Yu Save Truim Dediket Bilong Yu?

“Olgeta samting yupela i mekim, yupela i mas wok strong na mekim. I no olsem yupela i mekim wok bilong ol man. Nogat. Yupela i mekim wok bilong Bikpela.”​​—⁠KOLOSI 3:​23.

1. Long ol samting bilong dispela graun, wanem insait bilong dispela tok “dediket”?

OLSEM WANEM ol man bilong pilai spot ol inap ran strong tru? Long ol spot olsem tenis, soka, basketbal, golf, na ol narapela spot, ol man i givim bel tru long mekim pilai na ol i no les, ol tasol inap winim ol pilai na stap nambawan. Ol i mas mekim ol samting bilong strongim skin na tingting bilong ol​—⁠dispela i bikpela samting tru. Dispela i stret wantaim wanpela insait bilong dispela tok “dediket,” em i olsem “givim bel olgeta long bihainim wanpela kain tingting o pasin.”

2. Wanem insait bilong dispela tok “dediket” olsem Baibel i toktok long en? Stori long dispela samting.

² Tasol wanem insait bilong dispela tok “dediket” olsem Baibel i toktok long en? Dispela tok “dediket” i kam long wanpela tok Hibru, insait bilong en i olsem “stap narapela kain; stap longwe.”a Long Israel bilong bipo, Hetpris Aron i pasim long laplap bilong het wanpela medal bilong makim olsem “hetpris i man bilong Bikpela tasol,” na ol i wokim dispela medal long gutpela gol na ol i raitim wanpela tok Hibru long en olsem “em [olsem pasin holi] i bilong Bikpela.” Dispela i mas helpim hetpris long tingim olsem em i mas abrusim olgeta samting em inap bagarapim Rum Tambu, long wanem, ‘ol i welim em pinis long dispela wel God i givim ol bilong makim em i kamap hetpris.’​​—⁠Kisim Bek 29:6; 39:30; Wok Pris 21:⁠12.

3. Dediket i mas mekim wanem long pasin bilong yumi?

³ Em nau, dispela i helpim yumi long save olsem dediket em i wanpela bikpela samting. Em i makim olsem long laik bilong yumi yet yumi kamapim klia olsem yumi stap wokman bilong God, na yumi mas bihainim stretpela pasin. Olsem na yumi ken save bilong wanem aposel Pita i kamapim tok bilong Jehova olsem: ‘Yupela i mas i stap holi, long wanem, mi stap holi.’ (1 Pita 1:​15, 16) Yumi Kristen i dediket pinis, yumi gat bikpela wok bilong truim dediket bilong yumi, na stap gut long God i go inap long pinis. Tasol bilong dediket olsem Kristen yumi mas mekim wanem ol samting?​​—⁠Wok Pris 19:2; Matyu 24:⁠13.

4. Yumi mekim wanem samting pastaim, na bihain yumi dediket long God? Dediket i olsem wanem samting?

⁴ Taim yumi kisim pinis stretpela save long God Jehova na ol laik bilong em, na yumi kisim save long Jisas Krais na wok bilong em insait long ol dispela samting God i laik mekim, yumi bin pasim tok long bel long mekim wok bilong God long bel na tingting na strong bilong yumi olgeta. (Mak 8:​34; 12:30; Jon 17:⁠3) Yumi ken tingim dispela samting olsem wanpela strongpela tok promis yumi mekim long God, olsem yumi givim yumi yet long em. Bel bilong yumi i no kirap nating na yumi dediket long God, nogat. Yumi beten na tingting gut, na yumi skelim gut long stretpela tingting. Olsem na yumi no dediket inap liklik taim tasol. Yumi no ken stap olsem wanpela man i kirap long brukim graun bilong wokim gaden na bihain em i lusim dispela wok, long wanem, em i hatwok tumas o taim bilong kamautim kaikai i longwe tumas o em i no save gut olsem bihain bai i gat sampela kaikai bilong kamautim o nogat. Tingim sampela man ol i bin mekim bikpela wok bilong God, olsem “holim stia,” maski wanem wanem hevi i painim ol.​—⁠Luk 9:62; Rom 12:​1, 2.

Ol i No Lusim Dediket Bilong Ol

5. Olsem wanem Jeremaia i gutpela piksa tru olsem wokman bilong God i dediket pinis?

⁵ Jeremaia i autim tok olsem profet long Jerusalem inap 40 yia samting (647-607 B.C.E.), na em i wanpela bikpela wok tru. Em i save long ol samting em i no inap long mekim. (Jeremaia 1:​2-6) Em i mas i gat strongpela bel na pasin bilong sanap strong bambai em i ken autim tok long ol dispela bikhetman Juda long olgeta de. (Jeremaia 18:18; 38:​4-6) Tasol Jeremaia i bilip long God Jehova, na Jehova i strongim em, olsem na em i stap gut olsem wokman bilong God i dediket pinis.​—⁠Jeremaia 1:​18, 19.

6. Aposel Jon i mekim wanem na em i stap olsem gutpela piksa yumi ken bihainim?

⁶ Na yumi ken tingim gutpela aposel Jon, em i stap kalabus long ailan Patmos taim em i lapun pinis, long wanem, em i ‘autim tok bilong God, na em i autim tok olsem em i bilip long Jisas.’ (KTH 1:⁠9) Em i sanap strong na bihainim dediket bilong em olsem Kristen inap 60 yia samting. Em i stap laip yet bihain long taim Jerusalem i bagarap long han bilong ami bilong Rom. Em i kisim gutpela wok bilong raitim wanpela Gutnius, na 3-pela pas, na Buk Kamapim Tok Hait, na long dispela buk em i tok profet long pait bilong Armagedon bai kamap. Olsem wanem? Em i lusim wok bilong em taim em i kisim save olsem Armagedon bai i no inap kamap long taim bilong em yet? Nau em i les long mekim wok? Nogat tru! Jon i stap gut long God i go inap long taim em i dai, long wanem, em i save, maski “taim i laik kamap nau, na ol dispela samting God i tok pinis long mekim, em bai i mekim,” tasol truim bilong dispela tok profet bai kamap long taim bihain.​—⁠KTH 1:3; Daniel 12:⁠4.

Ol i Truim Dediket Bilong Ol Long Nau

7. Wanpela brata i mekim wanem na em i stap gutpela piksa olsem Kristen i dediket pinis?

⁷ Long taim bilong yumi, inap planti tausen Kristen i stap gut long God ol i bin truim dediket bilong ol, maski ol i no stap i go inap long taim bilong lukim Armagedon. Wanpela Kristen olsem em Ernest E. Beavor bilong Inglan. Em i kamap wanpela Witnes long 1939 long kirap bilong Namba Tu Pait, na em i lusim wanpela gutpela wok bisnis bilong wokim ol buk samting bambai em i ken mekim wok bilong autim tok long olgeta de. Em i bihainim ol lo bilong Krais na i no laik insait long ami, olsem na ol i kalabusim em inap 2-pela yia. Meri pikinini i helpim em na sambai long em, na long 1950 ol 3-pela pikinini bilong em ol i go long Wastaua Baibel Skul Bilong Gileat long Nu Yok bilong kisim skul bilong kamap misineri. Brata Beavor i bin givim bel tru long autim tok, olsem na ol pren bilong em i kolim em Armagedon Erni. Em i bihainim gut dediket bilong em, na i go inap long taim em i dai long 1986 em i autim tok olsem pait bilong God, em Armagedon, i klostu pinis. Em i no ting dediket bilong em i olsem wanpela kontrak em i mekim wantaim God inap sotpela taim!b​​—⁠1 Korin 15:⁠58.

8, 9. (a) Long taim bilong gavman Franco long Spen, planti yangpela man i mekim wanem na ol i stap olsem gutpela piksa? (b) I stret yumi kamapim wanem ol askim?

⁸ I gat narapela stori bilong ol manmeri i strong long bihainim dediket bilong ol na ol i stap olsem gutpela piksa, na dispela stori i kam long Spen. Long taim bilong gavman Franco (1939-1975), planti handet yangpela Witnes ol i sanap strong na i no insait long wok bilong ami samting. Planti bilong ol i bin stap inap 10-pela yia samting long ol kalabus bilong ami. Wanpela Witnes, Jesús Martín, em i bin stap long kalabus inap 22 yia olgeta. Taim em i stap long kalabus bilong ami long Not Afrika ol i bin paitim em nogut tru. I hatwok long karim ol dispela hevi, tasol em i no surik na lusim bilip liklik.

⁹ Planti taim ol dispela yangpela man i no save long wanem taim ol inap long lusim kalabus, o ol inap lusim o nogat, long wanem, planti taim kot i makim ol long kalabus. Tasol ol i stap gut long God na ol i wok strong long autim tok taim ol i stap kalabus. Taim ol samting i wok long kamap gutpela liklik long 1973, planti bilong ol dispela Witnes, long dispela taim ol i gat 35 krismas samting, ol i lusim kalabus na kwiktaim ol i kirap mekim wok autim tok long olgeta de​—⁠sampela i kamap painia salim na wasman bilong raun. Ol i truim dediket bilong ol taim ol i stap long kalabus, na klostu olgeta bilong ol i mekim olsem i kam inap long nau.c Olsem wanem long yumi long nau? Yumi stap gut long dediket bilong yumi olsem ol dispela man i stap gut long God?​​—⁠Hibru 10:​32-​34; 13:⁠3.

Stretpela Tingting Long Dediket Bilong Yumi

10. (a) Yumi mas ting olsem wanem long dediket bilong yumi? (b) Jehova i ting olsem wanem long wok bilong em yumi mekim?

¹⁰ Yumi ting olsem wanem long dediket bilong yumi long bihainim laik bilong God? Em i olsem nambawan samting long i stap bilong yumi? Maski yumi gat wanem kain sindaun, o yumi yangpela o lapun, marit o singel, o yumi gat gutpela skin o yumi gat sik, yumi mas wok strong long truim dediket bilong yumi, inap long mak bilong yumi. Sindaun bilong sampela manmeri i givim rot long ol na ol inap mekim wok bilong autim tok long olgeta de olsem painia, o ol i mekim wok volantia long ol brens-ofis bilong Sosaiti Was Taua, o ol i mekim wok misineri, o mekim wok olsem wasman bilong raun. Tasol sampela papamama i gat bikpela wok long lukautim famili bilong ol long ol samting bilong skin na bilong spirit. Olsem wanem? Yu ting Jehova i no tingim tumas ol liklik aua ol i save lusim long wok bilong autim tok long olgeta mun, tasol em i tingim ol planti aua em ol manmeri i autim tok long olgeta de ol i save lusim? Nogat, a? God i no tokim yumi long mekim ol samting yumi no inap mekim. Aposel Pol i tok: “Sapos man i laikim tumas long givim samting, orait God i laikim tumas long kisim. God i save ting long ol samting ol wan wan man ol inap long givim, na em i kisim ol samting ol i givim. Em i no save ting long ol samting man i no gat, na em i skelim pasin bilong en.”​—⁠2 Korin 8:⁠12.

11. Wanem samting inap helpim yumi na God bai kisim bek yumi?

¹¹ Maski yumi inap mekim planti wok o liklik wok, gutpela pasin marimari bilong Jehova long rot bilong Krais Jisas, em Bikpela bilong yumi, i helpim yumi na God bai kisim bek yumi​—⁠i no wok samting yumi mekim. Pol i tokaut stret olsem: “Yumi olgeta man yumi bin mekim sin, na yumi no inap i stap wantaim God . . . Tasol God i marimari long yumi, na long wok Krais Jisas i mekim bilong baim bek yumi, God i save kolim yumi stretpela manmeri. Yumi no kamap stretpela manmeri long wok yumi yet i mekim. Nogat. God i givim nating long yumi long han bilong Krais Jisas.” Tasol wok yumi mekim i kamapim olsem yumi bilip tru long ol tok promis bilong God.​—⁠Rom 3:​23, 24; Jems 2:​17, 18, 24.

12. Bilong wanem yumi no ken skelim skelim wok bilong yumi yet wantaim wok bilong ol narapela?

¹² Yumi no gat wok long skelim wok bilong God yumi mekim wantaim wok ol narapela i mekim, olsem hamas aua yumi kisim, o hamas buk na nius bilong Baibel yumi tilim, o hamas Baibel-stadi yumi mekim. (Galesia 6:​3, 4) Maski hamas aua samting yumi mekim long wok bilong autim tok, yumi olgeta i mas tingim tok bilong Jisas olsem: “Olsem na yupela tu, sapos yupela i mekim pinis olgeta samting olsem God i tokim yupela, orait yupela i mas tok, ‘Mipela i no gutpela wokboi. Samting mipela i mekim, em i wok tasol bilong mipela.’ ” (Luk 17:10) Hamas taim tru yumi inap tok olsem yumi “mekim pinis olgeta samting olsem God i tokim [yumi]” long mekim? Ating i no planti taim, a? Olsem na bikpela askim em olsem: Taim yumi mekim wok bilong God, yumi mas mekim olsem wanem?​—⁠2 Korin 10:​17, 18.

Mekim Gut Wok Long Olgeta De

13. Yumi mas i gat wanem kain tingting taim yumi mekim ol wok bilong truim dediket bilong yumi?

¹³ Pol i givim pinis tok long ol meri marit, man marit, pikinini, papamama, wokboi, na nau em i tok: “Olgeta samting yupela i mekim, yupela i mas wok strong na mekim. I no olsem yupela i mekim wok bilong ol man. Nogat. Yupela i mekim wok bilong Bikpela. Yupela i save, bihain Bikpela bai i givim pe long yupela, em ol dispela gutpela samting em i makim pinis bilong ol manmeri bilong en. Tingim. Yupela i stap ol wokboi bilong Krais, na em tasol em i Bosman tru bilong yupela.” (Kolosi 3:​23, 24) Yumi no mekim wok bilong Jehova bambai ol man i givim biknem long yumi, nogat. Yumi laik bihainim pasin bilong Jisas Krais na mekim wok bilong God. Insait long ol yia em i mekim wok bilong God, long olgeta taim em i ting olsem taim i sot pinis.​—⁠1 Pita 2:⁠21.

14. Pita i givim wanem tok lukaut long taim bilong las de?

¹⁴ Aposel Pita tu i kamapim olsem em i ting taim i sot pinis. Long namba tu pas bilong em, em i givim tok lukaut olsem long taim bilong las de ol man bai i tok bilas​—⁠em ol man i bikhet na givim baksait long bilip tru na ol man i gat tupela tingting​—⁠na long laik bilong ol yet ol bai kamapim sampela askim long pasin bilong Krais long kam bek i stap. Tasol Pita i tok: “Bikpela i no save wok isi isi long kamapim samting em i bin promis long mekim, olsem sampela man i save tok. Nogat. Tasol em i no laik bai wanpela man i lus. Em i laik bai olgeta man i mas tanim bel, olsem na em i isi long yupela na em i wet i stap yet. Tasol De bilong Bikpela bai i kamap wantu tasol olsem ol stilman i save kam.” Tru tumas, de bilong Jehova bai kamap tru. Olsem na long olgeta de yumi mas tingim bilip bilong yumi, olsem yumi bilip strong long tok promis bilong God, o nogat?​—⁠2 Pita 3:​3, 4, 9, 10.

15. Olsem wanem yumi ken tingim olgeta wan wan de long i stap bilong yumi?

¹⁵ Bilong truim dediket bilong yumi long pasin olsem yumi givim bel tru long mekim, long olgeta de yumi mas litimapim nem bilong Jehova. Olsem wanem? Long pinis bilong olgeta wan wan de, yumi ken tingting bek long dispela de na ting olsem yumi bin helpim wok bilong mekim nem bilong God i stap holi na wok bilong autim gutnius bilong Kingdom? Ating yumi bin mekim olsem long rot bilong stretpela pasin bilong yumi, o yumi bin mekim sampela tok bilong strongim ol narapela, o yumi bin tingim tru famili na ol pren bilong yumi? Taim rot i op yumi bin tokim ol narapela long gutpela samting yumi ol Kristen i wet long en? Yumi bin helpim wanpela man long tingting strong long ol tok promis bilong God? Gutpela yumi mekim sampela gutpela samting bilong spirit long olgeta wan wan de​—⁠long tok piksa i olsem long ol samting bilong spirit yumi wok long putim hap mani long pasbuk bilong yumi.​​—⁠Matyu 6:​20; 1 Pita 2:​12; 3:​15; Jems 3:​13.

Tingting Gut

16. Long wanem ol rot Satan i laik kirapim yumi na yumi no tingim strong dediket bilong yumi?

¹⁶ Yumi stap long taim i hatwok tru long ol Kristen long stap gut long God. Satan na lain bilong em ol i wok strong long paulim tingting bilong ol man na ol i no save gut wanem pasin i stret na wanem pasin i no stret, na wanem pasin i klin na wanem pasin i doti. (Rom 1:​24-​28; 16:​17-​19) Satan i mekim na i no hatwok liklik long yumi mekim bel na tingting bilong yumi i kamap doti long rot bilong televisen o Intenet. Long ol samting bilong spirit i olsem ai bilong yumi i no lukim klia ol samting, olsem na yumi no inap pilim ol pasin trik bilong em. Yumi bin tingting strong long truim dediket bilong yumi, tasol sapos yumi no strong moa long bihainim ol stretpela lo bilong God em yumi bin ting ol i bikpela samting tru, dispela inap mekim na yumi surik long bihainim dediket bilong yumi.​​—⁠Luk 9:​62; Filipai 4:⁠8.

17. Olsem wanem tok bilong Pol inap helpim yumi long holim strong pasin bilong pas gut wantaim God?

¹⁷ Olsem na tok bilong Pol long kongrigesen bilong Tesalonaika i stret long taim bilong yumi, olsem: “Laik bilong God em i olsem. Yupela i mas givim laip bilong yupela olgeta long em na kamap holi. Olsem na yupela i mas abrusim olgeta kain pasin pamuk. Yupela i mas bosim ol laik na tingting nogut i save kamap long bel bilong yupela, bai yupela i bihainim ol gutpela pasin na ol pasin God i laikim. Nogut ol dispela laik na tingting nogut i pulim yupela na yupela i go mekim olkain pasin pamuk olsem ol haiden i no save long God ol i save mekim.” (1 Tesalonaika 4:​3-5) Sampela i mekim pasin pamuk na ol i bin rausim ol long kongrigesen Kristen​—⁠em ol manmeri i no bin tingim gut dediket bilong ol long God. Ol i no pas gut moa wantaim God, olsem na em i no bikpela samting moa long i stap bilong ol. Tasol Pol i tok: “God i no singautim yumi bilong bihainim pasin i doti. Nogat tru. Em i singautim yumi bilong givim laip bilong yumi long em na bihainim pasin i holi. Olsem na man i sakim dispela tok, em i no sakim tok bilong ol man tasol. Nogat. Em i sakim tok bilong God, em God i save givim Holi Spirit bilong en long yupela.”​—⁠1 Tesalonaika 4:​7, 8.

Yu Tingting Strong Long Mekim Wanem?

18. Yumi mas tingting strong long mekim wanem?

¹⁸ Sapos yumi pilim tru dediket bilong yumi long God Jehova, yumi mas tingting strong long mekim wanem? Yumi mas tingting strong long i stap stret long ol pasin bilong yumi na long wok bilong yumi long autim tok. Pita i tok: “Oltaim yupela i mas i stap stret long ai bilong God. Olsem na sapos ol i tok nogut na tok bilas long yupela, orait ol man i save mekim dispela tok bilas long gutpela pasin yupela i mekim bilong bihainim Krais, ol bai i sem long dispela tok ol i bin mekim.” (1 Pita 3:16) Ating yumi bai karim pen na ol man bai mekim nogut long yumi, long wanem, yumi bihainim stretpela pasin Kristen, tasol Krais tu i bin karim pen na hevi, long wanem, em i bilip long God na stap gut long em. Pita i tok: “Krais i bin karim pen long bodi bilong em, na yupela i mas holim strong wankain tingting olsem em i bin holim. Long wanem, sapos wanpela man i bin karim pen long bodi bilong em, orait em i lusim pinis pasin bilong sin.”​—⁠1 Pita 4:⁠1.

19. Yumi laik bai ol narapela i ken tok wanem long yumi?

¹⁹ Tru tumas, sapos yumi tingting strong long truim dediket bilong yumi, dispela bai lukautim yumi na yumi no ken go insait long ol bilaspasin na amamas bilong dispela graun bilong Satan i gat sik long ol samting bilong spirit na skin, na ol i paul long ol samting bilong stretpela pasin. Na em bai helpim yumi long sampela samting moa. Bai yumi bilip strong tru olsem God i orait long yumi, na dispela i gutpela moa, winim olgeta samting Satan na lain bilong em inap givim long yumi. Olsem na yumi no laik bai wanpela i ken tok yumi bin lusim pasin bilong laikim tru Jehova olsem bilong pastaim, long taim yumi bin kisim tok i tru nupela. Tasol yumi laik bai ol i ken tok long yumi olsem ol i bin tok long kongrigesen bilong Taiataira long taim bilong ol aposel, olsem: “Mi save pinis long olgeta pasin yu save mekim. Mi save, yu laikim tru ol manmeri, na yu bilip long mi, na yu save mekim olkain wok bilong helpim ol arapela. Mi save, yu sanap strong long olgeta hevi i kamap long yu. Mi save, ol pasin yu bin mekim bipo, ol i gutpela, na nau ol pasin bilong yu i kamap gutpela moa yet.” (KTH 2:​4, 18, 19) Tru tumas, yumi no laik slek long ol samting bilong dediket bilong yumi. Yumi laik “larim Holi Spirit i kirapim [yumi]” long wok strong i go inap long pinis​—⁠na pinis i stap klostu.​​—⁠Rom 12:11; KTH 3:​15, 16.

[Ol Futnot]

Yu Inap Tingim?

• Yumi mas mekim wanem ol samting bilong truim dediket bilong yumi?

• Long bipo na long nau wanem sampela wokman i dediket long God ol i stap olsem gutpela piksa yumi ken bihainim?

• Yumi mas ting olsem wanem long wok bilong God yumi mekim?

• Yumi mas tingting strong long mekim wanem long dediket bilong yumi?

[Piksa long pes 15]

Jeremaia i stap gut long God, maski ol i mekim nogut tru long em

[Piksa long pes 16]

Ernest Beavor i givim bel tru long mekim wok Kristen na long dispela rot em i stap olsem gutpela piksa tru long ol pikinini bilong em

[Piksa long pes 17]

Planti handet yangpela Witnes long ol haus kalabus long Spen ol i stap gut long God

[Ol Piksa long pes 18]

Long olgeta wan wan de yumi mas mekim sampela gutpela wok bilong spirit