i mekim wok long buk Save i Bringim Man Long Laip Oltaim. Ating em i lusim bikpela hap taim liklik long toktok wantaim yu long ol wan wan sapta, na sampela taim em i mekim 2-pela o 3-pela stadi wantaim yu bilong pinisim wanpela sapta. Taim yupela i ritim na stori gut long ol skripsa em paragraf i kolim, dispela i bin helpim gut yu. Sapos yu bin hatwok long kisim gut wanpela tok, orait em i kamapim gut as bilong en. Em i bin redi gut, na beten askim God long givim spirit holi, na em i bin helpim yu long pilim tru tok i tru.
7. Wanem samting i save inapim man long skulim ol narapela long tok i tru bilong God?
7 Dispela hatwok i stret long mekim, long wanem, Pol i tok: “Man i skul long tok bilong God, em i ken givim sampela bilong olgeta gutpela samting bilong en i go long man i skulim em.” (Galesia 6:6) Long Baibel long tok Grik dispela tok i makim olsem man i “skul” em i save kisim gut ol tok bilong Baibel long bel na long tingting bilong em. Taim yu kisim kain skul olsem, dispela i save inapim yu long kamap wanpela tisa na skulim ol man. (Aposel 18:25) Bilong bihainim gut dediket bilong yu, yu mas stap strong long ol samting bilong spirit long rot bilong stadi oltaim long Baibel.—1 Timoti 4:13; Taitus 1:13; 2:2.
Tingim Yet Dispela Taim Yu Bin Tanim Bel na Baut
8. Wanem samting bai helpim yu long bihainim ol pasin God i laikim?
8 Olsem wanem? Yu inap tingim bek bel isi yu bin pilim taim yu kisim save long tok i tru, na yu tanim bel, na nau yu pilim olsem God i lusim ol rong bilong yu long wanem yu bilip long ofa bilong Jisas? (Song 32:1-5; Rom 5:8; 1 Pita 3:18) Yu no laik pas gen long ol pasin nogut bipo yu bihainim, a? (2 Pita 2:20-22) Pasin bilong beten oltaim long Jehova bai helpim yu long bihainim ol pasin God i laikim, na bihainim dediket bilong yu, na stap gut long mekim wok bilong Jehova.—2 Pita 3:11, 12.
9. Taim yumi lusim pinis ol rong, yumi mas kirap bihainim wanem rot?
9 Taim yu lusim pinis ol rong, olsem baut, wok long askim God long helpim yu long holimpas strongpela bilip. Bipo i olsem yu bihainim wanpela rot i no stret, tasol yu lukim mep na yu kirap bihainim rot i stret. Orait nau yu no ken lusim dispela rot. Wok long wetim God i stiaim yu, na tingting strong long bihainim rot i go long laip.—Aisaia 30:20, 21; Matyu 7:13, 14.
No Ken Lusim Tingting Long Dediket na Baptais Bilong Yu
10. Yumi dediket long God na yumi mas tingim wanem ol samting bilong en?
10 Yu mas tingim olsem yu bin dediket long Jehova long rot bilong beten, na yu bin tingting long mekim wok bilong em i go inap oltaim oltaim. (Jut 20, 21) Dediket i olsem man i givim em yet bilong mekim wanpela wok holi. (Wok Pris 15:31; 22:2) Dediket i no olsem samting yu tok promis long mekim inap liklik hap taim tasol, nogat; na yu no dediket long mekim wok bilong wanpela man. Yu bin dediket long King bilong heven na graun na dispela dediket i bilong olgeta taim, na bilong bihainim dispela dediket, yu mas stap gut long God i go inap olgeta taim yu stap laip. Yes, maski ‘yumi stap laip, o yumi dai, yumi bilong Bikpela tasol.’ (Rom 14:7, 8) Bilong yumi ken stap amamas, yumi mas bihainim laik bilong Jehova na bilip strong na mekim yet wok bilong em.
11. I gat wanem as na yu mas tingim baptais bilong yu na samting dispela i makim?
11 Olgeta taim yu mas tingim baptais bilong yu em i makim olsem yu dediketim pinis laip olgeta bilong yu long God. Narapela i no bin subim yu long kisim baptais. Em samting yu yet i bin tingting long mekim. Orait olsem wanem? Yu tingting strong long bihainim laik bilong God i go inap long olgeta taim yu stap laip? Yu bin askim God long mekim bel bilong yu i stap klin long ai bilong em na yu bin kisim baptais bilong makim olsem yu dediket pinis long em. Lukautim gut dispela klinpela bel na truim dediket bilong yu, na Jehova bai givim planti blesing long yu.—Sindaun 10:22.
Laik Bilong Yu Yet i Gat Wok Bilong En
12, 13. Olsem wanem na laik bilong yumi yet em i insait long ol samting bilong dediket na baptais?
12 Tru tumas, dediket na baptais i bin helpim planti milion manmeri long olgeta hap bilong graun long kisim planti gutpela blesing. Taim yumi kisim baptais long wara bilong makim olsem yumi dediket pinis long God, yumi lusim pinis olpela wokabaut bilong yumi, tasol yumi no lusim ol laik bilong yumi yet. Yumi ol bilipman i bin kisim stretpela save, yumi bin mekim wok long laik bilong yumi yet taim yumi dediket long God long rot bilong beten na yumi kisim baptais. Olsem na taim yumi dediket na kisim baptais, yumi mas save wanem samting em i laik bilong God, na nau long laik bilong yumi yet yumi bihainim. (Efesus 5:17) Long dispela rot yumi save bihainim pasin bilong Jisas, em long laik bilong em yet em i lusim wok kamda na givim em yet olgeta long bihainim laik bilong Papa bilong em long heven.—Song 40:7, 8; Jon 6:38-40.
13 God Jehova i gat laik long Pikinini bilong em i mas “karim pen, na long dispela pen em i mekim Jisas i kamap nambawan man tru bilong helpim ol manmeri.” Olsem na Jisas i mas mekim wok long laik bilong em yet na bai em inap long karim dispela pen na stap gut long God. Bilong mekim olsem, em i “mekim prea na . . . i beten strong long God, na em i singaut strong na i krai planti. Em i save daunim laik bilong em yet na i aninit long God, olsem na God i harim beten bilong em.” (Hibru 2:10, 18; 5:7, 8) Na sapos yumi tu i daun na pret long God, em bai “harim beten” bilong yumi, na yumi ken bilip olsem Jehova bai helpim yumi ol Witnes i dediket pinis long em long stap strong.—Aisaia 43:10.
Rot Bilong Holimpas Strongpela Bilip
14. Bilong wanem yumi mas ritim Baibel long olgeta de?
14 Wanem samting bai helpim yu long holimpas strongpela bilip na bihainim dediket yu bin mekim long God? Ritim Baibel long olgeta de na bai yu ken save moa long Tok Bilong God. Em samting “wokboi i gat gutpela tingting” i save tokim yumi olgeta taim long mekim, long wanem, bilong bihainim dediket bilong yumi, yumi mas wokabaut yet long tok i tru bilong God. Sapos long laik bilong en yet oganaisesen bilong Jehova i orait long ol tok giaman, bai dispela wokboi i no tokim ol Witnes Bilong Jehova, wantaim ol man ol i autim tok long ol, long ritim Baibel, a?
15. (a) Taim yu mas skelim ol samting yu mas mekim, yu mas tingim wanem samting? (b) Olsem wanem yumi ken tok, wok mani em i nambatu samting long i stap bilong Kristen?
15 Taim yu skelim ol samting yu mas mekim, oltaim yu mas tingim olsem wanem dispela inap helpim yu long truim dediket yu bin mekim long Jehova. Tingim wok mani. Yu save mekim sampela samting na bai wok mani bilong yu i ken helpim yu long kamap strong long lotu i tru? Tru, planti bos i save olsem ol Kristen i dediket pinis ol i save stap gut long wok bilong ol na ol i mekim gut dispela wok, tasol ol i lukim tu olsem ol Witnes Bilong Jehova ol i no strong strong long kisim bikpela namba na ol i no resis wantaim ol narapela long kisim ol wok we ol inap kisim bikpela mani long en. Dispela i olsem, long wanem, nambawan tingting bilong ol i no bilong kisim bikpela mani, biknem, namba, o strong. Nambawan bikpela samting long ol Witnes i bihainim gut dediket bilong ol, i olsem: Ol i laik bihainim laik bilong God. Wok mani i helpim ol long kisim ol samting bilong skin, dispela em i nambatu samting long ol. Olsem aposel Pol, nambawan bikpela wok bilong ol, em wok Kristen bilong autim tok. (Aposel 18:3, 4; 2 Tesalonaika 3:7, 8; 1 Timoti 5:8) Olsem wanem? Yu save putim wok bilong Kingdom i go pas long ol narapela samting long i stap bilong yu?—Matyu 6:25-33.
16. Sapos pasin bilong tingting planti tumas i mekim na yumi hatwok long bihainim dediket yumi bin mekim long God, orait yumi ken mekim wanem?
16 Sampela, taim ol i no save yet long tok i tru, ol i bin tingting planti long kain kain samting na klostu dispela i bin daunim ol. Tasol pasin bilong amamas na tenkyu na laikim tru God, dispela i wok long pulap tru long bel bilong ol taim ol i kisim save long ol gutpela samting Kingdom bai mekim! Taim ol i tingim ol gutpela blesing ol i bin kisim bihain long dispela taim, dispela i bin helpim ol long bihainim dediket ol i bin mekim long Jehova. Tasol olsem wanem sapos nau ol i kirap tingting planti tumas long sampela hevi na dispela i laik karamapim “tok bilong God,” wankain olsem ol rop i gat nil inap pasim ol pikinini wit long kamap bikpela? (Luk 8:7, 11, 14; Matyu 13:22; Mak 4:18, 19) Sapos yu pilim olsem dispela samting i wok long painim yu o famili bilong yu, orait putim dispela hevi i go long Jehova na beten askim em long helpim yu long kamap strong long pasin bilong laikim em na tenkyu long em. Sapos yu putim olgeta hevi yu karim long han bilong em, em bai sapotim na givim strong long yu na bai yu inap mekim yet wok bilong em na bilip strong na amamas.—Song 55:22; Filipai 4:6, 7; KTH 2:4.
17. Olsem wanem yumi inap karim ol bikpela hevi?
17 Wok yet long beten oltaim long God Jehova, wankain olsem yu bin beten long em taim yu bin givim yu yet long God, olsem dediket long em. (Song 65:2) Taim samting i laik pulim yu long mekim rong o bikpela hevi i painim yu, orait askim God long stiaim gut yu na helpim yu long bihainim dispela dediket. Yu mas bilip tru, long wanem, disaipel Jems i tok: “Sapos wanpela man namel long yupela em i sot long gutpela tingting [bilong karim wanpela hevi], orait em i mas beten long God i givim tingting long em, na bai God i givim em. God i save givim planti samting long olgeta man, na em i no save tok kros long man i askim em. Tasol dispela man i mas bilip tru na i beten long God. Em i no ken lusim bilip liklik na i ting olsem, ‘Ating God bai i givim dispela long mi, o nogat?’ Long wanem, man i gat tupela tingting, em i olsem solwara win i sakim na i kirap nabaut. Kain man olsem i no ken ting Bikpela bai i givim wanpela samting long em. Nogat. Tingting bilong dispela man em i bruk nabaut, na long olgeta pasin em i mekim, em i no save bihainim wanpela rot tasol.” (Jems 1:5-8) Sapos wanpela hevi i kamap na i olsem daunim yumi, yumi ken bilip tru long dispela samting: “Ol traim i bin kamap long yupela, ol i no ol narakain traim. Nogat. Ol i wankain olsem ol traim i save kamap long olgeta man. Na God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem. Em bai i mekim yupela i sanap strong, na dispela traim bai i no inap daunim yupela.”—1 Korin 10:13.
18. Sapos yumi bin mekim wanpela bikpela rong na yumi haitim, na dispela i mekim na yumi no strong moa long bihainim dediket yumi bin mekim long God, orait yumi ken mekim wanem?
18 Orait olsem wanem sapos yu bin mekim wanpela bikpela rong na yu haitim na nau bel i gat tok na yu no strong moa long bihainim dediket bilong yu? Sapos yu tanim bel, bel bilong yu bai stap isi taim yu tingim olsem Jehova ‘i no ken givim baksait long man i pilim hevi long sin na i daunim em yet.’ (Song 51:17) Askim ol elda Kristen long helpim yu. Ol bai bihainim pasin bilong Jehova na tingim gut dispela samting yu laik mekim, olsem yu laik kamap wanbel gen wantaim Papa bilong yu long heven. Ol i no ken tingim dispela i olsem liklik samting tasol, nogat. (Song 103:10-14; Jems 5:13-15) Orait taim yu kamap strong gen long ol samting bilong spirit na yu bilip strong, bai yu inap wokabaut long stretpela rot na bihainim tru dediket yu bin mekim long God.—Hibru 12:12, 13.
Bilip Strong na Mekim Yet Wok Bilong God
19, 20. Bilong wanem i bikpela samting long yumi mas wok yet long bihainim dediket bilong yumi?
19 Long dispela taim i gat planti hevi nogut tru long en, yumi mas wok strong long bihainim tru dediket bilong yumi na bilip strong na mekim yet wok bilong God. Jisas i tok: “Ol manmeri i stap strong inap long las de, God bai i kisim bek ol.” (Matyu 24:13) Yumi stap long “taim bilong las de,” olsem na i no longtaim na pinis bai kamap. (2 Timoti 3:1) Na narapela samting, yumi no save bai yumi stap laip long tumora o nogat. (Jems 4:13, 14) Olsem na i bikpela samting long yumi mas bihainim dediket bilong yumi nau long dispela taim!
20 Aposel Pita i kamapim klia dispela samting long namba tu pas bilong em. Em i tok, ol man i givim baksait long God ol i bin bagarap long Bikpela Tait, na olsem tasol, dispela graun, olsem ol man nogut, bai kisim bagarap long “De bilong Bikpela.” Olsem na Pita i tok: “Yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God”! Na em i tok moa: “Ol pren tru, yupela i save pinis long ol dispela samting bai i kamap bihain. Olsem na yupela i mas lukaut gut long yupela yet. Nogut giaman bilong ol man bilong sakim lo em bai i pulim yupela na yupela i no sanap strong moa long bilip.” (2 Pita 3:5-17) Sori tru sapos wanpela i baptais pinis em i lusim tok i tru na em i kisim bagarap, long wanem, em i no bin holimpas strongpela bilip!
21, 22. Olsem wanem tok bilong Song 57:7 i stret long Devit na ol trupela Kristen?
21 Sapos yu wok long tingim dispela taim bilong amamas em yu bin kisim baptais, na yu wok long askim God long helpim yu na bai ol tok na ol pasin yu mekim i ken mekim em i belgut tru, ating dispela bai strongim tingting bilong yu long bihainim tru dediket bilong yu. (Sindaun 27:11) Jehova i no inap lusim ol manmeri bilong em, olsem na yumi mas stap gut long em, a? (Song 94:14) Taim Jehova i pasim wok bilong ol birua na kisim bek Devit, dispela i kamapim klia olsem em i marimari na sori long Devit. Devit i pilim tru dispela, olsem na em i tokaut olsem em i no ken surik liklik long laikim tru dispela Man i bin kisim bek em. Em i singsing olsem: “God, long bel bilong mi, mi bilip strong long yu. Yes, mi bilip olgeta long yu. Na bai mi singim song bilong litimapim nem bilong yu.”—Song 57:7.
22 Olsem Devit, ol trupela Kristen ol i no bin surik long givim bel long God. Ol i bilip strong, na ol i tokaut olsem Jehova em i Man bilong kisim bek na lukautim gut ol, na ol i amamas long mekim ol singsing i litimapim nem bilong em. Sapos long bel yu bilip strong long God na yu wetim em, em bai helpim yu long truim dediket bilong yu. Yes, yu inap stap kain olsem dispela “gutpela man” em man bilong raitim song i bin tok long em olsem: “Sapos em i harim nius bilong ol hevi i kamap, em i no save pret. Em i save bilip strong long Bikpela.” (Song 112:6, 7) Sapos yu bilip long God na wetim em i helpim yu, orait yu inap bihainim tru dediket bilong yu na bilip strong na mekim yet wok bilong Jehova.
Yu Inap Tingim?
• Bilong wanem yumi mas wok yet long kisim stretpela save long ol tok bilong Baibel?
• I gat wanem as na yumi mas tingim dispela taim yumi bin tanim bel na baut?
• Taim yumi tingim dediket na baptais bilong yumi, dispela i save helpim yumi olsem wanem?
• Wanem samting bai helpim yumi long bilip strong na mekim yet wok bilong Jehova
[Ol Piksa long pes 18]
Yu save stap strong long ol samting bilong spirit long rot bilong ritim Tok Bilong God long olgeta de?
[Piksa long pes 18]
Sapos wok Kristen bilong autim tok i stap nambawan bikpela wok bilong yumi, dispela bai helpim yumi long bilip strong na mekim yet wok bilong Jehova